Lukə̀ 21

Nkabə̀ nchàʼtə Nẅùə̀ nkwùə mə̀ngyə̌

(Mrk 12.41-44)

1Yěsû à lə̀ pə a Ndâ Mɨ̀shwàʼà Nẅùə̀ mbə̀ʼkə̀ àtwuə̀ e ndzəənə̀ tsaʼnə ngàŋə nkabə̀ lə̀ mənə ntô nchyâ nkabə̀ amwuə àkaŋə̀ nchàʼtə Nẅùə̀. 2À lə̀ kɨ ndzəənə̀ a nkwùə mə̀ngyə̌ ɨ̀tse nɨ à lə̀ pənə ngàŋə̀ àfumə̀, a làŋə̀ nchyâ nkabə̀ ɨpaa. 3Yěsû shwəŋə̀ lo, “Ǹshwəŋə̀ tyìʼə̀ nkǔŋə nkuŋə ambo pɨghə lo nkwùə mə̀ngyə̌ wə̀, nɨ̀ à pənə ngàŋə̀ àfumə̀ à chyâ nkabə̀ ntsàarə̀ a ŋwùə̀ ntsùmə̀. 4Mbə̀ʼnə pobə fuukə̀nə la a mɨlyiʼə amwuə nkabə̀ yɨ̀noʼnə nɨ ɨ̀ pənə ambo pobə mmàʼà amwuə àkaŋə̀ Nẅùə̀. La mə̀ngyə̌ wə̀ nɨ à pənə ngàŋə̀ àfumə̀ à shwatə̀ la nkabə̀ e ntsùmə̀ ntô màʼà amwuə àkaŋə̀ nchàʼtə Nẅùə̀.”

Yěsû a shwəŋnə̀ mbə̀ʼə nɨ̀shàʼtə̀ Ndâ Mɨ̀shwàʼà Nẅùə̀

(Mat 24.1-2; Mrk 13.1-2)

5Pɨ̀tse ɨ̀zùŋə̀ ndzùmə̀ ɨ̀pe lə̀ mə nshwəŋnə̀ mbə̀ʼə ndwuumə̀ nɨ pɨ lə̀ korə̀nə Ndâ Mɨ̀shwàʼà Nẅùə̀ nɨ ngotə mɨ̀ghòorə mɨ̀shìʼnə̀; nkɨ nchi mmə nshwəŋnə̀ mbə̀ʼə ɨ̀pwuumə̀ nɨ pɨ lə̀ ŋânə ambo Nẅùə̀. La Yěsû a shwəŋə̀ lo, 6“Ɨ̀pwuumə̀ pèrə pə̀ ɨ̀tsùmə̀ nɨ nɨ̀ zəənə̀ lə, nkwùə̀ ɨ̀tse ghǎ tô nɨ ka tyìʼə̀ taʼà nɨ̀ghòorə a pə ghǎ nwuunə̀ e àtwuə̀ tsɨ̀tse. Pɨ ghǎ shàʼtə̀ tyìʼə̀ àzwuumə̀ àtsùmə̀.”

Tsaʼnə pɨ ghǎ nyàŋə̀ pə̀ənə̀ a ndẅùutə àtwuə̀ ɨ̀shyə̂

(Mat 24.3-14; Mrk 13.3-14)

7Ɨ̀zùŋə̀ ndzùmə̀ ɨ̀pe pyiitə̀ e lo, “Ɨ̀nèrə̀, mɨ̀nwùə̀ mèrə mə ghǎ lòo alyiʼə la nkwùə̀ àkə? Àlènə̀ nɨ a ghǎ nèrə̀ lo mɨ̀nwùə̀ mèrə mə mə ntô la àkə?”

8A shwəŋə̀ ambo pobə lo, “Nɨ̀ zhìʼtə̀ a wɨghə, kò nɨ̀ myàʼtə̀ lo ŋònə̀ ɨ̀tse â fɨ̀ghə̀ a wɨghə; ntiinə pànə̀ pɨ̀noʼnə ghǎ tô aŋunə nɨ̀linə̀ ɨ̀tsâ mmə shwəŋə̀ lo, ‘Mɨ̀ŋə̀ lə ze, nkwùə̀ ɨ̀ paatə̀.’ Kò nɨ̀ zùŋə̀ a wɨghə a ghobə. 9Nɨ̀ tə ndzuʼù lo pɨ pə mmàʼà ntsòo, kə̀ mmə ndzòŋnə̀ mɨ̀làʼà, kò nɨ̀ pô a wɨghə àkẅàrə̀. Ntiinə mɨ̀nwùə̀ mèrə mə chyə̂ a nɨ pyə̀ nfurə̀; la ka ndẅùutə a pə ghǎ zùŋə̀ pə e la nkwùə̀ ghu.”

10Yěsû a làŋə̀ nɨ mbyə̀ nshwəŋə̀ ambo pobə lo, “Ɨ̀laʼà ghǎ màʼà ntsòo ghobə pɨ̀tse ɨ̀laʼà, ɨ̀laʼà nɨ pənə a ɨ̀sùmə pɨ̀fò zòŋnə̀ pɨ̀tse. 11Ɨ̀shyə̂ ghǎ nə̀ʼnə̀ nɨ ɨ̀tɨ̀ŋnə̀ a alyiʼə alyiʼə, ndzàŋə̀ ɨ̂ kwuunə̀ amwuə ɨ̀laʼà, ɨghoonə nɨ mbə̀ʼə pèrə zhwuutə̀ pə̀ənə̀ pə a alyiʼə alyiʼə, mɨ̀nwùə̀ nɨ mbə̀ʼə mɨ ŋâ àkẅàrə̀ pobə ɨ̀lènə̀ mɨ̀nwùə̀ pɨ̀ẅùunə furə̀ a nɨ̀pwuurə̀. 12Ɨ̀nwùə̀ pèrə pə ɨ̀tsùmə̀ ghǎ kɨ furə̀ pɨ kootə̀ a wɨghə nkɨ nnyàŋə̀ a wɨghə. Pɨ ghǎ kootə̀ a wɨghə ŋŋâ amwuə mɨ̀ndâ mɨ ɨ̀shwatə̀ pɨ̀Jew, pɨ̀ tsoʼtə̀ mɨ̀sàʼa ɨ̀mɨghə, nkɨ nchyâ a wɨghə amwuə ndâ ɨ̀tsaŋə̀. Pɨ ghǎ lòo a wɨghə lèrə̀ a mbyə̀ pɨ̀fò pobə ɨ̀twuə̀ ɨ̀laʼà mbə̀ʼə nɨ̀linə̀ ɨ̀tsâ. 13Zèrə zə̀ ànwùə̀ a ghǎ ŋâ a wɨghə nɨ ɨ̀sàanə̀ nɨ̀ chwìitə̀ ntwuumə̀ ghù ɨ̀shìʼnə̀ wa mbə̀ʼə Yěsû. 14Nkwùə̀ nɨ a tônə mbə a lenə, kò mɨ̀ntɨŋmə̀ ɨ̀mɨghə nə̀ʼnə̀ e lo nɨ̌ tyiʼə̀ mə kwàŋə̀ lo nɨ̌ kẅùə̀ lo àkə lo; 15ntiinə ngǎ ŋâ àshwəŋnə̀ pobə àzhìʼtə̀ ambo pɨghə, amwuə ndwuumə̀ nɨ mbə̀ʼə ngàŋə̀ kɨpaanə ɨ̀zɨghə tànkə̀ e nkɨ ntwuunə̀ e apə̀. 16Tyìʼə̀ pɨ̀tǎ nɨ pɨ̀mǎ ɨ̀pɨghə, nɨ pɨ̀momaa ɨ̀pɨghə, nɨ ngẅàrə̀ ɨzɨghə pobə pɨ̀swùə ɨ̀pɨghə ghǎ shwùunə̀ a wɨghə. Pɨ ghǎ kootə̀ a wɨghə ŋŋâ a wɨghə pɨ̀tse lo pɨ̀ zhwuutə̀. 17Pànə̀ pɨ̀tsùmə̀ ghǎ pàanə̀ a wɨghə ntii mə̀. 18La mbə̀ʼə taʼà ɨ̀nyùŋə̀ àtwuə̀ ŋwùə̀ ɨwɨghə ɨ̀tse a pî e apə̀. 19Nɨ̀ tə ngẅìimə̀ ntɨŋmə̀, yi nɨ̌ zɨghə̀ a nɨ̀chwarə̀.”

