MATIYO 7
7
Misomo ya Insa yahusu mutru adzihetsio munamuzi
(Luk 6:37-38,41-42)
1«Musunamuwe wanyanyu, pare wanyu musunamulwe. 2Mana mutsonamulwa ha uɗunga unamuzi munamuawo, na ishiv̄imo muirumiao ha wanyanyu, ɗe mutsov̄imiwaoyo.
3Manatrini uonao saha lilio dzitsoni ha munyaho, ne kusumaizi umongo ulio dzitsoni haho? 4Au namuna jeje utsoshindrao uambiye munyaho: ‹Nilishe nihutoleye saha lilio dzitsoni haho›, wawe uliona mongo moni na laho? 5Munafiki! Toa raɓuzi umongo dzitsoni haho, v̄av̄o ɗe utsoonao ha uzuri hali utsotoao lisaha lilio dzitsoni ha munyaho.
6Musuv̄e zimbwa izo zilio twahara, zasuje zamuzingiani, zamukamanyoni; wala musuvutsiye lulu zendza thamani zanyu mav̄uruku, yasuje yazigaɗa.»
Mungu ɗe atakaɓaliao mamilio
(Luk 11:9-13)
7«Namumiye, na wanyu mutsov̄olwa; namuzunguhe, na wanyu mutsopara; namureme umulongo, na wanyu mutsoɓuliwawo. 8Mana yotsi amiao, uv̄olwa, uwo azunguhao, upara, na uwo aremao umulongo, uɓuliwawo.
9Mbani hanyuju, mwana wahe amomumia dipe, atsomuv̄ao ɓwe? 10Au neka asumumia fi, atsomuv̄ao nyoha? 11Neka wanyu mulio wa peu ujua uv̄a wana wanyu zitru ndjema, ha mara ngav̄i zaidi Ɓaɓanyu alio pev̄oni atsov̄ao ndjema ha wao wamumiaozo? 12Ɓasi piya izo mutsahao watru wamufanyiyeni, wanyu wajau namuwafanyiyezo. Iyo ɗe imana ya iSharia na marongozi ya yimitrume.»
Mufano wa milongo, moja mutsala, na umoja muv̄ana
(Luk 13:24)
13«Namungiye ha uv̄ira hari mwa umulongo mutsala; mana muv̄ana ɗe umulongo, tsena nafasi ɗe indzia iv̄ingao hari mwa uangamifu, na wengi ɗe wav̄irao hari mwawo. 14Ɓadi mutsala ɗe umulongo, na ndzisongefu ɗe indzia iv̄ingao hari mwa uhayati, tsena washashi ɗe wauparao.»
Mufano wa muri na mbia zawo
(Luk 6:43-44)
15«Namudzifahamishe na watru wa trambo wadzifanyao amba washukidziwa marongozi; wao umujiliani ha sura za maɓariɓari matrulivu, ɓadi moni hawo, wao wahali mauri mbwa nyeha. 16Mutsowajua ha mavuna yawo. Hali mutru upua zaɓiɓu hari mwa shimea yendza miɓa? Au mbia za uɗya hari mwa muri-muɓa? 17Muri mwema, uwo udza mbia ndjema, na muri muyi, udza mbia mbi. 18Muri mwema kaushindri udza mbia mbi, wala muri muyi mbia ndjema. 19Kula muri kaudza mbia ndjema, uwo ukatrwa, amwesa uvutswa moroju. 20Ɓasi ha izo, mutsowajua ha mavuna yawo.»
Watru watsongiao hari mwa Utawalizi wa Mungu
(Luk 13:25-27)
21«Tsi ɗe piya wanihirao: ‹*Raɓi, Raɓi› ɗe watsongiao hari mwa Utawalizi wa Monyewe ziMbingu, ɓadi ɗe uwo tu afanyao yamav̄endzeleo ya Ɓaɓangu alio pev̄oni. 22iSuku ya Hukuma, watru wengi watsoniambia: ‹Raɓi, Raɓi, afa ha lidzina laho, karajudza marongozi rakoshukidziwawo mwa? Na ha lidzina laho tsi ɗe ratradza mazetwani, na utsimidza trongo nyengi za midjuza?› 23Ɓadi wami nitsowaambia: ‹Tsaparomujuani; namulawe mbeli zangu v̄anu, wanyu marendra-mbovu!› »
Mufano wa waundrizi waili
(Luk 6:47-49)
24«Ɓasi kula akiao marongozi yangu yanu, ayatriao ndziani, ufana na mwendza ãkili aundra nyumba yahe hari mwa mudjasasa wa ɓwe. 25Vua inye, yimiro yijaya ata yitrisi, v̄uja pev̄o ɓole zivumu na urema nyumba ile, ɓadi kayakomoha, mana iundrwa hari mwa mudjasasa wa ɓwe. 26Ɓadi kula akiao marongozi yangu yanu wala kayatria ndziani, ufana na ɗaɓa laundra nyumba yalo hari mwa mutsanga. 27Vua inye, yimiro yijaya ata yitrisi, v̄uja pev̄o ɓole zivumu na urema nyumba ile, ata ikomoha-komoha. Ɓas, uangamifu wayo uka muɓole halisi.»
28Wakati Insa amalidza marongozi yanu, idunia yaka v̄ale yakoshanga na yimisomo yahe, 29mana akosomedza mauri mutru aliona yezi, ɓadi tsi mauri ɗe Mafundi ya Sharia yawo yale.
Pašlaik izvēlēts:
MATIYO 7: swb
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2021, Wycliffe Bible Translators, Inc. All rights reserved.