GYƆNI 6

1Di nyaaŋŋa, Yisa daa kyaŋŋi n‑yakki Galilii mɔ'ari la, seaa kan yuuri laa m‑boonni Taibiriyasi mɔ'ari la. 2Ka daadam pam daa dɔli u, dama ba daa nya ka u tum alahazibu tuntumsa n‑tibri baaridima la. 3Yisa daa du zoori zugu nti zini bɛni, ŋɔn ni u nyaandɔliba maa. 4Di daa bu yuui ka Yɛhudiya dima maa ya puusi ba Yakki-n‑Gaari Kyuu la. 5Ka Yisa daa ti gɔsi n‑nya ka daadam pam daa kyɛnni u saani na, ka u daa boosi Filipi, ni, “Ya'akani ka ti yɛ nya bundirigu n‑da n‑diisi daadam pam wa zaasa?” 6(U daa yɛli lala ni u zamsi Filipi n‑nya; amaa yɛlimaŋni, u daa pun mi ŋɔn yɛ niŋi seem zaa.) 7Ka Filipi daa yɛli u, ni, “Halli ti yi yɛ da bundirigu ka sɔkam zaa deaai beelabeela gba, di nin gaari anzulifa la'akɔba kɔbsiyi.” 8U nyaandɔliba maa ni sɔa, Anduru, ŋɔn nyɛ Saimoon Piita sunzɔ la, daa yɛli u, ni, 9“Bidibbila m bɛ kpa m‑mari boroboro kpila abanu ni zimi abayi, amaa a mun pun ku sakki niriba wa zaa.” 10Ka Yisa yɛli ba, “Ya kyɛ ka niriba maa zinni tiŋŋa.” (Mɔmaasa mun daa bɛ bɛni pam). Ka daadam maa zaa daa zinni tiŋŋa; ba daa nyɛ la kaman ninvugtusa anu laasaabu. 11Yisa daa zaŋŋi boroboro maa, ka puusi Naawunni, ka yi puri a n‑tɔri n‑tɔri daadam seeba ban daa zi tiŋŋa maa. Lala ka u daa niŋi zaasim maa gba, ka ba zaa daa di nti sakki ban boori seem. 12Ba zaasa ŋɔn daa ti di n‑tigi, Yisa daa yɛli u nyaandɔliba, ni, ba la'asim dikyɛba an kpalim zaa, ni ba di kyɛ ka halli beela gba basi. 13Ka ba daa la'asi bunkyɛba seesi m‑paali peeri pii ni ayi - ban di boroboro kpila abanu maa ni ka kyɛ dikyɛba maa. 14Ka niriba ban daa bɛ bɛni maa daa nya Yisa ŋɔn tum makkri tuntumsa wa seem la, ka daa yɛli, ni, “Yɛlimaŋni anabisɔ ŋɔn daa yɛ kyɛ duniya ni na la nŋɔa.” 15Yisa daa pun mi, ni, ba nin kyɛ na m‑mugsi u n‑diisi u naam; dinzugu u daa bakki ka laa n‑kyaŋŋi n‑du zoori maa u kɔkɔa.

16Zaanoori ŋɔn daa ti paai, Yisa nyaandɔliba maa daa labi n‑kyaŋŋi n‑sigi mɔ'ari la ni, 17n‑kpɛ nyariŋŋu, n‑yakkri mɔ'ari maa n‑kpa Kapirinyum ya'ari sa. Ka yuŋŋu mari nti zibi ka Yisa na bu kyɛ ba saani na. 18Lala saha maa, pɛsigu n daa zeera n‑damni koom maa pam. 19U nyaandɔliba maa daa duusi nyariŋŋu maa n‑kyaŋŋi la kaman maala ata‑anaasi laasaabu, ka yi ti nya ka Yisa tɔm koom maa zugu n‑kyɛnni m‑pɔtti nyariŋŋu maa na, ka dabeem daa gbaai ba. 20Ka Yisa yɛli ba, ni, “Ya di kyɛ ka dabeem mari ya, ka mani nla!” 21Dizugu ba daa sakki n‑zaŋŋi u n‑kpeesi nyariŋŋu maa puuni; ka nyariŋŋu maa ŋɔn kur ti siisi tingbaŋŋu, ba daa di paai la ban daa wa ya'aseelli maa ni.

