Jònə 5
5
Yěsû a parə̀ ŋònə̀ ɨ̀tse a nɨ̀pwùnə nɨ atəŋə
1Nkwùə̀ ɨ̀tse ɨ̀ lə̀ làŋə̀, Yěsû a koʼò ndèrə̀ a Yèrusalèmə̀ amwuə njyə̂ nɨ̀ghaʼà pɨ̀Jew. 2Atəŋə nchyə yètse a pə a Yèrusalèmə̀ mbaatə̀ ntswùə̀ àpùʼù mbyə̂ ndzìrə̀ (nɨ pɨ lə̀ mənə nfuŋə̀ amwuə àshwəŋnə̀ pɨ̀Hibrù lo Bethzatha) nɨ mɨ̀ntswùə̀ mɨ àpùʼù mɨ̀tàanə pənə ghu pɨ poomə̀ nɨ mɨ̀ntoomə̀. 3Àpùŋə̀ pɨghoonə tsaʼa pɨ̀fə̀, nɨ pɨ̀koŋə̀ ɨ̀shyə̂, nɨ pànə̀ nɨ pɨ̀pàa pɨ mbɨ̀ŋmə̀ ɨ̀pobə pɨ̀tse kwɨghə̀nə lə̀ nwuunə̀ amwuə ɨ̀pùʼù pə̀, [mmə mbyabə̀ nkwùə̀ nɨ pɨ̌ tô taanə̀ nchyə ghu, 4ntiinə angèrə̀ Ndòʼnə̀mbyə̂ à lə̀ mənə nshwuʼə̀ amwuə mɨ̀nkwùə̀ mɨ̀tse mmə nkwuunə̀ ntaanə̀ atəŋə nchyə zə, ntsàambyə̀ ngoonə nɨ à kwuunə̀nə amwuə atəŋə nchyə nkwùə̀ nɨ pɨ taanə̀nə a zèrə, mbuurə̀ ɨghoonə nɨ pənə aŋunə ze zùŋə̀ myə̀.] 5Taʼà ŋònə̀ ɨ̀tse à lə̀ pə alyiʼə ghu nɨ à ghòonə̀ mə aŋunə nguʼu mɨ̀ghumə̀ mɨntarə ntsòbə̀ nɨ̀fàamə̂. 6Nkwùə̀ nɨ Yěsû à lə̀ zəənə̀nə e, nzhyə̂ lo à chyə̂ mə aŋunə ntyə̌ sàa nɨ aghoonə ghu, à lə̀ pyiitə̀ e lo, “Wə̀ taʼà lo fiitə̀?” 7Ngoonə wa a kẅùə̀ lo, “Tǎ, ka mbə mə̀ nɨ ŋònə̀ nɨ mbə̀ʼə a yèmpə̀ mə̀ nchyâ mə̀ amwuə atəŋə nchyə zə nkwùə̀ nɨ pɨ taanə̀nə nchyə wə̀. Nkwùə̀ nɨ mbɨ mə taŋnə̀ àzâ lo kwuunə̀ amwuə atəŋə zə, ŋònə̀ ɨ̀tse â zàamə̀ nkwuunə̀ e a mbyə̀ mɨ̀ŋə̀.”
8Yěsû a shwəŋə̀ ambo ze lo, “Lòo a ɨ̀shyə̂ mbìʼì ɨ̀kwùunə o ngyìinə̀.” 9Mbɨ̀ŋmə̀ ŋònə̀ wa ɨ̀ lə̀ zùŋə̀ ntɨ̀ŋnə̀ a taʼà nkwùə̀, a pìʼì ɨ̀kwùunə e ngyìinə̀.
Njyə̂ nɨ ànwùə̀ zèrə zə̀ lə̀ ghɨ̀rə̀nə a lə̀ pə njyə̂ àlaʼà, 10lenəla pɨ̀Jew shwəŋə̀ ambo ŋònə̀ nɨ pɨ lə̀ parə̀nə e la lo, “Lə̌ njyə̂ àlaʼà, ka mbòomə a pyiimə̀ lo wə̀ pìʼì ɨ̀kwùunə o aŋunə njyə̂ zə̀.”
11La ŋònə̀ wa a kẅùə̀ lo, “Ŋònə̀ nɨ à tənə mbarə̀ mə̀ à tə nshwəŋə̀ ambo mɨ̀ŋə̀ lo, ‘Pìʼì ɨ̀kwùunə o ngyìinə̀.’”
12Pobə pyiitə̀ ambo ze lo, “Ŋònə̀ nɨ à tənə nshwəŋə̀ ambo ghò lo wə̀ pìʼì ɨ̀kwùunə o ngyìinə̀ la ɨ̀wə̌?”
13Ŋònə̀ nɨ pɨ lə̀ parə̀nə la ka à lə̀ zhyə̂ e a ŋònə̀ nɨ à tənə mbə, mbə̀ʼnə Yěsû à tswurə̀ mə amwuə pànə̀ nfurə̀ nkwuunə̀ e amwuə àpùŋə̀ pə̀ənə̀ nɨ a tənə mbə a alyiʼə ghu.
14Yěsû à lə̀ chi ndzəənə̀ a ŋònə̀ wa a Ndâ Mɨ̀shwàʼà Nẅùə̀ nshwəŋə̀ ambo ze lo, “Zəənə̀, wə̀ fiitə̀ njiilo kò wə̀ chi ngɨ̀rə̀ ànwùə̀ tɨ̀pòŋə̀, yi ànwùə̀ àtse nɨ a pɨ̂nə ntsàarə̀ a zə a chi ghɨ̀rə̀ o.”
15Ŋònə̀ wa à lə̀ lèrə̀ ngə̀ nshwəŋə̀ ambo pɨ̀Jew lo la lə̀ ghɨ̀rə̀ Yěsû a fiitə̀. 16Lə̌ ɨ̀sùmə nɨ Pɨ̀Jew lə̀ tyiʼnə ŋŋâ ngəʼə̀ ambo Yěsû ntiinə à parə̀ a ŋwùə̀ amwuə njyə̂ àlaʼà Pɨ̀Jew. 17La Yěsû a kẅùə̀ ambo pobə lo, “Tǎ ɨwəə à wə̀ mbirə̀ nfàʼà tə mbyàa sìnə̀ wə̀, lenəla ǹkɨ mmə nfàʼà àzâ.” 18Ka ɨ̀sùmə nɨ pɨ̀Jew lə̀ chinə mmə ntaŋnə̀ a nɨ faʼa nzhwuutə̀ a Yěsû ɨ̀ lə̀ pə e pə ntiinə ɨ̀ lə̀ pənə njyə̂ àlaʼà ndàʼà, ɨ̀ lə̀ kɨ mbə ntiinə à lə̀ fuŋə̀nə a Nẅùə̀ nɨ Tǎ ɨghobə, nkɨ ndòo mbɨ̀ŋmə̀ e tsaʼa Nẅùə̀.
Ɨ̀tɨ̀ŋnə̀ Moonə̀ Nẅùə̀
19Yěsû a shwəŋə̀ ambo pobə lo, “Ǹshwəŋə̀ tyìʼə̀ nkǔŋə nkuŋə ambo pɨghə lo mbə̀ʼə ka Moonə̀ a fàʼà e ànwùə̀ àtse àtwuə̀ nɨ ze. Ǎ ghɨ̀rə̀ tyìʼə̀ ànwùə̀ nɨ à zəənə̀nə ambo Tǎ. Ànwùə̀ àtsùmə̀ nɨ Tǎ à ghɨ̀rə̀nə, Moonə̀ à wa nkɨ ngɨ̀rə̀. 20Mbə̀ʼnə Tǎ a kòŋə̀ a moonə̀ la, a nèrə̀ ànwùə̀ àtsùmə̀ nɨ à wa ngɨ̀rə̀ ambo ze. À ghǎ nèrə̀ e nɨ mɨ̀nwùə̀ mɨ̀ẅùunə nɨ mɨ tsàarə̀nə mə, a tyiʼə̀ ngɨ̀rə̀ a mèrə mɨ kə̀ʼnə̀ a wɨghə. 21Tsaʼnə Tǎ à wa mbə̀ʼkə̀ ɨ̀kwuə̀ pə̀ənə̀ ŋŋâ a nɨ̀chyə̂mbyə̂ ambo pobə la, a tsaʼnə Moonə̀ ǎ kɨ ŋâ a nɨ̀chyə̂mbyə̂ ambo pànə̀ nɨ à kòŋə̀nə a nɨ ŋâ. 22Ka Tǎ a pə saʼà e ɨ̀sàʼa ŋònə̀ ɨ̀tse, la à ŋâ mə mɨ̀tɨ̀ŋnə̀ pə ambo Moonə̀ lo a tyiʼə̀ nsaʼà mɨ̀sàʼa mɨ pə̀ənə̀. 23Njiilo ŋwùə̀ ntsùmə̀ a ghuʼtə̀ a Moonə̀ tsaʼnə à ghuʼtə̀nə a Tǎ. Ŋònə̀ nɨ ka à ghuʼtə̀ e a moonə̀ ka à kɨ mə nguʼtə̀ e a tǎ nɨ a tsàanə a Moonə̀.
24“Ǹshwəŋə̀ tyìʼə̀ nkǔŋə nkuŋə ambo pɨghə lo ŋwùə̀ ntsùmə̀ nɨ à zuʼnə àshwəŋnə̀ mə̀, nnùŋə̀ ntɨŋmə̀ e aŋunə ŋònə̀ nɨ à twuumə̀nə mə̀, ǎ pə nɨ nɨ̀chyə̂mbyə̂ nɨ à ghoŋə̀nə nɨ nkuŋə̀. Ka mbə ghǎ saʼà mə̀ ɨ̀sàʼa e; à làŋə̀ mə a nɨ̀wɨghə̀ nkwuunə̀ amwuə nɨ̀chyə̂mbyə̂. 25Ǹshwəŋə̀ tyìʼə̀ nkǔŋə nkuŋə ambo pɨghə lo, nkwùə̀ ɨ̀ zə nkùʼù, ɨ̀ pyə̀ mə nkùʼù, nɨ ɨ̀kwuə̀ pə̀ənə̀ zuʼù ngyə̀ Moonə̀ Nẅùə̀; pànə̀ nɨ pobə pɨ zuʼù pobə̌ pə nɨ nɨ̀chyə̂mbyə̂. 26Tsaʼnə Tǎ à pənə nɨ nɨ̀chyə̂mbyə̂ la, à kɨ ngɨ̀rə̀ lo Moonə̀ â pə nɨ nɨ̀chyə̂mbyə̂. 27A ŋâ e nɨ ɨ̀tɨ̀ŋnə̀ a nɨ saʼà mɨ̀sàʼa mə pə̀ənə̀ ntiinə a pənə Moonə̀ Ŋwùə̀. 28Kò zə̀ a kə̀ʼnə̀ e a wɨghə; nkwùə̀ ɨ̀ zə̀ ntô nɨ pànə̀ nɨ pɨ pənə amwuə mɨ̀shyə̀ ghǎ zuʼù ngyə̀ e, 29nfurə̀, pànə̀ pyə̀ nɨ pɨ lə̀ mənə ngɨ̀rə̀ ɨ̀nwùə̀ pɨ̀shìʼnə̀ ghǎ zhwuumə̀ kwuunə̀ amwuə nɨ̀chyə̂mbyə̂, pànə̀ pyə̀ nɨ pɨ lə̀ mənə ngɨ̀rə̀ ɨ̀nwùə̀ tɨ̀pòŋə̀ zhwuumə̀ nkwuunə̀ amwuə ɨ̀sàʼa.
Pɨ̀ndzəənə̀ zəənə̀nə pɨ Yěsû
30“Mbə̀ʼə ka ǹgɨ̀rə̀ mə̀ ànwùə̀ àtse àtwuə̀ nɨ mɨ̀ŋə̀; ndə̀ saʼà la tsaʼnə ǹdzuʼnə, nkɨ nsaʼà ɨ̀shìʼnə̀; ntiinə ka ǹtàʼà mə̀ a nɨ ghɨ̀rə̀ ànwùə̀ nɨ a pòŋə̀nə mɨ̀ŋə̀, ǹkɨ tàʼà pə a nɨ ghɨ̀rə̀ ànwùə̀ nɨ ŋònə̀ nɨ à twuumə̀nə mə̀ a shwəŋə̀nə.
