Lukas 1
1
Lukas enat Teofilus hau weregei wene
1-2Teofilus nue o. Wene nis neneʼgerlakma en aga ano, is wene ebe edip pam en til wagoma enil hegesarik moʼgulentil denaga legesa aʼge en moʼgulnentigisa hegitsogo, is aphwami pema enebe modok aʼbik enat wene ebe pelal wouwogoluk walhil wegesa. 3-4Asogo walhil wegesa aʼgeat de, an ogo re, wene ai edip pam en dokhumsogo moʼgulise legirikmu oluk e, hat e, wene moʼgulhegisa aʼge ai demat oluk epagun en e, wene ebe ʼbeliʼgogo pelal wokho heʼbek perakpou weigoluk epasu legirik wasu legi ai o. Nue.
Allah en Yohanes ik olomu ʼbelabenebise laga aʼge ano dagema o, oluk obok moʼgulentesi wene
5Ap ʼgain mesik Herodes ai o Yudea doʼgo onuk logo oruakma, ap mesik onuk Zakharia, ebe ap Abia en dogoma aʼge emin enebe Allah eiye welat at ebaget togu legesa aʼge welaga. Ye, at ugwe re, ap Harun en dogoʼgwe aʼge onuk Elisabet ai welaga. 6Is ugwe eʼbirek eria re, nenaik ʼgain Onuk Logo aʼge en,
“Disogo tip, asogo tip,” oluk, moʼgulnentasulat, nenesaʼgo weriselat, egei aʼge ano, modok hegitsogoat togu legesema re, at Allah en e,
“Is ai enebabut op modok o,” oluk, enak aʼge il entasu laga. 7Aʼgeat de, at hwe Elisabet ai, ebe abeli en emalik mesik doru erlak welat ogun eʼbiregat arat sebal egesarik welegesa. 8-9Asogo sebal otluk welat, agauwa mesik erlige, at Zakharia ebe emin, ap logon enebe mesigat aʼge ʼgelaʼge emin, Allah eiye aʼge welat, is en at Allah owi werikmu ʼgoluk is yabuk tu aʼge elit aga. Elit agama ʼgwigisarik e, eʼben op aʼge Allah ilem ap sa ʼgelaʼge en narlik po ʼgua, oluk helep eʼgen hwikhai lagalat, hwikhau wagalat, hegitsogo, at Zakharia hwikhai lasumu ebam hegit agama narlik oluk ʼgwegei. 10Asogo ʼgwegeitik narlisokhwe re, aphwami aʼbik o selimu odoktigisarik seʼban ogulat welegesa. 11Eʼben op aʼge ano e narlisokhwe re, nenaik ʼgain Onuk Logo aʼge malaikat ʼbogorl pam Allah en yoʼgo ʼbelagonobou ago aʼge mesik ʼbu agarik eʼben op aʼge narlogu legesema ebano eneʼgik ʼbekhit akhit Zakharia ologotma inagama il hesi. 12Il holuk e, yuk egeitik ogorlok agama re, 13at malaikat ano en e,
“Zakharia! Hogorlok hagun o. Hat seʼban ese legen ano, Allah arat esaʼgo hwelegei o. Hugwe Elisabet ai emalik abat dagema ani o. Dagago holuk e, onuk Yohanes tualip o. 14-16At ai ia ogola enat, Allah Arogun modok ʼbetesogo dagemarik e, nenaik ʼgain Onuk Logo aʼge ilem ebe ʼgainat welat, anggur eʼgen aʼbosu emin, ik honuk honuk togwi aʼge pema emin, no erlak modok welat, aphwami Israel aʼge enebe aʼbik enede nenaik ʼgain Onuk Logo aʼge Allah pam heʼberik welemagoluk, at en enebabut heberlonobua ai o. At dagemma ai aphwami enebe aʼbik onogola enagai aʼbik hogukhwe, hat ogo re, hogola hagai aʼbik hasulat, ebe hebam liok eselat, tua ani o. 17Allah Arogun ap Elia ai ogola welat annisogo nak til denaga laga aʼge ai, at Yohanes ano ebam louk uarik, malik enaiklak enemin, laʼbuksogo enebasulat, wene enesaʼgo holu puk aʼge is pema wene holugulat hegitsogo togwi aʼge enebabut wouwagoluk tagenebasulat, enebe nenaik ʼgain Onuk Logo aʼge paget welemagoluk degelogo enebasulat, tigoluk, at naduk dagemarik asogo til denaga lema o,” oluk moʼgulesi. 18Asogo moʼgulesimu, at Zakharia en e, malaikat disogo moʼgulesi,
“An nugwe neʼbirek arat sebal egerikmu re, wene egen ai noʼgosogo ema o. Demat ema oluk noʼgosogo naluk ema epegen,” oluk egeimu, 19at malaikat ano en e,