22Ka beoo ŋɔn daa neaai, daadam ban daa kpalim mɔ'aduuri la sa daa nya ka nyariŋŋu yinni kɔkɔ n sa bɛ ni. Ba daa mi suŋŋa, ni, Yisa sa bu la'am n‑kpɛ nyariŋŋu maa u nyaandɔliba saani, kulla nyaandɔliba maa n sa kpɛ m‑bakki. 23Amaa pampaŋŋɔ nyarinseesi n daa yi Taibiriyasi tiŋŋa n‑kyɛ na, halli nti paai hoo ban sa bɛ ya'aseaa la ni, sahanseaa ka Yisa sa puusi Naawunni boroboro maa zugu n‑ti ba ka ba ŋɔbi la. 24Ka zama maa ŋɔn daa ti baŋŋi, ni, Yisa ka bɛni, ŋɔn ni u nyaandɔliba gba, ba daa kpɛ la lala nyarima maa n‑kyaŋŋi Kapirinyum m‑boori Yisa ziiya. 25Ka ban daa ti paai u ka u bɛ mɔ'ari ya'ari sa maa, ba daa boosi u n‑yɛli, ni, “Ti Ba Rabbi, bɔn saha ka i paai kpa na?” 26Ka Yisa daa labsi n‑yɛli ba, ni, “Yɛlimaŋni ka n yɛtti ya wa, ni, di pa la yan sa nya makkri tunkarigu m‑baŋŋi ka gbinni maa zugu ka ya boori n zii maa, amaa yan sa ŋɔbi paanu maa n‑tigi la zugu ka ya boori ma. 27Yan di tumni m‑boori bundiriseelli din bu yuura, amaa ya tumma m‑bɔ bundiriseelli din nin kpalim m‑paai nyɔvuri kan ka tariga. Lala bundirigu maa ka Ninsaala Bii maa nin zaŋŋi n‑tisira. Dama ŋɔna n nyɛ sɔ ti Ba Naawunni ŋɔn pun daalim n‑wulisi, ni, u nyɛ la u dinni.” 28Ka ba daa boosi u, ni, “Ka ti ya niŋi la wula n‑tum Naawunni ŋɔn boori ni ti tum seem?” 29Ka Yisa labsi n‑yɛli ba, “Naawunni ŋɔn boori yan tum seem nŋɔa#:- ya niŋma yɛdda n‑niŋi ninvugsɔ ŋɔn daa tum na maa.” 30Ka ba daa yɛli u, “Alahazibu bɔ ka i ya tum ka ti nya ka niŋi i yɛdda? Bɔ ka i ya tum? 31Ti yaadima ban daa bɛ yoo ni sahanseaa la, ba daa diri la manna - kaman Litaafi ŋɔn yɛli seem, ni, ‘U daa kyɛ ka paanu yi arizana ni na ka ba di.’ ” 32Ka Yisa yɛli, “Yɛlimaŋni ka n yɛtti ya wa, ni, di pa la Musa n daa ti ya arizana ni paanu maa, amaa di nyɛ la m Ba Naawunni n tiri ya arizana ni paanu ni yɛlimaŋni maa. 33Naawunni ŋɔn tisiri paanuseelli maa nyɛ la ninvugsɔ ŋɔn yi arizana ni na n‑zaŋŋi nyɔvuri n‑tiri duniya dima maa.”

