Kuxh 12

Uvaʼs txumbʼalimal ibʼant quBʼaal Jesuus eela inqʼa iqʼesal uqʼeʼybʼal tuchʼ jolol inqʼa yaabʼla txhaq kʼamol txʼavaʼ

Tio 21.33-46; Luk 20.9-19

1Yaʼne ech vaʼt u yol uvaʼ txumbʼalimal talt Jesuus s-eche: —Atich val u bʼaal txʼavaʼ uvaʼ ex tava iuuva t-vitxʼavaʼ. Tul ipeʼ tiʼ vitxʼavaʼ. Atz ibʼit val u atibʼal tal uvaʼ laʼ patxhʼaxik el taʼlil inqʼa uuva. Tul ibʼit vaʼt otzotz uvaʼ niim jaʼi, s-xeebʼ tetz viuuva itxhika. Tul taqʼ ka vitxʼavaʼ s-kʼam, uvaʼ at txhiko s-tuul, te jolol inqʼa kʼamol txʼavaʼ. Tul bʼen vet u bʼaal txʼavaʼ t-invaʼt tenam s-naatxh.#Isaiias 5.1-2

2Opoonetz vet viqʼiil iqʼanbʼ ivatz inqʼa uuva, tul itxhaq vet tzaan u bʼaal txʼavaʼ val u taqʼonvil tiʼ ijaqax ivatz inqʼa itxhiko te inqʼa kʼamol txʼavaʼ tiʼ u kʼambʼal tetz. 3Poro tiletz vet inqʼa kʼamol txʼavaʼ taqʼbʼ u aqʼonvil, tul qʼosox vet taʼn. Tul tira yeʼl uuva aqʼax bʼen s-tiʼ.

4Yaʼne itxhaq tzaan u bʼaal txʼavaʼ vaʼt u taqʼonvil. Poro aʼl takʼonsal iviʼ u aqʼonvil s-sivan taʼn inqʼa kʼamol txʼavaʼ. Tul aʼl ichʼixvisaleʼ, atz qʼaʼvisal vet bʼen inpaqte.

5Yaʼne tikʼ itxhaq tzaan u bʼaal txʼavaʼ invaʼt u taqʼonvil. Poro yatzʼelat tel taʼn inqʼa kʼamol txʼavaʼ. Yaʼne itxhaq bʼen jolt inqʼa taqʼonvil. Tul echatxh motx ibʼane. Tan at inqʼa akʼonsali; atz at inqʼa yatzʼel tel taʼn inqʼa kʼamol txʼavaʼ.

6Pet taʼn kuxh vet vaʼt vatz ikʼaol u bʼaal txʼavaʼ kaj s-kʼatza, uvaʼ kamyichxh s-tiʼ. Tul aʼetz vet uvaʼe, itxhaq bʼen tiyaʼtebʼal. Tan ech titzʼa u bʼaal txʼavaʼ s-eche: «Toqetz qeexoq vet naqe qʼaoq vinkʼaol taʼn inqʼa kʼamol txʼavaʼ,» xeʼte.

7Tiletz vet inqʼa kʼamol txʼavaʼ taqʼbʼ u kʼaola, tul ech tal vet s-vatzaq s-eche: «Aʼetz naqe uvaʼe, toq etzan ka inqʼa kam s-kaqaayil. Pet ¡etulvaq! Tul ¡quyatzʼvaq el naq! Tul ¡qetz vet inqʼa kamaq tetz naq s-kaqaayil toq ibʼaneʼ!» xeʼtaq veteʼ.

8Yaʼne txeyp vet u kʼaola, atz yatzʼax vet el. Tul een ex ikʼonivataq vet el vitxhiʼoʼl u kʼaola tiʼel tal uvaʼ avamalich inqʼa uuva.

