Exodus Nyangatja Ngaṉmanytju Nyakula Wangkanytjaku
Nyangatja Ngaṉmanytju Nyakula Wangkanytjaku
Nyangatja Godaku tjukurpa. Munu tjukurpa nyanga paluṟu tjakultjunanyi aṉangu Godaku walytjapiti Israelkunu panya tjuṯa. Panya paluṟu tjana ngura Itjipala nyinangi parari mulapa ngura walytja wantikatinytjatjanu. Panya paluṟu tjana ngura nyara palulakutu anu maikutu, ka tjananya Jacobaku katjangku Josephalu aṯunymaṟa kanyiningi.
Ka ngula Josephanya ilunyangka maḻangka yiya tjuṯa mulapa ngaṟakatingi, kaya Itjipanya nguraṟa tjuṯa tjanampa mayatjaringu aṉangu panya Israelkunu tjuṯaku munuya palunya tjananya puḻkaṟa pauntjingaṟa wituwituningi waṟkarinytjaku munu tjananya kuraṟa pungangi.
Ka tjukurpa nyanga paluṟu tjakultjunanyi Godalu tjananya Itjipalanguṟu pakaltjingantja. Panya paluṟu Mosenya ngurkantaṟa tjunu Israelkunu tjuṯa aṯunymaṟa kanyintjaku. Munu paluṟu Moselawanungku pika kutjupa kutjupa tjuṯa iyaṉu Itjipanya nguraṟa tjuṯa nguḻutjingantjikitjangku, kaya ngula pika puḻka wirkankunyangka kutju Mosenya tjananya wantir'iyaṉu tjanampa ngura wantikatira ankunytjaku. Munu paluṟu Mosenya tjananya katira uṟu puḻkangka nguṟurwanungku wankaṟunu munu tjaultji Itjipanya nguraṟa tjuṯangku maḻawanungku pikangku waṯaparannyangka uṟungka iluntanu.
Munu tjukurpa nyanga paluṟu tjakultjunanyi Godalu tjukurpa puḻka tjuṯa Mosenya ungkunytja Israelkunu tjuṯangku kuliṟa Godala wangaṉarangku kulintjaku munu kuliṟa palumpa puḻkaṟa nintiringkunytjaku. Panya Godanya mukuringangi tjana palunya mulamulangku waḻkuntjaku. Munu paluṟu tjananya nintinu tiinta miḻmiḻpa palyantjaku munu tjarpara palunya tjukaṟurungku waḻkuntjaku.
Tjukurpa nyanganpa ngarinyi:
1:1—4:31 Godalu Mosenya ngurkantankunytja
5:1—6:27 Mayatja Piiṟanya Mosela tungunpungkunytja
6:28—12:36 Godalu pika kutjupa kutjupa tjuṯa Itjipanya nguraṟa tjuṯakutu iyantja
12:37—18:27 Israelkunu tjuṯangku Itjipanya wantikatira puḻi ini Tjaniyalakutu ankunytja
19:1—24:18 Godalu tjukurpa puḻka tjuṯa Mosenya ungkunytja
25:1—40:38 Tiinta Miḻmiḻpa tjarpara Godanya waḻkuntjaku
Voafantina amin'izao fotoana izao:
Exodus Nyangatja Ngaṉmanytju Nyakula Wangkanytjaku: PITJ
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© Bible Society Australia