Kuxh 13

Uvaʼs ibʼaxabʼsat quBʼaal Jesuus talax vitilpul el u tostiuxh t-Jerusaleen

Tio 24.1-2; Luk 21.5-6

1Eletz vet ul Jesuus tu nimla atibʼal tuulbʼal u tostiuxh, tul ech tal vaʼl uvaʼ nikich itxhus tibʼ kʼatz Jesuus, s-eche: —Txhusul qetz, ¡saqi! ¡Aʼxh vankin sivan bʼanbʼemal tiʼ ibʼitix u mamaʼ atibʼal uvaʼe! Atz ¡aʼxh bʼaʼnla txhaq otzotze! —xeʼt te Jesuus.

2Yaʼne ech tal Jesuus s-eche: —Eche u mamaʼ atibʼal uvaʼ nik eeleʼ, tan laʼ opoon invaʼl qʼij uvaʼ tetxhal laʼ tinpul el s-kaqaayil. Tul tira yeʼl invaʼtoʼq sivan laʼ kaj tiibʼa imol, —xeʼt Jesuus.

Uvaʼs talt quBʼaal Jesuus kam laʼ utxhi uvaʼs yeʼnaq uloq u kʼaxkʼo tiibʼa u tenam Jerusaleen

Tio 24.3-28; Luk 21.7-24; 17.22-24

3Aqʼbʼetz vet Jesuus tu vitz Inqʼa Oliivo, uvaʼ vatz bʼen u nimla atibʼal tuulbʼal u tostiuxh, tul kʼuqeʼv Jesuus tzitzi. Yaʼne itxhok Luʼ tuchʼ Jakoovo tuchʼ Xhun tuchʼ Lixh iyolon tuchʼ Jesuus s-junal. 4Tul echaq tal te Jesuus s-eche: —Al s-qe ¿jatuetz laʼ ibʼan inqʼa yol uvaʼ nik aaleʼ? Atz ¿kam tetxhlal laʼ ul s-bʼaxa?, yaʼne laʼ elaʼpun jankʼal inqʼa yol uvaʼ nik aaleʼ, —xeʼtaq te Jesuus.

5Tul ech tal Jesuus s-eche: —Poro xeevaqxh etibʼ, tul yeʼxhal kuxh laʼ eesan ex t-bʼey tiʼ vinnimaleʼ. 6Tan at inqʼa laʼ uli uvaʼ laʼ kʼamon vinbʼij. Tul ech laʼ motx tal junun s-eche: «Ine u Kriisto,» chaq tul junun. Tul mamala xaol laʼ teesa t-bʼey.

7Tul laʼ motx etabʼi uvaʼ mamala txhʼaʼo sebʼte. Atz laʼ motx etabʼi uvaʼ tal kuxh vet laʼ motx iyolvat inqʼa xaol s-vatzaq tiʼ u txhʼaʼo. Poro yeʼl ex laʼ motx xoʼv ex, tan echxh laʼ ibʼane. Poro yeʼxnaqetz opoonnaʼqle viqʼiil vimotxtebʼal. 8Tan laʼ itxhʼaʼoi tibʼ inqʼa nimla tenam s-vatzaq. Tul laʼat motx itxhʼaʼoi tibʼ inqʼa mam iqʼesal s-vatzaqil. Atz laʼ pal kabʼnaano tuulbʼalaq inqʼa tenam. Tul mam vaʼy laʼ ibʼana. Tul laʼ kuxh motx vavalkabʼ vet inqʼa xaol. Ayaʼletz kuxh inqʼae, laʼ utxhi uvaʼs yeʼnaq uloq in vatz txʼavaʼ inpaqte. Poro aʼetz kuxh vixeʼtebʼal u mam kʼaxkʼoe, eche laʼ ixeʼt itxhoʼm vaʼq ixoq tiʼ talal vineʼ.

9Echetz antxh ex, etil etibʼ jununil ex, tan laʼ motx pal ex titzaʼlal tiʼ vinnimaleʼ. Tan laʼ oksal ex vatz inqʼa aqʼol kuʼ yol tinuqul. Tul antxh laʼ tzʼuʼmalik ex t-inqʼa kʼulbʼal ibʼ. Atz laʼ iqʼol ex vatz inqʼa iqʼesal inqʼa nimla txhaq tenam, atz vatz jolt inqʼa mam iqʼesal. Echetz laʼ etalt vete, kam inqʼa ilel etaʼn s-viʼ, te inqʼa iqʼesal.#Vibʼanoʼm inqʼa Apoostol 4.5-22; 24.10-23 10Bʼaxaetz laʼ nal paxsal inuqul inqʼa bʼaʼnla txhaq yol s-viʼ tuulbʼal inqʼa tenam s-kaqaayil, yaʼne laʼ opoon vet vimotxtebʼal.

