Joela 4
4
Ny fitsaran’Andriamanitra ny Jentilisa
1Fa indro, amin’ireo andro ireo sy amin’izany fotoana izany,
rehefa hampody an’i Joda* sy hanangana an’i Jerosalema indray Aho,
2dia hangoniko ny Jentilisa* rehetra
ka hoentiko midina ao amin’ny lohasahan’i Josafata,
ary ao no hifandaharako aminy
noho ny amin’ny Israely, oloko sy lovako,
fa naeliny tany amin’ny Jentilisa izy ireo;
ary nozarazarainy ny taniko
3sady nanaovany antsapaka ny oloko
ka zazalahy no nataony takalon’ny vehivavy janga,
ary zazavavy no namidiny divay ka nosotroiny.
4Ary ianareo koa, ry Tiro sy Sidona, sy ry tanin’ny Filistina rehetra,
Inona no tadiavinareo Amiko?
Hamaly faty Amiko va ianareo, sa ahoana?
Raha hamaly faty Amiko ianareo
dia hatsingeriko haingana ho eo an-dohanareo ny nataonareo,
5noho ny nakanareo ny volafotsiko sy ny volamenako,
sy ny nitondranareo ny fananako sarobidy ho ao amin’ny tempolinareo.
6Ny zanak’i Joda sy ny zanak’i Jerosalema
dia namidinareo tamin’ny Grika
mba hamindranareo azy hanalavitra ny taniny.
7Indro, hofohaziko izy
hiala any amin’ny tany
izay nahalafosanareo azy,
ary hatsingeriko ho eo an-dohanareo ny nataonareo.
8Hamidiko ho lasan’ny zanak’i Joda* kosa ny zanakalahinareo sy ny zanakavavinareo,
ary hamidiny amin’ny Sabeana kosa ireny, dia ho an’izay firenena lavitra;
fa NY TOMPO no efa niteny.
Ady farany sy fitsarana
9Ambarao any amin’ny Jentilisa* izao:
Miantsoa hanao ady masina,
fohazy ny lehilahy mahery!
Aoka handroso ny mpiady rehetra ka hiakatra!
10Tefeo ho sabatra ny angadinareo,
ary ho lefona ny antsinareo fanetezam-boaloboka!
Aoka izay kelikely aina hihiaka hoe: Mahery aho!
11Avia haingana, ianareo Jentilisa rehetra avy eny manodidina eny,
dia ento midina ao ny maherinao, RY TOMPO ô!
12Aoka hifoha ny Jentilisa
ka hiakatra ho ao amin’ny lohasahan’i Josafata;
fa ao no hipetrahako hitsara
ny Jentilisa rehetra avy eny manodidina eny.
13Arosoy ny antsimbary
fa masaka ny vokatra;
avia ianareo hanosihosy azy
fa feno ny famiazam-boaloboka,
mihoatra ny vata fanantazana:
Be loatra ny faharatsiany.
14E izany vahoaka mireondreona ao amin’ny lohasahan’ny fitsarana!
Fa efa antomotra ny Andron’NY TOMPO ao amin’ny lohasahan’ny fitsarana.
15Ho tonga maizina ny masoandro sy ny volana
ary tsy hamirapiratra ny kintana.
16NY TOMPO mierona avy ao Ziona*
ary mampikotroka ny feony ao Jerosalema
ka mihorohoro ny tany aman-danitra;
fa NY TOMPO no fialofan’ny olony
sy fiarovana mafy ho an’ny Zanak’Israely.
17Ary ho fantatrareo fa Izaho no TOMPO Andriamanitrareo,
izay monina ao Ziona, tendrombohitro masina;
dia ho masina i Jerosalema
ary ny hafa firenena dia tsy mba handeha
hamakivaky eo intsony.
Fanambinana vaovao ho an’ny vahoakan’Andriamanitra
18Amin’izany andro izany dia hipoipoitra ranom-boaloboka ny tendrombohitra,
handriaka ronono ny havoana,
ho feno rano ny lohasahan-driakan’i Joda rehetra,
ary hisy loharano hivoaka avy ao amin’ny tranon’NY TOMPO
ka handena ny lohasahan-driakan’i Sitima.
19Ho tonga tany lao kosa i Ejipta
ary ho tany efitra foana i Edoma
noho ny fampahoriana ny taranak’i Joda,
dia ny nandatsahany ny ran’ny tsy manan-tsiny teo amin’ny taniny.
20Fa honenana mandrakizay i Joda
ary hatramin’ny taranaka fara aman-dimby i Jerosalema.
21Ary hamaly ny ran’ny tsy manan-tsiny izay mbola tsy novaliko Aho;
fa NY TOMPO monina ao Ziona*.
Voafantina amin'izao fotoana izao:
Joela 4: MRV
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© La Société Biblique Malgache 2011