Yěsû a shwəŋə̀ amwuə ndwuumə̀ nɨ pɨ ghǎ ntsə̀ŋə̀ àlaʼà Yèrusalèmə̀

(Mat 24.15-21; Mrk 13.14-19)

20“Nkwùə̀ nɨ nɨ̀ zəənə̀nə pɨ̀soyì pɨ kamnə̀ a Yèrusalèmə̀, nɨ̀ zhyə̂ lo nkwùə̀ nɨ̀tsə̀ŋə̀ a ẅèrə ɨ̀ paatə̀ mə. 21Amwuə nkwùə̀ ghu pànə̀ pa nɨ pɨ pənə amwuə àlaʼà Judyà la pobə̂ kɨ̀ɨrə̀ nkoʼò lèrə̀ àtwuə̀ mɨ̀mbarə̀, pyə̀ nɨ pɨ kɨnə mbə amwuə mbòmpə àlaʼà ngẅùunə pobə̂ furə̀, pyə̀ nɨ pɨ pənə a tɨ̀tɨ̀rə̀ àlaʼà kò pobə chi nkwuunə̀ amwuə mbòmpə àlaʼà; 22ntiinə mɨ̀njyə̂ mèrə mə̀ ghǎ pə la amwuə nkwùə̀ nɨ Nẅùə̀ a ghǎ tə̂ ngəʼə̀ àtwuə̀ pə̀ənə̀ ɨ̀pe, a nɨ ghɨ̀rə̀ ànwùə̀ àtsùmə̀ a koʼò mbwùumə̀ tsaʼa pɨ lə̀ ŋwàʼnə̀nə amwuə àŋwàʼnə̀ Nẅùə̀ la. 23Ngəʼə̀ noʼnə ambo pə̀ngyə̌ pɨ̀sùŋə̀nə pobə pɨ̀məpwùrə̀ pyə̀ nɨ pobə ghǎ nyoŋə̀ ɨ̀poonə̀ amwuə njyə̂ ghu! Ntiinə ngəʼə̀ noʼnə ɨ̀ ghǎ pə amwuə àtwuə̀ ɨ̀shyə̂ ghə̀, Nẅùə̀ â nèrə̀ àzaŋə̀ loŋə e ambo pànə̀ pèrə pə̀. 24Pɨ ghǎ zhwuutə̀ pànə̀ pɨ̀noʼnə nɨ mɨnẅuə ntsòo, kootə̀ pɨ̀tse tsaʼa ɨ̀pùʼù ntsòo lèrə̀ nɨ pèrə amwuə ɨ̀twuumə̀ ɨ̀twuumə̀. Pànə̀ nɨ ka pobə pə ghobə pɨ̀Jew ghǎ kwuunə̀ a Yèrusalèmə̀ nyìimə̀ pànə̀ pə a ɨ̀sùmə pobə lo pobə fàʼà tə mbyàa nkwùə̀ nɨ pànə̀ nɨ ka pobə pə ghobə pɨ̀Jew nùŋə̀nə lo pànə̀ pə pə a ɨ̀sùmə pobə.”

Ndwuumə̀ nɨ Moonə̀ Ŋwùə̀ à ghǎ kẅirə̀ tô

25“Amwuə nkwùə̀ ghu, ɨ̀lènə̀ pɨ̀kə̀ʼnə̀nə ghǎ furə̀ amwuə nẅùumə̀ pobə məŋwɨgrə̀ pobə pɨsaŋə. Pə̀ənə̀ amwuə ɨ̀laʼà ɨ̀laʼà pə amwuə ngəʼə̀, ɨ̀twuə̀ ɨ̀pobə zhwàʼnə̀ nkwùə̀ nɨ pobə zəənə̀nə nchyə ɨ zòrə̀ ntô ndzinə̀ a nkàŋə̀ nchyə la. 26Pànə̀ ghǎ tyiʼə̀ pə nɨ àkẅàrə̀ ntii mɨ̀nwùə̀ nɨ mɨ furə̀nə a àtwuə̀ ɨ̀shyə̂, ntyiʼə̀ kuntə̀ tsaʼa ɨ̀kwuə̀ ɨ̀pwuumə̀ ntiinə pɨ ghǎ nə̀ʼə̀ ɨ̀tɨ̀ŋnə̀ ɨ̀tsùmə̀ wa nɨ pənə a nɨ̀pwuurə̀. 27Amwuə nkwùə̀ ghu pɨ ghǎ zəənə̀ a Moonə̀ Ŋwùə̀ a mə ntô amwuə mbàʼà mbə nɨ ɨ̀tɨ̀ŋnə̀ pobə àghuʼtə̀ ẅùunə. 28Nɨ̀ tə ndzəənə̀ ɨ̀nwùə̀ pə̀ pìʼnə̀ a nɨ furə̀, nɨ̀ lòo a ɨ̀shyə̂ ntəəmə̀ mbə̀ʼkə̀ ɨ̀twuə̀ ɨ̀pɨghə ntiinə nkwùə̀ nɨ Nẅùə̀ ǎ tsuʼù ɨ̀twuə̀ ɨ̀pɨghə ɨ̀ zə̀ mbaatə̀.”