“An Allah ilem edik welago aʼge nonuk Gabriel, ai nebe anat o. Op wene yu moʼgulhemagoluk, at Allah en yoʼgo peraknobou wagama wegi o. 20Asogo wegirik wene moʼgulhegis aʼgeat de, demat opo erlak ai en, om aʼge hegitsogo ema ai owan om erlak oruakhwe, hiak ʼbalogo mo oguntik hiak u erlak woloroguntik e, pobuk wene ai ʼberlegat agoam en de, hiak hurema ani o,” oluk moʼgulesi. 21Asogo moʼgulosokhwe re, is aphwami odipmu seʼban ogulat welegesa aʼge ebano en e,
“Zakharia ano odipmu modok liplau wago erlakma en Allah owi werikmu ogola modok oruak ai nonogorlok e!” oluk asogo ogwiam e, 22Zakharia ebe liplau wagarik e, wene mesik modok moʼgulonto erlakma en, mo egeimu, is ebano en e,
“Ap yu Allah owi werikmu en abi ʼgelaʼge mesik hesimu hegi,” oluk pobi tigisa. Asogo ogukhwe re, at ano iak logon u erlak, we eʼgik walok pam nak ese laga. 23Allah paget tuagoluk is ebano en Zakharia moʼgulegisa ano, arat tegeitik e, owi pam laga. 24-25Owi pam lagarik agauwa wei nak welegesarik en, ugwe Elisabet ano emalik ogola aga. Ogola agama re,
“Nenaik ʼgain Onuk Logo aʼge ai, an ede en aphwami enemin neʼgerli ʼgelaʼge hasu legi ano erlak emagoluk taknebesi hegi o,” oluk, odipmu libom erlakma en, o ogola hisogo modok oruakhwe, dugwi huaben pollegei.
At Allah en, “Yesus dagema,” oluk obok moʼgulentesi wene
26-27Hwe Elisabet ano emalik ogola oruakhwe, dugwi hebarligen pollegeimu re, Allah en malaikat ʼbogorl pam yoʼgo ʼbelagonobou wago aʼge mesik Gabriel ano Galilea doʼgo, o onuk Nazaret, eba hwele mesik onuk Maria, ap Yusuf Daud en dogoʼgwe aʼge ai eʼbirek iak tago oruakma eʼbek perakpou waga. 28Perakpou wagama re, at malaikat hwele ano eʼbek wagarik e, disogo moʼgulesi,
“Maria nerei o! Allah en op modok aʼge wokheriogoluk hemin welegep o,” oluk moʼgulesimu re, 29at hwele Maria ano esaʼgo hwelegeitik, ogorlok en uak erlik-erlik eselat e,
“Hau wusogo moʼgulnesi ai no oluk moʼgulnesi,” oluk ede eberegei. 30Asogo eberegeimu, at malaikat ano en e,
“Maria, nerei yo. Hogorlok hagun o. At Allah en edeaphebegeitik e, hebe ebam liok egei o. 31Yethemen, hat hemalik hogola oroguntik abat dorogun. Doroguntik e, onuk Yesus tualip o. 32Ye, malik ai arlue emarik ʼgain agoam e, aphwami en e,
Allah ʼgain Onuk Logo aʼge welago ano omlogo hegi o, oluk ogu lema. At eʼba Daud ai onuk logo aʼge welat, aphwami at en tenentarok welaga ano ebalema re, nenaik ʼgain Onuk Logo aʼge en, at aiat edikpouwa o. 33Holuk e, Yakub en dogoʼgwe aʼge ebano onue ʼgain Onuk Logo aʼge at aiat eragam iak modok hologo welema o. Asogo tenentarok welat ebe hurom erlakma en ʼgain Onuk Logo aʼge modok welema o,” oluk asogo moʼgulesimu, 34at hwele Maria en e,
“An ap emin nogou erlakma, hat moʼgulnigen ai noʼgosogo ema o,” oluk asogo egeimu, 35at malaikat ano en e,
“Allah Arogun hebam louk emarik e, ʼgunmu onobogwi ʼgelaʼge, nenaik ʼgain Allah Onuk Logo aʼge anni aʼbik aʼge ai eragam hobouwa o. Hobouema re, hemalik Allah ematek omlogo dorumu re, aphwami en,
At ai Allah omlogo, oluk ogu lema ani o. 36Ye, yethemen, hat hebap Elisabet ano ebe sebal aga aʼgeat de, emalik abat ogola agama o. Is aphwami pema en,
Hwe ai ebe abeli o, oluk, obok ogwi aʼge ano emalik ogola agarik dugwi hebarligen pollegeimu moʼgulhegis ai o. 37At Allah en di aʼge yu aʼge tumu re, mia erlak o. Elirat tu nak o,” oluk moʼgulesimu re, 38at Maria en e,
“I o. An nenaik ʼgain Onuk Logo aʼge eragam aʼgeat o. Hat en egen ai hegitsogoat taknobouwak o,” oluk egeimu re, at malaikat yoʼgo waga aʼge ano Maria ukpoluk laga.