9Poro ¿kametz laʼ ul ibʼan vet u bʼaal txhiko te inqʼa kʼamol nik enatxheʼ? Pet laʼetz ul vet u bʼaal txhiko, tul laʼ ul iyatzʼeʼl inqʼa kʼamol. Tul aʼ laʼ taqʼvat vet tilix viuuva te jolt kʼamol.#Isaiias 5.1-7

10Yeʼetzebʼ nik ibʼen sete u yol uvaʼ tzʼibʼamal ka t-viyolbʼal quBʼaal Tiuxh uvaʼ ech nik tal s-eche:

«U Sivan, uvaʼ ixval

taʼn inqʼa bʼitol otzotz,

tan aʼetz vet uvaʼe,

qat aqʼax tiqleʼm s-bʼaʼn

tiʼ itxeyt jaʼp vixojbʼal u otzotz.

11Tan quBʼaal Tiuxh qat bʼanon.

Tul mam yol qilt vet

kam qat tulbʼe quBʼaal Tiuxh

itxakunsal u Sivan,»

chich u yol, —xeʼt Jesuus.#Saalmo 118.22-23

12Bʼenetz vet te inqʼa iqʼesal uqʼeʼybʼal uvaʼ, aʼ nikich talax tuchʼ u yol uvaʼ txumbʼalimal talt Jesuus, tul itxhokaq vet txumbʼal tiʼ itxeyp Jesuus. Poro nikich ixoʼv tiʼ itxeyp Jesuus vatz inqʼa xaol. Aqʼaxetz vet ka Jesuus taʼn, tul bʼenaq veteʼ.

Uvaʼs tabʼil val u yol te quBʼaal Jesuus tiʼ itxhojt inqʼa xaol tatineʼ

Tio 22.15-22; Luk 20.20-26

13Yaʼne aʼ vet inqʼa fariseeo tuchʼ jolt inqʼa eenich tiʼ Eroodes Antiipas, txhaqax bʼen taʼn inqʼa iqʼesal tiʼ itxhokox txumbʼal tiʼaq tiltaʼ, tal laʼich elk Jesuus t-bʼey, tiʼ yeʼ inimal inqʼa bʼekʼbʼal. 14Aqʼbʼetz vet inqʼa fariseeo tuchʼ inqʼa eenich tiʼ Eroodes, tul ech motx tal te Jesuus s-eche: —Txhusul qetz, qootzaqle uvaʼ antxhte inqʼa yol uvaʼ nik aaleʼ. Tul vaʼl kuxh aqʼabʼ tiibʼa inqʼa xaol; tan jit aʼ nik eel kam tatin inqʼa xaol. Pet aʼxh nik atxhus vinuqul tiʼ kam laʼ qule qok bʼen tiʼ vibʼey quBʼaal Tiuxh ¿Niketz kol ikuy u qubʼekʼbʼal oʼ, inqʼa tij imam Israeel, uvaʼ laʼ qutxhoj qatin te u mam iqʼesal, uvaʼ een tu Rooma? Pet ¿maq yeʼle? —xeʼtaq te Jesuus.

15Poro yekich bʼen te Jesuus uvaʼ bʼan vatz kuxh nikich ibʼan inqʼa vinaq. Tul ech tal Jesuus s-te s-eche: —¡Kam s-tiʼil nik etxhok txumbʼal tiʼ veesal t-bʼey! Aqʼtaq tzaan vaʼq u puaq, u denaario. Tul toq vileʼ, —xeʼt Jesuus.{*}#12.15 ¿Kam s-tiʼil ‹bʼan vatz› kuxh tatin inqʼa fariseeo vatz quBʼaal Jesuus? Ech s-tiʼile tan, jit nuq koqxh nikich tal tiʼ tabʼil u yol te quBʼaal Jesuus. Tan bʼane aʼaq koqich yeʼ ootzaqin tetz. Pet tootzaqlichaqe kam u yol motx tabʼi te quBʼaal Jesuus. Tan jankʼalxh inqʼa iqʼesal uqʼeʼybʼal, tan tira yeʼ nikich motx isaʼ itxhoox tatin te inqʼa aj Rooma. Pet tetxhal kuxh nikich motx itxhojeʼ, tan aʼ inqʼa aj Rooma, atich tokebʼal tiʼ ibʼekʼex tiʼ itxhojtaq u tatineʼ. Echetz oq laʼich tal quBʼaal Jesuus uvaʼ yeʼ laʼich motx itxhoj u tatin te inqʼa aj Rooma, tul tzitzi laʼich txhejk ipaʼv quBʼaal Jesuus vatz inqʼa eelaich iyol tuchʼ inqʼa aj Rooma. Atz yek laʼich motx bʼen xotxhoxoq quBʼaal Jesuus vatz inqʼa aj Rooma, inqʼa aqʼolaq kuʼ yol tinuqul. Atzoq laʼich tal quBʼaal Jesuus uvaʼ laʼ utxh itxhojtaq tatin te inqʼa aj Rooma, tul chʼixvebʼaletz kuxh vet quBʼaal Jesuus vatz inqʼa imol s-tijaq imam Israeel. Tul yek laʼich motx bʼen tiʼ ixotxhox quBʼaal Jesuus vatz inqʼa aqʼol kuʼ yol tinuqul xoʼl inqʼa tij imam Israeel. Echetz aʼichaq kuxh isaʼ tabʼitaʼ kam laʼ tal quBʼaal Jesuus s-tiʼ, tul maq laʼich oleʼvaq tiʼ itxhej ipaʼv quBʼaal Jesuus. Poro yeʼetz motx oleʼv tiʼ tel quBʼaal Jesuus t-bʼey, tan yekich bʼen te quBʼaal Jesuus kame inqʼa titzʼabʼal. Tul itxhabʼaxh quBʼaal Jesuus itzaqʼbʼeleʼ.

16Tul iqʼol vet tzaan vaʼl u puaq te Jesuus. Tul ech tal Jesuus s-eche: —¿Jaʼletz ivatzibʼale? atz ¿jaʼletz ibʼije uvaʼ atoʼk tiʼ u puaq uvaʼa? —xeʼt Jesuus.

Yaʼne ech tal inqʼa vinaq te Jesuus s-eche: —Ivatzibʼal naqe u Seesar, —xeʼtaq te Jesuus.

17Tul ech tal Jesuus s-eche: —Aqʼvaq te Seesar uvaʼ nik ijaqeʼ. Atz aqʼvaq te Tiuxh uvaʼ nik ijaqeʼ, —xeʼt Jesuus.{*}#12.17 ¿Kam s-tiʼil kaj taanima inqʼa xaol tiʼ viyol quBʼaal Jesuus? Tiʼ uvaʼ itxhabʼaxh quBʼaal Jesuus itzaqʼbʼel inqʼa yol uvaʼ jotxhʼil s-te. Tan yeʼxhkam tal quBʼaal Jesuus tiʼ yeʼ inimal inqʼa bʼekʼbʼal. Pet laʼich motx inima vitxhojt inqʼa tatin te inqʼa aj Rooma. Atz laʼich motx inima inqʼa bʼekʼbʼal tiʼ inimal quBʼaal Tiuxh. Tul aʼ nik elkaʼp u yol uvaʼ tal quBʼaal Jesuus uvaʼ yeʼ laʼ titzʼa inqʼa iqʼesal uqʼeʼybʼal tuchʼ inqʼa tij imam Israeel uvaʼ, aʼ laʼ motx bʼanon vet iqʼesal tiibʼa inqʼa aj Rooma.

Tul tira motx kaj taanima inqʼa vinaq tiʼ u yol uvaʼ tal Jesuus.

