GYƆNI 7

1Dinŋɔ nyaaŋŋa Yisa daa gɔ n‑gyiligi Galilii tingbaŋŋu ni. U daa bu boori u gɔ n‑gyiligi Gyuudii tingbaŋŋu ni, dama Yɛhudiya dima maa daa boori la ba ku u. 2Yɛhudiya dima Suga Kyuu saha daa ti pɔtta, 3ka Yisa sunzɔppa maa daa yɛli u, ni, “Kur kyɛli nyin bɛ ya'aseaa wa ka kyaŋŋi Gyuudii tingbaŋŋu ni; lala ka i nyaandɔliba maa nin nya tunseesi nyin yi niŋni maa. 4Ninvugsɔ yi boori ni niriba baŋŋi u yɛla, u bu sɔ'ari n‑tumna. I yi ya tum anŋɔ taabu, kur kyɛ ka duniya zaa nya.” 5Halli u sunzɔppa maa sɔsɔ daa bu niŋi u yɛdda gba. 6Dizugu ka Yisa daa yɛli ba, ni, “N saha maa na bu paai. Yarima muna - sahaseaa zaa niŋi la deede n‑ti ya. 7Duniya maa ku toaai n‑yaai ya; amaa man mun ka duniya maa yaai, dama man yi yɛtti ka, ni, ka sɔya bu veeli maa. 8Tɔ, ka dizugu ya kyɛma Kyuu maa ni. Man bu wa Kyuu wa ni, dama saha maa bu paai ma na.” 9U daa yɛli nŋɔa, ka daa kpalim m‑bɛ Galilii tingbaŋŋu ni.

10Amaa u sunzɔppa maa ŋɔn daa ti gaari Kyuu maa ni, Yisa gba daa kyaŋŋiya. U daa bu yi paalu ni, amaa ka sɔ'ai ni. 11Tɔ; ka Yɛhudiya dima maa daa boori u ziiya Kyuu maa ni, ka daa boosiri taaba, ni, “U lee?” 12Ka daadam maa daa sɔ'ai n‑tɔ'asiri taaba n‑yɛtti u yɛla halli n‑ŋmeeri taaba nangbankpeemni, dama baseeba daa yɛtti, ni, u nyɛ la ninvugsuŋŋu, ka seeba mun yɛtti, ni, “Ay! Di pa lala - u yɔmsiri la niriba.” 13Amaa sɔsɔ daa bu yi paalu na n‑tɔ'asi u yɛla, dama ba daa zɔri la Yɛhudiya dima maa dabeem.

14Kyuu maa dabsa purigri daa na paai na pɔi, ka Yisa naayi kyaŋŋi Gyeeŋŋu Yiri maa ni nti piili bulisigu. 15Ka di daa niŋi Yɛhudiya dima maa alahazibu, ka ba yɛli, “Di niŋi la wula ka doo wa mi bukku pam lala, ka sɔ mun na zi n‑wulisi u?” 16Yisa mun daa labsi n‑yɛli ba, ni, “Man n bulisiri seela pa la m mammaŋŋa bulisigu, amaa di yi la Ŋɔn tum ma na la saani na. 17Ŋɔn boori ni u niŋi Naawunni ŋɔn boori seela maa, ŋɔna nin baŋŋi man bulisiri seelli maa yɛla, ni, di yi la ŋɔn Naawunni saani na, bee, n tɔ'asiri la m maŋtoori yiiko. 18Ya bu nya? - ninvugsɔ ŋɔn tɔ'asiri ni u toori yiiko nyɛ la ŋɔn boori pɛ'abu ni gyirima n‑tiri u maŋŋa. Amaa ŋɔn boori pɛ'abu ni gyirima n‑tiri ŋɔn tum u maa nyɛ la yɛlimaŋni daana, ka galinsi ka u saani. 19Ammi, Musa daa ti ya zaaligu maa, bee, u daa bu tisi? Amaa ya sɔsɔ bu sakki n‑dɔli zaaligu maa: wula zugu ka ya boori ni ya ku ma?” 20Ka zama maa daa labsi, ni, “I mari la arizimbeoo i ni! Ŋɔni n boori ni u ku i?” 21Ka Yisa daa yɛli ba, ni, “Vuusim dabsiri maa ni ka n daa tum makkri tumni yinni ka di daa niŋi ya alahazibu. 22Amaa Musa daa ti ya bidibsi gunibu kaari - halli di daa pa la Musa n daa piili di, amaa ya yaadima maa - ka di zugu ya zaŋŋni biisi n‑guntira, halli Vuusim Dabsiri daari gba. 23Tɔ: ka ba yi guni biiya Vuusim Dabsiri daari maa, ni, ba di burigri Musa zaaligu yɛla maa, wula ka ya suuri yisigri n‑niŋni mani, man ŋɔn kyɛ ka nira nya alaafɛ zaa Vuusim Dabsiri daari ni? 24Ya kyɛli birikɔnsi sariya karibu din dɔli ya nini gɔsibu ŋɔn nyɛ seem la, ka katti sariyamaŋni.”

25Ka Gyɛrusalɛm niriba seeba daa yɛli, ni, “Pa doo wa ka kpambaya boori ni ba ku la? 26Nyama, u bɛ la zama ni n‑tɔ'asira ka ba bu yɛli sɛseela n‑galim u! Kala ba siri mi, ni, ŋɔna n nyɛ Masiiya maa? 27Amaa Masiiya maa yi ti kyɛ na, sɔsɔ n bu ti yɛ baŋŋi ŋɔn yi ya'aseaa na. Tirima mun zaasa mi doo wa ŋɔn yi ya'aseelli ni na.” 28Yisa ŋɔn daa ti wulisiri Gyeeŋŋu Yiri maa ni la, u daa tɔ'asi ni kukɔtitaari n‑yɛli, ni, “Kala ya siri mi ma ka baŋŋi man yi ya'aseelli na? N bu kyɛ na m mammantoori yiiko puuni. Ŋɔn tum ma na maa nyɛ la yɛlimaŋni daana. Yarima bu mi u, 29amaa man mi u, dama n yi la u saani na, ŋɔna mun daa tum ma na.” 30Ba daa boori la ba gbaai u, amaa sɔsɔ daa bu zaŋŋi u nuu n‑siisi u, dama u saha daa na bu paai. 31Amaa daadam maa puuni niriba pampam daa niŋi u yɛdda ka daa yɛli, ni, “Kala Masiiya maa yi ti kyɛ na, u nin ti toaai n‑tum alahazibu tuma n‑gaari doo wa ŋɔn tum seem wa?”

32Farisii dima maa daa wum daadam maa ŋɔn daa waasiri n‑tɔ'asiri Yisa yɛla seem maa. Dinzugu Farisii dima maa ni gyeeŋŋu toondaandima maa daa tum ba Pirinsi ni ba ti gbaai Yisa. 33Yisa daa yɛliya, ni, “N yɛ bɛ ya saani la saha beela kɔkɔa, ka n nin ti laa m‑bakki n‑labi Ŋɔn daa tum ma na maa saani. 34Ya nin ti bɔ n ziiya, amaa ya ku ti nya ma, dama ya ku toaai n‑kyaŋŋi man ti yɛ m‑bɛ seela maa.” 35Yɛhudiya dima maa daa yɛli taaba, ni, “Ya'akani ka u wa ka ti bu yɛ nya u? U ti yɛ n‑kyaŋŋi la ti niriba ŋɔn bɛ Griika tinseesi la ni n‑wulisiri ban, bee? 36U yɛliya, ni, ti nin ti bɔ u ziiya ka ku nya u; ni, ti mun ku toaai n‑kyaŋŋi ŋɔn ti yɛ bɛ seela maa. Di wulisi la wula?”

37Kyuu maa naari ni - ka dabsitibsiri maa daari nla - Yisa daa doaai saazugu n‑tɔ'asi ni kukɔtitaari n‑yɛli, ni, “Kɔnyuuri yi mari sɔ zaa, u kyɛm n saani na nti nyu. 38Kaman Litaafi ŋɔn pun yɛli zaŋŋi n‑kyaŋŋi ŋɔnkam niŋi ma yɛdda, ni, ‘nyɔvuri kɔpɔbrim nin buli n‑yi u sufu ni na.’ ” 39Yisa daa tɔ'asi n‑kpa Sii Kasi yɛla, ni, ban niŋi u yɛdda la nin ti yɛ deaai Sii maa. Lala saha maa Sii Kasi maa daa na bu kyɛ na, dama Yisa daa na bu paai naam gyirima neesim maa ni.

40Daadam maa ni ninvugseeba daa wum ŋɔn daa tɔ'asi seem maa ka daa yɛli, ni, “Doo wa siri nyɛ la anabi maa!” 41Ka seeba daa yɛli, ni, “Ŋɔna n nyɛ Masiiya la!” Amaa ka seeba mun yɛli, ni, “Masiiya maa bu yɛ yi Galilii na. 42Litaafi yɛliya, ni, Masiiya maa yɛ yi la NaaDauda za'anɔri ni na, ka u ti yi Bɛtlihɛm tiŋŋa ni na, tinseaa NaaDauda ŋɔn daa bɛ ni la.” 43Dinzugu nangbanwala daa bɛ daadam maa puuni Yisa zugu. 44Ba seeba daa boori la ba gbaai u, amaa sɔsɔ daa bu zaŋŋi u nuu n‑siisi u. 45Pirinsi ŋɔn daa ti labi gyeeŋŋu toondaandima maa ni Farisii dima maa saani na, ba daa boosi ba, ni, “Wula ka ya bu mari u na?” 46Ka Pirinsi maa labsi n‑yɛli ba, ni, “Sɔ na zi n‑tɔ'asi hoo doo maa yɛttɔ'a wa taabu!” 47Ka Farisii dima maa boosi ba, ni, “U na'a yɔmsi ya gba ni? 48Ya na mi n‑nya ka kpambaya, bee, Farisii dima ninvugyinni n niŋi u yɛdda? 49Ay! - Amaa daadam wa zaa bu mi Musa zaalikpana la ŋɔn nyɛ seem, dinzugu ba bɛ la mbusu ni!” 50Ninvugtibsa wa yinni ŋɔn daa bɛ bɛni daa nyɛ la Nikɔdiimusi - dɔsɔ ŋɔn daa pun kyaŋŋi nti nya Yisa la. U daa yɛli u taaba maa, ni, 51“Ti zaaligu soori puuni, ti ku toaai n‑tu sɔ pɔi ka naayi yi wum u yɛttɔ'a, bee, ka naayi boosi m‑baŋŋi ŋɔn niŋi seela maa.” 52Ka ba daa yɛli, ni, “Eeh! - i gba yi la Galilii na, bee? Kur gɔsim Litaafi maa suŋŋa: i nin baŋŋi, ni, anabisɔ bu yɛ yi Galilii na.” [[53Tɔ, ka ba sɔkam zaa daa kuli u yiri.

Voafantina amin'izao fotoana izao:

GYƆNI 7: maw

Asongadina

Hizara

Dika mitovy