Asan’ny Apostoly 13
13
Nalefa ho misionera i Barnabasy sy i Saoly
1Teo amin’ny fiangonana tany Antiokia dia nisy mpaminany sy mpampianatra: I Barnabasy, i Simeona izay antsoina koa hoe Nigera, i Losio kireniana, i Menahema izay niara-notezaina tamin’i Heroda mpanapaka ary i Saoly. 2Nanao fanompoam-pivavahana ho an’ny Tompo sy nifady hanina izy ireo ka tamin’izany no nitenenan’ny Fanahy Masina hoe: Atokàny ho Ahy i Barnabasy sy i Saoly mba hanao ny asa izay efa niantsoako azy. 3Rehefa nifady hanina sy nivavaka ary nametra-tanana taminy izy ireo dia nandefa azy.
Any Sipra i Barnabasy sy i Saoly
4Nirahin’ny Fanahy Masina izy roa lahy, raha nidina nankany Seleokia ka teo no niondrana an-tsambo hankany Sipra. 5Nony tonga tany Salamisy izy dia nitory ny tenin’Andriamanitra tany amin’ny sinagogan’ny Jiosy*; ary noentiny koa i Jaona ho mpanampy azy.
6Rehefa namakivaky ny nosy hatrany Pafo izy dia nahita Jiosy iray antsoina hoe Barjesosy, mpitahiry ody sady mpaminany sandoka, 7nipetraka tao amin’i Sergio Paolo; governoran’ny tany sady lehilahy marani-tsaina izy io; nampiantso an’i Barnabasy sy i Saoly hankao aminy izy satria naniry mba hahare ny tenin’Andriamanitra. 8Nefa i Elima, ilay mpitahiry ody, satria izany koa no anarany raha adika, dia nanohitra azy roa lahy sady nitady hampivily ny governora tsy hanaiky ny finoana. 9Fa i Saoly kosa, izay antsoina koa hoe Paoly, dia feno ny Fanahy Masina ka nibanjina azy 10sady niteny hoe: Ialahy feno ny fitaka rehetra sy ny hafetsena rehetra, Ialahy zanaky ny devoly* sady fahavalon’ny fahamarinana rehetra, tsy hitsahatra tsy hamily ny lalan’ny Tompo izay mahitsy va Ialahy? 11Ary indro, ankehitriny hamely an’Ialahy ny tanan’ny Tompo, dia ho jamba Ialahy ka tsy hahita masoandro aloha. Dia tonga taminy niaraka tamin’izay ny hajambana sy ny haizina ary niraparapa nitady olona hitantana azy izy. 12Nony nahita izay zava-nitranga taminy ny governora dia nino sady talanjona tamin’ny fampianaran’ny Tompo.
Ny fanambaràna nataon’i Paoly tany Antiokia any Pisidia
13Niondrana an-tsambo niala avy tao Pafo i Paoly sy ireo namany dia tonga tany Perga any Pamfilia; i Jaona kosa dia nandao azy ka niverina nankany Jerosalema. 14Rehefa niala tany Perga izy ireo dia nandroso nankany Antiokia any Pisidia ary niditra tao amin’ny sinagoga* tamin’ny andro Sabata* ka nipetraka teo. 15Rehefa vita ny famakiana ny Lalàna sy ny Mpaminany dia nampilaza taminy ireo lehiben’ny sinagoga hoe: Ry rahalahy, raha misy fananarana hataonareo amin’ny olona dia ataovy.
16Ary nitsangana i Paoly sady nibaiko tanana azy ka niteny hoe: Ry lehilahy Israelita sy ianareo izay matahotra an’Andriamanitra, mihainoa: 17Andriamanitr’izao olona Israely izao no nifidy ny razantsika ka nanandratra ny olona, raha nivahiny tany amin’ny tany Ejipta izy, ary sandry avo no nitondrany azy nivoaka avy tany. 18Niaritra ny toetran’ireo tany an-tany efitra nandritra ny efapolo taona Izy. 19Ary rehefa nandrava firenena fito tany amin’ny tany Kanana Izy dia nampandovainy ny tanin’ireny izy 20tokony ho dimampolo sy efajato taona. Rehefa afaka izany dia nomeny mpitsara izy hatramin’i Samoela mpaminany. 21Taorianan’izany indray dia nangataka mpanjaka izy ka nomen’Andriamanitra azy nandritra ny efapolo taona i Saoly, zanak’i Kisy, lehilahy avy tamin’ny fokon’i Benjamina. 22Rehefa nanaisotra an’i Saoly Izy dia nanandratra an’i Davida ho mpanjakany sady nanambara azy hoe: «Nahita an’i Davida, zanak’i Jese, lehilahy araka ny foko, izay hanao ny sitrapoko rehetra Aho» (1Sam 13.14; Sal 89.20). 23Avy tamin’ny taranak’izany lehilahy izany no nitondran’Andriamanitra an’i Jesosy araka ny teny fikasana ho Mpamonjy ny Israely. 24Talohan’ny nahatongavany dia nitory ny batisan’ny fibebahana tamin’ny olon’ny Israely rehetra i Jaona. 25Ary rehefa nadiva hahatanteraka ny fihazakazahany i Jaona dia niteny hoe: Heverinareo ho iza moa aho? Tsy Izy aho; fa indro, misy Iray avy ao aorianako, koa izaho dia tsy mendrika hamaha ny kapa eo an-tongony akory.
