Maalʉko 4
4
Ɨshifwani ɨsha mʼvyala mbeyu
(Mataayo 13:1-9; Luuka 8:4-8)
1ɄYeesu ahanda hubhamanyizye abhantu nantele panshɨnjɨ pa nsʉmbi ɨyɨ Galilaaya. Ɨmpʉga ɨngoosi haani ɨya bhantu yahamʼmʉnganiiye. Ɨpo ʉmwene ahatʉʉha mu waato na‑akhale muula huje, bhagandi humʼbiganye. Abhantu bhahasagala panshɨnjɨ pa nsʉmbi.#4:1 Enya Mataayo 13:2, ɨshifwani ɨsha Yeesu lwa‑amanyizya ɨmpʉga ɨya bhantu lwa‑ali mu waato. 2Ahabhamanyizyaga ɨmanyizyo ɨnyinji hu vifwani. Mu manyizyo zyakwe ahagaga, 3“Mwɨ tejeelezyi! Ʉmʼvyala mbeyu ʉmo ahabhalile asanse ɨmbeyu ɨzyɨ ngano. 4Lwa‑asansa, ɨmbeyu zimo zyahagwɨla mwi‑idala, ɨnyonyi zyahɨnza, zyahazikompa na huzimile. 5Ɨmbeyu zimo zyahagwɨla mu longo ʉnʼdoodo pi‑ilyalawe, zyahamela nalinaali mu longo ʉnʼdoodo. 6Ɨpo isanya lwa lyahalama, lyahʉʉmɨha ʉlongo guula, zyope ɨngano zyahanyaala na hwʉme, pɨpo amalandazi gaakwe saga gahiishile pa nsi tee. 7Ɨmbeyu ɨzyamwabho zyahagwɨla mu mimvwa, amimvwa ɨgo gahamela, gahazipuuta, zyahapootwa ahwele. 8Leelo, ɨmbeyu zimo zyahagwɨla mu longo ʉgwɨ mboto, zyahamela, zyahakula na hwele haani. Ɨmo yaheela amashʉmi gataatu, ɨmo yaheela amashʉmi nʼtanda, nantele ɨyamwabho yaheela ɨmya yeeka!”
9Ɨpo ʉYeesu ahabhabhʉʉzya huje, “Ʉmuntu wowonti wa‑ahwʉmvwa, azyaganyaaje na‑alembe mwɨ‑ɨgo ga nabhamanyizya.”
Yeenu ʉYeesu amanyizya hu vifwani
(Mataayo 13:10-17; Luuka 8:9-10)
10Pamandɨ ʉYeesu ahasagala na bhasundwe bhaakwe ishʉmi na bhabhɨɨlɨ na bhasundwe abhamwabho. Ɨpo bhahamʼmʉzɨɨlɨzya hu nongwa yɨ vifwani, bhahaga, “Ɨshi, ɨvifwani vyaho vilɨngaanisya yeenu?” 11Ahabhaamula ahaga, “Amwɨ mwɨ‑ɨhubhavundulila ɨzyɨ mfiso ɨzyɨ wumwɨnɨ ʉwa Ngʉlʉbhɨ. Leelo, abhantu abhanjɨ ɨhubhabhʉʉzya zyonti hu vifwani, 12nanshi sha zyahasimbwilwe huje,
‘Bhahenyaaje,
saga bhahazilolaje nka zimo.
Nantele, bhahatejelezyaje,
saga bhahazyaganyaaje nka zimo
huje, bhasahanʼgalushile ʉNgʉlʉbhɨ,
wope nka‑abhakhobhoshele.’ ”#Bhaazya Yesaaya 6:9-10.