At Maria ano en Elisabet hai laga wene
39 Malaikat ano lagama, at hwele Maria agauwa wei nak welagarik o Yudea ʼbegeitik dom akhit eba ligagarik e, 40at Zakharia ano owi pam ʼgwi lagarik e, hwe Elisabet ano hau weregei. 41Maria en hau werisoma Elisabet esaʼgo hwelisokhwe erianoat, emalik ogola aʼge ano hogoloʼbok hesi. Asogo tisokhwe, Allah Arogun, hwe Elisabet ogola ʼbete la ʼgwegei. 42ʼGwegeimu, at hwe Elisabet ano iak loksogo re, disogo egei,
“Hwami enebe aʼbik oruakhweat de, Allah en,
Op aʼge harat wokheselat, hemalik hogola ai obap pasulat, tegei yo. 43Ye, hat hebe an nue ʼgain Onuk Logo aʼge ia en niau wegen yu nogorlok o! 44Hat en hau watnebisoam e, nesaʼgo hwelisokhweat, malik nogola aʼge ogola agai hasulat hogoloʼbok hesi o. 45Naik ʼgain Onuk Logo aʼge en obok moʼgulhesi aʼge, demat ema o, oluk, hede Allah pam heʼberik pegen ai, hogola hagai aʼbik hagun ani o,” oluk moʼgulesi.
Maria en Allah erliktegei wene
46Asogo moʼgulesimu, at hwele Maria en e,
“Naik ʼgain Onuk Logo aʼge ai an nogola en erliktaga legi o.
47Allah en delnebegei aʼge ano en disogo taknebesimu nogola nagai aʼbik hasu legi o.
48An at eragam aʼge ai, eneragam ʼgelaʼge oruakma il niesi o. Ye, hwerli yogodak en e, aphwami ʼberlek en,
Allah en op aʼge wogesimu o, oluk ogu lema o.
49At anni aʼbik aʼge enat, lok aʼge taknebesi o.
At uʼgwarek omuat onuk logo welemak o.
50Aphwami ʼberlek, pageat dagegesa aʼge emin, ʼget dagegesa aʼge emin, pobuk dagema aʼge emin,
at ebe onogorlok oruakma ede en obabenebise lema o.
51At eʼgik anni aʼbik ai pam, aphwami onogola en onuʼgwarek erlikhorlogwi aʼge ai modok ʼbullogo mugentesi o.
52Aphwami ʼgaindek ononuk logo welagai aʼge ai sebelak enebasulat e,
is ononuk erlak aʼge ai logo enebasulat,
53aphwami onogola nele welagai aʼge op aʼge seik-ʼbeiksogo wogentasulat e,
is enilmu oruak aʼge ai, logon wogentasu erlak weat peragenebasulat, tegei.
54-55Pageat neneʼba Abraham emin, at en dogoʼgwe aʼge emin, enemin modogat obabenebigoluk obok moʼgulentesi ano hegitsogoat,
at osi aphwami Israel aʼge enebam eberak poluk ede en lerentau waga yu o,”
oluk egei. 56Asogo egeitik e, at hwele Maria ano dugwi henagan ʼgelaʼge, at Elisabet emin welagarik e, pobuk owi pam waga.
Yohanes ik olomu ʼbelabenebise laga aʼge ano dagaga wene
57At Maria wagama en e, hwe Elisabet ano emalik dakhorlo hegit agarik e, emalik abat deregei. 58Emalik abat deregeimu re, is aphwami emin welegesa aʼge pema emin, at ue ari emin,
“Nenaik ʼgain Onuk Logo aʼge en modok edeaptegei hegi o,” oluk egesarik e, at uʼgwarek emin onogola enagai hegesa. 59Onogola enagai hegesarik e, agauwa sabiren welegesarik loruk oʼgwe re, malik ano agap eʼgerlimu aʼge ʼbaluagoluk woluk wegesa. Wegesarik e,
Malik yu aik onuk hegitsogoat onuk Zakharia tualuok o, oluk egesa aʼge re, 60ia en e,
“Erlak o. Onuk Yohanes tualul o,” oluk moʼgulentesi. 61Asogo moʼgulentesimu, is ebano en e,
“Hue hari ononuk asogo erlakmayat de, onuk Yohanes tualigen ai nopaget tualigen,” oluk, asogo egesarik 62emalik ano aik Zakharia ano eneʼgik walok pam moʼgulogulat e,
“Onuk sa tualul o,” oluk 63asogo egesema, at Zakharia en e,
“Helep aʼge pelal wogwi aʼge mesik woknemis o,” oluk eʼgik walok pam ʼbelinghesimu wogegisema re,
“At onuk Yohanes o,” oluk, pelal wesi. Asogo pelal wesimu aphwami aʼbik ebano en e,
“Nonogorlok e!” oluk erliktigisa. 64Erliktugukhwe erianoat, Zakharia ano iak modok huragarik e, iak eselat Allah hau werise laga. 65Asogo tegeimu, is aphwami enemin welegesa aʼge ebano onogorlok aʼbik aga. Onogorlok agarik, wene aga aʼge ano obok o Yudea dom oʼgwe aʼge eba modok ʼbeling-ʼbelangsogo moʼgulentil legesema wene ano sak-ʼbak egei. 66Asogo ogu legesema enesaʼgo hweligisarik e,
“Allah en annisogo tenak pesimu hegi o,” oluk, onogola eberugulat e,
“Malik wei aʼge oruak yu, arlue emarik e, noʼgosogo tua,” oluk ogu legesa.
Zakharia en Allah erliktegei wene
67At Yohanes aik Zakharia ano Allah Arogun ogola ʼbetesogo ʼgwegeimu Allah wene eselat e, disogo egei,
68“Nis aphwami Israel aʼge ai nenaik ʼgain Onuk Logo aʼge Allah en il nentau wagarik delnenebegei ai en e,
at erliktogu lomok o.
69Delnonobuagoluk e, at eragam aʼge Daud en dogoʼgwe aʼge anni oruak aʼge edikpesimu oruak ai o.
70Asogo tegei ai re, is ap naduk aʼge Allah enat uʼgwarek paget pagathwerlesimu wene moʼgulontogu legesa aʼge en moʼgulontogulat e,
71Is aphwami logon nenemin il ʼbelak aʼge eneʼgikmu en delnenebiselat,
is aphwami ʼberlegat enebirapsogo nonobogwi aʼge eneʼgikmu en ʼgoboksogo nenebasulat, tua o, oluk,
ogu legesa ano hegitsogoat aga o.
72-73At en neneʼbalak ai ede en obabenebigoluk obok egei ano ebe tagenebasulat,
Disogo takhenebaigoluk, wene uʼgwarek en obok moʼgulentesi aʼge ano ebe tagalat, tua o, oluk e, nede eberak weleik o, oluk moʼgulentesi.
Disogo tik o, oluk hoʼbuk ʼbalogo nenaik Abraham moʼgulesi ʼgelaʼgeat tu waga yu.
74-75Is aphwami pema nenemin il ʼbelak aʼge eneʼgikmu en delogo re,
nonogorlok om erlak nenelaluk welat, Allah il oruakhwe nis wiak mesik tu erlakma en,
at ebaget nak hegitsogo tugulat, togu lemagoluk tu waga yu o.
76-77Ye hat nomlogo yu en, nonue ʼgain Onuk Logo aʼge wemaʼgwe ebela yerise lemagoluk,
hat naduk yoʼgo lasulat,
aphwami di wiak yu wiak togwi aʼge Allah en wene enebam aʼge erlagapsogo ukpasulat delonobua ai
wene hat en moʼgulontoma enaluk ema ai pam en, hat hobok ogulat e,
Logo welago aʼge iak moʼgulentil denago ano ebe yu o, oluk ogu lema o.
78Ye, nenaik Allah ai nenebe edeapnenebiselat e,
o hubet mo yosu ago ʼgelaʼge,
mo erabu en nenebam perakpou wagalat,
79O hiktakma welat warom ai nonogorlok o, oluk opogwi ano o dakharak enebasulat, nis wongsogo yogunat oruakma,
Ebela ʼgo yu lagupmu re, henede haʼbuk ua ani o, oluk, moʼgulnentasulat, tua o,”
oluk, Zakharia en egei. 80Ye, at Zakharia omlogo ano ebe arlue otluk ede modok hurle agarik e, aphwami Israel aʼge owan il yerentai lo erlak welat e, o leimu aphwami modok erlakma ebano welaga.
Pašlaik izvēlēts:
Lukas 1: WUL
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties