Markus 13
13
“Allah owi werik ai aphwami muon en modok moluktua ani o,” oluk moʼgulentesi wene
(Matius 24:1-2; Lukas 21:5-6)
1Wene asogo moʼgulentesirik e, at Yesus Allah owi werikmu en libagama, at osi iak wogu legesa aʼge ebano mesik en e, disogo moʼgulesi,
“Eige! Nue, nogorlok e. O helep op aʼge pam o op modok werik etleba yethemen!” oluk erliktegei. 2Erliktegeimu, at Yesus en e, disogo moʼgulesi,
“O lok werik etleba yethasu legen a? Helep pam louk-louk werik aʼge etleba mesik ukpouwa erlak modok moluksogo hwikhai louwa ani o,” oluk moʼgulesi.
“Naduk naduk disogo wiagaphonobua ani o,” oluk moʼgulentesi wene
(Matius 24:3-14; Lukas 21:7-19)
3Wene asogo moʼgulentasu lagarik e, at Yesus Allah owi werik yu akhit ukpoluk e, etle akhit Zaitun duk pam ligegesarik Allah owi werik aʼge hegit yetharok welat enebe huregesa. Huregesarik e, Petrus o, Yakobus o, Yohanes o, Andreas o, Yesus emin enemategat welat, at ebam wene mesik hin wegesa. 4Hin wogulat e, disogo moʼgulegisa,
“Nue. Wene moʼgulnentigen ano re, metnerlige en de ema. Ebe tigoluk tagokhwe, ʼge aʼge naduk tagokhwe nis nenede weʼgerlema epegen. Wene dokhumsogo moʼgulnentemen da,” oluk hin wegesa. 5Hin wegesema, at Yesus en e, disogo moʼgulentesi,
“Aphwami en lalhonobuano oluk e, henebabut heberlogo welemis o. 6Aphwami enebe aʼbik en ononuk an nonuk aʼge tualogo re, disogo il wema ani o,
At wema egesa ano an nebe wegi yuat o, oluk eniak demat ʼgelaʼge aphwami aʼbigat lalenebil wema o. 7Asogo til wagaihwe, weim horogat obugukhwe eniak henesaʼgo holugulat, walekma obogukhwe onobok holugulat, tugulat e, henede oborlogouk ogup o. Asogo ema aʼgeat de, o ologun pam ema aʼge ai owanat o. 8Di aphwami yu aphwami enaʼgul onuk loʼbok weim ʼgagalugulat, ap onuk logo aʼge onosi eneragam aʼge loʼbok weim ʼgagalugulat, tua ani o. Weim ʼgagalogukhwe re, di owi yu owi mouk erlanghasulat, soʼboru obuk agalat, tua aʼgeat de, ai re, hwami enemalik dagonobuogoluk onoʼborl serlem togwi ai ʼgelaʼge, naduk naduk hagup e, aiat o. 9Asogo hogulat, his e, henebabut heberlogo welemis o. Aphwami nin pema en e, heneʼgik herle wusogo ap ʼgaindek en henemdema wouwagoluk eneʼbek wokhonoboluk lagalat, o aphwami Yahudi aʼge seʼban ogumu eba en ʼgoʼbu wathonobogulat, tua o. Asogo tuarik e,
Is yu re, Yesus osiat o, oluk, is ap pemerintah aʼge ʼgaindek emin, ononuk logo aʼge emin, wene henebam pouwagoluk onlogotma edikhonobouema, ai erlige panoasuak, an tagokhwe henil niogu legep aʼge ʼbaksogo moʼgulontomup o. 10Aʼge re, wene op wene yu, di ap yu ap enaʼgul onuk loʼbok moʼgulentil lagup holuk e, o ologun pam arat ema o. 11His heneʼgik herle wusogo wene enebam pogulat, noʼgorlogulat, tugumu eba wokhonoboluk louema his en e,
An en wene oʼgo noʼgosogo ik, oluk henede porogup o. Wene oʼgo his en honogola ʼgagalogo ogup puk. We, Allah Arogun enat,
Disogo ip o, oluk ai erlige moʼgulhontouwa aʼgeat moʼgulontomup o. 12Ye, are mesik en e, uʼgwarek are woruagoluk woluk lasulat, aik en e, omlogo woruagoluk woluk lasulat, enemalik en e, enaiklak enialak enebirabonoboluk, waronobuagoluk onobok ʼbalugulat, tua ani o. 13Ye, aphwami ʼberlek enat an nonuk oluk,
His e, at osi o, oluk henebe enebit modogat hontouwa o. Aʼgeat de, sa en epe mosogo welema holuk e, o ologun pam Allah en agap delua ani o,” oluk moʼgulentesi.
