Hebreo INDRAY MIJERY
INDRAY MIJERY
Antsoina hoe epistily ity soratra ity, kanefa tsy mitovy amin’ny epistily mahazatra: Hafa kely ny fanombohany fa tsy mba misy fiarahabana, tsy misy olona voalaza fa nandefa azy na anoratana azy. Soratra miendrika fampianarana, toriteny, famelabelarana lalina ny Epistily. Manana izay mampiavaka azy koa izy amin’ny fomba fandaharan-tenin’ny Grika manam-pahaizana, ary koa ny fampiasany andininy ao amin’ny Testamenta Taloha voadika ara-bakiteny avy amin’ny Baiboly dikanteny grika na ny Septanta.
Nantsoina hoe Hebreo ny olona nanoratana ka nahatonga ny fiheverana hoe Jiosy nonina tany Palestina izy ireo.
Fantatra avy amin’ny rijan-teny fa nobeazina tao anatin’ny kolontsaina grika izy ireo ary Kristiana efa niorim-paka tamin’ny finoana sady nafana fo tamin’ny maha mpivavaka azy, saingy nandalo fizahan-toetra mahamay ka mila fampaherezana, tsy avela hihemotra.
Voaresaka ato ny fanao tao amin’ny tempoly ka angamba talohan’ny naharavany tamin’ny taona 70 no nahavoasoratra ny Hebreo.
Ny votoatin’ny Epistily
Toa naniry hiverina amin’ny fivavahana jiosy izay fantany tsara ireo olona anoratana ireo ka nila nampahatsiarovina ny fahalehibeazan’i Kristy sy ny fihoarany an’i Mosesy sy ny mpisorona ary ny Mpisoronabe na dia i Melkizedeka aza.
Jesosy no nahatanteraka izay rehetra niantomboka tany amin’ny Testamenta Taloha: Izy dia sady mpisorona no Mpisoronabe ary sorona mihitsy koa aza.
Ny firafitry ny Epistily
Niteny tamintsika tamin’ny alalan’ny Zanany Andriamanitra: 1.1-4
Ny toerana misy an’i Kristy oharina amin’Andriamanitra sy oharina amin’ny olona: 1.5–2.18
Ny fisoronan’i Kristy neken’Andriamanitra ho an’ny olona sy ny fampaherezana ny mpivavaka haharitra amin’ny fivavahana: 3.1–5.10
Kristy no Mpisoronabe ary tanteraka ao Aminy ny fanekena taloha: 5.11–10.39
Ny ohatra navelan’ireo olo-malazan’ny finoana sy ny faharetana ilaina amin’ny Kristiana: 11.1–12.13
Fitaomana ny Mpino handeha amin’ny fahamasinana sy fahamendrehana eo amin’ny fifandraisana amin’ny olona rehetra: 12.14–13.19
Tsodrano sy fanaovam-beloma: 13.20-25
Voafantina amin'izao fotoana izao:
Hebreo INDRAY MIJERY: MRV
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© La Société Biblique Malgache 2011