Yorhaq 12
12
Yeqsur-anr Tsir Yawsaw Shaevdav-euq
Mt 26:6-13; Mk 14:3-9
1Baqsaqkaq yawbui bui-eu maq keuvlar-aer kof nan dzer ngae, Yeqsur, Laqzaqlur jawr-eu Beqtaqnir pu-anr lekeuv-euq mae. Laqzaqlur heughaq-aq, Yeqsur nae shir-euq gar nae bi ghofdaef lar-euq khoerghaq mae. 2Khoergar, aqcawq, Yeqsur-euq gharduq hawqbyawr lavdawv naeq-euq mae. Maqta-aq, aqjax mr-awr, Laqzaqlur-aq, Yeqsur naeq-aer hawqjawq jawqluf-eu deuq-euq lafkhoer keuq-eu mae. 3Khoerngae, Maqliv-aq, naqdur laer kur-eu zawr poeq-eu tsir yawsaw smq kar yur-awr, Yeqsur-euq aqkuir-anr shaevlaef naeq-euq mae. Khoernar-aq, aqyawf-euq uqduq-euq tsaerkanr nae Yeqsur-euq aqkuir-anr sivshawr-euq mae. Tsir yawsaw khoer, nymr nymrlan-aer sawkheufni jav-eu mae.
4Yeqsur-anr anqdzaq-eu laer ghae-eu aqyawf-euq zaqlanr pyeuf-eu Sirmoq-euq zaqyo, Yurdav Irsaqgaqliqoq khoerghaq aer-eu, 5“Tsir yawsaw teu deqnaqlir#12:5 Deqnaqlir Heudawq-aq, Heqlaqsar-euq dawq mae. Yaerbof-euq aryamq-euq lafkhoer, deqnaqlir 1 byav-aq, tiq ghaq nae tiq nan mr-euq ghaqgarpoeq mae. 300 byav-anr nae anq-awr, shaqzaq zanqzaq deuq-anr aqjeq mirnae maq bifnaeq-eu le?”
6Aqyawf khoerlof-aer aer-eu-aq, shaqzaq zanqzaq deuq-anr sharnoeq-awr aer-eu maqngeur-eu, smrkhoeq pyeuf-eu mirnae aer-eu mae. Aqyawf pyur pawqbaev jeqhmq-eu ghaq pyeuf-awr, khoer-euq lafkhoer anr-eu pyur khoeqluf-eu mae.
7Khoerngae, Yeqsur heulof-aer aernaeq-euq mae, “Aqyawf-euq navni bijav-awq. Ngaq-anr bafpanq-eu arnan-euq gharduq, aqyawf tsir yawsaw heu jeqhmq taq-euq mae. 8Aqjeq mirnae aernar-aq, shaqzaq zanqzaq deuq aqmyanluf nawmaf naeq-aer jawr-eu mae. Aerkhawf, ngar, nawmaf naeq-aer aqmyanluf jawr-eu maqngeur.”
Laqzaqlur-anr Saef Ma Laer Bawqtsaev-euq
9Yeqsur khoergar jawrluf-eu mae laer Yurdav tsawrhaq armaf mafma yasiq ngae, khoergar le-euq mae. Yeqsur-anr mawrmawf-eu mirnae taef-aer maqngeur-eu, shir-euq gar nae Yeqsur nae bi ghofdaef lar-euq Laqzaqlur-anr khawf mawrmawf-eu mirnae le-euq mae. 10Khoerngae, pirma aqyuif deuq, Laqzaqlur-anr khawf saef ma laer bawqtsaev taq-euq mae. 11Aqjeq mirnae aernar-aq, Yurdav tsawrhaq ghawqmya’ni Laqzaqlur baqda’nae aqyawf maf-euq armur-anr nae dov-ir-awr, Yeqsur-anr jan-ir-euq mae.
Yeqsur, Yeqlursaqlaeq-anr Urler-euq
Mt 21:1-11; Mk 11:1-11; Lk 19:28-40
12Nishawq ngae nan, Yeqsur, Yeqlursaqlaeq-anr oeluf-eu garkawv, yawbui bui-eu gar lartaq-euq tsawrhaq armaf mafma yagaq-euq mae. 13Khoermirnae, aqyawfmaf daor uqpyaq baf-awr, Yeqsur-anr halaq-ir-eu laer dov-ir-awr gur-eu,
“ Hosa’na ! Sanqpaq Miqyaer-euq tsawrmyanr-euq uqmov oeluf-eu ghaq pyeuf-eu, Irsaqleqlav tsawrhaq-euq Sanqpaq guiqlanqhuiq luf-ur!” (Jc 118:25-26)
14Khoerngae, Yeqsur, manq tanqlavzaq tiq mawr-anr mawr-awr dziq-euq mae. Yaerbof-euq lafkhoer boftaq-euq lof-aer:
15 “Ziroq-euq zaqmiq-or! Taqguv.
Hawsher-eq, nawq-euq Sanqpaq, manq tanqlavzaq dziq-awr oeluf-eu mae.” (Zkl 9:9)
16Yawbae ngae-aq, aqyawf-euq zaqlanr deuq garkawv khoer-anr maq ghovshaw nya-a. Yeqsur yawshaef khanqsaer zaghaq-awr nae taef-aer, aqyawf-euq garkawv khoerlof-aer boftaq-euq gar hawr-eu aqcawq, aqyawf-anr khoerlof-aer janrnaeq-euq garkawv, aqyawf maf-anr noeqdov ler-euq mae.
17Yeqsur, Laqzaqlur-anr shir-euq gar nae bi ghofdaef lar-awr, lmqbymr-anr nae kurdov ngae, Yeqsur naeq-aer khoergar jawr-eu tsawrhaq armaf khoerdeuq, garkawv khoer sarkir kamqluf-eu mae. 18Yeqsur bisiq bimawr-eu jeq mr-euq garkawv, tsawrhaq armaf deuq yagaq-euq mirnae, aqyawf-anr ha-ir-euq mae. 19Khoermirnae, Paqliqsaer deuq, aqyawf maf-euq yawkaq aer-eu, “Nawmaf tiqjeq-iq maq mrpyeufnya nga. Hawsher-eq. Mirtsaqzaq dawqtawvluf, aqyawf-euq maeqnan cantae jir-euq ngar-a.”
Heqlaqsar Tsawrhaq, Yeqsur-anr Pov-eu
20Yawbui bui-eu gar uqduqtanq lar-euq tsawrhaq deuq-euq lafkhoer, Heqlaqsar tsawrhaq tiqdeuqnav khawf keuq-eu mae. 21Khoerngae, aqyawfmaf, Gaqliqlaer mirkhanq-anr jav-eu Baeqdzerdaq-anr nae oe-euq Pirlirpuv jawr-eu gar oe-awr shar-eu, “Saqlaq-or! Nga’maf, Yeqsur-anr mawrmawf nya.”
22Pirlirpuv, Aqdaeqlaeq-anr aernaeq-ir-awr, Aqdaeqlaeq hawr-eu Pirlirpuv, Yeqsur-anr aernaeq-ir-euq mae. 23Khoerngae, Yeqsur, aqyawf nyaf-anr heulof-aer aerkhof naeq-euq mae, “Tsawrhaq-euq Zaqyo yawshaef khanqsaer za-eu aryamq keuvlar-euq mae. 24Ngar, nawmaf-anr aqdirma-aer aernaeq nyar, caer siqyoeq tiq nuiv mirtsaq-anr maqga-ir-aer maqshir nar-aq, siqyoeq khoer tiq nuiv taef mae. Aerkhawf, shir nar-aq, caersiq ghawqmya’ni tsofle-eu mae. 25Yawqha-euq daefzir-anr gaq-eu tsawrhaq-aq, daefzir yasmq taef-a. Mirtsaq-euq khoertav daef ngae, yawqha-euq daefzir-anr byae-eu tsawrhaq-aq, mqmaq maqbyav yarzir daef-eu gharduq jeqhmqnya taef-a. 26Tsawrhaq tiqghaqnav ngaq-euq kuirlaf zaqkhav geufmawf nar-aq, ngaq-euq maeqnan ya cantae-eu mae. Ngar aqgeugar jawr nar-aq, ngaq-euq kuirlaf zaqkhav khawf khoergar yajawr-eu mae. Tsawrhaq tiqghaqnav ngaq-euq kuirlaf zaqkhav geuf nar-aq, ngaqDa, aqyawf-anr taqhuiq taqmanrnaeq taef-a.”
