If you have would like a copy of this version please contact info@davarpartners.org

Text: Churahi New Testament, CC-BY-SA-4.0, The Love Fellowship. Audio: Churahi New Testament Audio Bible, CC-BY-SA-4.0, Davar Partners International, The Love Fellowship, 2022

Churahi New Testament

Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.

बपतिस्मै किना बाद फिरी पवित्र आत्मा यीशु सुनसान जगाईनी लैई गिया। ताकि शैतान तेसैरी परीक्षा लिया। यीशु चाही धियाड़ी जां चाही राती, किच्छ बि ना खउ-पितु, तेठां किना बाद तैस भ्रुख लगी। फिरी परखणै बाऐ शैतानै नीड़ अईछी करि तेसनी बौलु, “अगर तु परमेश्वरैरा पुत्र आ ता ऐन्हां घौड़ानि हुक्म दी करि साबित कर कि ऐ रोटी बंणी गहिया, ताकि तु खा सकिया।”
यीशु उत्तर दित्ता, कि ऐ पवित्र शास्त्रा मझ लिखोरू आ, कि
मैहणु सिर्फ रोटीऐ ला ना,
पण हर एकि वचने ला जै परमेश्वर बोलता तैस मंनणै ला जींता रींहणा। 
तां शैतान तैस पवित्र नगर यरूशलेम मझ लै ग्या जां मंदरैरी सभनियांं उथड़ि जगाय पन खड़ा केया। जां बौलु, “अगर तु परमेश्वरैरा पुत्र आ ता अपड़ै आपनि ऐठां किना छिढाय करि साबित कर; केईनी कि पवित्र शास्त्रा मझ लिखोरू आ तैस तिंडै बारै अपड़ै स्वर्गदूतनी ऐ आज्ञा दींणी, कि सै तिंडि रक्षा करिया जां सै तुरन्त ताउ अपड़ै हत्था मझ पकड़ी लैलै जेनि ला तिंडै पायड़ानि घौड़ै ला चुत्थ ना लगिया।” यीशु तैस सिंउ बौलु, “पवित्र शास्त्र ऐक्यु बि बोलता कि, मैहणुवां अपड़ा परमेश्वर परखणा ना चेहिंथा। ” फिरी शैतान यीशु एकि बड़ै बडै पहाड़ा पन लै ग्या जां तेसनी संसारेरी सारी धन-दौलत लुहाई करि तैस सिंउ बौलु, “अगर तु मिंडै आघै झुकि करि मूंनी प्रणाम करैला, ता आंउ ऐ सभ किछ ताउनि दैई दैला।” तां यीशु तैस सिंउ बौलु, “हे शैतान दूर भौ गा, केईनी कि पवित्र शास्त्रा मझ लिखोरू आ, तु सिर्फ अपड़ै प्रभु परमेश्वरैरियै अराधना कर, जां सिर्फ तेसैरी सेवा कर। ” तां शैतान तैस छडि करि चलि ग्या, जां स्वर्गदूत अईछी करि तेसैरी सेवा कांना लगै।


यीशु जेख्णी शुंणु कि यूहन्ना पकड़ी गियौरा आ, ता यीशु यहूदिया प्रदेश छडि करि गलील प्रदेशनी वापस चलि ग्या। तां यीशु जां तेसेरै चैलै नासरत नगरा छडि करि कफरनहूमैरै तैस इलाके मझ गिया जै गलील झीलिरै किनारै बसौरा थ्या जेठि जबूलून जां नपतालिरै गौत्रा केरै मैहणु रिहींथ्यै। ऐ ऐठणीरै तेईनी भूं, कि परमेश्वरै यशायाह भविष्यवक्तेरै जरियै जै किछ बोलोरू थियु, सै पूरू भुईया:
“तुवे मैहणु जै जबूलून जां नपतालिरै गौत्रा केरै कब्जै बाऐ इलाके मझ रींहथै,
जै तैस बत्तै मझ अत्तै जै गलील झीलि किनि जां यरदन नदिरै पूर्वी किनारै बसौरै अत्तै।
ऐ गलील प्रदेशेरै ऐतियै इलाके मझ अत्तै जेठि केही अन्यजाति रीहंथी।
तुवे मैहणु जै पापेरै अंधियारै मझ बेठोरै अत्तै, तैन्हांं मसीहरू चमकतु प्रगड़ु तकाणु। मसीहरू प्रगड़ु तैन्हांं मैहणुवां मझ यौउरू आ, जै तैस देशा मझ रींहथै, जेठि मैहणु मोउतिरी पकड़ी मझ अत्तै।” तैस टैंमा किना यीशु प्रचार कांना जां ऐ बोलणु शुरू कियु कि, “अपड़ै पापा किना मंन फैरा केईनी कि परमेश्वरैरा राज्य तुवाड़ै नीड़ अईछी गियौरा आ।”


जेख्णी यीशु गलील झीलिरै किनारै गांहथा थ्या ता तेनी दो भाई मतलब शमौन जैसनि पतरस बोलींथ्यै, जां तेसैरा भाई अन्द्रियास झीलि मझ जाल सुटतै लधै, केईनी कि सै मछुवारै थ्यै। यीशु तैन्हांं सेईतै बौलु, “ऐईछा जां मिंडै चैलै बंणा; जिहीं तुवे मछलिया किठैतै, तिहियें तुवे मूं शिख्रांणै कि मैहणु मिंडै चैलै बंणाणेरै तेईनी किहीं किठैनै।” सै झटपट मछलिया पकड़ने बाऐ तैस कंमा छडि करि तैस सेईतै चलि पियै। फिरी यीशु तेठां किना आघै गहि करि दो होरै भाई यनी जब्दिरा पुत्र याकूब जां तेसैरा भाई यूहन्ना अपड़ै बाबै जब्दी सेईतै किश्ती पन अपड़ै जाला केरी मुरम्मत कातै तकाय; जां सै बि शदाय। सै तुरन्त किश्ती जां अपड़ै बाबै जब्दी मजदूरा सेईतै छडि करि तैस पिचालीं चलि पियै।


यीशु सारै गलील प्रदेशा मझ घुमता-फिरता तेन्हैरै यहूदी सभा घरा मझ उपदेश काता जां स्वर्गेरै राज्यरी खुशखबरिरा प्रचार काता, जां मैहणुवां केरी हर प्रकारेरी बिमारी जा कमजोरी दूर काता रिय्हा। सारै सीरिया प्रदेशा मझ तेसैरी खबर फैली गैई; ऐठणीरै तेईनी मैहणु ऐतिया सभनियांं मैहणुवां जै बड़ी सारिया किस्मेरिया बिमारिया मझ, जां दुखा मझ पियौरै थ्यै, जां जैन्हां मझ दुष्ट आत्माय थी, जैन्हांनि मिर्गी ऐईछींथि जां अधरंग भौरा थ्या तैस किनि अणना लगै। यीशु सैक्यै ठीक क्यै। जां गलील प्रदेशा जां दिकापुलिस इलाके, यरूशलेम शहर, यहूदिया प्रदेश जां यरदन नदिरै पारियां मैहणुवां केरी अक बडी भीड़ तैस पिचालीं चलि पैयि।

Mihaino ny मत्ती 4