Estera INDRAY MIJERY
INDRAY MIJERY
Ny Boky dia isan’ireo Horonam-boky Dimy ka novakina tamin’ny Fetin’ny Porima.
Ny votoatin’ny Boky
Hita ato amin’ity boky ity ny tantara momba an’i Estera, vehivavy jiosy izay isan’ny babo avy tany Jerosalema, ary tonga vadin’ny mpanjakan’i Persia. Ao koa i Mordekay izay zanaky ny rahalahin-drainy sady mpitaiza azy. Ao ihany koa i Hamana izay nikasa handripaka ny Jiosy noho i Mordekay tsy nety niankohoka taminy. Nanao vy very ny ainy mihitsy i Estera tamin’ny fanatonana ny mpanjaka mba hamonjena ny fireneny. Nahazo sitraka tamin’ny mpanjaka anefa izy ka nivadika ny rasa: I Hamana indray no nahantona tamin’ny hazo fa i Mordekay no nahazo toeram-boninahitra ho valin’ny soa nataony tamin’ny mpanjaka, ary nahazo nandripaka ny fahavalony ny Jiosy.
Ny bokin’i Estera dia tsy ahitana mivantana ny anaran’Andriamanitra, kanefa miharihary ao fa i Estera sy ireo Jiosy namany dia miandrandra ny vonjy avy amin’Andriamanitra ary Andriamanitra no mitantana ny fandehan-javatra rehetra, fa fiasana ihany ny Mpino. Ny fifaranan’ny boky dia mitantara ny valifaty nataon’ny Jiosy tamin’ny fahavalony.
Ity boky ity koa dia manazava ny niandohan’ny fetin’ny Porima, izay tsy hita ao amin’ny Baiboly koa afa-tsy ato amin’ny bokin’i Estera, ary mbola ankalazain’ny Jiosy mandraka androany.
Ny fetin’ny Porima
Ny fotoana izay noheverin’i Hamana handripahana ny Jiosy dia nanaovana Pora. Io dia teny vahiny, tsy hebreo, midika hoe Fanaovana antsapaka: Nanaovana antsapaka ny andro sy volana handringanana ny Jiosy, koa izay voatondro dia ny faha-13-n’ny volana Adara. Io fotoana io indrindra anefa no tonga andro nahavoavonjy ny Jiosy ka namaliany ny fahavalony. Noho izany ny Jiosy dia nanao andro firavoravoana lehibe tamin’ny faha-13 sy faha-14 Adara, ary notendrena ho andro firavoravoana isan-taona ireo andro ireo ka nomena ny anarana hoe Porima, avy amin’ny hoe Pora.
Voafantina amin'izao fotoana izao:
Estera INDRAY MIJERY: MRV
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© La Société Biblique Malgache 2011