Jònə 18
18
Pɨ kô a Yěsû
(Mat 26.47-56; Mrk 14.43-50; Luk 22.47-53)
1Nkwùə̀ nɨ Yěsû à lə̀ myàanə̀nə a àchàʼtə̀ Nẅùə̀ zə̀, à lə̀ lèrə̀ pobə ɨ̀zùŋə̀ ndzùmə̀ ɨ̀pe ngə̀ ntwuumə̀ a mɨlyiʼə nchyə nɨ pɨ lə̀ mənə nfuŋə̀ nɨ Kidrònə̀. À lə̀ kwuunə̀ amwuə nkaʼà mɨ̀ntàamə mɨ àtɨ̀ghə ɨ̀tse nɨ ɨ lə̀ pənə alyiʼə ghu pobə pɨ ɨ̀zùŋə̀ ndzùmə̀ ɨ̀pe. 2Yudà nɨ à lə̀ shwùunə̀nə a Yěsû à lə̀ zhyə̂ alyiʼə zèrə zə ntiinə à lə̀ pə alyiʼə nɨ Yěsû pobə ɨ̀zùŋə̀ ndzùmə̀ ɨ̀pe lə̀ mənə mbwùumə̀ ghu nkwùə̀ noʼnə 3Tsaʼnə Yudà à lə̀ zhyə̂nə alyiʼə ghu la, à lə̀ lòo àpùŋə̀ pɨ̀soyì pobə pànə̀ pɨ̀tse nɨ pobə lə̀ mənə mbyabə̀ Ndâ Mɨ̀shwàʼà Nẅùə̀ nɨ pɨ̀fò màʼà Nẅùə̀ pobə pɨ̀Farìsî lə̀ tsàanə, pobə pɨ pobə lèrə̀ alyiʼə ghu ntwuʼtə̀ pɨ̀làamə̀ pobə mɨ̀nkàʼà nɨ ɨ̀pwuumə̀ ntsòo. 4Yěsû à lə̀ zhyə̂ ànwùə̀ àtsùmə̀ nɨ a pɨ ghɨ̀rə̀ e, ntyiʼə̀ nfurə̀ mbyiitə̀ ambo pobə lo, “Nɨ̀ tàʼà la ɨ̀wə̌?”
5Pobə kẅùə̀ ambo ze lo, “Pəə tàʼà la Yěsû ŋwùə̀ Nazarètə̀ wa.”
Yěsû a kẅùə̀ ambo pobə lo, “Ngwə̀ lə.” Yudà ŋònə̀ nɨ à lə̀ shwùunə̀nə e la a təəmə̀ alyiʼə ghu pobə pɨ pobə. 6Nkwùə̀ nɨ Yěsû à lə̀ shwəŋə̀nə lo, “Ngwə̀ lə,” Pobə mìntə̀ nɨ ndzùmə̀ kẅìntə̀ a ɨ̀shyə̂.
7Yěsû a chi mbyiitə̀ ambo pobə lo, “Nɨ̀ ghù nɨ̀ tàʼà la ɨ̀wə̌?”
Pobə kẅùə̀ lo, “Pəə tàʼà la Yěsû ŋwùə̀ Nazarètə̀ wa.”
8Yěsû a kẅùə̀ ambo pobə lo, “Ǹtə mə nshwəŋə̀ a wɨghə lo ngwə̀ lə. Nɨ̀ tə mbəla mmə ntàʼà la a gha nɨ̀ myàʼtə̀ pànə̀ pə̀ pobə lèrə̀ a ghobə.” 9À lə̀ shwəŋə̀ a lenə la a nɨ ghɨ̀rə̀ ànwùə̀ nɨ à lə̀ pyə̀nə nshwəŋə̀ â koʼò mbwùumə̀ lo, “Tǎ ɨwəə, ka taʼà ŋònə̀ wa ɨ̀tse nɨ wə̀ lə̀ ŋânə ambo mɨ̀ŋə̀ la â pî e.”
10Shimùnə̀ Pità nɨ à lə̀ pənə nɨ ɨ̀nẅùə ntsòo e a mbɨ̀ŋmə̀ ze, à lə̀ tsoʼò a zèrə ndòo ndə̂ nɨtugrə nɨ àpùʼù àtwuə̀ pɨ̀fò màʼà Nẅùə̀ tsɨ̀ zɨghə̀nə. Nɨ̀linə̀ nɨ àpùʼù tsɨ̀ghu lə̀ pə Malchùsə̀. 11Yěsû a shwəŋə̀ ambo Pità lo, “Chyâ ɨ̀nẅùə o za amwuə ngwaanə̀. Wə̀ kwàŋə̀ lo ka mbə ghǎ nô mə̀ ndoŋə̀ zə̀ nɨ Tǎ ɨwəə à ŋânə ambo mɨ̀ŋə̀ la?”
Pɨ lòo a Yěsû ndèrə̀ ambo Anàsə̀
12Pɨ̀soyì pa pobə pɨ àtwuə̀ àzobə, nɨ pànə̀ nɨ pobə pa mbyabə̀ Ndâ Mɨ̀shwàʼà Nẅùə̀ lə̀ kô a Yěsû nkorə̀. 13Ndòo e mbyə̀ ndèrə̀ ambo Anàsə̀. Anàsə̀ à lə̀ pə nchyə Kayafàsə̀ nɨ à lə̀ pənə àtwuə̀ pɨ̀fò màʼà Nẅùə̀ amwuə nguʼu ghu. 14Kayafàsə̀ wə̀ à lə̀ pə ŋònə̀ nɨ à lə̀ pə ntiitə̀ pɨ̀Jew lo a pòŋə̀ lo taʼà ŋwùə̀ a kwɨghə̀ àtwuə̀ nɨ pànə̀ pɨ̀noʼnə.
Pità a twuunə̀ a Yěsû
(Mat 26.69-70; Mrk 14.66-72; Luk 22.55-57)
15Shimùnə̀ Pità pobə taʼà àzùŋə̀ ndzùmə̀ Yěsû lə̀ mə ndzùŋə̀ a Yěsû ndèrə̀ alyiʼə nɨ pɨ lòonə e ndèrə̀ a ghu. Àtwuə̀ pɨ̀fò màʼà Nẅùə̀ a lə̀ zhyə̂ àzùŋə̀ ndzùmə̀ Yěsû za tyìʼə̀ ɨ̀shìʼnə̀. Lenəla, à lə̀ kwuunə̀ àtɨ̀taa àtwuə̀ pɨ̀fò màʼà Nẅùə̀, 16la Pità a lə̀ təəmə̀ a àpyìinə a ntswùə̀ àpùʼù. Àzùŋə̀ ndzùmə̀ Yěsû za nɨ àtwuə̀ pɨ̀fò màʼà Nẅùə̀ a lə̀ zhyə̂nə e ɨ̀shìʼnə̀ la a lə̀ tyiʼə̀ nfurə̀ ngə̀ nshwəŋnə̀ pobə mômə̀ngyə̌ nɨ à lə̀ mənə mbyabə̀ ntswùə̀ àpùʼù la, ndòo a Pità pobə ze kwuunə̀ amwuə àpùʼù.
17Mômə̀ngyə̌ ghu a pyiitə̀ ambo Pità lo, “Ka wə̀ pə o la taʼà àzùŋə̀ ndzùmə̀ ŋònə̀ wanə?”
Pità a kẅùə̀ ambo ze lo, “Ngaŋə, ka mbə mə̀ taʼà.”
18Ɨ̀fə̂ lə̀ mə nkoorə̀, ngàŋə àfàʼà pobə pɨ pànə̀ nɨ pɨ lə̀ mənə mbyabə̀ ɨlyiʼə chwùə̀ ɨ̀mǔ mmə ndzô, Pità a tô nkɨ ntəəmə̀ àze alyiʼə ghu mmə ndzô àze.
Àtwuə̀ pɨ̀fò màʼà Nẅùə̀ a pyiitə̀ a Yěsû nɨ ɨ̀pyiitə̀ ɨ̀shwəŋnə̀
(Mat 26.59-66; Mrk 14.55-64; Luk 22.66-71)
19Àtwuə̀ pɨ̀fò màʼà Nẅùə̀ a lə̀ pyiitə̀ a Yěsû nɨ ɨ̀pyiitə̀ ɨ̀shwəŋnə̀ mbə̀ʼə ɨ̀zùŋə̀ ndzùmə̀ ɨ̀pe farə aŋunə mɨ̀nwùə̀ nɨ à mənə nnèrə̀. 20Yěsû a kẅùə̀ ambo ze lo, “Ndə̀ shwəŋə̀ a sàŋə̀ sàŋə̀ ambo pànə̀ pɨ àtwuə̀ ɨ̀shyə̂; ndə̀ mə nnèrə̀ mɨ̀nwùə̀ nkwùə̀ ɨ̀tsùmə̀ amwuə Ndâ Mɨ̀shwàʼà Nẅùə̀ pobə mɨ̀ndâ mɨ ɨ̀shwatə̀ mɨ pɨ̀Jew nɨ mɨ pənə alyiʼə nɨ pɨ̀Jew lə̀ mənə ntô nshwatə̀ ghu. Ka ndə̀ lə̀əmə̀ mə̀ ànwùə̀ àtse, ndə̀ shwəŋə̀ pə a sàŋə̀ sàŋə̀.”
21Yěsû a chi ndàŋə̀ nɨ mbyə mbyiitə̀ ambo àtwuə̀ pɨ̀fò màʼà Nẅùə̀ lo, “Wə̀ tyiʼə̀ mmə mbyiitə̀ pə a gha nɨ ànwùə̀ zə̀ mbə̀ʼə àkə? Pyiitə̀ pə pànə̀ pyə̀ nɨ pɨ lə̀ zuʼnə ànwùə̀ nɨ ndə̀ mənə nshwəŋə̀, ntiinə pobə zhyə̂nə ànwùə̀ nɨ ndə̀ shwəŋə̀nə.”
22Tsaʼnə à lə̀ shwəŋə̀nə a lenə la, taʼà ngàŋə̀ mbyabə̀ ɨlyiʼə ɨ̀tse nɨ à lə̀ pənə alyiʼə ghu a kyiinə̀ àpô àtwuə̀ ze nshwəŋə̀ lo, “À ghɨ̀rə̀ àkə wə̀ pə̀nkə̀ ànwùə̀ a ntswùə̀ àtwuə̀ pɨ̀fò màʼà Nẅùə̀ nɨ ndwuumə̀ wə̀?”
23Yěsû a kẅùə̀ ambo ze lo, “M̀bəla nshwəŋə̀ ànwùə̀ àtse a pɨ̂, wə̀ nèrə̀ àwɨ̀ghə̀ ànwùə̀ mə̀ ambo pànə̀ pɨ̀tsùmə̀ nɨ pɨ pənə ɨ̀shyə̂ nɨ̀ghə̂ pɨ zəənə̀; ǹkɨ mbəla nshwəŋə̀ ànwùə̀ nɨ a kùʼnə̀nə, a tyiʼə̀ ngɨ̀rə̀ àkə wə̀ kyiinə̀ àpô àtwuə̀ mɨ̀ŋə̀?”
24Nkwùə̀ ghu Anàsə̀ a ghɨ̀rə̀ pɨ lòo e a pirə̀ amwuə mɨ̀tsaŋə̀ ngə̀ ntsàa e ambo Kayafàsə̀, nɨ à pənə àtwuə̀ pɨ̀fò màʼà Nẅùə̀.
Pità a chi ntwuunə̀ a Yěsû
(Mat 26.71-75; Mrk 14.69-72; Luk 22.58-62)
25Pità à lə̀ pirə̀ ntəəmə̀ tyìʼə̀ alyiʼə nɨ à lə̀ mənə ndzô ɨ̀mǔ la, pànə̀ pyiitə̀ e lo, “Ka wə̀ pə o lə taʼà àzùŋə̀ ndzùmə̀ ŋònə̀ wə̀ ghùtse?”
Pità a làʼnə̀ e lo “Ka mbə mə̀ ẅèrə.”
26Ngàŋə̀ àfàʼà àtwuə̀ pɨ̀fò màʼà Nẅùə̀ wa yɨ̀tse nɨ à lə̀ pənə ŋwùə̀ ngẅàrə̀ ŋònə̀ wa nɨ Pità à lə̀ lə̂nə nɨtugrə ɨ̀tse la a pyiitə̀ nɨ mɨ̀tɨ̀ŋnə̀ ambo Pità lo, “Yi ǹtə ndzəənə̀ o amwuə nkaʼà mɨ̀ntàamə mɨ àtɨ̀ghə pɨghə ze?”
27Pità a chi ndàʼnə̀ e. Ankəʼə a zùŋə̀ ntoŋə̀.
Pɨ lòo a Yěsû ndèrə̀ a mbyə̀ Palètə̀
(Mat 27.1-2, 27.11-14; Mrk 15.1-5; Luk 23.1-5)
28A lə̀ pə a ngẅùʼə ngẅùʼə pɨ lòo a Yěsû nfurə̀ a ndâ Kayafàsə̀ ndèrə̀ a ntoʼò govɨnò. Ka pɨ̀Jew lə̀ kwuunə̀ a ghobə amwuə ntoʼò ghu ntiinə pobə lə̀ mə ntàʼà pyatə̀ mbɨ̀ŋmə̀ ɨ̀zobə a nɨ zùŋə̀ a mbòomə ɨghobə mbə̀ʼə zɨghə̀ mɨ̀zɨghə̀ mɨ Àlàŋə̀ Mmyàʼtə̀. 29Lenəla, Palètə̀ a furə̀ a àpyìinə mbyiitə̀ ambo pobə lo, “Nɨ̀ ẅìimə̀ a ŋònə̀ wə̀ la lo à ghɨ̀rə̀ ɨla?”
30Pobə kẅùə̀ ambo ze lo, “À tə mbəla ka ghɨ̀rə̀ e ànwùə̀ tɨ̀pòŋə̀ yi ka pəə lòo a wəə a ye ntô a mbyə̀ ghò.”
31Palètə̀ a shwəŋə̀ ambo pobə lo, “A pəla mbə a lenə pɨghə àtwuə̀ ɨ̀pɨ̀ŋmə̀ àzɨghə nɨ̀ lòo e ngə̀ nsaʼà ɨ̀sàʼa e a nɨ zùŋə̀ a mbòomə ɨwɨghə.”
Pɨ̀Jew kẅùə̀ ambo ze lo, “Ka mbòomə pɨ̀Jew a pyiimə̀ e lo pəə àtwuə̀ ɨ̀pɨ̀ŋmə̀ àzəə zhwuutə̀ a ŋònə̀ nɨ à wɨ̀ghə̀nə ɨ̀sàʼa.” 32A lə̀ furə̀ a lenə la a nɨ lẅenə̀ ànwùə̀ nɨ Yěsû à lə̀ shwəŋə̀nə a nɨ tiitə̀ mbuurə̀ nɨ̀wɨghə̀ nɨ à ghǎ kwɨghə̀.
33Palètə̀ à lə̀ kẅirə̀ nkwuunə̀ a ntoʼò nfuŋə̀ a Yěsû mbyiitə̀ ambo ze lo, “Ghò la ɨ̀fò pɨ̀Jew?”
34Yěsû a kẅùə̀ ambo ze lo, “Àpyiitə̀ zə̀ a furə̀ lə tyìʼə̀ amwuə ghò, kə̀ a shwəŋə̀ pànə̀ pɨ̀nyaanə nshwəŋə̀ o mbə̀ʼə mə̀?”
35Palètə̀ a pyiitə̀ Yěsû lo, “Wə̀ kwàŋə̀ lo mɨ̀ŋə̀ la ŋwùə̀ Judà? A ŋâ pə̀ənə̀ ɨ̀pô pobə pɨ̀fò màʼà Nẅùə̀ ŋŋâ o ambo mɨ̀ŋə̀. Wə̀ ghɨ̀rə̀ la àkə?”
36Yěsû a shwəŋə̀ ambo ze lo, “Ka àzâ alyiʼə nɨ̀fò a pə e la àtwuə̀ ɨ̀shyə̂ ghə; alyiʼə nɨ̀fò mə̀ a pə la nga mbə àtwuə̀ ɨ̀shyə̂ ghə, yi ɨ̀zùŋə̀ ndzùmə̀ ɨ̀pâ zòŋnə̀ lo kò pɨ ŋâ mə̀ ambo pɨ̀Jew. La ka alyiʼə nɨ̀fò mə̀ a pə e la àtwuə̀ ɨ̀shyə̂ ghə.”
37Palètə̀ a tyiʼə̀ mbyiitə̀ ambo ze lo, “Njiilo ghò la ɨ̀fò?”
Yěsû a kẅùə̀ ambo ze lo, “Wə̀ shwəŋə̀ lo mɨ̀ŋə̌ ɨ̀fò. Pɨ lə̀ pyə̂ mə̀ ǹtô amwuə àtwuə̀ ɨ̀shyə̂ pə a nɨ ghɨ̀rə̀ a taʼà ànwùə̀ wə̀: a nɨ shwəŋnə̀ mbə̀ʼə nkǔŋə nkuŋə. Ŋònə̀ nɨ à pənə ŋwùə̀ nkǔŋə nkuŋə à wa ndzuʼù àshwəŋnə̀ mə̀.”
38Palètə̀ a pyiitə̀ ambo ze lo, “Nkǔŋə nkuŋə a àkə?”
Pɨ ŋâ a Yěsû lo pɨ zhwuutə̀
(Mat 27.15-31; Mrk 15.6-20; Luk 23.13-25)
Nkwùə̀ nɨ Palètə̀ à lə̀ pyiitə̀nə a lenə la, à lə̀ chi nkẅirə̀ ndèrə̀ a àpyìinə nshwəŋə̀ ambo pɨ̀Jew lo, “Ka ǹdzəənə̀ mə̀ ànwùə̀ àtse nɨ ŋònə̀ wə̀ à ghɨ̀rə̀nə. 39La tsaʼnə mbòomə ɨwɨghə à nèrə̀nə, ngwa nfuukə̀ a taʼà ŋwùə̀ a ndâ ɨ̀tsaŋə̀ njyə̂ nɨ̀ghaʼà Àlàŋə̀ Mmyàʼtə̀ nkẅirə̀ ŋŋâ ambo pɨghə. Nɨ̀ tàʼà lo n̂fuukə̀ la a ɨ̀fò pɨ̀Jew wə̀ nkẅirə̀ ŋŋâ ambo pɨghə?”
40Pobə pìʼnə̀ a nɨ kyiinə̀ nshwəŋə̀ lo, “Ka pəə tàʼà wəə a ye! Pəə tàʼà wəə pə Barabbas!” Barabbas wə̀ à lə̀ pə la ntuŋə̀ ɨ̀shyə̂.
Voafantina amin'izao fotoana izao:
Jònə 18: pny
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2017, Cameroon Association for Bible Translation and Literacy