11Poro yeʼl ex laʼ el etaanima, tiʼ uvaʼs laʼ etiqʼol vatz inqʼa iqʼesal. Atz jitoq laʼ etitzʼa kam uvaʼ laʼ etala. Pet taʼn kuxh laʼ etal kam uvaʼ laʼ tal quBʼaal Tiuxh t-vetitzʼabʼal tuulbʼal uvaʼs een vet ex vatz inqʼa iqʼesal. Tan jit kuxh vet ejunal laʼ yolon ex, pet aʼ vet viTiuxhil Tiuxh laʼ yolon tetziʼ.

12Poro nima tel kuxh kam laʼ utxhi. Tan antxh invaʼq u atzika, uvaʼ jit niman vetz, laʼ alon ikameʼl invaʼq titzʼin, uvaʼ niman vetz. Atz antxh invaʼq u bʼaala, uvaʼ jit niman vetz, laʼ alon ikameʼl invaʼq ikʼaol, uvaʼ niman vetz. Atz antxh inqʼa kʼaola meʼala, inqʼa jit niman vetz, laʼ yani. Tul laʼ tal iyatzʼax el itxutx ibʼaal, uvaʼ niman vetz. 13Tul mamala xaol laʼ txhiʼan setiʼ, tiʼ venimat in. Pet jaʼl ex, uvaʼ tira kʼayimal etaanima tiʼ vinnimaleʼ, tul aʼetz exe, uvaʼ laʼ kolox ex vatz u kʼaxkʼo uvaʼ laʼ taqʼ quBʼaal Tiuxh tiibʼa inqʼa aj paʼvom. Echetz yeʼ laʼ etanbʼat kae vinnimaleʼ tetxhal ekameʼ.#Apokaliipsis 6.15-17; 15.7

14Echetz nik valte sete, tiʼ uvaʼ laʼ etil vet ibʼanax u txoqebʼal kʼuulla txumbʼal uvaʼ itzʼibʼa ka Danieel, u qʼexsanich tetz viyol quBʼaal Tiuxh. Tan aʼ laʼ ibʼanvat tu tatibʼal quBʼaal Tiuxh tu tostiuxh tu Jerusaleen. Taʼnetz kuxh laʼ etil tutxh uvaʼ nik valeʼ, tul aʼl bʼaʼn, nal kuxh laʼ etzʼeq etibʼ t-inqʼa vitz. Tan aʼetz vet inqʼa yaabʼla txumbʼale laʼ bʼanaxi, inqʼa txumlebʼal laʼ utxh tuul okaʼp u tostiuxh tal uvaʼ yeʼ laʼ utxhk ibʼanax u yeʼbʼaʼn. Echetz jaʼl ex, uvaʼ een ex tuulbʼal Judeea s-laʼ tutxh inqʼa txumlebʼal, tul nal laʼ etzʼeq etibʼ. (In Kuxh nik alon uvaʼ bʼenoq u yol sete, ex uvaʼ laʼ sikʼlen.)#Danieel 9.27; 11.31; 12.11{*}#13.14 Danieel 9.27; 11.31; 12.11. ¿Kam talax u yol uvaʼ ‹txoqebʼal kʼuulla txumbʼal laʼ bʼanaxi› tal quBʼaal Jesuus tzitza? Aʼ ibʼaxbʼsa quBʼaal Jesuus talax val u txumbʼal uvaʼ laʼich utxh tuulbʼal u tostiuxh uvaʼ tira kantxhaq laʼich bʼanaxi. Atz eesabʼ tetz iqʼij quBʼaal Tiuxh ibʼana. Tul elaʼpetzxh uvaʼ ibʼaxabʼsa quBʼaal Jesuus talaxeʼ, tan aʼxh ibʼant u yaʼbʼ laval imutxʼ (70) m.t.J. Tul opoon inqʼa sol, inqʼa aj Rooma, tul ex tokebʼe u tenam Jerusaleen. Tul mam yeʼbʼaʼn ex ibʼan tuulbʼal u tenam; atz tira ex teesa iqʼij u tuulbʼal u tostiuxh. Tan ex iyatzʼ vet inqʼa txoo viʼ u natxhkʼuulabʼal, uvaʼ alel taʼn Moisees uvaʼ yeʼ laʼ utxh ibʼanbʼeleʼ. Tul ex itzʼeʼsa inqʼa uʼ uvaʼ tzʼibʼamich viyolbʼal quBʼaal Tiuxh s-tuul, inqʼa bʼalqʼumiche, atz inqʼa kolelich tu tostiuxh. Tul mamala inqʼa kam uvaʼ nikich itxakun tuul u tostiuxh telqʼaaq bʼen. Tul nima vatzlenich kuxh tiqleʼm inqʼa laq atich tuul u tostiuxh, atz nima vatzlenich kuxh ichʼijeʼ. Tan atichaq uvaʼ ooro tiqleʼm; atz atich plaata tiqleʼm; atz atich vroonse tiqleʼm. Tul atich viqbʼal tetz u tostiuxh uvaʼ ooroich tiqleʼm. Tul itzʼeʼsaetz inqʼa sol u tostiuxh tiʼ teluʼl inqʼa ooro inqʼa atich ok vatz bʼitzʼ, atz inqʼa atich ok tuul okaʼp inqʼa bʼitzʼ. Echetz imotx kuule inqʼa ooro, tul motx tiqʼo vet inqʼa sol. Tul tira motx itilpu vet kuʼl u tostiuxh. Pet taʼn kuxh kaj vet vixeʼ, uvaʼ atich bʼen t-txʼavaʼ. Aʼetz u ‹txoqebʼal kʼuulla txumbʼale uvaʼ bʼanaxi› uvaʼ ibʼaxabʼsa quBʼaal Jesuus talaxeʼ. Tul tiqʼo tzaan quBʼaal Jesuus viyol Danieel tiʼ talaxeʼ. Tul ant nik tal u yol tiʼ kam uvaʼ nik tal tu versiikulo vajxaqlaval tetxhal topoon t-bʼelelaval uvaʼ: —mam kʼaxkʼo laʼ ibʼan tuulbʼal inqʼa qʼij inqʼae, val u kʼaxkʼo uvaʼ yeʼx paqxoʼq utxhi uvaʼs ixeʼt tzaan u qʼij saq, —chich inqʼa versiikulo.

15Atz jaʼl ex uvaʼ een at jaʼp ex viʼ etotzotz, tul jitoq laʼ kuʼl ex tetotzotz tiʼ tiqʼol el invaʼq kam etetz. 16Atz jaʼl ex uvaʼ een ex t-vitz, tul yeʼl ex laʼ qʼaʼv ex tu tenam tiʼ tiqʼol veqinkin oksaʼm uvaʼ nik etxhasoʼk setiʼ. Pet nal laʼ etzʼeq etibʼ. 17¡Txumlebʼalxh ivatz inqʼa ixoq, inqʼa oybʼalte, atz tuchʼ inqʼa ixoq, inqʼa yaʼn ineʼ nik itxhʼuʼuneʼ tuulbʼal inqʼa qʼij inqʼae!

18-19Tan mam kʼaxkʼo laʼ ibʼan tuulbʼal inqʼa qʼij inqʼae, val u kʼaxkʼo uvaʼ yeʼx paqxoʼq utxhi uvaʼs ixeʼt tzaan u qʼij saq. Tul yeʼl inpaqt laʼ ilix invaʼtoʼq kʼaxkʼo eche uvaʼ laʼ ul tuulbʼal inqʼa qʼij inqʼa tuleʼ. Pet abʼivaq te quBʼaal Tiuxh uvaʼ jit koq tiqʼiil txun txheʼv laʼ emuqvat etibʼ vatz u mam kʼaxkʼo. 20Oqetz yeʼ laʼ iyaʼsa quBʼaal Tiuxh u mam kʼaxkʼo tuulbʼal inqʼa qʼij inqʼae, tul yeʼxhabʼil invaʼq laʼ oleʼv tiʼ ikolt tibʼ vatz u kamchil. Pet tiraetz laʼ motx kame s-kaqaayil. Pet tiʼ ikolt quBʼaal Tiuxh inqʼa chʼexel vet taʼn, tul laʼ iyaʼsa quBʼaal Tiuxh u mam kʼaxkʼo tu qʼij uvaʼe. 21-22Tan antxh laʼ txhejk inqʼa xaol sexoʼl uvaʼ laʼ tzʼeqon tzij. Tul: «Ine u Kriisto,» chaqe. Atz laʼ tal tibʼ s-qʼexsan tetz viyol quBʼaal Tiuxh. Tul laʼ motx ikʼutxh txha inqʼa etxhlal, atz inqʼa mam yol tilix sevatz, tiʼ tetxhbʼul eteesal t-bʼey. Tul aʼ kuxh kʼaqel taʼn, uvaʼ laʼ motx el inqʼa ichʼexoʼm quBʼaal Tiuxh t-bʼey. Poro oq ech laʼ tal invaʼq u xaol sete s-eche: «Il u Kriisto, ile uya.» Atz «Ile at tzitzi,» chaq eʼl ex, pet yeʼ laʼ eqej u yol. 23Tul xeevaqxh etibʼ, tan ile qat inbʼaxabʼsal talax kaqaayil inqʼa kam sete uvaʼ laʼ utxh t-inqʼa qʼij, inqʼa tuleʼ.