Uvaʼs tabʼil val u yol te quBʼaal Jesuus taʼn inqʼa saduseeo tiʼ u itzʼeʼvchil inpaqte

Tio 22.23-33; Luk 20.27-40

18Yaʼne aqʼbʼ vet inqʼa saduseeo vatz Jesuus, inqʼa yeʼ nikich qeon u titzʼeʼv inqʼa kamnaʼq. Tul echaq tal te Jesuus s-eche: 19—Txhusul qetz, ech val u yol itzʼibʼa ka Moisees s-eche: «Oq laʼ kam invaʼq u vinaq, uvaʼ yeʼnaq nitxaʼinoq, tul laʼ kaj u tixqel, laʼetz isaʼa uvaʼ antxh vet u itzʼina laʼ iqʼon tixqel u atzika. Aʼetz vet u itzʼina laʼ nitxaʼin tuchʼ u ixoq. Tul aʼ vet vibʼij u atzika laʼ ok sibʼij u neʼ. Echetz yeʼ laʼ isotz vet talax ibʼije u atzika,» xeʼt ka Moisees.#Deuteronoomio 25.5

20Pet atichetz juqvaʼl inqʼa vinaq uvaʼ titzʼinich tibʼ. Tzʼalonetz u bʼaxa atzika. Tul yeʼ nitxaʼin tuchʼ u tixqel. Tul kam vet u bʼaxa atzika. 21Aʼetz vet u bʼaxa itzʼina, iqʼon u ixoq. Tul echat kuxh ibʼane, tan yeʼ nitxaʼin tuchʼ u ixoq. Tul kami. Atz echat kuxh ibʼane vikaʼv itzʼina. Tul yeʼ nitxaʼin tuchʼ u ixoq. Tul kam veteʼ. 22Echatetz kuxh ibʼane jolt inqʼa itzʼina, tetxhal tiqʼot ixoq s-juqvaʼl. Tul tira yeʼl invaʼq inqʼa vinaq nitxaʼin tuchʼ u ixoq. Kametz vet inqʼa vinaq, atz xamtel kam vet u ixoq. 23¿Jabʼisteetz vet vinaq s-te laʼ alax sitzumel u ixoq uvaʼs laʼ titzʼeʼv inqʼa kamnaʼq?, tan oq ayaʼl inqʼa vinaq s-juqvaʼl iqʼon u ixoq, —xeʼt inqʼa saduseeo.

24Yaʼne ech tal Jesuus s-eche: —Tira bʼak elnaʼql ex t-bʼey. Tan tira yeʼ nik ibʼen sete kam talax viyolbʼal quBʼaal Tiuxh, uvaʼ tzʼibʼamal ka. Atz yeʼetz bʼak nibʼen sete uvaʼ yeʼxhkam invaʼq tzaʼl vatz quBʼaal Tiuxh. Tan at tiqleʼm tiʼ titzʼeʼvsal inqʼa kamnaʼq. 25Laʼetz itzʼeʼv vet inqʼa kamnaʼq, tul yeʼl vet tzʼaloʼm, atz yeʼl vet txhejchil laʼ ibʼana. Tan ech vet tatin laʼ ibʼana, eche tatin inqʼa iaanxel quBʼaal Tiuxh, inqʼa een tu amlikaʼ.

26Echetze u yol tiʼ titzʼeʼv inqʼa kamnaʼq, tan yeʼ nik ibʼen sete kam uvaʼ tal ka quBʼaal Tiuxh te Moisees tuulbʼal uvaʼs iyolon quBʼaal Tiuxh xoʼl u vatomla chʼiʼx. Tul ech tal s-eche: «In u Tiuxh uvaʼ nik inatxhkʼuula Avraʼaam. In u Tiuxh uvaʼ nik inatxhkʼuula Isaak. Atz in u Tiuxh uvaʼ nik inatxhkʼuula Jakoov,» chich u yol.#Eeksodo 3.6 27Tan itzʼleletz Avraʼaam, Isaak tuchʼ Jakoov vatz quBʼaal Tiuxh s-txheel, kʼuxh kamnaʼql sevatz. Echetz jit iTiuxh kamnaʼq u quBʼaal Tiuxh, pet iTiuxh inqʼa itzʼlele. Pet ¡sibʼxh elnaʼql ex t-bʼey! —xeʼt Jesuus te inqʼa saduseeo.

Uvaʼs talt quBʼaal Jesuus uvaʼ, aʼ kaʼvaʼl inqʼa bʼekʼbʼal palnaʼq tiqleʼm viʼ jolt inqʼa bʼekʼbʼal

Tio 22.34-40

28Atichetz val u vinaq uvaʼ nikich txhusun vibʼekʼbʼal inqʼa tij imam Israeel, tul ijetxhoʼk tibʼ kʼatz Jesuus. Tul tabʼi viyolbʼet tibʼ Jesuus tuchʼ inqʼa saduseeo. Tul tabʼi inpaqte uvaʼ jikxh itzaqʼbʼet Jesuus inqʼa saduseeo.

Tul ech tal vet te Jesuus s-eche: —¿Jabʼisteetz vibʼekʼbʼal quBʼaal Tiuxh s-te uvaʼ palnaʼql viʼ jolt inqʼa bʼekʼbʼal? —xeʼte.

29Tul ech tal Jesuus s-eche: —Aʼetz u bʼekʼbʼal uvaʼ palnaʼql tiqleʼm tiibʼa jolt inqʼa bʼekʼbʼal, uvaʼ ech nik tal s-eche: «Abʼivaq, ex inqʼa tij imam Israeel: Taʼn kuxh u quBʼaal Tiuxh laʼ etal seBʼaal, tul laʼ enatxhkʼuula. 30Tul laʼ asaʼ u quBʼaal Tiuxh tuchʼxh avaanima tuchʼxh avaanxelal, atz tuchʼxh avitzʼabʼal, atz tuchʼxh ayakʼil,» chiche. Aʼetz u bʼaxa bʼekʼbʼale uvaʼ palnaʼq viʼ jolt inqʼa bʼekʼbʼal.#Deuteronoomio 4.35; 6.4-5

31Pet vikaʼv bʼekʼbʼal, [tan eela kuxh tuchʼ vibʼaxa. Tul tetxhal kuxh laʼ nimali.] Tul ech nik tal s-eche: «Saʼ vamol, eche uvaʼ nik asaʼt eebʼ,» chiche.#Leviitiko 19.18 Echetz yeʼl invaʼtoʼq bʼekʼbʼal uvaʼ palnaʼq koq tiqleʼm viʼ inqʼaa, —xeʼt Jesuus.

32Yaʼne ech tal uvaʼ nikich txhusun ibʼekʼbʼal inqʼa qumol s-tijaq imam Israeel s-eche: —Nuqxhte uvaʼ nik aaleʼ, Txhusul qetz. Tan vaʼl kuxh u quBʼaal Tiuxh. Tul yeʼxhabʼil invaʼtoʼq Tiuxh ech, eche u quBʼaal Tiuxh uvaʼ laʼ natxhkʼuulali. 33Tul laʼ qusaʼ u quBʼaal Tiuxh tuchʼxh qaanima, tuchʼxh qitzʼabʼal, [tuchʼxh qaanxelal,] atz tuchʼxh quyakʼil. Atz laʼ qusaʼ inqʼa qumol, eche uvaʼ nik qusaʼt qibʼ s-qujunal. Oqetz ech laʼ qubʼane, tul quBʼaal Tiuxhetze nik quchiibʼisa. Tul sibʼxh palnaʼq inqʼa yol inqʼaa vatz quBʼaal Tiuxh, viʼ vitzʼeʼsal ok inqʼa oya vatz quBʼaal Tiuxh, —xeʼte.#1 Samueel 15.22; Oseeas 6.6

34Tiletz vet Jesuus uvaʼ bʼaʼnxh itzaqʼbʼ u vinaq, tul ech tal Jesuus s-te s-eche: —Il vet u quBʼaal Tiuxh toq ibʼan iqʼesalil sakʼatza, —xeʼt Jesuus te u vinaq. Tul tira yeʼxhabʼil vet invaʼq txʼolon tabʼil invaʼtoʼq yol te Jesuus tiʼ itxhokox tel Jesuus t-bʼey.#Tio 22.46

