Mákò 9
9
1Tsí ó sɛ̃̀ wà wí fú ŋa ró ní: Ká rí gé! Òŋu wà wí fú ŋa ní fee, ɔ̀nyà kã̀ŋa wà náàŋírĩ-ŋa bí#ɛ́, à kàkó kú tã́ná à nákó rí kíbí Ɔ̀ɖáyé wà dzoyè òŋu ikpá‐ɛ̀ gbà#á.
Ìwànwà-Yèésù kpàrɔ̀ nódzú-ɔmatsɛ́‐ɛ̀ ŋa
(Màtéwò 17:1-13; Lúkà 9:28-36)
2Ɔdzɔ́ mɛ́ɛfà náànyì-bɛ́ɛ̀#ɛ́, Yèésù gbɛ̃́ Òkúta òŋu Yàkúbù má nára-Yòhánà†, tsí à lɔ ńǹtá-òkè gíga-kã̀. Àŋa mɛ́ɛrɛ̃#ɛ́ sɔ̃́ŋú gé ní káà wà bɛ̀ si#ɛ́. Tsí ìwànwà‐ɛ̀ kpàrɔ̀ gbòkã́. 3Tsí èbò-ara‐ɛ̀ ŋa wà kɔ màrã̀màrã̀, tsí wà fṹ pílípílí. Ɔ̀nyà-kã̀ kpókpó kò wà ńnɔ́-ayé#ɛ́, tsí kó nyáa fɔ̃ iŋɛ́, tsí kó fṹ tó bɛ́ɛ̀. 4Gbòkã́#á, ɔmatsɛ́ mɛ́ɛta ŋa#á, à rí Mɔ̀ɔ́sè† òŋu Èlíyà†, tsí à bɔ́, tsí wà wíìnyɛ̀ bá Yèésù. 5Tsí Òkúta tsí arũ, tsí wà fɔ̀ fú Yèésù ní: Akɔ́nɛ, ó sã̀ héŋú ní àwa gbo, àa wà ńbíbɛ́ si. Báàyí#ɛ́, àa kó kɔ́ awúrɛ́ mɛ́ɛta si bí. Ɔ̀kã̀ nákó dzɛ́ tɛ̀ɛ, tsí ɔ̀kã̀ gbo nákó dzɛ́ ti Mɔ̀ɔ́sè, tsí ɛ̀kɛ́ɛta‐ɛ̀ nákó dzɛ́ ti Èlíyà.
6Òkúta#á kò tì ma iŋɛ́ yèé kó fɔ̀ gìɖì#ɛ́, iŋɛ́ yèé tse#ɛ́, odzo wà tse òŋu enìkéèdzì‐ɛ̀ ŋa tó bɛ́ɛ̀. 7Ńǹɖì-bɛ̀#ɛ́, irì-kã̀ ɖí, tsí bò ŋá málɛ̀ kpó. Tsí oŋù-kã̀ ɖɔ̃́ ti ńnɔ́-irì#ɛ́, tsí wà fɔ̀ ní: Ɛnɛ yèé bɛ́, Ɔma bíbí-mi ni, tsí ó dzɛ́ àrínódzú-mi gbo. È rɛ̃tígbè‐ɛ̀!
8Gbòkã́#á, à wà wòrã wérí-ara-ŋa wèrèwèrè, tsí à kò rí ɔ̀nyà-kã̀ kpókpó ró. Yèésù òŋu níìkã̀ gé ní wà bá ŋa si#ɛ́.
9Tsí à ǹɖe, tsí tì nóòkè#ɛ́ bàa. Tsí Yèésù kɔ̀ fú ŋa ní: Iŋɛ́ yèé à rí#ɛ́, ká máa kpɛ̀rɔ́‐ɛ̀ fú ɔ̀nyà-kã̀ kpókpó títí káà fú ɔdzɔ́ yèé òŋu, Ɛnɛ yèé ɔ̀nyà bí#ɛ́†, òŋu nákó dzí ti náàŋírĩ-òkú ŋa wá náyé#ɛ́.
10Ńbɛ̀ɛ́, ó kí náàŋírĩ-ara-ŋa sɔ̃́ŋú. Ńǹkɛ̀ɛ́, à wà dzèrèbe ní: Kí dzɛ́ ká dzí ti náàŋírĩ-òkú ŋa wá náyé ná?
11Tsí à wà bere Yèésù ní: Kí tse tsí akɔ́nɛ nɛ́kpa-Ɔ̀ɖáyé† ŋa náa fɔ̀ ní ó wà ní Èlíyà kó sɛ̃̀ wá tã́ná Ɔ̀ɖáyé kó bɛ Kírísítò Agbanɛlà wá ná?
12Tsí ó wà wí fú ŋa ní: Ìɖéǹɖè#ɛ́, ó wà ní Èlíyà kó wá, tsí kó tsúwádzú wá, tsí kó wáa tɔ́tse iŋɛ́ ŋa kpó si tã́ná Kírísítò#ɛ́ kó wá. Ó ɖi, à kɔ si ńǸwé-Ɔ̀ɖáyé† ní òŋu, Ɛnɛ yèé ɔ̀nyà bí#ɛ́, òŋu nákó réré kpíkpɔ̀, tsí ɔ̀nyà ŋa kàkó mú òŋu kpe iŋɛ́-kã̀. 13Ńbɛ̀ɛ́, òŋu wà wí fú ŋa ní fee, Èlíyà ti wá ná. Tsí à tse báa kíbí ó wù ŋá gbà#á. À tseé kíbí Ìwé-Ɔ̀ɖáyé† ti fɔ̀ si ti nára‐ɛ̀#ɛ́.
Yèésù lé edzò-kã̀ sɛ̃̀ náànyì-maɖé-kã̀
(Màtéwò 17:14-21; Lúkà 9:37-43)
14Kíbí à tì nóòkè#ɛ́ tã́, tsí sɔ́má-ɔmatsɛ́-Yèésù† yèé bɔ̀ ŋa#á bàa#á, à rí ní ɔ̀nyà ŋa tsɛ́ kì, tsí wáa sú wérí ŋa si. Akɔ́nɛ nɛ́kpa-Ɔ̀ɖáyé† kã̀ŋa gbo wà bɛ̀, tsí wà tse àrã́dzìnyà bá ŋa. 15Kíbí èrò#ɛ́ rí Yèésù#ɛ́, ó mù ŋá. Tsí à súré lɔ ńɖɔ̀‐ɛ̀, tsí káà kíi. 16Tsí ó wà bere ɔ̀nyà ŋa#á ní: Afɔ̀ mɛ̀ɛ́ à wà dzìnyà bá ɔmatsɛ́-òŋu ŋa ná?
17Ńbɛ̀ɛ́, ɔ̀nyà-kã̀ náàŋírĩ-èrò#ɛ́ tsí arũ, tsí wà wí fú Yèésù ní: Akɔ́nɛ, òŋu gbɛ̃́ ɔma-òŋu wá, tsí kó ríi fú òŋu. Ó ɖi, edzò†-kã̀ wà ɖɔ́kpɔ fúu, tsí mú àrɔ̃̀-tsubútsubú bɔwɔ́‐ɛ̀, tsí sɔɔ́ ɖi mùnù. 18Tsí ńǹɖì ɔ̀kã̀lɔ́ɔ̀kã̀ yèé náa múu#ɛ́, náa múu tsɔlɛ̀, tsí arũ‐ɛ̀ náa wà wó fùtùfútù, tsí náa wà rɔ̃́ enyí, tsí náa le si tàndzàà. Ńbɛ̀ɛ́, òŋu wí fú ɔmatsɛ́‐ɛ̀ ŋa ní ká lé edzò#ɛ́ sɛ̃̀ náànyì‐ɛ̀, tsí à kò nyáa tóòsũ̀‐ɛ̀.
19Tsí Yèésù ní: Òò, ɛ̀ŋɛ, ɔma-ìsɛ̃̀ɛ̃́ ŋa, è kè nɛ́ àkaralé nɛ́! Ìwèrè mɛ́ɛló màa tse bá ŋɛ́? Gbà mɛ́ɛló màa módzúgbó ná?
Tsí ó nyí, tsí ní: Ká gbɛ̃́ ɔma#á wá fú òŋu.
20Tsí à gbɛ̃́ɛ̃ lɔ fúu. Kíbí edzò yèé wà ɖɔ́kpɔ fúu#ɛ́ rí Yèésù gé#ɛ́, ó mi maɖé#ɛ́ kũkũ, tsí maɖé#ɛ́ tsubúlɛ̀, tsí wà nyílɛ̀, títí fùtùfútù wà bɔ́ nárũ‐ɛ̀. 21Tsí Yèésù wà bere boba‐ɛ̀ ní: Títí ńǹwèrè yèésí ó wà bɛ́?
Tsí boba‐ɛ̀ ní: Títí ńmaɖé tsígíɖí‐ɛ̀ ni. 22Ó ɖi, edzò#ɛ́ náa múu sɔ ńná nàmí nómi kpeékpeé gé ni, àtsùgbée kó múu tsɛ̀rá. Ó ɖi, bí nákó nyáa tse iŋɛ́-kã̀ ná, ni kó rí ànyínɔ́ fú àŋa, tsí kó mɔ́wɔ́ gbè fú àŋa ɖé.
23Tsí Yèésù wà wí fúu ní: Ó ní “bí òŋu nákó nyáa tse iŋɛ́-kã̀ã̀?” Ó ɖi, bí ɔ̀nyà-kã̀ nɛ́ àkaralé si ńǹtá-Ɔ̀ɖáyé#ɛ́, nákó nyáa tse iŋɛ́ ɔ̀kã̀lɔ́ɔ̀kã̀ kpó.
24Gbòkã́#á, boba-maɖé#ɛ́ bu igbe ta ní: Ǹ nɛ́ àkaralé. Ó ɖi, àkaralé-mi kò tó ni. Mɔ́wɔ́ gbè fú mi ɖé!
25Tsí kíbí Yèésù rí èrò#ɛ́, tsí à súré bàa ńɖɔ-ŋa#á, ó nyí, tsí hɔ̃́rɔ̃́ fú edzò#ɛ́ ní: Ìwɔ yèé náa sɔnɛ ɖi mùnù, tsí sɔnɛ ɖi aɖetí gbo#ɛ́, ǹ wà fɔ̀ fɛ́ɛ ní o sɛ̃̀ náànyì-ɔma yèé bɛ́, tsí o máa ɖɔ́kpɔ fúu láyé gbo ró!
26Tsí edzò#ɛ́ ɖúgbe, tsí mi maɖé#ɛ́ kpàkpàkpà, tsí kɔ̀ɔ́ dzɔ̀ɔ́. Ńbɛ̀ɛ́, maɖé#ɛ́ ɖákú lɔ kéɖéɖéé títí ɔ̀nyà kpíkpɔ̀ náàŋírĩ-èrò#ɛ́ wà fɔ̀ ní: Ó kú.
27Tsí Yèésù dzi ɔwɔ́‐ɛ̀ gé, tsí fàá ɖóro, tsí ó ɖóro.
28Kíbí à ǹɖe bɛ̀ tã́, tsí Yèésù òŋu ɔmatsɛ́‐ɛ̀ ŋa sɔ̃́ŋú wà ńnɔlé si#ɛ́, ɔmatsɛ́‐ɛ̀ ŋa wà bèrèé ńǹkɛ̀ɛ́ ní: Kí tse tsí àŋa òŋu, àŋa kò nyáa lé edzò#ɛ́ sɛ̃̀ náànyì-maɖé#ɛ́ ná?
29Tsí ó wí fú ŋa ní: Tã́ná ká nyáa lé edzò-ìrɔ́ nyɛ̀ŋɛ̀ sɛ̃̀ náànyì-nɛ#ɛ́, ó bere ìre wúwú.#9:29 Ńnɔ́-ìwé kã̀ŋa, à náa mú afɔ̀ yèé ŋa máa: “òŋu arũ ɖíɖì”.
Yèésù wà fɔ̀ ró ní òŋu nákó kú, tsí sɛ̃̀ dzí ti náàŋírĩ-òkú ŋa wá náyé
(Màtéwò 17:22-23; Mákò 9:30-37; Lúkà 9:43-45)
30Ńbɛ̀ɛ́, à ǹɖe, tsí gbà nérè-Gàlìlé. Yèésù kò wà wò ní ɔ̀nyà ŋa kó ma ńbí òŋu wà#á, 31iŋɛ́ yèé tse#ɛ́, ó wà wíìnyɛ̀-kã̀ fú ɔmatsɛ́‐ɛ̀ ŋa ni. Ó wà wí fú ŋa ní: À nákó mú òŋu, Ɛnɛ yèé ɔ̀nyà bí#ɛ́†, tsí à nákó mú òŋu bɔwɔ́-ɔ̀nyà ŋa, tsí à nákó kpa òŋu nóòkú, tsí bí òŋu kú, ɔdzɔ́-ɛ̀kɛ́ɛta‐ɛ̀ òŋu nákó sɛ̃̀ dzí ti náàŋírĩ-òkú ŋa wá náyé.
32Ó ɖi, à kò wà gbɔ́ òkpì-afɔ̀#ɛ́, tsí à wà sá gbo, tsí à kò nyáa bèrèé nóòkpì‐ɛ̀.
Nɛ̀ɛ́ dzɛ́ ɔ̀gá náàŋírĩ-ɔmatsɛ́-Yèésù ŋa?
(Màtéwò 18:1-5; Lúkà 9:46-48)
33Tsí à káà tó ńKàfànàwú. Kíbí à wà ńlé si#ɛ́, ó wà bèrè ŋá ní: Afɔ̀ mɛ̀ɛ́ à wà dzìnyà nɔ́ɔ̀nà ná?
34Tsí ó tsanɔ́ fú ŋa, tsí à tsikó. Iŋɛ́ yèé tse#ɛ́, à dzinya ara-ŋa nɔ́ɔ̀nà ti nára-ɛnɛ yèé nákó dzɛ́ ɔ̀gá fú ɛnɛ-àtíbɔ̀ ŋa#á.
35Ńbɛ̀ɛ́, ó dzokó, tsí ó kpe àŋa máàméèdzì#ɛ́, tsí wà wí fú ŋa ní: Bí ɔ̀nyà-kã̀ wà wo kó dzɛ́ ɔ̀gá fú ɛnɛ-àtíbɔ̀ ŋa, kó sɔ ara‐ɛ̀ ɖi maɖé tsígíɖí, tsí kó dzɛ́ adzítsɛ́ fú ɔ̀nyà kpó.
36Tsí ó fa maɖé tsígíɖí-kã̀ wáa ɖóro náàŋírĩ-ŋa. Tsí ó fɔ̃́ maɖé#ɛ́ si, tsí wà wí fú ŋa ní: 37Bí ìwɔ-kã̀, ò gba ɔma tsígíɖí-kã̀ bɛ́ náàtsùgbé-èmi, èmi ká-mi ní ò gbà#á. Tsí ìwɔ-kã̀ yèé gbà mí#ɛ́, kò tsi èmi níìkã̀ ní ò gbà#á, ò gba ɛnɛ yèé bɛ̀ mí wá#á gbo.
Bí ɔ̀nyà-kã̀ kò wà kɔ àŋa, ɛnɛ nyɛ̀ŋɛ̀ dzɛ́ tàŋa si ni
(Lúkà 9:49-50)
38Ńbɛ̀ɛ́, Yòhánà† wà wí fúu ní: Akɔ́nɛ, àŋa rí ɔ̀nyà-kã̀, tsí ó wà lo ɛ̀tsɛ‐ɛ̀, tsí wà ń lé edzò† ŋa sɛ̃̀ náànyì-ɔ̀nyà ŋa. Tsí àŋa kɔ̀ fúu ní kó máa tse bɛ́ɛ̀ ró, iŋɛ́ yèé tse#ɛ́, kò wà tɛ̀ náànyì-àŋa.
39Tsí Yèésù ní: Ká máa kɔ̀ɔ́ fúu. Ó ɖi, ɔ̀nyà-kã̀ kàkó wà lo ɛ̀tsɛ-òŋu, tsí wà ń tse iŋɛ́-àwùsì ŋa tã́, tsí kó sɛ̃̀ nyí gbòkã́, tsí wà wí íbàɖí nára-òŋu ró. 40Bí ɔ̀nyà-kã̀ kò wà kɔ àŋa, ɛnɛ nyɛ̀ŋɛ̀ dzɛ́ tàŋa si ni. 41Tsí bí ɔ̀nyà-kã̀ tsomi tútù igbá-kã̀ fú ŋa ní ká mɔ náàtsùgbée kíbí à dzɛ́ ti Kírísítò#ɛ́, òŋu wà wí òtítɔ́ fú ŋa ní fee, Ɔ̀ɖáyé kàkó kɔ àrìmáa bù kɔ̃́ɔ̃ fú ɛnɛ nyɛ̀ŋɛ̀.
Ká tsɔ́ éwo-ara-wa rere, tsí ká máa sɔ́nɛ si náàbi ró
(Màtéwò 18:6-9; Lúkà 17:1-2)
42Bí ɔ̀nyà-kã̀ ɖi òkúta-àkɔ̀sɛ̀ fú ɔ̀kã̀-maɖé tsígíɖí nyɛ̀ŋɛ̀ ŋa yèé gba òŋu gbɔ́#ɛ́, ká mú ɔlɔ lákṹ rìgìɖìì-kã̀, tsí ń so nɔ́ɔ̀gɔ̃̀rɔ̃̀-ɛnɛ nyɛ̀ŋɛ̀, tsí kɛ́ɛ káà sɔ nóɖò, nákó sã̀ fúu lárè. 43Tsí bí ó dzɛ́ ní ɔwɔ́-ɛ̀ɛ-kã̀ ní wà múɛ dzàbi#ɛ́, kée ǹɖe. Bí ò ɖi olákpá kíké, tsí ò rí ɔlà, ó sã̀ fɛ́ɛ lárè ní ɔwɔ́-ɛ̀ɛ méèdzì méèdzì ŋa#á kó wà si, tsí ká kɛ́ɛ sɔ lɔ ńná-àrìtã́, ńbí iná kà kú láyé#ɛ́. [ 44Ɛnɛ yèé náa lɔ bɛ̀ ŋa#á, àrírã̀-ŋa kà tã́ láyé, tsí iná gbo kà kú bɛ̀ láyé.] 45Tsí bí ó dzɛ́ ní ɛsɛ̀-ɛ̀ɛ-kã̀ ní wà múɛ dzàbi#ɛ́, kée ǹɖe. Bí ò ɖi olɛ́sɛ̀ kíké, tsí ò rí ɔlà, ó sã̀ fɛ́ɛ lárè ní ɛsɛ̀-ɛ̀ɛ méèdzì méèdzì ŋa#á kó wà si, tsí ká kɛ́ɛ sɔ lɔ ńná-àrìtã́. [ 46Ɛnɛ yèé náa lɔ bɛ̀ ŋa#á, àrírã̀-ŋa kà tã́ láyé, tsí iná gbo kà kú bɛ̀ láyé.] 47Bɛ́ɛ̀ ké ní bí odzú-ɛ̀ɛ-kã̀ gbo wà múɛ dzàbi#ɛ́, nà nyàá ǹɖe. Bí odzú-kã̀ kó wà fɛ́ɛ, tsí Ɔ̀ɖáyé wà dzoyè si ńǹtá-ɛ̀ɛ, ó sã̀ fɛ́ɛ lárè ní odzú-ɛ̀ɛ méèdzì méèdzì ŋa#á kó wà si, tsí ká kɛ́ɛ sɔ lɔ ńná-àrìtã́. 48Ɛnɛ yèé náa lɔ bɛ̀ ŋa#á, àrírã̀-ŋa kà tã́ láyé, tsí iná gbo kà kú bɛ̀ láyé. 49Tsí kíbí oŋu náa tɔ́tse dzídzɛ#ɛ́, bɛ́ɛ̀ ké ní ìréré gbo náa tɔ́tse ɔ̀nyà kpó#ɛ́.
50Oŋu ni iŋɛ́-ire-kã̀ ni. Ó ɖi, bí ɖíɖɔ̃̀‐ɛ̀ kò wà ńnɛ̀ ró#ɛ́, à kàkó nyáa mú iŋɛ́-kã̀ kpókpó si ńnɛ̀, tsí kó ɖɔ̃̀ ró. Ńbɛ̀ɛ́, ɛnɛ kṹnukṹ kó wà kíbí oŋu bɛ́, tsí e wà ɖɔ̃̀ bá ara-ŋɛ́ ŋa.
Voafantina amin'izao fotoana izao:
Mákò 9: ngl
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© (Active), Wycliffe Bible Translators, Inc. All rights reserved.
