MATIUS 8
8
Tong Tuhan Yésus peka'o kelunan éh sakit kapéé'
(Mrk. 1:40-45, Luk. 5:12-16)
1La'ah hun Yésus tuhun jin tokong, pinaa' kelunan kivu éh. 2La'ah pu'un jah kelunan sakit kapéé' tavin Yésus. Iah ngejekuu' lep néh tong jumen Yésus menyat éh pika éh, ka' ha' néh, O lakei' ja'au, hun ko' keloo' adang ko' omok peka'o akeu', ha' néh.
3Pelapah Yésus nyelaka' ojoo' néh ke' Néh ngamit éh, ka' ha' Néh, Akeu' keloo' ke' ma'o jin kesakit ko' nah, ha' Néh. Pelapah kelunan inah pu'un ma'o. 4#Ima. 14:1-32 Boh Yésus bara' ngan néh, Menéng ke' jian-jian, mai ke' tosok iteu' ngan kelunan séé'-séé' péh, bang jian ke' tioo tai bara' usah ko' ngan imam tong sebayang Yahudi, ngan mena' pengena' ngan néh ke' néh mematai éh kivu sohoo' Tuhan lem Surat Musa dokoo' kekat irah omok jam ka'au' lepah ma'o, ha' néh.
Tong Yésus peka'o jah kelunan sohoo' seradu Rum
(Luk. 7:1-10)
5Hun Yésus tai leboo' Kapernaum, tuai jah pengeja'au irah seradu Rum menyat Yésus nolong éh. 6Ha' néh, O lakei' ja'au, pu'un jah kelunan sohoo' ké' éh sakit tong lamin ké' sitai, bé' éh omok gusii', keta mu'un éh, ha' néh.
7Ha' Yésus ngan néh, Oo' tai ke' Ku' peka'o éh dat, ha' néh.
8Bang ha' pengeja'au nah, Mai ke' tuai makat da', bé' tekep akeu' mihin ke' tai lamin ké'. Jian ke' pané awah, neu' ha' ko' awah péh kelunan sohoo' ké' inah omok éh ma'o. 9Uban akeu' péh kelunan éh kivu sohoo' pengeja'au ké' ngan pu'un irah seradu éh jah kepéh éh lem nihau ké'. Kenat péh hun ké' bara' ngan jah usah, Tai ke', tai ke' éh kenat. Hun ké' bara' ngan jah usah kepéh, Tuai ke', tuai ke' éh. Hun ké' bara' ngan ripen ké', ko' maneu' iteu', iah péh maneu' éh, ha' néh.
10Béé kenin Yésus menéng ha' néh kenat, boh Yésus pané ngan irah pinaa' éh kivu éh, ka' ha' néh, Akeu' bara' mu'un ngan keh, jin belah irah pohoo' Yahudi péh bé' pu'un irah pu'un pengelan barei' pengelan lakei' iteu'. 11#Luk. 13:29 Akeu' bara' mu'un ngan keh, Hun Ké' tuai pengeja'au, pinaa' kelunan éh tengéé' pohoo' jin pohoo' Yahudi juk tuai jin tana' saa' usit maten dau ngan jin tana' saa' oléé' maten dau ke' réh mokoo' kuman ngan Abraham ngan Ishak ngan Yakub. 12#Mat. 22:13, 25:30, Luk. 13:28 Bang irah Yahudi éh tekep tai lem nihau Ké' kenat, bé' réh omok tai, bang nebet Ké' tong merem awah réh. Sinah réh mangaa' keta mu'un-mu'un, ha' néh. 13La'ah ha' Yésus ngan pengeja'au nah, moléé' ke', adang néh pu'un pekua' barei' pengelan ko' nah, ha' néh. La'ah tovoo' jaka' inah péh kelunan sohoo' lakei' pengeja'au nah ma'o jin kesakit néh.
Tong Yésus peka'o kelunan éh sakit
(Mrk. 1:29-34, Luk. 4:38-41)
14La'ah Yésus tai lamin Péterus, boh éh na'at kivan Péterus éh redo pegen darem. 15Yésus ngamit ojoo' redo inah, pelapah kedarem redo inah pega', ngan iah tioo betéé' petubo réh.
16La'ah avéé' dau tahup, pu'un kelunan mihin kuraa'-kuraa' kelunan éh nasek balei' tavin Yésus. La'ah palaa' ha' néh awah péh Iah mega' kekat balei' sa'at nah ngan peka'o kekat irah éh sakit. 17#Yes. 53:4 Iah maneu' kenat dokoo' néh pesukup ha' éh benara' nabi Yesaya, ka' ha' Yesaya nah, Iah tagong kekat pengeketa lu' ngan peka'o kekat kesakit lu', ha' néh.
Tong kelunan éh juk kivu Yésus
(Luk. 9:57-62)
18Hun Yésus na'at kelunan pinaa' tutuh déhéé' néh, boh éh nyohoo' bakéh Néh papit kedipa baa' Banget nah. 19La'ah pu'un jah guru éh nebaraa' tong tebaraa' lem Surat Musa tuai tavin éh, ha' néh, O Guru, semah-semah ke' tai akeu' juk kivu ke', ha' néh.
20Ha' Yésus ngan néh, Kekat bekuleu' pu'un luvang néh, ngan kekat juhit pu'un sala néh, bang Anak Kelunan bé' pu'un jalan néh pegen ngan posot, ha' néh.
21Jah usah kepéh éh kivu éh bara' ngan Néh, O lakei' ja'au jian ke' kejeraa' akeu' tai jak mokoo' ngan tamen ké' pah avéé' néh matai, ha' néh.
22Bang ha' Yésus ngan néh, Jian ke' kivu Akeu', kejeraa' irah jah éh mokoo' seleket matai nanem kelunan éh matai nah, ha' néh.
Tong Yésus ngepawah kepu ngan lipak
(Mrk. 4:35-41, Luk. 8:22-25)
23La'ah tai Yésus masek lem alut pemung ngan irah bakéh Néh. 24Beleka' pu'un taa' ngan kepu gahang, avéé' lipak ja'au pa'ung lem alut, bang Yésus pegen marut. 25Tai irah bakéh Néh peto'ot éh, ha' réh, O Tuhan, jian ke' nolong améé', kaham lu' dat, ha' réh.
26La'ah ha' Yésus ngan réh, Kineu' keh medai? Uban ineu' keh kurang ngelan tong Akeu', ha' néh. Betéé' éh ke' néh meta' lipak ngan kepu, pelapah éh pawah mu'un.
27Béé kenin kekat irah bakéh Néh, ka' ha' réh, Kelunan ineu' éh ka' éh omok Pané ngan kepu ngan lipak ke' néh omok Kivu sohoo' Néh ha' réh.
Tong Yésus peka'o duah kelunan éh nasek balei'
(Mrk. 5:1-20, Luk. 8:26-39)
28Hun Yésus avéé' saa' dipa baa' Banget tong tana' Gadara, peselalang éh ngan duah usah kelunan éh nasek balei'. Rawah inah tuai jin uban tanem kelunan. Luvaa' mu'un roh, bé' pu'un séé'-séé' péh jeleng masek jalan inah. 29Ngeradau roh ja'au ha', ka' ha' roh, O Anak Allah, ineu' éh juk neu' Ko' tong amo? Kineu' Ke' tuai, uban Ko' juk ngukum amo tenah bé' mena avéé' tong jaka' Ko' ngukum kekat kelunan, ha' roh.
30La'ah bé' makat juu' jin sinah pinaa' idok kuman. 31Kekat balei' nah menyat Yésus kejeraa' réh tai lem idok pinaa' nah, ka' ha' réh, Hun Ko' juk mega' améé', Ko' nyohoo' améé' masek lem kekat idok inah, ha' réh.
32Ha' Yésus ngan réh, Tai ka'ah, ha' néh. Pelapah balei' nah pega' jin rawah iri' tioo tai kepéh lem idok nah. Pelapah kekat idok nah nekedeu' jin apé ihang pelohoo' lem baa' matai menyet.
33La'ah kekat kelunan éh mavaa' idok nah kelap tai leboo' ke' réh bara' kekat rengah inah ngan irah éh sitai, ngan bara' tong kelunan éh nasek balei' nah kepéh. 34Pelapah kekat irah jin leboo' nah tai tavin Yésus, hun irah na'at Yésus pelapah irah menyat éh piso jin tana' réh.
Voafantina amin'izao fotoana izao:
MATIUS 8: PNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
