मत्ती 4
4
यीशुरी परीक्षा
(मरकुस. 1:12-13; लूका 4:1-13)
1बपतिस्मै किना बाद फिरी पवित्र आत्मा यीशु सुनसान जगाईनी लैई गिया। ताकि शैतान तेसैरी परीक्षा लिया। 2यीशु चाही धियाड़ी जां चाही राती, किच्छ बि ना खउ-पितु, तेठां किना बाद तैस भ्रुख लगी। 3फिरी परखणै बाऐ शैतानै नीड़ अईछी करि तेसनी बौलु, “अगर तु परमेश्वरैरा पुत्र आ ता ऐन्हां घौड़ानि हुक्म दी करि साबित कर कि ऐ रोटी बंणी गहिया, ताकि तु खा सकिया।”
4यीशु उत्तर दित्ता, कि ऐ पवित्र शास्त्रा मझ लिखोरू आ, कि
मैहणु सिर्फ रोटीऐ ला ना,
पण हर एकि वचने ला जै परमेश्वर बोलता तैस मंनणै ला जींता रींहणा।
5तां शैतान तैस पवित्र नगर यरूशलेम मझ लै ग्या जां मंदरैरी सभनियांं उथड़ि जगाय पन खड़ा केया। 6जां बौलु, “अगर तु परमेश्वरैरा पुत्र आ ता अपड़ै आपनि ऐठां किना छिढाय करि साबित कर; केईनी कि पवित्र शास्त्रा मझ लिखोरू आ तैस तिंडै बारै अपड़ै स्वर्गदूतनी ऐ आज्ञा दींणी, कि सै तिंडि रक्षा करिया जां सै तुरन्त ताउ अपड़ै हत्था मझ पकड़ी लैलै जेनि ला तिंडै पायड़ानि घौड़ै ला चुत्थ ना लगिया।” 7यीशु तैस सिंउ बौलु, “पवित्र शास्त्र ऐक्यु बि बोलता कि, मैहणुवां अपड़ा परमेश्वर परखणा ना चेहिंथा। ” 8फिरी शैतान यीशु एकि बड़ै बडै पहाड़ा पन लै ग्या जां तेसनी संसारेरी सारी धन-दौलत लुहाई करि 9तैस सिंउ बौलु, “अगर तु मिंडै आघै झुकि करि मूंनी प्रणाम करैला, ता आंउ ऐ सभ किछ ताउनि दैई दैला।” 10तां यीशु तैस सिंउ बौलु, “हे शैतान दूर भौ गा, केईनी कि पवित्र शास्त्रा मझ लिखोरू आ, तु सिर्फ अपड़ै प्रभु परमेश्वरैरियै अराधना कर, जां सिर्फ तेसैरी सेवा कर। ” 11तां शैतान तैस छडि करि चलि ग्या, जां स्वर्गदूत अईछी करि तेसैरी सेवा कांना लगै।
यीशुरै सेवाईरै कम शुरू
(मरकुस. 1:14-15; लूका 4:14-15)
12यीशु जेख्णी शुंणु कि यूहन्ना पकड़ी गियौरा आ, ता यीशु यहूदिया प्रदेश छडि करि गलील प्रदेशनी वापस चलि ग्या। 13तां यीशु जां तेसेरै चैलै नासरत नगरा छडि करि कफरनहूमैरै तैस इलाके मझ गिया जै गलील झीलिरै किनारै बसौरा थ्या जेठि जबूलून जां नपतालिरै गौत्रा केरै मैहणु रिहींथ्यै। 14ऐ ऐठणीरै तेईनी भूं, कि परमेश्वरै यशायाह भविष्यवक्तेरै जरियै जै किछ बोलोरू थियु, सै पूरू भुईया:
15“तुवे मैहणु जै जबूलून जां नपतालिरै गौत्रा केरै कब्जै बाऐ इलाके मझ रींहथै,
जै तैस बत्तै मझ अत्तै जै गलील झीलि किनि जां यरदन नदिरै पूर्वी किनारै बसौरै अत्तै।
ऐ गलील प्रदेशेरै ऐतियै इलाके मझ अत्तै जेठि केही अन्यजाति रीहंथी।
16तुवे मैहणु जै पापेरै अंधियारै मझ बेठोरै अत्तै, तैन्हांं मसीहरू चमकतु प्रगड़ु तकाणु। मसीहरू प्रगड़ु तैन्हांं मैहणुवां मझ यौउरू आ, जै तैस देशा मझ रींहथै, जेठि मैहणु मोउतिरी पकड़ी मझ अत्तै।” 17तैस टैंमा किना यीशु प्रचार कांना जां ऐ बोलणु शुरू कियु कि, “अपड़ै पापा किना मंन फैरा केईनी कि परमेश्वरैरा राज्य तुवाड़ै नीड़ अईछी गियौरा आ।”
चैला केरा चुनाव
(मरकुस. 1:16-20; लूका 5:1-11)
18जेख्णी यीशु गलील झीलिरै किनारै गांहथा थ्या ता तेनी दो भाई मतलब शमौन जैसनि पतरस बोलींथ्यै, जां तेसैरा भाई अन्द्रियास झीलि मझ जाल सुटतै लधै, केईनी कि सै मछुवारै थ्यै। 19यीशु तैन्हांं सेईतै बौलु, “ऐईछा जां मिंडै चैलै बंणा; जिहीं तुवे मछलिया किठैतै, तिहियें तुवे मूं शिख्रांणै कि मैहणु मिंडै चैलै बंणाणेरै तेईनी किहीं किठैनै।” 20सै झटपट मछलिया पकड़ने बाऐ तैस कंमा छडि करि तैस सेईतै चलि पियै। 21फिरी यीशु तेठां किना आघै गहि करि दो होरै भाई यनी जब्दिरा पुत्र याकूब जां तेसैरा भाई यूहन्ना अपड़ै बाबै जब्दी सेईतै किश्ती पन अपड़ै जाला केरी मुरम्मत कातै तकाय; जां सै बि शदाय। 22सै तुरन्त किश्ती जां अपड़ै बाबै जब्दी मजदूरा सेईतै छडि करि तैस पिचालीं चलि पियै।
गलील मझ रोगी मैहणु ठीक कांने
(लूका 6:17-19)
23यीशु सारै गलील प्रदेशा मझ घुमता-फिरता तेन्हैरै यहूदी सभा घरा मझ उपदेश काता जां स्वर्गेरै राज्यरी खुशखबरिरा प्रचार काता, जां मैहणुवां केरी हर प्रकारेरी बिमारी जा कमजोरी दूर काता रिय्हा। 24सारै सीरिया प्रदेशा मझ तेसैरी खबर फैली गैई; ऐठणीरै तेईनी मैहणु ऐतिया सभनियांं मैहणुवां जै बड़ी सारिया किस्मेरिया बिमारिया मझ, जां दुखा मझ पियौरै थ्यै, जां जैन्हां मझ दुष्ट आत्माय थी, जैन्हांनि मिर्गी ऐईछींथि जां अधरंग भौरा थ्या तैस किनि अणना लगै। यीशु सैक्यै ठीक क्यै। 25जां गलील प्रदेशा जां #4:25 दीकापुलिसैरा मतलब आ दश शहरदिकापुलिस इलाके, यरूशलेम शहर, यहूदिया प्रदेश जां यरदन नदिरै पारियां मैहणुवां केरी अक बडी भीड़ तैस पिचालीं चलि पैयि।
Voafantina amin'izao fotoana izao:
मत्ती 4: CDJNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