Uvaʼs talt quBʼaal Jesuus iqʼaʼv vatz u txʼavaʼ inpaqte

Tio 24.29-35, 42-44; Luk 21.25-36

24Poro taʼn kuxh laʼ pal u mam kʼaxkʼo tuulbʼal inqʼa qʼij inqʼae, tul:

«Laʼ tokbʼix ivatz u qʼij.

Atz yeʼ laʼ txiqun vet u ichʼ.

25Tul laʼ motx el tzaan

inqʼa txʼumil vatz amlikaʼ.

Atz jankʼalxh uvaʼ at vatz amlikaʼ

laʼ jalp tatineʼ.»#Apokaliipsis 6.12-13; Isaiias 13.10; Esekieel 32.7; Joeel 2.31

26Yaʼne laʼ motx til inqʼa tenam vul inpaqte tuchʼ u nimla vatineʼ, atz tuchʼ u viqleʼm xoʼl suʼtzʼ vatz amlikaʼ, in, u Kʼaola uvaʼ bʼen s-alam aanima.#Danieel 7.13 27Tul laʼ intxhaq tzaan inqʼa inaanxel. Atz laʼ motx imol tzaan inqʼa xaol, inqʼa chʼexel vet vaʼn, jankʼalxh inqʼa at tuulbʼal kaj xojbʼal u vatz amlikaʼ, atz jankʼalxh inqʼa at vet opoon tuulbʼal vimotxebʼal u vatz txʼavaʼ.#Apokaliipsis 14.14-20; Tio 13.47-50

28Eloq kuxh etxumbʼal tiʼ tzeʼ u iigo. Tan oq nik ixeʼt vet inqʼa ixaq tzeʼ chʼexpoq, atz nik teluʼl vixaq, tul etootzaqle uvaʼ, aʼ vet u saqʼie toq eloq. 29Echatetz uvaʼe, laʼ ibʼan u vulebʼal inpaqte. Tan oq laʼ etil vet tutxh inqʼa yol, inqʼa nik val sete, tul echetz laʼ ibʼene sete uvaʼ aalemal inaqbʼix vet inqʼa qʼij tetz u vulebʼal inpaqte. Atz txʼebʼoʼmy kuxh vet in eche vaʼq xaol uvaʼ txʼebʼomy kuxh vet tziʼ jubʼal. 30Pet toq val sete: Yeʼnaq sotzoq el inqʼa qumol, inqʼa itzʼlel s-txheel, uvaʼs laʼ telaʼpun inqʼa yol. 31Tan jankʼalxh inqʼa inyol uvaʼ nik valeʼ, tan tetxhal kuxh laʼ motx elaʼpun. Pet u vatz txʼavaʼ, atz u vatz amlikaʼ, tan tetxhal laʼ pali, atz laʼ jalpi. 32Poro yeʼxhabʼil invaʼq inqʼa xaol, ootzaqin tetz kam qʼij, atz kam oora laʼ ul in inpaqte. Atz jitoq inqʼa aanxel, uvaʼ een t-amlikaʼ, ootzaqin tetz. Atz jitoq in, in viKʼaol quBʼaal Tiuxh. Pet taʼn kuxh u quBʼaal Tiuxh ootzaqin tetz. 33Tul ¡noqxh etil etibʼ! Atz ¡natxhnotxhoq etatineʼ! Atz ¡bʼanoq kuxh etutxheʼ! [Tul natxhvaq Tiuxh.] Tan yeʼ etootzaqle jatu laʼ ul in inpaqte.

34Tan ech laʼ ibʼan u vulebʼal inpaqte eche ibʼan val u vinaq uvaʼ bʼen s-naatxh. Tul taqʼ ka tiqleʼm junun inqʼa taqʼonvil tiʼ taqʼonv tu totzotz. Tul ibʼekʼ ka te u xeen tziʼ peʼ, tiʼ uvaʼ natxhnotxhoq tatin tiʼ ixeeleʼ.

35Echetz natxhnotxhoq kuxh etatineʼ, tan yeʼ etootzaqle jatu laʼ ul in. Tan ech laʼ vul inpaqte, eche laʼ tul u aj otzotz. Tan maq aʼ laʼ iqʼeqxeʼ; atz maq aʼ, laʼ itxhaqʼaan aqʼbʼal; atz maq aʼ laʼ toqʼ kaxhan; atz maq s-qʼalaʼm. 36Tan yeʼ kuxh taqla laʼ ul in. Tul yeʼ insaʼ uvaʼ ech laʼ ul inleqt ex, eche ivat vaʼq xeen tziʼ jubʼal. 37Tan jankʼalxh inqʼa yol uvaʼ nik valeʼ, tan etetz tuchʼ inqʼa niman vetz. Echetz ¡natxhnotxhoq kuxh etatineʼ! —xeʼt Jesuus te inqʼa nikich itxhus tibʼ s-kʼatza.

Voafantina amin'izao fotoana izao:

Kuxh 13: ixlC

Asongadina

Hizara

Dika mitovy