Andinin-tSoratra Masina malaza indrindra nalaina tao amin'ny Salamo 103

Hizara

Misaora NY TOMPO, ry fanahiko ary aza misy hadinoinao ny fitahiany rehetra

izay mamela ny helokao rehetra, izay manasitrana ny aretinao rehetra, izay manavotra ny ainao tsy hidina any an-davaka, izay manarona famindrampo sy fiantrana anao, izay mamoky zava-tsoa anao; mihavao toy ny an’ny voromahery ny fahatanoranao.

Misaora NY TOMPO, ry fanahiko ary izay rehetra ato anatiko, misaora ny anarany masina.

Tahaka ny fiantran’ny ray ny zanany no fiantran’NY TOMPO izay matahotra Azy.

Tahaka ny halavitry ny atsinanana amin’ny andrefana no halavitry ny anesorany ny fahotantsika amintsika.

Mamindra fo sy miantra NY TOMPO, mahari-po sady be famindrampo.

Tsy mba manao amintsika araka ny fahotantsika Izy, na mamaly antsika araka ny helotsika. Fa tahaka ny haavon’ny lanitra ambonin’ny tany no haben’ny famindrampony amin’izay matahotra Azy.

Efa nampitoetra ny sezafiandrianany any an-danitra NY TOMPO; ary manapaka izao rehetra izao ny fanjakany.