Tononkiran’i Solomona 2
2
1Izaho dia voahirana eny amin’ny tany lemaka ihany
ary lisy eny an-dohasaha.
(Ralehilahy)
2Toy ny lisy eo ampovoan’ny tsilo,
dia toy izany ianao, Rahavako, eo amin’ny zazavavy.
(Ravehivavy)
3Toy ny hazo paoma iray eo anivon’ny hazo any an’ala,
dia toy izany ny malalako eo amin’ny zanakalahy.
Mahafinaritra ahy indrindra ny mipetraka eo ambanin’ny alokalony,
sady mamy ao am-bavako ny voankazony.
4Noentiny niditra ho ao an-trano fitoeran-divay aho,
ary ny faneva napetrany eo amboniko dia fitiavana.
5Hatanjaho amin’ny mofo voaloboka aho,
ary velombelomy amin’ny paoma
fa mararim-pitia aho.
6Aoka ny tanany havia hiondanako,
ary aoka ny tanany havanana hamihina ahy.
(Olon-kafa?)
7Mampianiana anareo aho ry zanakavavin’i Jerosalema,
amin’ny gazela na amin’ny dieravavy any an-tsaha:
Aza manaitra na mamoha ny fitiavana
raha tsy efa sitrapony.
Indro, tamy Ralehilahy
(Ravehivavy)
8Injay, ny feon’ilay malalako!
Indro, tamy izy
ka mitsambikimbikina eny an-tendrombohitra
ary mitsamboamboatra eny amin’ny havoana.
9Ny malalako dia tahaka ny gazela na ny diera tanora;
indro, mijanona ao alatranonay izy,
mitsidika eo am-baravarankely,
manarangarana eo amin’ny makarakara.
10Niteny tamiko ny malalako hoe:
Mitsangàna, Rahavako, ry tsara tarehiko, ka andao!
11Fa indro, lasa ny ririnina,
tsy misy intsony sady efa lasa ny ranonorana;
12mamelana eny amin’ny tany ny voninkazo;
tonga ny taona fanaovam-peo fifaliana,
ary re atỳ amin’ny tanintsika ny feon’ny domohina.
13Mahamanitra ny voany tanora ny aviavy,
mamony ny voaloboka ka mamerovero tsara.
Mitsangàna, Rahavako, ry tsara tarehiko, ka avia!
14Ry voromailalako ao an-tsefatsefaky ny harambato,
dia ao amin’ny fialokalofana amin’ny fiakarana mideza,
aoka hahita ny endrikao
sy handre ny feonao aho,
fa mamy ny feonao, ary mampaharavoravo ny endrikao.
(Olon-kafa)
15Sambory ny amboahaolo,
dia ireo amboahaolo madinika izay manimba ny tanim-boaloboka;
fa efa mamony izao ny voalobotsika.
(Ravehivavy)
16Ahy ny malalako, ary azy aho,
dia ilay miandry ny ondriny eny amin’ny lisy.
17Mandra-pangatsiatsiaka ny andro,
amin’ny milenti-masoandro,
mitodiha, ry ilay malalako, ary aoka ho tahaka ny gazela na ny diera tanora
eny an-tendrombohitra be hantsana ianao.
Voafantina amin'izao fotoana izao:
Tononkiran’i Solomona 2: MRV
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© La Société Biblique Malgache 2011