Ànwùə̀ a nɨ zhyə̂ mbə̀ʼə àtɨ̀ghə figə̀

29Yěsû a tyiʼə̀ nshwəŋə̀ àshwəŋnə̀ nàanə̀ nàanə̀nə zə̀ ambo pobə lo, “Nɨ̀ naŋə̀ àtɨ̀ghə figə̀ pobə mɨ̀tse mɨ̀tɨ̀ghə. 30Nkwùə̀ nɨ mɨfuə mɨ̀shwuə̀ furə̀nə aŋunə mɨ̀fàa, nɨ̀ zhyə̂ lo nkwùə̀ mbə̀ŋə̀ ɨ̀ tyiʼə̀ àpô. 31A kɨ mbə tyìʼə̀ ndəŋə ndəŋə, nkwùə̀ nɨ nɨ̀ zəənə̀nə ɨ̀nwùə̀ pèrə pə̀ mə nfurə̀, nɨ̀ zhyə̂ lo ànwùə̀ Nɨ̀fò Nẅùə̀ a paatə̀. 32Ǹshwəŋə̀ tyìʼə̀ nkǔŋə nkuŋə ambo pɨghə lo, mbə̀ʼə ɨ̀waanə̀ wə̀ tɨ̀tsòŋə̀ ɨ làŋə̀ e tɨghu ɨ̀nwùə̀ pə̀ ɨ̀tsùmə̀ furə̀ apə̀. 33Nɨ̀pwuurə̀ pobə àtwuə̀ ɨ̀shyə̂ ghǎ làŋə̀, la àshwəŋnə̀ mə̀ a làŋə̀ e apə̀.”

A kùʼnə̀ lo nɨ̀ lyə̂ a nɨ̀lyìinə̀

34“Nɨ̀ zhìʼtə̀ a wɨghə lo kò nɨ̀ kɨ ŋŋâ mbɨ̀ŋmə̀ ɨ̀zɨghə pobə pɨ nkwùə̀ ɨzɨghə tɨsɨŋnə mbə̀ʼə mɨ̀zɨghə̀ pobə nɨ̀nô, nɨ mɨ̀nwùə̀ nɨ mèrə mə ngẅìimə̀ a wɨghə mbə̀ʼə nɨ̀chyə̂mbyə̂, yi njyə̂ zə̀ ɨ ghǎ tô tɨghu nɨ̀ zhyə̂ kô a wɨghə tsaʼa àzə̀ʼə̀. 35Mbə̀ʼnə njyə̂ zèrə zə̀ ɨ̀ ghǎ tô la ambo ŋwùə̀ ntsùmə̀ wa nɨ à pənə àtwuə̀ ɨ̀shyə̂ ghə̀. 36Nɨ̀ mə ndyə̂ a nɨ̀lyìinə̀ nkwùə̀ ɨ̀tsùmə̀, mmə nchàʼtə̀ a Nẅùə̀ mbə̀ʼə a ŋâ a wɨghə nɨ ɨ̀tɨ̀ŋnə̀ lo nɨ̀ kɨ̀ɨrə̀ mɨ̀nwùə̀ mèrə mə mɨ̀tsùmə̀ mbə̀ʼə tyiʼə̀ təəmə̀ a mbyə̀ Moonə̀ Ŋwùə̀.” 37Yěsû à lə̀ mə nnèrə̀ àshwəŋnə̀ Nẅùə̀ a Ndâ Mɨ̀shwàʼà Nẅùə̀ njyə̂ ɨ̀tsùmə̀ la, mmə nkoʼò ndyə̂ àtwuə̀ Mbarə̀ Olìvə̀ mɨ̀twuʼə̀ mɨ̀tsùmə̀. 38A pə pɨ̀ngẅùʼə pɨ̀tsùmə̀, pànə̀ pɨ̀tsùmə̀ tô mbwùumə̀ a Ndâ Mɨ̀shwàʼà Nẅùə̀ lo zuʼù ànwùə̀ nɨ à lə̀ mənə nshwəŋə̀.

Voafantina amin'izao fotoana izao:

Lukə̀ 21: pny

Asongadina

Hizara

Dika mitovy