Acts 9
9
Saul Isumalitqiksuq
(Acts 22.6-16; 26:12-18)
1Tavra Saul sivuuġasaaqłipiaŋaruq suli tuquġaaġukługich ukpiqtuat Ataniġmun. Tavra ilaa aullaŋaruq aŋaiyyuliqsiqpaich qaukłiannun, 2aasii apiqsrivḷuni tuyuutinik, iḷitchuqqutiksranik kiutilaamiñik Jew-guruat aŋaiyyuviŋiññi Damascus-mi. Iḷaanni paqitkumi ukpiqtuanik Ataniġmun taamani tigutaaġumiñaġuqługich, aŋutikkaluat aġnakkaluallu, aasii utqutilugich Jerusalem-mun.
3Tavra iglauniaqtillugu qallivḷuni Damascus-mun, tavraŋŋatchiaq qaummaq qiḷaŋmiñ qaummaatinŋaruq avataanun. 4Aasii Saul ulġuŋaruq nunamun, suli tusaaŋaruq nipimik uqallaktuamik inmiñun, Saul, Saul, summan nagliksaaqtitpiŋa? 5Tavra Saul apiqsriŋaruq, Kiuvich ququularuatin uvamnik? Aasiiḷi ilaan kiuŋagaa, Uvaŋa Jesus-guruŋa, nagliksaaqtitan. [Nagliksautiksriuqsiññaqtutin iliŋnun akiḷḷiḷiqsuqamŋa.] 6Makittin, aasii aullaġlutin iniqpaŋmun, uqallautiniaġaatin suruksrautilaaġnik. 7Aŋutit iglauqatiŋi Saul makitaŋarut nutqaŋavlutiŋ uqallaġniaġnatiŋ, tusaqsraġivlugu nipi aglaan tautulaił̣ł̣utiŋ iñuŋmik. 8Saul makinŋaruq nunamiñ, aasii uiññami tautuksiḷaiñŋaruq sumik. Tavra tasirriutiŋagaat aasii tikiutivlugu Damascus-mun. 9Tavraasii piŋasuni uvluni tautuksiḷaiñŋaruq, niġiḷaiñmiuq imilaił̣ł̣uniḷu.
10Tavra ukpiqtuaq inŋaruq Damascus-mi atiqaqtuaq Ananias-mik. Atanġum tuqłuŋagaa atqanik qiñiqtuuraakun, Ananias. Aasii ilaan kiuŋagaa, Uvaniittuŋa, Ataniiq. 11Tavra Atanġum uqallautiŋagaa, Makillutin aullaġiñ apqugaatchianun atiqaqtuanun Sivukkiruanik, aasii apiqsriḷutin igluani Judas iñuŋmik Tarsus-miumik, atiqaqtuamik Saul, qanuq ilaa aŋaiyyuuqtuq. 12Aasii qiñiqtuuraakun tautuaniŋagaa iñuk atiqaqtuaq Ananias-mik isiqtuaq, aasii iḷivḷugich argaŋni ilaanun ilaa tautullasitqiquvlugu. 13Tavra Ananias-gum kiuŋagaa, Ataniiq, tusaaŋaruŋa iñugiaktuaniñ iñuŋniñ taavrumuuna iñukun, qanutun pigiisigiruamik savaaġiŋakkaŋanik ukpiqtuanun Jerusalem-mi. 14Aasii qaiŋaruq Damascus-mun ataniġnaqusiraqłuni aŋaiyyuliqsiqpaŋniñ qiḷiqsruiyumiñaġukługich iluqaisa ukpiqtuat iliŋnun. 15Tavra Ataniq uqallaŋaruq ilaanun, Aullaġiñ, qanuq uvaŋa piksraqtaaġiŋagiga savautitquvluŋa, iḷitchuġipkaquvluŋa Jew-guŋitchuanun, umialiŋnullu, Israel-guruanullu. 16Qanuq iḷisautiniaġiga qanutupayauraq nagliksaaqtuksrautilaaŋa pisigiluŋa.
17Tavra Ananias aullaŋaruq, aasii isiqłuni iglumun. Aasii iḷiŋagai argaŋni Saul-mun uqallakłuni, Aniqaan Saul, Atanġum Jesus niptaŋaruam iliŋnun apqunmi qaġġiviŋñi, tiliŋagaaŋa qiñillasitqiquvlutin, suli paŋmapaŋmiñ aglaan Ilitqusiġiksuamun aŋalatquvlutin. 18Aasii tavrauvvaa sutkiaq kavitchisun ittuat kataŋarut Saul-gum irraŋniñ, aasii qiñillasitqiŋaruq. Tavra makinŋaruq aasii paptaiqsauvluni, 19suli niġiŋaruq aasii sayanitqikł̣uni. Tavra iñugiaktuani uvluni piqatigiŋagai ukpiqtuat Damascus-mi.