ɄYeesu ahwilula ɨshifwani ɨsha mʼvyala mbeyu
(Mataayo 13:18-23; Luuka 8:11-15)
13Ɨpo ʉYeesu ahaga, “Ɨshi leelo, nkashele saga muhushaaganya ɨshifwani ɨshi, zibhala‑abhe bhʉlɨ bhʉlɨ hu vyamwabho? 14Ʉmʼvyala mbeyu muntu ʉyo ahubhaleetela abhanjɨ amazwi ga Ngʉlʉbhɨ. 15Ʉlongo ʉgwa mwi‑idala, shifwani sha bhantu bha bhatejeelezya izwi lya Ngʉlʉbhɨ, leelo lwa bhahulyʉmvwa izwi lya Ngʉlʉbhɨ lwene, ʉSeetano ahwɨnza, ahwefwa izwi liila mu mooyo gaabho. 16Ʉlongo ʉgwa pi‑ilyalawe, shifwani sha bhantu bha bhahulyʉmvwa izwi lya Ngʉlʉbhɨ, bhahulyambɨɨlɨla hu nseho zyonti nalinaali lwene, 17leelo saga bhahulibhɨɨha mu mwoyo. Lyoli bhali nanshi imelela lya saga lisiizye amalandazi pa nsi tee. Alɨngaane nɨ‑ɨsho, bhajimbiilila hashe lwene. Amayɨmba lwa gahubhaaga hu nongwa yi‑izwi, bhahululeha ʉlwɨtɨho nalinaali lwene. 18Ʉlongo ʉgwa mu mimvwa, shifwani sha bhantu bha bhahulyʉmvwa na hulyambɨɨlɨle izwi lya Ngʉlʉbhɨ, 19leelo abheene bhasɨɨbha haani ɨzya mu nsi, ilenga ɨlya‑abhe nɨ shʉʉma ɨshinji peeka na‑azilishe ahwanze ɨvintu ɨvinza ɨvyamwabho. Ɨvyo vya vihubhabhɨɨha huje, bhapootwe hulibhombele ɨmbombo izwi. 20Leelo, ʉlongo ʉgwɨ mboto, shifwani sha bhantu bha bhahulyʉmvwa izwi lya Ngʉlʉbhɨ na hulyambɨɨlɨle na hulibhombele ɨmbombo. Ɨpo pa lipaapa na‑agalulanye abhantu ɨbho bhabhombaje ɨnyinza, nanshi ɨmbeyu yeeka shɨ‑ɨhwela amashʉmi gataatu, ɨyamwabho amashʉmi nʼtanda, ɨyamwabho ɨmya yeeka.”
Ɨshifwani ɨshɨ kolobooyi
(Luuka 8:16-18)
21ɄYeesu ahayibhʉʉzya ɨmpʉga ɨla ɨya bhantu huje, “Bhʉlɨ, alɨɨho ʉmuntu wa‑akhozya ɨkolobooyi na‑abhɨɨshe hwi‑izʉngʉlʉ ɨlyɨ shitala, awe huyikwinshile nɨ nsonta? Bhʉlɨ, saga abhɨɨha pa mwanya pa mbeeje huje ɨkhozyaje mwonti? 22Ɨsho sha shɨɨsho hu shifwani, lyolyonti liila lya lili hu mfiso, lili hu mfiso huje, livundulwe na‑abhe pazelu. Nantele, lyolyonti liila lya lifisiilwe, lifisiilwe huje, likwinkuliwe. 23Ʉmuntu wowonti wa‑ahwʉmvwa, azyaganyaaje na‑alembe mwɨ‑ɨgo ga nabhamanyizya.”
24Ɨpo ʉYeesu ahonjela hubhabhʉʉzye huje, “Tejelezyaji haani! Shishiila shʉ‑ʉhwifumya hulitejeelezye izwi, sha shɨɨsho wope ʉNgʉlʉbhɨ sha‑ahupeela ʉmanyi, nantele anza huhwonjele hulimanye haani. 25Ʉla wa‑ahulitejeelezya izwi lya Ngʉlʉbhɨ na hulimanye, ʉNgʉlʉbhɨ ahumʼmwavwa na humʼmwonjele hulimanye tee. Ɨpo nkashele ʉmuntu saga atejeelezya izwi lya Ngʉlʉbhɨ, ni‑idoodo lya‑alimɨɨnye lifyʉlwa.”
Ɨshifwani ɨshɨ mbeyu yɨ‑ɨmela
26ɄYeesu ahonjela hubhabhʉʉzye huje, “Ɨmbabhʉʉzye ɨshifwani ɨshamwabho huje, ɨmbamanyizye ʉwumwɨnɨ ʉwa Ngʉlʉbhɨ sha wuli. Ʉmuntu ʉmo ahavyalile ɨngano mu nʼgʉnda. 27Pasanya na nʉsiku, abhe adamuuye awe agonile, ɨmbeyu ɨla ɨdugula na‑akule sinta amanye ʉmwene shɨ‑ɨkula. 28Ʉlongo gwʉgwo gukuzya ɨngano ɨla na hwezye. Nasʉʉti ɨdugula itʉndʉ iduvya, nkashele yanda alembe, hu malishilo ɨfumya itwe lya libha nɨ ngano muuhati. 29Ɨngano ɨla lwa yeela, nantele yʉʉma, ɨpo ahwanda agwedule nɨ ngwedulo.”