Tsawrhaq-euq Zaqyo Yabi Ciqgor-eu
27“Nymq-mr ngaq-euq nuima saflar tiqpawf-iq maq sarnya. Ngar aqjox-aer aer-eu tsaq-eu la? ‘Aqda-or! Aryamq heu-anr nae ngaq-anr bibuq-ir naeqlaf-awq’ laer ya’aer-eu la laq? Aerkhawf, ngar-aq, arpyar heu jav-awr oe-euq ma. 28Aqda-or! Nawq-euq tsawrmyanr yawshaef khanqsaer za’ni mr-awq.”
Khoerngae, mq-anr nae tersar ngaeqdov lef-eu, “Ngar, ngaq-euq tsawrmyanr yawshaef khanqsaer za’ni mrghaq-awr, yawshaef khanqsaer za’ni parmr le siq.”
29Khoergar yawfluf-eu tsawrhaq armaf deuq, tersar khoer-anr yagaq ngae, mqjeq jeq-eu tersar nya laer aer-awr, tiqpavnav deuq aer-eu, “Mqtav ghaqkhaer, aqyawf-anr dawq ngaeqcawq-eu nya.”
30Yeqsur heulof-aer aerkhof naeq-euq mae; “Tersar khoer-aq, ngaq-euq gharduq maqngeur-a, nawmaf-euq gharduq mae. 31Nymq-mr mirtsaq heu-anr yarkhaq dar-eu aryamq tsaqlar-euq mae. Nymq-mr mirtsaq heu-anr uvlanr luf-eu ghaq yabi taedov taef-a. 32Mirtsaq-anr nae ngaq-anr ciqgor ngae, ngar, tsawrhaq dawqtawv luf-anr ngar jawr-eu gar gheu’ur laf ma.”
33Yeqsur khoerlof-aer aer-eu-aq, aqyawf aqjox-aer yashir-eu garkawv toeqmaeq naeq-eu mae.
34Khoerngae, tsawrhaq armaf deuq, aqyawf-anr aerkhof naeq-eu, “Kali-aq, mqmaq maqbyav yarzir daef-eu mae laer zanrdawq-euq lafkhoer nga’maf yagaq-euq ma. Aqjeq mirnae nawr, ‘Tsawrhaq-euq Zaqyo yabi ciqgor-eu mae’ laer aer-eu le? Tsawrhaq-euq Zaqyo khoerghaq aqsur ghaq la?”
35Yeqsur, aqyawf maf-anr heulof-aer aernaeq-euq mae, “Nawmaf jawr-eu gar yawshaef tiqkhaeq bya-a siq. Yawzanr nawmaf-anr maqbi taemini, yawshaef bya ngae can-awq. Yawzanr-euq lafkhoer can-eu tsawrhaq-aq, aqyawf aqgeugar irluf-eu le laer maq siqnya-a. 36Nawmaf jawr-eu gar yawshaef byaluf ngae, nawmaf yawshaef-euq zaq pyeuflarni yawshaef-anr jan-awq.” Yeqsur dawq heudeuq ngaeqghaq ngae, aqyawfmaf jawr-eu gar nae dov-ir-awr yawzaf zaf-aer jawr-ir-euq mae.
Yurdav Tsawrhaq Maqjan-eu
37Yeqsur, aqyawf maf-euq maeqshi bisiq bimawr-eu jeq ghawqmya’ni janrmaeq-euq khawf, aqyawfmaf, aqyawf-anr maqjan-a. 38Khoerlof-aer pyeuflar-euq-aq, Miqyaer gharduq ngaeqdan-eu Irsaqyar nae aertaq-euq dawq heudawq byanlar-euq mae. Aqyawf aer-eu,
“Sanqpaq Miqyaer-or! Nga’maf-euq dawqdzawr-anr aqsur ghaq jan-eu la?