26Ry rahalahy, taranak’i Abrahama, sy izay rehetra matahotra an’Andriamanitra eo aminareo, ho amintsika no nampitondrana ny tenin’izao famonjena izao. 27Fa izay monina any Jerosalema sy ny loholona eo aminy dia tsy mba nahafantatra Azy, na ny feon’ny mpaminany izay vakina isan-tSabata ka nahatanteraka izany tamin’ny nanamelohany Azy. 28Na dia tsy hitany aza izay tokony hanamelohana Azy ho faty dia nangataka tamin’i Pilato ihany izy mba hamonoana Azy. 29Nahatanteraka izay rehetra voasoratra ny amin’i Jesosy izy dia nanaisotra Azy teo amin’ny hazo ary nandevina Azy tao am-pasana. 30Fa Andriamanitra kosa nanangana Azy tamin’ny maty. 31Ary niseho nandritra ny andro maro tamin’izay niara-niakatra taminy avy tany Galilia ho any Jerosalema Izy ka ireo no vavolombelony eo anatrehan’ny olona ankehitriny.
32Mitory ny Filazantsara aminareo izahay, dia ilay teny fikasana nolazaina tamin’ny razana, 33dia ny nahatanterahan’Andriamanitra izany tamintsika taranany, raha nanangana an’i Jesosy Izy, araka ny voasoratra eo amin’ny Salamo faharoa hoe:
«Zanako Ianao,
Izaho no niteraka Anao androany» (Sal 2.7).
34Ary ny amin’ny nananganany Azy tamin’ny maty ka tsy hiverenany ho amin’ny fahalovana intsony, dia izao no voalazany: «Homeko anareo ny famindrampo mahatoky nampanantenaina an’i Davida» (Isa 55.3). 35Fa hoy Izy ao amin’ny Salamo hafa koa: «Tsy hamela ny Iray Masinao ho tratry ny fahalovana Ianao» (Sal 16.10). 36Fa i Davida, rehefa nahatanteraka ny sitrapon’Andriamanitra hahasoa ny olona niara-belona taminy, dia nodimandry ka nangonina any amin’ny razany izy ary tratry ny fahalovana; 37fa Izay natsangan’Andriamanitra no tsy mba tratry ny fahalovana.
38Koa aoka ho fantatrareo, ry rahalahy, fa izany Lehilahy izany no itoriana famelan-keloka aminareo; 39ary ao Aminy no anamarinana izay rehetra mino ho afaka amin’ny heloka rehetra izay tsy azo nanamarinana anareo tamin’ny lalànan’i Mosesy. 40Koa tandremo fandrao hihatra izay voalaza ao amin’ny Mpaminany hoe:
41«Jereonareo mpiavonavona,
dia aoka ho gaga ka ho levona ianareo;
fa Izaho manao asa amin’ny andronareo,
dia asa izay tsy hinoanareo akory
na dia hisy hilaza aminareo aza» (Hab 1.5).
42Nony niala teo izy dia nangatahiny holazaina aminy indray izany teny izany ny Sabata* manaraka. 43Rehefa nirava ny fivoriana dia maro tamin’ny Jiosy* sy ny prozelita* izay nanompo an’Andriamanitra no nanaraka an’i Paoly sy i Barnabasy; ary izy ireo dia niresaka taminy ka nampirisika azy haharitra amin’ny fahasoavan’Andriamanitra.
Mitodika amin’ny Jentilisa ry Paoly sy i Barnabasy
44Nony tonga ny Sabata* manaraka dia saika tafangona avokoa ny tao an-tanàna rehetra mba hihaino ny tenin’Andriamanitra. 45Fa ny Jiosy* kosa, raha nahita ny vahoaka betsaka, dia feno fialonana ka nanohitra ny teny nolazain’i Paoly sady niteny ratsy. 46Dia niteny tamin’ny fahasahiana i Paoly sy i Barnabasy hoe: Ianareo no tsy maintsy nitoriana ny tenin’Andriamanitra mialoha; nefa rehefa mandà izany ianareo ka manao ny tenanareo ho tsy mendrika hahazo fiainana mandrakizay dia indro, mitodika any amin’ny Jentilisa* izahay; 47fa izao no nandidian’ny Tompo anay:
«Efa nanendry Anao ho fahazavan’ny Jentilisa Aho,
mba ho famonjena hatrany amin’ny faran’ny tany ianao» (Isa 49.6).
48Rehefa nandre izany ny Jentilisa dia faly ka nankalaza ny tenin’ny Tompo; ary izay voalahatra ho amin’ny fiainana mandrakizay dia nino. 49Koa ny tenin’ny Tompo dia niely manerana izany tany rehetra izany. 50Fa nandrisika ny vehivavy manankaja izay nivavaka sy ny lehibe tao an-tanàna ny Jiosy, dia nahatonga fanenjehana an’i Paoly sy i Barnabasy ireny ary nandroaka azy niala tamin’ny taniny. 51Fa izy roa lahy kosa dia nanintsana ny vovoka tamin’ny tongony hiampanga ireo, dia nankany Ikonioma. 52Dia feno fifaliana sy ny Fanahy Masina ny mpianatra.
Voafantina amin'izao fotoana izao:
Asan’ny Apostoly 13: MRV
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© La Société Biblique Malgache 2011