Markus 16
16
At Yesus ebe elaluk aga wene
(Matius 28:1-8; Lukas 24:1-12; Yohanes 20:1-10)
1Asogo hegesarik, agauwa sabit pam Allah paget weat welegesarik e, is hwe Maria owi Magdala aʼge ano o, hwe Maria Yakobus ia ano o, hwe Salome o, aʼbosu eʼben op aʼge Yesus werak ano pam egeli louwogoluk oʼgo ʼbali legesa. 2Oʼgo ʼbalogo poluk e, nogoluk loruk oʼgwe hari Minggu hubet siaksogo mo pou wagokhwe, owikmu ano wegesa. 3-4Wagalat e, helep modok lok aʼge dopnosogo pegesarikmu no oluk e, is-is en nak ogulat e, disogo egesa,
“Werak helep dopnosogo pegesa ano, sa en erlebilogo ʼgoduk hutnontouwa e,” oluk il il wegesa. Asogo ʼgonutakma en il wagalat e, enil likhegesa ʼgal e, helep ano erlebilogo hwikhai legesema ʼgoduk hwerik oruakma hegesa. 5Hegesarik, enebe horoksogo wegesarik ʼgwigisa ʼgal e, ap souwe aʼge mesik osum ʼgut yat aʼge ʼbuksogo eneʼgik ʼbekhit akhit hweriogo oruakma enil holuk e, yuk egesa. 6Yuk egesema, at ap souwe aʼge ano en e, disogo moʼgulentesi,
“Yuk ogup o. Yesus owi Nazaret aʼge e pam edikpoluk werigisa aʼge ano heratil wegep aʼge re, ebe yema erlak. Allah en elalugaptegeimu oruak o. Werak pegesema ebano ebale nak yu henil ʼgwelakhemit o. 7ʼGwelakholuk e, his en at osi iak wogu legesa aʼge Petrus lak ebano moʼgulentai lu o. At Yesus en e,
An o Galilea legeiktik honlogotma weleik o, oluk moʼgulhentesi hegitsogoat ligema ani o. His ligoroguptik e, at ebe henil hagup ani o, oluk moʼgulentai lu o,” oluk moʼgulentesi. 8Asogo moʼgulentesimu enede nalagama re, onuak erlik-erlik hweiye ʼbogoligisarik onogorlok en wene aphwami pema moʼgulonto erlakma en ʼbekhit legesa.
At Yesus en, “Naduk naduk hwe Maria owi Magdala aʼge en il niouwak o,” oluk ologotma inlau waga wene
(Matius 28:9-10; Yohanes 20:11-18)
[ 9At Yesus ebe hari Minggu pam inaga ai erlige hubet siaksogo re, inagarik, at hwe Maria owi o Magdala aʼge muʼgat enebabut wiak aʼge enebe sabit aʼge ogola ʼgoluk oruakma pageat henokho lebikpesi aʼge ano naduk,
“Naduk naduk il niouwak o,” oluk ologotma inaga. 10Ologotma inagama il holuk e, yoʼgo is aphwami at Yesus emin welegesa aʼge pong worugulat nge tugumu eneʼbek laga. 11Lagarik e, disogo moʼgulentesi,
“At Yesus e, elaluk agarik oruak o. Ebe arat nil hegi o,” oluk moʼgulentesimu, enesaʼgo hweligisa aʼgeat de, demat oluk epegesa erlak.
At Yesus en e, “Is ap nosi enebe ʼbiren en enil niouwak o,” oluk onlogotma inaga wene
(Lukas 24:13-35)
12Asogo epegesarik oruakhwe, pobuk e, ap enebe ʼbiren o seli weimu mesik womogoluk wagaimu at Yesus orogole muat agarik e,
“An nebe enil niouwak,” oluk eneʼberlik waga. 13Eneʼberlik wagama re, enil holuk togolik enarilak pema ebano moʼgulentai legesa aʼgeat de, is onogola en demat opo erlak.
At Yesus en, “An nebe nosi enil niouwak,” oluk eneʼbek ʼgwegeitik e, onologotma inaga wene
(Matius 28:16-20; Lukas 24:36-49; Yohanes 20:19-23; Peragenebesi 1:6-8)
14Asogo til waga lagarik e, ebe pobuk ologun ʼgoboksogo re, is at Yesus osi enebe 11 ebano hweriogo welat soʼboru noʼgumu,
“Enil niouwak,” oluk eneʼbek ʼgwegeitik onlogotma inagarik disogo moʼgulentesi,
“His yema henede en e, demat oluk opo erlakma en henede ʼbuk yema re! Allah en an nebe arat nelalugapnebegeimu oruakma, is pema en enil niegesarik moʼgulhentai wegesa aʼgeat de, henede en demat oluk opogwi erlak yema re!” oluk wene yagentesi. 15Asogo wene yagentesirik, wene mesik disogo moʼgulentesi,
“His e, aphwami enaʼgul onuk loʼbok o di owi yu owi eba ʼberlegat wene op wene yu moʼgulentil laga lomup o. 16Moʼgulentil lagaimu re, is aphwami pema en wene ai demat oluk opouwa aʼge ebano ik olomu ʼbelabonobogup aʼge, Allah en delonobua aʼgeat de, is pema wene ai demat oluk wouwa erlak aʼge holuk e, Allah en wene enebam poluk wiagabonobua ani o. 17Ye, is aphwami pema wene ai demat opouwagoluk, is wene demat oluk wouwa aʼge en e, disogo togu lema o. Muʼgat enebabut wiak aʼge is pema onogola ʼgoluk oruakma an nonuk ʼbalholuk henokho lebigonobogulat, eniak is mu aʼge eniak eneperlak aʼge elalinat ogulat, togu lema o. 18Asogo tugulat, herlegetie aphwami warenebiso aʼge eneʼgigem wogulat, is enebe waremagoluk aphwami waragai aʼge ik eʼbe pam naʼgogo wogontogwiam noʼgulat, tua aʼgeat de, ai en wiagabenebise lema erlak o. Ye, aphwami pema ou wogumu, is en eneʼgik tenontogwiam, op aga lemayat o,” oluk moʼgulentesi.
At Allah en Yesus ʼbogorl pam woluk ligaga wene
(Lukas 24:50-53; Peragenebesi 1:9-11)
19Wene asogo arat moʼgulentesimu re, at Allah en Yesus ebe ʼbogorl pam woluk ligaga. Asogo woluk ligagama eragam eʼgik ʼbekhit akhit ʼgainat hweriogo oruak. 20Asogo woluk ligagama re, at Yesus osi ebano o di owi yu owi ʼberlegat wene moʼgulentil legesa. Wene moʼgulentil lagaihwe re, aphwami en e,
“Is wene moʼgulnentil wegesa ai re, demat o,” oluk wene pobi tuagoluk, nonue ʼgain Onuk Logo aʼge emin modok welat, is en elalin aʼge togwiam, at en wene ai anniap pesi.]
Pašlaik izvēlēts:
Markus 16: WUL
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties