यूहन्ना 21
21
यीशु को सात चेलों तैं दरसन देण
1अर येका बाद यीशु अपणा चेलों तैं गलील#21:1 गलील झील को दुसरो नौ तिबिरियास झील च। झील का छाला पर फिर से दिखै। अर वे दिन इन ह्वे कि:
2एक दिन शमौन पतरस, अर थोमा जैकू जौंळ्या भि बुल्दिन, अर गलील मुलक का काना गौं को नतनएल, अर जबदी का दुई नौना#21:2 इख मा याकूब अर यूहन्ना की बात किये जाणि च। अर यीशु का दुई और चेला भि जमा होयां छा। 3तब शमौन पतरस न ऊंकू बोलि, “मि त माछा मरणु कू जाणु छौं।” अर दुसरा चेलों न वेकू बोलि, “हम भि तेरा दगड़ा मा औणा छां।” तब ऊ सब जैके नाव मा बैठि गैनी, पर वीं राति ऊंन कुछ भि नि पकड़ी।
4जब सुबेर होण लगि गै त यीशु छाला पर खड़ु होयुं छौ, पर चेलों न वेतैं नि पछ्याणी की उ यीशु ही च। 5तब यीशु न ऊंतैं पूछी, “हे दगड़्यों, क्या तुमतै कुछ माछा भि मिलिनी?” तब ऊंन वेतैं जबाब देई, “नऽ रे ना।” 6तब वेन ऊंकू बोलि, “नाव की दैंणी तरफा जाल डाला, त तुमतै माछा मिलला।” तब ऊंन जाल डालि, अर जाल मा इथगा माप माछा फंसी गैनी, कि ऊं लोगु न जाल भि नि खैंची सैकी।
7अर जै चेला बटि यीशु जादा प्यार करदु छौ, वेन पतरस कू बोलि, “अरे, यू त प्रभु छिन,” अर जन्नि शमौन पतरस न या बात सुणी कि, “यू त प्रभु छिन,” उन्नि वेन यीशु तैं मिलणु कू अपणा कपड़ा पैरिनी (किलैकि वेका पूरा कपड़ा नि पैरयां छा), अर झील मा फाल मारी दिनी। 8पर वेका दगड़ा मा जु दुसरा चेला छा, ऊ वीं नाव मा बैठि के अर माछों का भोर्यां वे जाल तैं उन्नि के खैंचदी-खैंचदी छाला मा लेके ऐनी। किलैकि उ छाला बटि जादा दूर नि छा, पर लगभग सौ मीटर की दूरी पर छा।
9फिर जब ऊ छाला पर उतरिनी त ऊंन देखि, कि अंगार सुलग्यां अर वेमा माछा रख्यां छिन, अर वेका नजदीक ही रुट्टी भि च। 10तब यीशु न ऊंकू बोलि, “जु माछा तुमुन अभि पकड़िनी, ऊंमा बटि कुछ लेके आ।” 11तब शमौन पतरस नाव मा चैड़ि, अर माछों का भोर्यां जाल तैं खैंची के छाला पर लेके ऐ। अर वे जाल मा एक सौ तिरप्पन बड़ा-बड़ा माछा छा। अर इथगा माप माछा होण का बाद भि जाल नि फटी।
12तब यीशु न ऊंकू बोलि, “आ, अर कल्यार खा।” अर चेलों मा बटि कैतैं भि इन पूछणे की हिम्मत नि ह्वे, कि “तुम कु छाँ,” किलैकि ऊ जणदा छा कि यू प्रभु ही च। 13तब यीशु न ऐके रुट्टी लेई अर ऊंतैं देई, अर वेका बाद उन्नि ऊंतैं माछा भि दिनी।
14अर यीशु को मुरदो मा बटि ज्यून्दु होण का बाद यू तिसरी दौं छौ, कि वेन अपणु दरसन चेलों तैं देई।
यीशु को पतरस तैं दुबरा जिमेदारी सौंपण
15जब ऊंन कल्यार खयेलि छौ, तब यीशु न शमौन पतरस बटि पूछी, “हे यूहन्ना का नौना शमौन, क्या तू यों सभ्यों मा बटि मिसे जादा प्यार करदी?” अर वेन वेकू बोलि, “हाँ प्रभु, तुम त जणदा ही छाँ, कि मि तुम बटि प्यार करदु छौं।” तब यीशु न वेकू बोलि, “मेरा मेम्नों#21:15 इख मा यीशु ऊं लोगु की बात कनु च जु की वेका पिछनै चलदिन। तैं चरो।”
16तब यीशु न दुसरि दौं वेकू बोलि, “हे यूहन्ना का नौना शमौन, क्या तू मि बटि प्यार करदी?” वेन वेकू बोलि, “हाँ प्रभु, तुम त जणदा ही छाँ, कि मि तुम बटि प्यार करदु छौं।” तब यीशु न वेकू बोलि, “मेरी भेड़ों की देख-रेख कैर।”
17अर यीशु न तिसरी दौं वेकू बोलि, “हे यूहन्ना का नौना शमौन, क्या तू मि बटि प्यार करदी?” तब पतरस तैं दुख ह्वे, किलैकि यीशु न तिसरी दौं वे बटि पूछी छौ कि, “क्या तू मि बटि प्यार करदी?” इलै वेन वेकू बोलि, “हे प्रभु, तुम त सब कुछ जणद्यां। अर यू भि जणद्यां, कि मि तुम बटि प्यार करदु छौं।” तब यीशु न वेकू बोलि, “मेरी भेड़ों तैं चरो। 18अर मि त्वे बटि सच्चि ही बोन्नु छौं, जब तू ज्वान छे, त तू खुद तयार#21:18 कुछ कागज्दों मा “अपणी कमर कसी के” लिख्यूं च। ह्वेके जख चान्दी छे, उख जान्दी छे। पर जब तू बुढ्या ह्वे जैली त तू अपणा हाथ फैलैली, अर कुई दुसरो त्वेतै तयार करलु अर जख तू नि जाण चैलि, उख उ त्वेतै लि जालु।”
19अर पतरस कनकै मुरलु#21:19 इन बुले जान्दु कि पतरस तैं नीरो महाराजा का द्वारा उल्टा क्रूस पर चड़ै गै छौ। अर लोगु तैं दिखै द्यालु की परमेस्वर कथगा महान च, इन बिंगाणु खुणि यीशु न वेकू इन बोलि छौ। अर इन बोन्ना का बाद यीशु न पतरस कू बोलि, “मेरा पिछनै अऽ।”
पतरस द्वारा यीशु बटि प्रिय चेला की मौत का बारा मा पूछण
20तब पतरस न पिछनै मुड़ि के वे चेला तैं औन्द देखि, जैतैं यीशु जादा प्यार करदु छौ, अर जैन खाणु खाणा दौं यीशु की काखे तरफा झुकि के वेतैं पूछी छौ, “प्रभु तुमतै धोखा से पकड़ौण वळु कु च?” 21तब वेतैं देखि के पतरस न यीशु कू बोलि, “प्रभु, ये मनखि को क्या जि होलु?” 22फिर यीशु न वेकू बोलि, “अगर जु मेरी इच्छा होलि, कि उ मेरा औण तक ठैर्युं रौ, त त्वेतै ईं बात से क्या मतलब? पर तू मेरा पिछनै अऽ।”
23इलै बिस्वासी लोगु मा या बात फैली गै, कि यू चेला कभि नि मुरलु, पर यीशु न वे खुणि इन नि बोलि छौ कि, “वेन कभि नि मुरण” बल्किन इन बोलि छौ कि, “अगर जु मेरी इच्छा होलि, कि उ मेरा औण तक ठैर्युं रौ, त त्वेतै ईं बात से क्या मतलब?”
आखिरी बात
24अर यू उई#21:24 यू खुद यूहन्ना ही च जैन यू सब देखि अर लिखी भि च। चेला च, जु की यों बातों की गवै देन्दु, अर जैन यू सब बात भि लिखिनी। अर हम जणदा छां, कि वेकी गवै सच्चि च।
25अर यीशु न त और भि भौत सरा काम करिनी। अगर वु सब काम एक-एक कैरिके लिखे जान्दा, त मेरा ख्याल से इथगा किताब लिखे जान्दी, कि ऊंतैं रखणु खुणि ईं दुनियां मा भि जगा नि होन्दी।
Pašlaik izvēlēts:
यूहन्ना 21: GBM
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© (Active) Wycliffe Bible Translators, Inc. All rights reserved.