Ɨshifwani ɨshɨ mbeyu yi‑ihaladaali
(Mataayo 13:31-32, 34; Luuka 13:18-19)
30ɄYeesu ahonjela hubhabhʉʉzye huje, “Ɨshi tiwulɨngaanisye ʉwumwɨnɨ ʉwa Ngʉlʉbhɨ nɨ yeenu? Tiwulɨngaanisye nɨ shifwani wɨlɨ? 31Wulɨngaana nanshi ɨmbeyu ɨyi‑ihaladaali,#4:31 Ihaladaali likwi lya lili nɨ mbeyu ɨndoodo tee nanshi ɨnzembwa. Ikwi ɨlyo nkashele lyamela, libha ligoosi hashe, hwope ɨnyonyi zitenjeela ɨvyansʉ mu nsamba zyakwe. yɨ ndoodo ashile ɨmbeyu zyonti zya zivyalwa mu magʉnda. 32Nkashele yaamela, libha likwi ligoosi ashile amakwi gonti aga mu magʉnda. Libha nɨ nsamba ɨngoosi nɨ nyonyi zyope zitenjeela ɨvyansʉ mu nsamba zyakwe.”
33ɄYeesu ahabhaletelaga amazwi ga Ngʉlʉbhɨ hu vifwani ɨvinji nanshi ɨvi, nanshi sha bhahavyaganyaaga. 34Saga ahayangaga nabho sinta vifwani. Leelo, ʉmwene na bhasundwe bhaakwe lwa bhali bheene, ahabhalanganyizyaga vyonti.
ɄYeesu akhajila ɨhaala ɨhali na mabhilingwa
(Mataayo 8:23-27; Luuka 8:22-25)
35Isiku lyɨnɨɨlyo, nalyabheela yaakwe, ʉYeesu ahabhabhʉʉzya abhasundwe bhaakwe huje, “Saali, tifwɨmɨɨle ɨnsʉmbi, tibhale hwi‑isyɨla ɨlyɨnjɨ.” 36Bhahayileha ɨmpʉga ɨya bhantu, bhahatʉʉha mu waato mwa‑ahali ʉYeesu, bhahasogola peeka nawo. Pahali nɨ nyaato ɨzyamwabho zya bhahalongozɨɨnye nabho. 37Ɨhaala ɨhali tee yahanda avugule mu nsʉmbi muula. Ʉvwalanganu wuula wahawubuhanyaaga ʉwaato, amɨnzɨ gahanda ahwitishile na‑ameme mu waato. 38Mu habhaazyo hɨnɨɨho, ʉYeesu ahagonelɨɨye hwisinda mu waato, ahasugamiiye itwe pi‑isugamilo. Abhasundwe bhaakwe bhahanʼdaamuzya, bhahaga, “Mʼmanyizyi, hwa huje saga ʉsaaga lwonti, atɨ lwa tifwa?” 39Lwʉnʉʉlwo ʉYeesu ahadaamuha na huyikhajile ɨhaala ɨla na mabhilingwa, ahawukhajila ʉvwalanganu ahaga, “Pʉʉma myɨ!” Ɨhaala ɨla yahaleha avugule, hwahabha myɨ lwonti. 40Lwʉnʉʉlwo ʉYeesu ahabhabhʉʉzya abhasundwe bhaakwe huje, “Yeenu amwɨ mwogʉʉpe tee? Ɨshi, tije amwɨ musɨɨle abhe nʉ lwɨtɨho lwonti?” 41Abheene bhahogʉʉpe tee, bhahanda abhʉzɨlɨzanye huje, “Ɨshi ʉnʉ yʉ naanu, aje ɨhaala nʉ vwalanganu vihumʼmwʉmvwa lwene?”
Pašlaik izvēlēts:
Maalʉko 4: SBK
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2022, Wycliffe Bible Translators, Inc. All rights reserved.