Saul Alġaqsruiruq Damascus-mi
20Tavra Saul aŋaiyyuliaqsautigillaan piŋaruq Jew-guruat aŋaiyyuviŋiññun. Aasii alġaqsruutigirraqsiŋagaa Jesus, Iġñiġinivḷugu God-mun. 21Tavra iluqaġmiŋ tusaaruat ilaanik niġiiḷḷaqtauŋarut, aasii uqaqłutiŋ, Taimñauŋitpauna iñuk Jerusalem-mi tuquġairuaq ukpiqtuanik Jesus-mun? Aasii qaiŋaruq mauŋa sivuniġivlugu tigutaaġlugich ukpiqtuat utqutisukługich aŋaiyyuliqsiqpaŋnun. 22Tavra Saul alġaqsruiŋaruq suaŋasisaiññaqługu alġaqsruutini. Aasii ilaan ukpiġnaqsilġutiŋi Jesus Christ-guniŋagun suaŋavaił̣ł̣utiŋ Jew-guruat Damascus-miittuat kiumalaiñŋagaat. 23#2 Co 11.32, 33.Iñugiaktuat uvlut qaaŋianiŋmata, Jew-guruat katinŋarut sivunniuqłutiŋ tuqutchukługu Saul. 24Tavra sivunniuġutaat iḷitchuġiŋagaa Saul-gum. Aasii taapkua iñuaġuktuat qaunagiŋagaich paaqpaich uvlumi unnuamiḷu, tuqutchukługu Saul. 25Tavra unnuat iḷaŋanni, ukpiliqsuat Saul alġaqsruimman, niŋinŋagaat Saul siḷataatigun katchich niŋirrusiqł̣ugu aguummakpaŋmik.
Saul Jerusalem-miittuq
26Tavra Saul aullaŋaruq Jerusalem-mun, aasii iḷḷatisaŋagaluaqtuq ukpiqtuanun. Iliŋisa arguagiŋagaat ukpiqtuaġuqtilaaŋa, suli iluqaġmiŋ iqsigiŋagaat. 27Tavra Barnabas qaivḷuni ikayuŋagaa Saul, aasii tiliraunikun iḷitchitquranuutivlugu. Ilaan quliaqtuaġutiŋagai Saul-mun tautuŋatilaaŋanik Ataniq apqunmi, qanuġlu Atanġum uqaŋatilaaŋanik Saul-mun. Barnabas quliaqtuaġutiŋammigai qanutun qikkisaił̣ł̣uni Saul alġaqsruiŋatilaaŋanik alġaqsruutigivlugu Jesus Damascus-miuni. 28Tavra Saul nayuŋagai, aasii kukiḷukłuni iluqaani Jerusalem-mi, 29alġaqsruutigivlugu Ataniq qikkisaił̣ł̣uni. Suli uqaaqatigivlugich Greek-gich uqausiqaqtuat Jew-guruatun, ilaisaliasii tuqurviksraqsiuŋagaat. 30Tavra aniqatit iḷitchuġikamiŋ taavrumiŋa, aullautiŋagaat Saul Caesarea-mun, aasii tavraŋŋa aullaqtiłługu Tarsus-mun. 31Tavra aŋaiyyuliqiruat iluqaani Judea-mi Galilee-miḷu Samaria-miḷu tutqiksiŋarut, suli aŋaiyyuliqiruat suaŋasisaiññaŋarut iñugiaksisaiññaqłutiglu iñuuvlutiŋ qiksigivlugu Ataniq, quviasaaġutaaniḷu Ilitqusiġiksuam.
Peter Lydda-muŋaruq Joppa-mullu
32Tavra Peter iglauŋaruq sumulliqaa, aasii iḷaanni ullaŋagai God-im iñuŋi iñuuruat Lydda-mi nunaaqqimi. 33Tavrani kasuŋagaa iñuk atiqaqtuaq Aeneas-mik, makitilaiñŋaniqsuaq tallimat piŋasuni ukiuni avatiŋi tuquŋavlutiŋ. 34Tavra Peter-m uqallautiŋagaa, Aeneas, Jesus Christ iłuaqsigaatin. Makittin iłuaqsakkich tuŋiutitin. Tavra tavrauvvaa makinŋaruq. 35Tavra iluqaġmiŋ iñuuruat Lydda-mi Sharon-miḷu tautuŋagaat, aasii iliŋich ukpiliŋarut Ataniġmun.
36Tavra Joppa-miinŋaruq ukpiqtuaq aġnaq atiqaqtuaq Tabitha-mik. Atqa Greek-tun Dorcas sivuniqaqtuaq tuttumik. Iluqaan piviksrani atuŋaniġaa nakuurualiqivluni ikayuqługiḷḷu iḷiappauruat. 37Taipkunani uvluni naŋiliŋaruq aasii tuquvluni, tavraasii timaa ivvaanikamirruŋ iḷiŋagaat qiḷaguamun. 38Tavra Joppa qaninman Lydda-mun, ukpiqtuat Joppa-mi tusaaŋarut Peter Lydda-miitilaaŋanik. Tavra tilisiŋarut malġugnik iññuŋnik Peter-mun uqaluksriqł̣ugik inna, Qilamik ullaktigut. 39Tavra Peter itqanaiyaŋaruq, aasii aullaqatigivlugik. Tavra tikiñman qiḷaguamuutiŋagaat. Iluqaġmiŋ uiḷgaŋaruat makitaŋarut saniġaani qiavlutiŋ, suli maniuqługich quppiġaat annuġaallu Dorcas piḷiaŋi iñuuŋŋaġmi. 40Tavra Peter-m aninŋagai iluqaisa, aasii sitquqłuni aŋaiyyuŋaruq. Tavraasii qiviaqługu timaa uqallaŋaruq, Tabitha, makittin. Tavra uiñŋaruq, aasii Peter tautukamiuŋ aquvinŋaruq. 41Tavra Peter-m isaaqłuni ikayuŋagaa makinman. Tavraniasii ququaqługich ukpiqtuallu uiḷgaŋaruallu, ilaan qaiñŋagaa iñuuvlugu. 42Tavra taamna iḷitchuġirauŋaruq iluqaani Joppa-mi, suli iñugiaktuat iñuich ukpiliŋarut Ataniġmun. 43Tavra Peter uvliuŋaruq Joppa-mi, tukkuġivlugu Simon qitummairi ammiñik.
Voafantina amin'izao fotoana izao:
Acts 9: INUPIAQ
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)