“Pobuk ologun pam wik-wiaksogo hagup ani o,” oluk moʼgulentesi wene
(Matius 24:15-28; Lukas 21:20-24)
14Wene asogo moʼgulentesirik e, mesik disogo moʼgulentesi,
“His en pelal wogo yu re, onuk moʼgulugulat e, opsogo pobi togu lomup o. Aphwami en enemelmel aʼge togwiam ogoiyesogo ʼbogolua aʼge o wolom erlakma inago holuk e, aphwami o Yudea doʼgo aʼge eba hweiye dom petne ligemak o. 15Hweiye ligomogoluk holuk, aphwami pema o dum pam ligotluk welemarik, togolik ʼbu emarik e, enaʼge di aʼge yu aʼge o pam oruak aʼge hwerla ʼgu erlakma en ʼbekhirat ligemak o. 16Ye, is pema yabuk oʼgwe en, soʼboru eʼgelaʼgwe en, togolik olema onosum wa ʼgwilo erlakma en hweiye ʼbekhirat ligemak o. 17Asogo ligagalat, is hwami enemalik onogola aʼge emin, enemalik ʼget dogo aʼge enagamu wogontogwi aʼge ai emin, wiaksogo houwa ai, eige! Nede e. 18His hweiye ligorogup ai, o moru wiak aʼge pam lagupno oluk, seʼban ogu lemis o. 19O ai erlige wiagat ema ai re, naduk Allah en di aʼge yu aʼge walhesi ai hwerli en ʼbekhit, o yogodak ya hwerli re, wiak lok ai ʼgelaʼge mesik om erlak aʼge, mesik erlige aiat emarik pobuk mesik ema modok erlak o. 20Wiak ema ai, nenaik Allah ʼgain Onuk Logo aʼge en e,
Hwerli yu hwerli arat o, oluk u erlakma en mo elipmu re, aphwami ʼberlegat perlengsogo delonobu erlakma en wiagat enebelip o. Aʼge re, aphwami Allah en poligenebesi aʼge is enebaget nak e,
Yogo. Wiak ano arat hegep o, oluk hwerli pouwa oruak o. 21Ye, wiak asogo tagokhwe, is pema en e,
Kristus ano yu waga yu hemit, ogulat, is pema en e,
Kristus ano etle waga etle yethemit, ogulat, ogwiam his honogola en e, demat oluk epagup o. 22Is aphwami pema enepenenat ogulat e,
Kristus ano nebe anat o, ogulat, ye, is nin pema en e,
Allah iak moʼgulhentasu aʼge anat o, ogulat, il wema o. Wemarik e,
Aphwami Allah en poligenebesi aʼge ebano lalonobua hwi a? Erlak hwi a, oluk lalonobuogoluk e, eniak demat opouwagoluk elalin tu puk aʼge til wema ani o. 23Wene ai owan tu erlak oruakhwe hweseʼbi naduk moʼgulhentegis ai henebabut heberlogo welemis o,” oluk moʼgulentesi.
“An abat daklau wegi ano, pobuk weigoluk tagokhwe, disogo ema,” oluk moʼgulentesi wene
(Matius 24:29-31; Lukas 21:25-28)
24At Yesus en asogo moʼgulentesirik e, mesik disogo moʼgulentesi,
“Wiak lok houwa ai holukmu en pobuk e,
o mo hik eselat, dugwi yoru erlakma en mo eselat,
25hwesagal ʼbogorl pam en lologo ʼbu agalat,
is ʼbogorl pam enanni aʼbik welagai aʼge ebano Allah en onoborlogouk hasulat, tua o. (Yesaya 13:10, 34:4; Yoel 2:10, 31, 3:15)
26Ai erlige re, an abat daklau wegi ano nannisogoat o hena ogola ʼbu agokhwe re, aphwami enil nioluk, aʼbigat erliknobua o. 27ʼBu agalat e, is malaikat Allah en yoʼgo peragonobou wago aʼge ebano, aphwami Allah en poligenebesi aʼge o orogobu akhit en, erabu akhit en, etlebaʼgwe en, yemaʼgwe en, welagai aʼge odogonobuagoluk, yoʼgo ʼbogorl edip edip o di owi yu owi eba peragonobouwa o,” oluk moʼgulentesi.
Wene e ara pam elitsogo moʼgulentesi wene
(Matius 24:32-35; Lukas 21:29-33)
28At Yesus en wene asogo moʼgulentesirik e, mesik disogo moʼgulentesi,
“Wene yu e ara pam elitsogo moʼgulhentaik aʼge yu pobi tit o. E ara ai eʼgela lologo ʼbiselat e, pobuk esemis ʼbaktagalat, erlit sebeliselat, tisokhwe re, henil holuk honogola en e,
Yogo. O arat hebi ema hegi, oluk henede pobi togu legep ai ʼgelaʼge,
29Disogo tua ani, oluk moʼgulhentegis ano ebe tisokhwe, henil holuk e,
Yogo. O ologun pam ema ano arat horok lau waga hegi, oluk henede opomup o. 30Disogo ema, asogo ema, oluk moʼgulhentegis ai, aphwami o yogodak ya oruak aʼge enebe logon erlak om erlak owan oruakhweat, ebe ʼberlegat ema ani o, oluk demat moʼgulhentegis. 31ʼBogorl emin, ʼgwiang emin, ai erlak ema aʼgeat de, an niak ai re, erlak ema modok erlak o,” oluk moʼgulentesi.
“Metnerlige en ema nis ʼberlegat neneperlak ai en, henebabut heberlogo welemis,” oluk moʼgulentesi wene
(Matius 24:36-44)
32At Yesus en asogo moʼgulentesirik wene mesik disogo moʼgulentesi,
“Ema ai, o ai erlige, jam ai pam ema oluk, nis aphwami ʼberlegat neneperlak nak o. Ye, is malaikat Allah en ʼbogorl pam en yoʼgo ʼbelagonobou ago aʼge ebano eneperlagat. Ye, an nebe at Allah omlogo aʼgeat de, an ogo neperlagat o. We, an naik emategat aluk o. 33Metnerlige en ema his heneperlagat welegep ai en e, henebabut heberlogo ʼgagalak welemis o. 34Wene yu emin hegit e, ap mesik owi pam en o walekma laigoluk e, eragam aʼge owi pekharok welemagoluk onoboluk lasu. Laigoluk, eragam aʼge ebano eniabuk loʼbok soʼbusogo wogentasulat e,
Hat mesik e, yu taga lomup.
Hat mesik e, yu taga lomup.
Hat mesik en e, nowi ʼgodukmu ʼgagalak welegen aʼge yu, hil opsogo wolomup o, oluk soʼbusogo wogontoluk lasu ʼgelaʼgeat o. 35Ai ʼgelaʼge, his henil opsogo wolomup o, oluk moʼgulhentegis ai, honue ʼgain Onuk Logo aʼge owi eiye aʼge ano togolik wema ai metnerlige wema. O sebek iogoluk tagokhwe wema ya? Hup ede ʼburl wema ya. Sue iak naduk aʼge osokhwe wema ya? O dakha uema wema ya. His heneperlak. 36O eria pam wema oluk heneperlak ai en e, wongat nogogukhwe hentaumano oluk e, 37henebabut heberlogo wolomup o, oluk his moʼgulhentegis yu re, aphwami enebe ʼberlegat enemin moʼgulhentegis o,” oluk moʼgulentesi.
Pašlaik izvēlēts:
Markus 13: WUL
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties