MATHAI 9
9
Jesu`n jeng a damsakna leh a ngaihdamna
(Mrk. 2.1-12; Luk. 5.17-26)
1Tuachi`n Jesu gunkuang khat ah alut a, agalkai a, ama khuapi ah a hungtungta hi, #9.1 Hihsan a ama khuapi chih pen Kapernaum khua gen ahi. 2tualeh ngaiin, lupna tung a lum jeng khat a kiang ah a hungpua uhi. Jesu`n a ginna uh amuhtak in a jengpa kiangah, “Tapa, kipak in om in! na khialhnate ngaihdam ahita,” achi hi.
3Tualeh laigelhmi amau sung a kuahiam khat in, “Hihpa in Pasian agensia!” achi a.
4Hinanleh Jesu`n a ngaihsutte uh athei a, “Bangding a na lungsim ua gilou ngaihtuah nahi ua? achi hi. 5‘Na khialhna ngaihdam hihen,’ chihleh, ‘Thou inla nakeng in paiin chih khoipen agen baihlam pen dia’? 6Hinanleh mihing Tapa in leitung ah khialhnate ngaihdam theihna thuneihna anei chih na theihna ding un.” Tuachi`n aman a jengpa kiangah, “Thou inla, na lupna la inla na inn ah paita in!” achi hi.
7Tuachi`n amah athou a a inn ah apaita hi. 8Mipite`n hih amuhtak un, lamdang asa ua, huachibang bawltheihna mihingte kiang a piapa, Pasian aphatta uhi.
Jesu`n Mathai asapna
(Mrk. 2.13-17; Luk. 5.27-32)
9Tualeh huamun a pan Jesu apaijom jel laiin, siah piakna zum a tou mikhat amin Mathai kichi amu a, aman akiang ah, “Hung juiin,” achi a.
Tuachi`n amah zong adingkhia a ajuipaita hi. #9.9 zum=Ei, Thangkhal ham ahi a, sap ham in= office ahi.
10Tualeh hichi ahi a, Jesu a innsung a dohkan geia atoulai in, ngaiin, siahdong mite leh mikhialte a hungpai ua, amah leh a nungjuite kiangah a hungtou ua. #Luk. 15.1,2. 11Pharisaite`n tua amuhtak un, a nungjuite kiangah, “Bangding a na siapa un siah dongmite leh mikhialte tawh an nekhawm ahia?” achi ua.
12Hinanleh Jesu`n tuabang a jaktak in, aman akiang uah, “Mi chidamte`n daktor a poimoh kei ua, hinanleh damloute`n apoimoh uhi, achi hi. 13Hinanleh kithoihna deihlou in zahngaihna ka deih hi, bang chihna hiam chih pai unla vazil un; ‘midikte sam ding a hungpai ka hikei a, mikhialte sam ding a hungpai ka hijaw,’ ” achi hi. #Mat. 12.7; Hos. 6.6.
Anngawl thu a dokna
(Mrk. 2.18-22; Luk. 5.33-39)
14Tuachi`n Johan nungjuite a kiangah a hungpai ua, “Bangding a koute leh Pharisaite`n anngawl jel ung a, hinanleh na nungjuite`n ngawllou uh ahia?” achi ua.
15Tuachi`n Jesu`n akiang uah, “Mouneipa amauh toh a omkhawm laiin alawmte`n Mouneipa a su`nngai uh maw? Hinanleh Mouneipa amauh kiangpan lakmang a aom hun a hungtung ding a, tuahun chiangin amauhte`n zong angawl ding uhi, achi hi.
16“Kuaman puanlui puan thak toh aphawh ngaikei, a phawhna puanthem in ahung kaikek beh ding a, ahung keksia semsem jaw khading hi. 17Kuaman uain thak savun uain thawl lui sungah a thunngai kei uh, atuachih keileh savun thawlte ahung pokkek ding a, a uainte akibua ding a, savun thawl zong ahung sia ding hi. Hinanleh amau`n uain savun thawl thak sungah uain thak athunjaw uh a, tuachi`n anih in a kemhoih tuaktuak uhi,” achi hi.
Jaira tanu leh numei sipawt damsakna
(Mrk. 5.21-43; Luk. 8.40-56)
18Hihthute akiang ua agen laitak in, ngaiin, vaihawmpa khat hungpaiin amah chibai ahungbuk a, “Ka tanu tutakin asi a; hungpai inla amahnu tungah nakhut hungkoih lechin ahing ding,” achi a.
19Tuachi`n Jesu a dingkhia a anung ajuita a, a nungjuite`n zong ajuichiat ua.
20Tualeh thakhat in, kum sawmlehnih sipawt numei khat a nungah hungpai in a puanmong ahung khoih a. 21Numeinu`n, “A puan vakhoihkha maimai lengzong, kadam ding hi chi`n amah leh amah a kichi hi.”
22Hinanleh Jesu akihei a, amahnu a muhtak in, “Tanu aw, kipaktak in om in! Na ginna in ahung damsakta,” achi a. Tuahun a pat in numeinu ahung damta hi.
23Tualeh Jesu vaihawmpa inn ah alut a. Theile mutte leh sisu`n a mipi au vengvungte a vamuh in, 24“Pawt un, numei naupangnu asi ahi kei-a ihmu ahi!” chi`n aman akiang uah achi a. Tualeh amauhte`n simmoh takin amah anuihsan ua. 25Tuachia mipite a pualam a a nohkhiat khit tak un, amah asung ah alut a, akhut ah atu a, tuatak in numei naupangnu ahung thouta hi. 26Tuachi`n hihthu tua gam tengteng ah ahung thangkhiata hi.
Mittaw minih damsakna
27Tuachia Jesu tuamun a pat a apawtkhiat laiin, mittaw nih in, “David Tapa, ka tung uah zahngaiin!” chia kikou in anung ajui ua.
28Tualeh inn a alut leh mittaw nihte a kiang ah a hungpai ua, Jesu`n akiang uah, “Hihte bawlthei dingin kei nunggingta uh hiam?” achi a. Amau`n a kiang ah,
“Hi, Toupa!” kung gingta uh! achi ua.
29Tuachi`n aman amitte uh atham a, “Na gintak bang un, na tung uah tunghen!” achi a, 30Tuachi`n amit uh ahung vakta a, tualeh Jesu`n akiang uah, “Kuamah theihlouh dingin pilvang un!” chi`n hahtak in a taihilh a.
31Hinanleh amauh a pawtkhia ua, tuagam tengteng ah atanchin a thangsakta uhi.
Jesu`n mi hamtheilou adamsakna
32A pawtkhiat laitak un, ngaiin, dawimat hamtheilou mikhat a kiangah ahung paipih ua. 33Tualeh dawipen adelh khiat takin, a hamtheiloupa ahung hamtheita a, tuatak in mipite`n lamdang asa mahmah ua, “Israelte lak ah hihbang a kimu ngaikei!” achi ua.
34Hinanleh Pharisaite`n, “Dawite vaihawmpa jal in ahi dawite a hawlkhiat,” achi ua. #Mat. 10.25; 12.24; Mrk. 3.22; Luk. 11.15.
Jesu`n mipite ahehpih
35Tuachi`n Jesu`n a kikhopna innte uah thu hilh in, van gam tangthupha gen in, damloute tengteng damsak in, natna chiteng damsak in khuapi leh khuaneute ah avak kawikawi hi. #Mat. 4.23; Mrk. 1.39; Luk. 4.44. 36Hinanleh mipite a muhtak in, chingding neilou belamte bang a gimthuak leh kithehthang a aom jiak un amauhte a hehpih mahmah a. #Num. 27.17; 1 Kum. 22.17; 2 Kronk. 18.16; Ezk. 34.5; Mrk. 6.34. 37Tuachi`n aman a nungjuite kiangah, “Buh lakding lah atam mahmah a, hinanleh asemmite atawm uhi. #Luk. 10.2. 38Tuajiakin a buh lading a semdingte sawlding in buh neipa kiangah ngen un,” achi hi.
Voafantina amin'izao fotoana izao:
MATHAI 9: THKHBSI
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Thangkhal NT - Thukhun Thak
Copyright © 2014 by The Bible Society of India
Used by permission. All rights reserved worldwide.