34Ka ba daa susi u, ni, “Ka dinŋɔna, ti Bapira, kur zaŋŋma paanu wa n‑ti ti sahakam!” 35Ka Yisa yɛli, “Mani n nyɛ paanu wa kan tiri nyɔvuri la. Ŋɔnkam kyɛ n saani na - kɔm ku laa n‑gbaai u; ka ŋɔnkam mun niŋi ma yɛdda - kɔnyuuri ku laa n‑gbaai u yaasa. 36Amaa m pun yɛli ya, ni, ya pun nya ma amaa ya ku sakki n‑niŋi ma yɛdda. 37M Ba ŋɔn zaŋŋi sɔ zaa n‑ti ma la nin kyɛ n saani na. Man mun ku kari sɔ zaa ŋɔn kyɛ n saani na; 38dama man bu yi arizana ni n‑sigi na ni n tum la m maŋtoori yuubu, amaa Ŋɔn tum ma na la yuubu ka n tumna. 39Ka Ŋɔn tum ma na la yuubu maa nŋɔa#:- ni, m mari Ŋɔn ti ma bunseelikam; ni, n di kyɛ ka sɔ zaa baasi yɔri, amaa ka n kyɛ ka sɔkam yisigi kum ni na Zaadaari maa. 40Yaasa, Ŋɔn tum ma na la yuubu maa nŋɔa#:- ni, ŋɔnkam nya Naawunni Bii maa ka niŋi u yɛdda la nin nya nyɔvuri kan ka tariga, ka n nin kyɛ ka u yisigi kum ni na Zaadaari maa.”

41Ka Yɛhudiya dima wa daa piili n‑nyurimni ba kparima n‑niŋni u, u yɛligu zugu, ŋɔn yɛli, ni, u nyɛ la paanuseelli din yi arizana ni n‑sigi na maa. 42Ka ba yɛtti taaba, ni, “Pa Gyoosɛfi bii Yisa n nyɛ u? Ti mi u ba ni u ma - ka wula ka u yɛtti, ni, u yi la arizana ni na?” 43Ka Yisa daa yɛli ba, ni, “Ya kyɛli ya kparima nyuriŋŋu wa! 44Sɔ ku toaai n‑kyɛ n saani na, di yi pa la m Ba ŋɔn tum ma na maa ti booli u n‑ti ma na, ka n nin kyɛ ka u yisigi kum ni na Zaadaari maa. 45Anabidima maa sɔppu ni di daa sɔbiya, ni, ‘Naawunni n yɛ wulisi sɔkam zaa.’ Ŋɔn kam zaa wum n‑tisi u Ba Naawunni ka baŋŋi u wulisigu wa gbinni nin kyɛ n saani na. 46Dinŋɔ bu wulisi, ni, sɔ na mi n‑nya Naawunni ti Ba maa; ŋɔn bɛ Naawunni saani la kɔkɔ n na mi n‑nya u Ba maa. 47N yɛtti ya la yɛlimaŋni: ŋɔn kam zaa niŋi yɛdda mari nyɔvuriseaa kan ka tariga. 48Mani n nyɛ nyɔvuri boroboro. 49Ya yaadima daa di la manna maa yoo la ni, amaa ka daa kpiya. 50Amaa boroboroseaa kan yi arizana ni n‑sigi na maa nŋɔa; ŋɔn kam zaa ŋɔbi ka ku kpi yaasa. 51Mani n nyɛ nyɔvuri boroboro kan yi arizana ni na maa. Ŋɔn kam zaa ŋɔbi lala boroboro maa, u nin bɛ ni halli saha kan ka naari. Boroboroseaa man ŋɔn tisiri maa nyɛ la n ningbiŋŋu, ka n zaŋŋni n‑tisira, din nin kyɛ ka duniya wa dima ti nya nyɔvuri.”

52Dinŋɔ n daa kyɛ ka Yɛhudiyadima maa piili la sugyeaa nangbankpeemni ba sunsukkuni. Ka ba boosiri taaba, ni, “U ya niŋi la wula n‑zaŋŋi u ningbina n‑ti ti ka ti ŋɔbi?” 53Ka Yisa yɛli ba, “Man yɛtti ya la yɛlimaŋni: ya yi bu ŋɔbi Ninsaala Bii ningbiŋŋu numni ka nyu u ziim la, ya ku nya nyɔvuri ya mammansi ni. 54Ŋɔn kam zaa ŋɔbi n ningbiŋŋu numni ka nyu n ziim maa mari nyɔvuri kan ka naari, ka n nin kyɛ ka u yisigi kum ni na Zaadaari maa. 55Dama n ningbina n nyɛ bundirimaŋni; ka n ziim maa nyɛ bunnyuurimaŋni. 56Ŋɔn kam zaa ŋɔbi n ningbiŋŋu wa ka nyu n ziim wa, di daama bɛ la ma ni ka man gba bɛ u ni. 57M Ba sɔ ŋɔn vu maa n tum ma na, u zugu ka n bɛ n nyɔvuri ni. Ka lala n nyɛ di n‑ti ninvugsɔ ŋɔn ŋɔbi n ningbiŋŋu maa - ŋɔn gba nin bɛ u nyɔvuri ni man zugu. 58Tɔ, kanŋɔ nyɛ la boroboroseaa kan yi arizana ni n‑sigi na; di pa la ya yaadima ŋɔn daa ŋɔbi boroboro ka daa kpi la taabu. Ŋɔn kam ŋɔbi boroboro wa nin bɛ ni halli saha kan ka naari.” 59Yisa ŋɔn daa ti wulisiri Kapirinyum la'aŋŋu duu la ni, ka u daa tɔ'asi dinŋɔa.

60U nyaandɔliba maa pam daa wum dinŋɔ ka yɛli, ni, “Wulisigu wa kpeema pam nti ya'ai. Ŋɔni n yɛ n‑toaai n‑wum n‑ti ka?” 61Ba daa bu yɛli u, amaa Yisa daa pun mi, ni, ba nyurimni la u yɛttɔ'a wa zugu, ka u daa yɛli ba, ni, “Kala, dinŋɔ zugu ka ya gba boori ya labi nyaaŋŋa? 62Tɔ, ka ya yi da nya ka Ninsaala Bii labri ŋɔn daa pun bɛ ya'aseaa la, fa? 63Bunseelli din tisiri nyɔvuri nyɛ la Naawunni Siiya Kasi: ninsaala yiiko ka tunsɛseaa halli beela. Yɛttɔ'aseesi man tɔ'asi n‑ti ya maa nyɛ la Sii maa yɛla n‑tiri nyɔvuri na. 64Amaa ni di zaa yɔri ya seeba bu niŋi yɛdda.” (Yisa daa pun mi suŋŋa ban ti ya za'asi yɛdda niŋbu, ni ŋɔn ti ya figsi u maa.) 65Ka u daa laa n‑yɛli m‑paasi, ni, “Nŋɔ zugu ka n yɛli ya, ni, sɔsɔ ku toaai n‑kyɛ n saani na ka di pa ni m Ba maa n tisi soori ka u niŋi lala.” 66Dinŋɔ nyaaŋŋa ka u nyaandɔliba maa pam daa ŋmaligi n‑kyaŋŋi n‑labi ka bu laa n‑dɔli u yaasa. 67Ka Yisa daa boosi u nyaandɔliba piiya ni ayi la, ni, “Ka yarima muna, ya nin boori ya gba bakki?” 68Ka Saimoon Piita yɛli, ni, “N dugma, ŋɔni saani ka ti ya kyaŋŋi? Nyini m mari yɛliseesi an tisiri nyɔvuri kan bu naara. 69Ka tirim mun yi niŋi yɛdda m‑baŋŋi, ni, nyini n nyɛ ninvugkasisɔ ŋɔn yi Naawunni saani na.” 70Ka Yisa yɛli, ni, “Mani n gamsi yarima ninvugpiiya ni ayi wa, bee m ma'ai ni? Di zaa yɔri, ya yinni nyɛ la Sintaani nira!” 71U daa tɔ'asiri la Saimoon Isikariyɔti bii Gyuudasi yɛla. Dama, halli ni ŋɔn daa nyɛ Yisa nyaandɔliba maa ni yinni maa zaa yɔri, ŋɔna n daa nyɛ ŋɔn ti ya figsi u maa.

Voafantina amin'izao fotoana izao:

GYƆNI 6: maw

Asongadina

Hizara

Dika mitovy