Panagnaꞌan 41
41
Si Yusup magpahāti taginep sultanin
1Palabey ne duwen tahun neginep sultanin weꞌ laꞌi koꞌ iye nengge tapit si higad boheꞌ hadje inēnan Nil. 2Niyaꞌ koꞌ takitene patakas amban Nil miyaꞌan pituꞌ sapiꞌ hāp duk lemmek. Mangan balili siye laꞌi. 3Ubus niyaꞌ isab paturul pituꞌ sapiꞌ seddili, debbes duk kagkag manamal patakas amban Nil miyaꞌan. Pī siye nengge si bihing sapiꞌ sinduwehin laꞌi si higad Nil. 4Bu meꞌ sapiꞌ makagkagin kakande meꞌ sapiꞌ mahāp duk malemmekin. Ubus miyaꞌan ngape ne sultanin. 5Ubus tuli iye balik bu ne ne isab neginep balik. Niyaꞌ koꞌ dampoꞌon kuweꞌ paley pituꞌ tangka buwaꞌnen lemmek duk hāp manamal. 6Ubus niyaꞌ koꞌ isab takitene tomoꞌ pituꞌ tangka, buwaꞌnen kagkag duk lanes sabab baliyu panas. 7Iloroy weꞌ makagkagin meꞌ pituꞌ malemmekin. Ubus bu ngape sultanin duk kataꞌuhanne weꞌ teginep hatiꞌ hadja miyaꞌan. 8Pag salung ne suse sultanin. Masan iye daꞌakne pī si iye kēmon meꞌ aꞌa elimuꞌan duk aꞌa lalem kataꞌunen. Pag laꞌi ne siye kēmon inakahan weꞌ sultanin meꞌ teginepne miyaꞌan, saguwaꞌ gaꞌ niyaꞌ siye taꞌu mahātine si sultanin.
9Manjari missā nakuraꞌ meꞌ aꞌa magboꞌo-boꞌo ininumin si sultanin, paꞌinne, “Kuweꞌitu taꞌessebku meꞌ kasallaꞌannu si akuhin. 10Metuꞌuhin pag inastel kew si kami meꞌ daraꞌakannun, dinaꞌak kami duk nakuraꞌ meꞌ aꞌa maghinang-hinang panin kinalabusu weꞌ nu dem lumaꞌ kapitan guwaldiyahin. 11Dambuwaꞌ sangem neginep kami duwangan saliꞌ-saliꞌ. Saguwaꞌ magseddili taginep kamihin. 12Manjari niyaꞌ laꞌi dembuwaꞌ lella Hibrani bataꞌ pe, daraꞌakan kapitan meꞌ guwaldiyahin. Pag magaka kami si iye tineginep kamihin, pinahātihan kami weꞌ ne. Akahanne kami dangan-dangan hāti teginep kamihin. 13Tewwaꞌ kēmon pinaꞌinnen. Aku, pinabalik ku si hinangkun duk aꞌa dambuwaꞌin pinapatey ne.”
14Sakaliꞌ takale sultanin miyaꞌan magtawus pinasan weꞌ ne dinaꞌak pī si iye si Yusup. Magdayiꞌ-dayiꞌ siye ngeddoꞌ si Yusup pinaluwas amban kalabusu. Magkeke dahuꞌ iye duk maggantiꞌ semmek ubus bu pī ne iye si sultanin. 15Ubus paꞌin sultanin pu si Yusup, “Bakas ku neginep bu gaꞌ niyaꞌ taꞌu mahātine. Takaleku weꞌ taꞌu kew magpahāti teginep.” 16Nambung si Yusup paꞌinne, “Dumaꞌin hep aku, Sultan. Saguwaꞌ pahātihan Tuhanin du kew bang ine teginepnun bu hātinen para si kahāpannu du.”
17Ubus paꞌin sultanin pu si Yusup, “Teginepkun weꞌ laꞌi ku nengge si higad boheꞌ Nil. 18Na, niyaꞌ pituꞌ sapiꞌ hāp duk lemmek manamal patakas amban Nil miyaꞌan. Mangan balili siye laꞌi. 19Ubus bu niyaꞌ paturul pituꞌ sapiꞌ seddili patakas. Meꞌ sapiꞌ miyaꞌan debbes duk kagkag manamal. Gaꞌ ku bakas ngite sapiꞌ debbes kuweꞌ miyaꞌan tuꞌu si kēmon lahat Misir inin. 20Ubus bu meꞌ sapiꞌ makagkagin kakande meꞌ pituꞌ sapiꞌ malemmekin. 21Pag ubus kakande gaꞌi takilale weꞌ bakas kakande peggeꞌ gaꞌ du halin kagkagden. Ubus ngape ne ku. 22Manjari,” paꞌinne, “neginep ku balik. Niyaꞌ dampoꞌon kuweꞌ paley pituꞌ tangka buwaꞌnen lemmek duk hāp manamal. 23Ubus bu tomoꞌ isab pituꞌ tangka buwaꞌnen kagkag duk lanes sabab baliyu panas 24bu iloroy weꞌ meꞌ buwaꞌ makagkagin meꞌ buwaꞌ mahāpin. Bakas akaku tineginepku inin si meꞌ aꞌa elimuꞌan saguwaꞌ gaꞌ niyaꞌ taꞌu mahātine.”
