Joela INDRAY MIJERY
INDRAY MIJERY
«NY TOMPO no Andriamanitra», izany no hevitry ny anarana hoe Joela. Fotoana tsy nisian’ny mpanjaka, fa fotoana nampisongadina kosa ny asam-pisoronana no nahaveloman’i Joela.
Heverina ho taorianan’ny fahababoana no nanoratana ny bokin’i Joela, noho ny filazana ao amin’ny 4.2 ny amin’ny «Israely oloko sy lovako izay naeliny tany amin’ny Jentilisa».
Ny votoatin’ny Boky
Ny bokin’ny Joela dia isan’ny lahatsoratra atao hoe apokaliptika izay milaza ny zavatra hitranga mialoha ny farany.
Fampiomanana ny Andron’NY TOMPO ny fiavian’ny andiam-balala mahatsiravina sy ny hain-tany izay hanapotika ny firenena. Tsy misy azo atao amin’izay fotoana izay na dia ny hanao fanompoam-pivavahana aza. Ho avy hitsara Andriamanitra ka samy hotsaraina na ny Israely na ny Jentilisa. Mialoha izany anefa dia asain’Andriamanitra antsoin’ny mpaminany ny olona mba hibebaka amin’ny alalan’ny fifadian-kanina, ny fitomaniana, ny fisaonana ary ny fanaovana vavaka fifonana.
Ho setrin’izany, raha mibebaka izy, dia hisy fitahiana be dia be homen’Andriamanitra, ary ny handrotsahany ny Fanahy Masina ho an’ny olona rehetra no lehibe indrindra amin’izany.
Fanamarihana
Ny toko 3.1-5 ao amin’ny Baiboly malagasy dia manaraka ny fizarana ao amin’ny Baiboly hebreo, fa toko 2.28-32 izany ao amin’ireo Baiboly sasany izay manaraka ny fizarana ao amin’ny Baiboly dikanteny latina. Noho izany, amin’ireto farany, ny toko faha-4 amin’ny Baiboly malagasy dia lasa toko faha-3.
Ny firafitry ny boky
Fanafihan’ny andiam-balala sy hain-tany ary ny fitarainana noho izany: 1
Ny Andron’NY TOMPO sy ny fitahiana omeny raha mibebaka ny olony: 2–3
Ny fitsarana ny firenena ao amin’ny Lohasahan’i Josafata: Hotsaraina ny Jentilisa fa ho feno voninahitra kosa i Ziona: 4
Voafantina amin'izao fotoana izao:
Joela INDRAY MIJERY: MRV
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© La Société Biblique Malgache 2011