31“Ǹtə mə nshwəŋə̀ ànwùə̀ mbə̀ʼə ɨ̀pɨ̀ŋmə̀ mə̀, ŋwùə̀ laʼa mbyiimə̀ e lo ǹshwəŋə̀ la a nkǔŋə nkuŋə apə̀, 32Ŋònə̀ ɨ̀tse à wa ghu nɨ à tiitə̀nə mɨ̀nwùə̀ mbə̀ʼə mə̀, lenəla njiilo ànwùə̀ nɨ à shwəŋə̀nə mbə̀ʼə mə̀ a nkǔŋə nkuŋə. 33Nɨ̀ lə̀ twuumə̀ pə̀ənə̀ ambo Jònə, la a shwəŋə̀ mɨ̀nwùə̀ mbə̀ʼə nkǔŋə nkuŋə. 34Ka a pə e lo ǹtàʼà a ndzəənə̀ zəənə̀nə nɨ à pənə ŋwùə̀ mɨsoŋə; la ǹshwəŋə̀ a zə pə lo mbə̀ʼə ghɨ̀rə̀ nɨ̀ chwarə̀. 35Jònə à lə̀ pə tsaʼa nkàʼà nɨ pɨ shwuʼnə lo nkɨrə̀ nkyàʼà ɨlyiʼə, lenəla nɨ̀ tsoʼò a nɨ ghaʼà nkàʼà ẅèrə wə̀ pə aŋunə mətùmə nkwùə̀. 36Ǹchyə̂ nɨ ndzəənə̀ zəənə̀nə ẅùə̀ nɨ à tsàarə̀nə ànwùə̀ nɨ Jònə à lə̀ shwəŋə̀nə mbə̀ʼə mə̀. Mbə̀ʼnə ntyə̌ àfàʼà nɨ Tǎ ɨwəə à lə̀ ŋânə lo m̀myàanə̀, zhyə̀ nɨ ngwə̀ nkɨ mmə nfàʼà a nèrə̀ lo Tǎ à lə̀ twuumə̀ mə̀. 37Lenəla Tǎ nɨ à lə̀ twuumə̀nə mə̀, a lə̀ kɨ shwəŋə̀ ànwùə̀ mbə̀ʼə mə̀. Nɨ̀ pirə̀ a wɨghə tɨ zuʼù ngyə̀ e kɨ zəənə̀ e tsaʼnə à pənə, 38ka àshwəŋnə̀ e a pə chyə̂ e amwuə pɨghə ntiinə ka nɨ̀ nùŋə̀ a wɨghə àshwəŋnə̀ e amwuə pɨghə, mbə̀ʼnə ka nɨ̀ nùŋə̀ a wɨghə ntɨŋmə̀ aŋunə ŋònə̀ nɨ à twuumə̀nə mə̀. 39Nɨ̀ wa ntə̂ àtwuə̀ nnaŋə̀ lo zhyə̂ ɨ̀sùmə ànwùə̀ nɨ àŋwàʼnə̀ Nẅùə̀ a za nshwəŋə̀ ntiinə nɨ̀ kwàŋə̀nə lo a àŋwàʼnə̀ zə̀ nɨ a za ŋŋâ a wɨghə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀. La lə̌ àŋwàʼnə̀ nɨ a shwəŋnə̀ mɨ̀nwùə̀ mbə̀ʼə mə̀. 40La nɨ̀ twuunə̀ a wɨghə a nɨ tô ambo mɨ̀ŋə̀ kẅiirə̀ a nɨ̀chyə̂mbyə̂.
41“Ka ntàʼà mə lo pànə̀ ghuʼtə̀ mə̀. 42La ǹzhyə̂ a wɨghə lo ka nɨ̀ kòŋə̀ a wɨghə a Nẅùə̀. 43Ǹtô aŋunə nɨ̀linə̀ nɨ Tǎ ɨwəə la ka nɨ̀ kẅiirə̀ a wɨghə a gha, la nkwùə̀ nɨ ŋònə̀ ɨ̀tse ǎ tô tô aŋunə ɨ̀tse nɨ̀linə̀, nɨ̌ kẅiirə̀ e. 44Mbə̀ʼə nɨ̀ tyiʼə̀ nnùŋə̀ ntɨŋmə̀ aŋunə mɨ̀ŋə̀ lə ɨla tsaʼnə àzɨghə chyə̂ mbə pə a nɨ kẅiirə̀ àghuʼtə̀ a pə ambo pɨghə pɨghə la mbə ka tàʼà a wɨghə a nɨ kẅiirə̀ àghuʼtə̀ nɨ a furə̀nə ambo Nẅùə̀ nɨ à pənə e ze nɨ ze ndàʼà? 45Kò nɨ̀ kwàŋə̀ a wɨghə lo ngǎ chyâ ɨ̀sàʼa ɨ̀tse aŋunə pɨghə a mbyə̀ Tǎ ɨwəə. Ŋònə̀ nɨ a ghǎ chyâ ɨ̀sàʼa aŋunə pɨghə a Mǔsî nɨ nɨ̀ lə̀ nùŋə̀nə ntɨŋmə̀ wɨghə aŋunə ze. 46Nɨ̀ lə̀ pəla mbyiimə̀ àshwəŋnə̀ Mǔsî, yi nɨ̌ pyiimə̀ àzâ àshwəŋnə̀, ntiinə Mǔsî à lə̀ ŋwàʼnə̀ mbə̀ʼə mə̀. 47Tsaʼnə ka nɨ̀ pə mbyiimə̀ a wɨghə ànwùə̀ nɨ à lə̀ ŋwàʼnə̀nə la, mbə̀ʼə nɨ̀ tyiʼə̀ mbyiimə̀ àzâ ànwùə̀ nɨ ngwə̀ nshwəŋə̀ lə ɨla?”
Voafantina amin'izao fotoana izao:
Jònə 5: pny
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2017, Cameroon Association for Bible Translation and Literacy