25Paꞌin si Yusup si sultanin, “Meꞌ teginepnun, Sultan, magdambuwaꞌ du hātinen. Pakitehan Tuhanin si kaꞌu bang ine sōng hinangnen. 26Meꞌ pituꞌ sapiꞌ mahāpin,” paꞌinne, “hātinen pitun tahun, duk meꞌ pituꞌ tangka buwaꞌ mahāpin hātinen pitun tahun du isab. Magdambuwaꞌ du hātinen. 27Meꞌ pituꞌ sapiꞌ madebbes duk makagkagin, iye mapaturul si meꞌ mahāpin hātinen pitun tahun,” paꞌinne, “duk meꞌ pituꞌ tangka buwaꞌ makagkagin duk malanes sabab baliyu panasin hātinen pitun tahun isab. Hātine inin sōng niyaꞌ pitun tahun unus. 28Akahante kew, Sultan, pakitehan Tuhanin si kaꞌu bang ine sōng hinangne. 29Sōng tekka dahuꞌ pitun tahun manjari manamal kēmon tinanem diyalem lahat Misirin. 30Saguwaꞌ paturul amban iyan niyaꞌ isab pitun tahun unus. Hangkan gaꞌi ne taꞌessebde masa kaꞌekka kapamanganin. Sigpit manamal dem lahatin weꞌ unusin. 31Hawal kasigpitan iyan gaꞌ niyaꞌ aꞌa makaꞌesseb bakas kamanjari meꞌ tinanemden.” 32Paꞌinne pe, “Hangkan minduwe teginepnun supaya kataꞌuhannu weꞌ dembūs-būs ne Tuhanin duk gaꞌi tiggel asal patekkane kēmon inin.”
33“Manjari,” paꞌinne pe, “hāp, Sultan, bang kew miha dembuwaꞌ aꞌa taꞌu duk pandey mikil bu urunganun iye kapatut ngantan dem lahat Misir inin. 34Hāp isab bang urungannu kapatut meꞌ aꞌa sinduwehin magnakuraꞌ si kalahatan inin. Dem pitun tahun kamanjari meꞌ tinanemin, bahagiꞌun pinalime kēmon jari meꞌ tinanem si Misirin duk eddoꞌun da bahagiꞌ. 35Ubus,” paꞌinne pe, “subey eddoꞌ meꞌ nakuraꞌin kēmon bahagiꞌ si kaꞌuhin, Sultan, dem kapitun tahun kamanjari tinanemin bu inennaꞌ pahāp-hāp weꞌ de diyalem meꞌ bodega si meꞌ puweblo. 36Buwaꞌ tinanemin dem meꞌ bodega miyaꞌan subey inennaꞌ duk niyaꞌ kinakan bang tekka pitun tahun unusin duk gaꞌi inunus meꞌ aꞌa Misirin.”
Si Yusup tahinang nakuraꞌ laꞌi si lahat Misir
37Manjari sultanin duk kēmon meꞌ bataꞌnen kasulutan si binissā si Yusup miyaꞌan. 38Paꞌin sultanin si meꞌ bataꞌnen, “Gaꞌ teꞌed niyaꞌ takasuwaꞌte bi aꞌa kuweꞌ si Yusup iyan. Laꞌi si iye kataꞌu amban Tuhanin.” 39Ubus paꞌinne pu si Yusup, “Gaꞌ niyaꞌ aꞌa paliyu kataꞌunen duk kapandeyannen amban kaꞌu, peggeꞌ pinataꞌu kew weꞌ Tuhanin. 40Kaꞌu ne iye magbayaꞌ si kēmonkun. Kēmon aꞌakun dem lahat inin subey ne patuhut si kaꞌu. Luwal aku, peggeꞌ sultan ku, langkew amban kaꞌuhin.” 41Paꞌinne pe, “Kuweꞌitu kaꞌu ne mangantanan lahat Misirin.” 42Ubus pinellusan weꞌ sultanin sinsimne tege malka sultanin#41:42 Sinsim sā miyaꞌan ginuna para pagpilma. amban gulameyne bu pinapī si gulamey si Yusup. Pinasemmekan hāp weꞌ ne si Yusup bu pinapīhan gantung liꞌug bulawan si kellongne. 43Ubus bu daꞌakne si Yusup pasakey diyataꞌ pasakeyan#41:43a Pasakeyan sultanin masaley arak kuweꞌ kalesa, sugaꞌ gaꞌ niyaꞌ sapewne bu hāp teꞌed. para aꞌa mapasunuꞌ si sultanin. Bu niyaꞌ dehellu amban iye ngalingan, pinaꞌin, “Pasujud kaꞌam#41:43b lit. ‘abrek’; gaꞌi tantu kataꞌuhan hātinen, kaw ‘pasujud kaꞌam’ atawa ‘palīꞌ kaꞌam’ atawa ‘daꞌa kaꞌam si lān’..” Sā miyaꞌan pinatingkoloꞌ si Yusup weꞌ sultanin ngantanan lahat Misirin.
