Andinin-tSoratra Masina malaza indrindra nalaina tao amin'ny Mpitoriteny 2

Hizara

Fa ny olona izay ankasitrahan’Andriamanitra dia omeny fahendrena sy fahalalana ary fifaliana; fa ny mpanota kosa ampiasainy hanangona sy hahory, mba hisy homeny izay ankasitrahan’Andriamanitra. Zava-poana sy misambo-drivotra foana koa izany.

Tsy misy mahasoa ny olona mihoatra noho ny mihinana sy misotro ary ny mampahafinaritra ny tenany amin’ny fisasarany. Izany koa aza dia efa hitako fa avy amin’ny tànan’Andriamanitra (fa iza no mahalany, ary iza no mahazo manaram-po mihoatra noho izaho?).

Kanefa nitodika aho nandinika ny asa rehetra nataon’ny tànako sy ny fisasarana izay nisasarako, ka, indreo, zava-poana sy misambo-drivotra foana izany rehetra izany, fa tsy nisy nahasoa tatỳ ambanin’ny masoandro.

Ary na inona na inona nirin’ny masoko dia tsy nisy narovako taminy; tsy nisakana ny foko tamin’izay mety ho fifaliana aho; fa nahazo hafaliana avy tamin’ny fisasarako rehetra ny foko; ary izany no anjarako avy tamin’ny fisasarako rehetra.

Dia hitako fa ny fahendrena dia tsara noho ny fahadalana, toy ny fahatsaran’ ny mazava noho ny maizina.

Ny mason’ny hendry dia eo an-dohany; fa ny adala kosa mandeha amin’ny maizina; nefa hitako fa mitovy ihany ny manjo azy roa tonta.

Fa misy olona izay misasatra amin’ny fahendrena sy ny fahalalana ary ny fahaizana, nefa ny olona izay tsy nisasatra tamin’izany akory no tsy maintsy hamelany azy ho lovany. Zava-poana sy faharatsiana lehibe koa izany.