Uvaʼs talt quBʼaal Jesuus uvaʼ maʼtich talt Daviid uvaʼ, aʼ laʼich tzajk u Kriisto kʼatz quBʼaal Tiuxh

Tio 22.41-46; Luk 20.41-44

35Tul tal Jesuus jolt yol te inqʼa xaol tu nimla atibʼal tuulbʼal u tostiuxh. Tul ech tal Jesuus s-eche: —¿Keʼch nik talt inqʼa nik txhusun ibʼekʼbʼal inqʼa qumol s-tijaq imam Israeel uvaʼ tij imam kuxh Daviid naq u Kriisto? 36Tan antxh naq Daviid tzʼibʼan ka inqʼa yol taʼn viTiuxhil Tiuxh uvaʼ ech nik tal s-eche:

«Ech tal u quBʼaal Tiuxh

te vinBʼaal s-eche:

–Kuʼen tinsebʼal,

tan tetxhal laʼ voksa

inqʼa nik itxhiʼan seʼe taqʼabʼ,

–chich quBʼaal Tiuxh

te vinBʼaal,» xeʼt Daviid.#Saalmo 110.1{*}#12.36 Saalmo 110.1. Aʼ nik tal viyolbʼal quBʼaal Tiuxh uvaʼ quBʼaal Tiuxh laʼ oksan inqʼa xaol ‹s-xeʼabʼ toq Tiuxh,› inqʼa nik motx itxhiʼan tiʼ u Kriisto, u Kʼaola uvaʼ bʼen s-alam aanima. Eche u yol ‹u xeʼabʼ toq› nik tal tzitza, tan bʼane uvaʼ, ech koqxhte. Pet nik kuxh tiqʼo tzaan tiʼ invaʼl u oʼtla txumbʼal s-naʼya uvaʼ nikich ibʼan inqʼa mam iqʼesal te invaʼt mam iqʼesal uvaʼ nikich itxeyp tzaan s-pereexhoil. Tan ajt qat txeyex tzaan invaʼq mam iqʼesal invaʼq tenam, tul tetxhal kuxh qat qajbʼal vet xeʼ toq invaʼt mam iqʼesal tiʼ tilansat u mam iqʼesal toq tisisil uvaʼ txeyel veteʼ. Echetz nik kuxh tiqʼo tzaan inqʼa tzʼibʼan tetz viyolbʼal quBʼaal Tiuxh invaʼl txumbʼal tiʼ, eche uvaʼ nikich ibʼan inqʼa mam iqʼesal te invaʼt imol. Tan aʼxh tokebʼal u yol uvaʼ, tetxhal laʼ teesa quBʼaal Tiuxh iqʼij inqʼa nik motx itxhiʼan tiʼ u Kriisto. Yaʼne laʼ motx oksal ok jaqʼ ibʼekʼoʼm u Kriisto.

37Oqetz: ‹InBʼaal,› chichich Daviid tiʼ naq u Kriisto, ¿keʼchetz nik talt inqʼa nik txhusun ibʼekʼbʼal inqʼa qumol s-tijaq imam Israeel, uvaʼ tij imam kuxh Daviid naq? —xeʼt Jesuus.

Tul mamala xaol uvaʼ ayaʼlxh ikʼuul nikich tabʼi inqʼa yol uvaʼ nikich tal Jesuus.