44Paꞌin sultanin pu si Yusup, “Aku sultanin, saguwaꞌ gaꞌi makajari meꞌ aꞌahin tuꞌu dem lahat Misir maghinang ine-ine bang gaꞌi du daꞌaknu.” 45Ubus bu ginantiꞌan weꞌ sultanin ēn Yusupin bu ēnanne iye Sapenat-panea. Ubus pinaꞌandahan weꞌ sultanin si Yusup pu si Asenat, anak Potipera, imam amban On. Sā miyaꞌan labeyannen hangkan si Yusup tapagbayaꞌ laꞌi si lahat Misir.
46Tagnaꞌ si Yusup dinaꞌak magbayaꞌ weꞌ sultan Misirin tellumpūꞌ tahun umulnen. Pag tahalaꞌ si Yusup amban sultanin lumengngan iye pī si kalahat-lahatan dem lahat Misir. 47Dem pitun tahun ekka manamal jarihan tinanemin 48duk pakaꞌeddoꞌ weꞌ si Yusup kēmon buwaꞌ tinanemin bu pakaꞌennaꞌne dem bodega si meꞌ puweblo. Si kēmon puweblohin ennaꞌne kinakan amban meꞌ tanaꞌ mapaliputin. 49Banes manamal kinakan inennaꞌ weꞌ si Yusup; duk padeheng ne iye nakesne peggeꞌ ekka ne manamal kuweꞌ ekkahan umus si tahikin hangkan gaꞌi ne tatakes; inennaꞌ ne hadja.
50Gaꞌ pe tekka unusin niyaꞌ ne duwe anak si Yusup lella duk andanen Asenat, anak Potipera, imam amban Onin. 51Pangēn si Yusup anakne sakahin Manasse#41:51 Ēn Manasse inin bissā Hibrani duk hellingnen arak kuweꞌ ‘takeyipat’ si bissā Hibrani. . “Peggeꞌ,” paꞌinne, “tabang Tuhanin ku duk takeyipatku ne kēmon meꞌ bakas kasusehankun duk meꞌ usbakun.” 52Pangēnne anakne salihin Eprayim#41:52 Ēn Eprayim bissā Hibrani isab duk hellingnen arak kuweꞌ ‘manjari’ atawa ‘dubli jarinen’ si bissā Hibrani.. “Peggeꞌ,” paꞌinne, “inurungan ne ku duwe anak weꞌ Tuhanin tuꞌu dem lahat bakas kasigpitankun.”
53Manjari pag ubus ne pitun tahun kamanjari meꞌ tinanemin laꞌi si Misir 54tekka ne pitun tahun unusin sā bakas pinaꞌal si Yusupin. Niyaꞌ unus si kēmon kalahatan. Saguwaꞌ laꞌi si Misir ekka kinakan inennaꞌ. 55Pag kakulangan ne si kinakan meꞌ aꞌa si kēmon lahat Misirin bu inusan ne siye, māku kinakan siye amban sultanin. Paꞌin sultanin si meꞌ aꞌa Misirin, “Pī kaꞌam pu si Yusup duk ine-ine daꞌakne hinangun bi.” 56Pag latag ne weꞌ unus lahat miyaꞌan, iluka weꞌ si Yusup kēmon meꞌ bodegahin duk pinabellihan weꞌ ne kinakanin si meꞌ aꞌa Misirin. Peggeꞌ inunus teꞌed meꞌ aꞌahin. 57Tekka ne si lahat Misir meꞌ aꞌa amban meꞌ lahat seddilihin magbelli kinakan amban si Yusup peggeꞌ pasōng unusin si kēmon kalahatan si dunya.
Voafantina amin'izao fotoana izao:
Panagnaꞌan 41: yakV
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2019, Wycliffe Bible Translators, Inc. All rights reserved.