Sanqpaq Miqyaer-euq baoq aqsur ghaq-anr panmaeq naeq-eu la?” (Isy 53:1)
39Aqyawfmaf maq jancoer-eu khoer-aq, Irsaqyar heulof-aer par aertaq-euq mae,
40 “Aqyawfmaf, myavnuiv maqya mawr-aer,
Nuima-euq lafkhoer maqya ghovshaw-eu uqtaf, nuima maqya parlar-aer,
Ngar, aqyawf maf-anr ya lavtaqni,
Miqyaer, aqyawf maf-euq myavnuiv bibaef-ir-awr, aqyawf maf-euq nuima bighanr lar-euq mae.” (Isy 6:10)
41Irsaqyar, Kali-euq yawshaef khanqsaer-anr ya’mawr-awr ya’ngaeq-euq mirnae, aqyawf-euq garkawv khoerlof-aer aer-eu mae. 42Khoerlof-aer khawf, uvlanr-eu deuq-euq lafkhoer, ghawqmya ghaq Yeqsur-anr janlar-euq mae. Aerkhawf, Paqliqsaer deuq-anr guv-eu mirnae, Aqyawfmaf, aqyawf-euq garkawv maq aerdov-a. Aqjeq mirnae aernar-aq, zanrdawq khawqnymr-anr nae taedov lar-eu gar guv-eu mae. 43Aqyawfmaf, Miqyaer nae jaceuq-eu gar geufmawf-eu navmaqtser, tsawrhaqzaq nae jaceuq-eu gar geufmawf-eu mae.
Yeqsur-euq Dawq Nae Yarkhaq Dar-eu
44Khoerngae, Yeqsur tersar yawkhav-aer heulof-aer aer-eu mae: “Ngaq-anr jan-eu tsawrhaq-aq, ngaq-anr jan-eu maqngeur-a. Ngaq-anr khaerghae lef-euq ghaq-anr jan-eu mae. 45Ngaq-anr mawr-euq tsawrhaq-aq, ngaq-anr khaerghae lef-euq ghaq-anr mawr-euq mae. 46Ngaq-anr kharjan-eu tsawrhaq yawzanr-euq lafkhoer maqya jawrni, ngar yawshaef lof-aer mirtsaq-euq khoertav oe-euq ma.
47Ngaq-euq dawq gaq-euq khawf, maqjan-eu tsawrhaq-anr ngar yarkhaq maqdar. Aqjeq mirnae aernar-aq, ngar, mirtsaqzaq-anr yarkhaq darle-euq maqngeur, mirtsaqzaq-anr bibuq-ir-eu gharduq oe-euq ma. 48Ngaq-anr byaerdzae-awr, ngaq-euq dawq-anr maq hageuf-eu tsawrhaq-anr yarkhaq dar-eu jeq jav-eu mae. Ngaq nae ngaeq-euq dawqdeuq-aq, arsaqsaq ngae nan aqyawf-anr yarkhaqdar taef-a. 49Aqjeq mirnae aernar-aq, ngar, ngaq-euq aryaq nae tiqjeq-iq maqngaeq-aq. Ngaq-anr khaerghae lef-euq Aqda-aq, ngar aqjeq ya’ngaeq-awr ngar aqjeq yatmr-eu la laer aqyawf, ngaq-anr dawq biflaf-euq mae. 50Aqyawf nae biflaf-euq dawq-aq, mqmaq maqbyav yarzir daef-eu jeq pyeuf-eu mae laer ngar siqnya ma. Khoermirnae, ngar kharngaeq-eu deuq-aq, Aqda nae ngaq-anr aernaeq laf-euq lof-aer ngar ngaeq-eu ma.”
Voafantina amin'izao fotoana izao:
Yorhaq 12: AKA
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
2018 ©
Bibles International ®
The Bible Society of Baptist Mid-Missions