Uvaʼs iyajt quBʼaal Jesuus inqʼa nikich txhusun ibʼekʼbʼal inqʼa tij imam Israeel

Tio 23.1-36; Luk 11.37-54; 20.45-47

38Tuulbʼal vitxhusun Jesuus te inqʼa xaol, tul ech nikich tal Jesuus s-eche: —Noq etil etibʼ tiʼ, yeʼ ebʼant etetz, eche uvaʼ nik ibʼan inqʼa nik txhusun ibʼekʼbʼal inqʼa qumol s-tijaq imam Israeel. Tan aʼaq kuxh isaʼ tok iqʼij tuchʼ inqʼa qinkin oksaʼm s-kʼutxhbʼal tetz tiqleʼm tuulbʼal u tuqʼeʼybʼal. Tul chiibʼiyaqxhtuʼ, uvaʼ tira nik tiqʼo kuʼl tibʼ inqʼa xaol s-vatz tiʼ taqʼax bʼaʼnil ikʼuul t-kʼayibʼal. 39Tul chiibʼiyaqxhtuʼ uvaʼ, aʼ nik motx kʼuqeʼvk t-inqʼa bʼaxa xhiila tuulbʼal inqʼa kʼulbʼal ibʼ. Atz chiibʼiyaqxh, tiʼ uvaʼ, aʼaq bʼaxa xhiila tuulbʼal inqʼa nik utxhk inqʼa bʼaʼnla txʼaʼoʼm. 40Atz iqʼaqʼal, tul nik motx taqʼ tzaqatz txakay ixoq totzotz. Tul nik kuxh motx itxhok txha vet txumbʼal, tul sibʼxh tuul vinatxhon Tiuxh nik motx ibʼan vatz inqʼa xaol. Tan aʼaq kuxh isaʼ isotz ikʼuul inqʼa xaol. Tiʼetz uvaʼ ech nik motx ibʼane, tul aʼl sibʼ vet u mam kʼaxkʼo laʼ motx bʼen tileʼ, —xeʼt Jesuus tiʼ inqʼa nikich txhusun ibʼekʼbʼal inqʼa qumol s-tijaq imam Israeel.

Uvaʼs taqʼt val u txakay ixoq kaʼvaʼl vatz ipuaq vatz quBʼaal Tiuxh

Luk 21.1-4

41Kʼuqlichetz vet Jesuus vatz u molbʼal puaq tu nimla atibʼal tuulbʼal u tostiuxh, tul nikich kuxh isaqi Jesuus taqʼt ka junun inqʼa xaol ipuaq tuul u molbʼal puaq. Tul mamala txʼiol iqʼij, uvaʼ sibʼxh puaq, nikich pal taqʼ ka. 42Yaʼne til Jesuus taqʼbʼ val u txakay ixoq, uvaʼ meebʼaʼichxhtuʼ. Tul pal taqʼ ka kaʼvaʼl vatz ipuaq, uvaʼ koovreichxhtuʼ, tuul u molbʼal puaq. Tul vaʼl kuxh sen vijaʼmil vipuaq.

43Yaʼne isikʼle tzaan Jesuus inqʼa nikich itxhus tibʼ s-kʼatza. Tul ech tal vet Jesuus s-te s-eche: —Nuqxh nik val sete: Eche u txakay ixoq vatziʼ meebʼaʼ kuxh tatineʼ, tan sibʼxhte uvaʼ qat pal taqʼ ka viʼ jankʼal inqʼa xaol uvaʼ qat pal aqʼon ka puaq tuul u molbʼal puaq. 44Tan jankʼalxh inqʼa xaol uvaʼ sibʼxh puaq qat pal taqʼ ka, tan aʼ kuxh nik pal taqʼ vet ka viyal vipuaq. Pet koq vatz txakay ixoq, uvaʼ meebʼaʼxhtuʼ, tan taʼnxhte vatz ipuaq uvaʼ qat pal taqʼ ka. Tan aʼ qat taqʼ ka jankʼal uvaʼ saʼ ibʼanbʼe s-loqʼbʼal tetxhbʼubʼal, —xeʼt Jesuus te inqʼa nikich itxhus tibʼ s-kʼatza.

Voafantina amin'izao fotoana izao:

Kuxh 12: ixlC

Asongadina

Hizara

Dika mitovy