Salamo 6
6
Aza ny fahatezeranao no ananaranao ahy
Ho an’ny mpiventy hira. Hampiarahina amin’ny valiha. Al-hasheminit. Salamo nataon’i Davida.
1TOMPO ô, aza ny fahatezeranao no ananaranao ahy
ary aza ny fahaviniranao no amaizanao ahy!
2Mamindrà fo amiko, TOMPO ô, fa reraka aho;
sitrano aho, TOMPO ô, fa mangozohozo ny taolako.
3Mangorohoro loatra ny fanahiko;
ary Ianao TOMPO ô, mandra-pahoviana?
4Miverena, TOMPO ô, afaho ny fanahiko,
vonjeo aho noho ny famindramponao.
5Fa tsy misy fahatsiarovana Anao any amin’ny fahafatesana;
iza no hidera Anao any amin’ny fitoeran’ny maty*?
6Efa sasatry ny misento aho;
isaky ny alina dia vonton’ny tomany ny kidoroko
sady kotsan-dranomaso ny fandrianako.
7Lanin’alahelo ny masoko;
efa pahina izy noho ny ataon’ny mpampahory ahy rehetra.
8Mialà amiko, ianareo mpanao ratsy rehetra!
Fa NY TOMPO efa nandre ny feon’ny fitomaniako,
9NY TOMPO efa nandre ny fangatahako;
NY TOMPO mandray ny vavaka ataoko.
10Ho menatra sy hangovitra be ny fahavaloko rehetra;
hihemotra izy ka ho menatra tampoka.
Voafantina amin'izao fotoana izao:
Salamo 6: MRV
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© La Société Biblique Malgache 2011