1Timoty INDRAY MIJERY
INDRAY MIJERY
Ny epistily voalohany sy faharoa ho an’i Timoty ary ny epistily ho an’i Titosy no atao hoe Epistily Pastoraly, noho izy voasoratra ho an’i Timoty sy i Titosy, izay samy tanora mpitondra fiangonana.
Natao hovakin’ny mpitondra fiangonana sy ny Fiangonana itony epistily pastoraly itony.
Tamin’ny faramparan’ny fiainan’i Paoly no nanoratany azy ireto.
Niara-niasa akaiky tamin’i Paoly ry Timoty sy i Titosy ary nataony ho tena zanany ara-panahy. I Timoty dia nanaraka azy hatrany am-pifatorana.
Araka ny Asan’ny Apostoly 28.30 dia nigadra roa taona tany Roma i Paoly. Raha ny filazan’ireo Rain’ny fiangonana dia afaka izy taorianan’izay ary niverina tany Azia Minora. Tamin’izany izy no nametraka an’i Timoty hitondra ny Fiangonana tao Efesosy. Avy any Makedonia no nanoratany ny epistily voalohany ho an’i Timoty, tamin’ny taona 65 eo ho eo.
Taorianan’izany izy no nanorina ny Fiangonana tany Kreta ka nametraka an’i Titosy hitondra azy io, koa tamin’ny diany ho any Nikopolia, any Gresy, no nanoratany ny epistily ho an’i Titosy.
Efa nirehitra ny fanenjehana nataon’ny amperora Neron tamin’io fotoana io ka voatana fanindroany tany Roma i Paoly. Niafara tamin’ny famonoana azy ho faty izany, tamin’ny taona 67 teo ho eo.
Ny votoatin’ny Epistily
Azo raisina ho fotokevitry ny Epistily ny 1Tim 3.15: «hahafantaranao izay fitondrantena mety hatao ao amin’ny tranon’Andriamanitra».
Tany Efesosy dia nisy ireo olona izay nanao fampianarana sandoka, nanohitra ny fampianarana tsy misy kilema, dia ny filazantsara madio izay nampianarin’ny Apostoly.
Maro samihafa ireny fampianarana ireny, ary niharoharo tao ny anganonganon-drazana, ny adihevitra sy fibedibedena foana, ny fitondrantena maloto, tao koa ny fampahorian-tena, ny filàna tombontsoa amin’ny fivavahana.
Didìn’i Paoly mihitsy i Timoty hanohitra ireny ary hanendry rafitra sy tomponandraikitra, dia ny mpitondra fiangonana izay nantsoina hoe «episkopos», mpanara-maso ny ondry, na eveka, ary koa ny loholona na «presbiteros» sy ny diakona na mpanompo. Izy ireo dia manana andraikitra lehibe amin’ny fitandroana ny fiainan’ny Fiangonana ary indrindra ny fiarovana ny fampianarana tsy misy kilema izay mampandroso ny fahatahorana an’Andriamanitra.
Teny miverimberina ao amin’ireo epistily pastoraly ny hoe ny toe-panahy araka an’Andriamanitra, izay azo adika koa hoe ny fahatahorana an’Andriamanitra na ny maha mpivavaka tsara. Ny zavamiafin’ny fahatahorana an’Andriamanitra dia Jesosy Kristy.
Ny firafitry ny Epistily
Fitarihanteny: Ny mpanoratra sy ny anoratana. Fiarahabana apostolika: 1.1-2
Ny mahamaika ny hanoherana ny fampianaran-diso na ny fampianarana sandoka: 1.3-20
Torolalana momba ny fitondrana ny Fiangonana. Ny fanendrena izay ho tomponandraikitra: 2.1–3.16
Fampitandremana ny amin’ireo fampianarana sandoka: 4.1-6
Ny fitondrana ireo sokajin’olona samihafa ao amin’ny Fiangonana: 5.1–6.2
Fananarana farany: 6.3-21
Voafantina amin'izao fotoana izao:
1Timoty INDRAY MIJERY: MRV
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© La Société Biblique Malgache 2011