Maalʉko 3
3
ɄYeesu ahumʼponia ʉmuntu pi‑isiku ɨlyɨ Sabaato
(Mataayo 12:9-14; Luuka 6:6-11)
1Isiku ɨlyɨnjɨ ɨlyɨ Sabaato, ʉYeesu ahatʉʉha mu nyumba ɨya‑apuutile na‑amanyiilile. Ʉmwo ahali ʉmuntu ʉyo ʉnʼkhono gwakwe gwahafwiye. 2ABhafalisaayo bhahamʼmendaga haani ʉYeesu, bhalole nkashele abhala humʼponie ʉmuntu ʉla pi‑isiku ɨlyɨ Sabaato, awe ndaadi. Nkashele amʼponie, nka bhalyaje idala ɨlya hunʼtaake ʉYeesu. 3ɄYeesu ahamʼmʉʉzya ʉmuntu ʉla ahaga, “Bhʉʉha, ɨmɨɨlɨla ɨpa paahati.” 4Ɨpo ʉYeesu ahabheenya abhantu bhaala, ahabhabhʉzɨɨlɨzya huje, “Ɨshi, alɨngaane nɨ ndajizyo zya Moose, lyenu linza lya likhondɨɨye abhombe pi‑isiku ɨlyɨ Sabaato, abhombe ɨlinza awe abhombe ibhiibhi, aponie awe agoje?” Abheene bhahapʉʉma myɨ! 5ɄYeesu ahabheenya bhonti hwi‑ilyoyo, ahazugumila mu mwoyo gwakwe, hu nongwa yɨ khome wɨ mooyo gaabho. Ɨpo ʉYeesu ahamʼmʉʉzya ʉmuntu ʉla huje, “Golosya ʉnʼkhono gwaho.” Ʉmuntu ʉla ahagolosya ʉnʼkhono gwakwe, gwahapona, gwahabha mwinza lwene. 6Pɨnɨɨpo aBhafalisaayo bhaala bhahafuma hwʉnzɨ, bhahabhʉngaana na‑ajeehane na bhaavwi bha mwɨnɨ ʉHeloode ʉAntipa.#3:6 Abhaavwi bha mwɨnɨ ʉHeloode ʉAntipa bhahali mpʉga ya Bhayahuudi ya yahali ni‑ikhone. Abheene na Bhafalisaayo saga bhahaganɨɨne lwonti, lyoli hu nongwa zimo lwene. Bhonti bhahogopaga amanyishe hwa Yeesu mu nsi yonti, ɨpo bhahanda ahwɨtɨɨhane ahwanze idala ɨlya hunʼgoje ʉYeesu. Lwa bhali pa lubhʉngaano, bhahanza idala ɨlya hunʼgoje ʉYeesu.
Abhantu abhinji bhahumʼmalila ʉYeesu
7-8Ɨpo ʉYeesu ahasogola ʉmwo, ahabhala hu nsʉmbi ɨyɨ Galilaaya peeka na bhasundwe bhaakwe. Lwa bhʉmvwa amayele ga‑ahabhombaga, ɨmpʉga ɨngoosi ɨya bhantu yahanda humʼmɨnjɨɨlɨzye. Bhahafumile mu pɨɨpɨ nʉ hutali. Bhahafumile hwi‑ibooma ɨlyɨ Yelusaleemu, hu mukowa ʉgwɨ Galilaaya, ʉgwɨ Yudeeya nʉ gwɨ Idumeeya, hwi‑isyɨla ɨli‑isooho ɨlyɨ Yolodaani na mu pɨɨpɨ mu mabooma agɨ Tiilo nɨ Siidoni. 9Ɨmpʉga ɨla yahali ngoosi haani, ɨpo ʉYeesu ahabhabhʉʉzya abhasundwe bhaakwe ahaga, “Bhɨɨshi nzɨɨla ʉwaato huje, nkashele ɨmpʉga ɨhumbiganya, ɨntʉʉshe mu waato.” 10Abhabhinu bhahabuhaanaga na‑asejeelele hwa mwene huje, bhamʼpalamansye, pɨpo abhantu bhinji bhahali bhaponile. 11Abhantu bhonti bha bhahali na mapepo lwa bhanʼnola lwene, bhahagwanga pa manama gaakwe na‑alile haani hwi‑izwi igoosi huje, “Aawe ʉli Mwana wa Ngʉlʉbhɨ!” 12Ɨpo ahagakhajila haani amapepo huje, gasahanyampaanye hwa bhantu huje, ʉmwene yʉ naanu.
ɄYeesu ahubhasalula abhasontwa ishʉmi na bhabhɨɨlɨ
(Mataayo 10:1-4; Luuka 6:12-16)
13ɄYeesu ahazʉbha mwi‑igamba. Ahabhakwizya abhantu, bhahɨnza hwa mwene. 14Ahabhasalula abhantu ishʉmi na bhabhɨɨlɨ huje bhabhe bhasontwa bhaakwe, bhabhanje nawo, abhasontelezyaje alʉmbɨɨlɨle. 15Nantele, ahabhapeela ikhone ɨlya hwefwezye amapepo mwa bhantu. 16Ɨga ga mataawa ga bhantu ishʉmi na bhabhɨɨlɨ bha‑ahasaluuye, ʉSiimoni ʉyo ʉYeesu ahamʼpiiye itaawa ɨlyɨnjɨ ɨlya Peeteli hwa huje lyalawe, 17ʉYaakobo nʉ Yoohani bha bhahali bhavwɨlɨ bha Zebedaayo, bhaala ʉYeesu ahabhapeelile itaawa ɨlya Boyanige, hwa huje Bhaana bhɨ Lyʉngʉmo, 18ʉAnduleeya, ʉFilipo, ʉBasolomaayo, ʉMataayo, ʉToomasi, ʉYaakobo ʉmʼvwɨlɨ wa Alufaayo, ʉTadaayo, ʉSiimoni ʉNʼzeloote#3:18 ʉSiimoni ʉNʼzeloote ɄSiimoni ʉyo ahali na mataawa gabhɨɨlɨ, lyeka yʉ Siimoni ʉNʼzeloote, ɨlyamwabho yʉ Siimoni ʉNʼkaanani. hwa huje ʉlwɨla nsi yaakwe, 19nʉ Yuuda Sikalyoti, ʉyo ahanʼsambushiiye ʉYeesu pamandɨ.
ɄYeesu ali ni‑ikhone ashile ʉSeetano
(Mataayo 12:22-32; Luuka 11:14-23; 12:10)
Ɨpo ʉYeesu ahatʉʉha mu nyumba. 20Ɨmpʉga ɨya bhantu yahabhʉngɨɨne paala. ɄYeesu na bhasundwe bhaakwe bhahapotiilwe alye nka shalye, pɨpo ɨmbombo ɨya hubhabhombele abhantu yahali ngoosi haani. 21Ʉnyina na bhanakwabho lwa bhʉmvwa ɨnongwa ɨzyo, bhahaga abwaluushe. Ɨpo bhahabhala humʼmweje.
22Bhope abhamanyizyi abhɨ ndajizyo zya Moose bha bhahafumile hwi‑ibooma ɨlyɨ Yelusaleemu bhahagaga, “Ali ni‑ipepo igoosi ɨlya Belizebuuli!” Nantele, bhahagaga, “Ʉyo ahumʼpeela ikhone ɨlya hugadaje amapepo mwa bhantu, yʉ Belizebuuli#3:22 Belizebuuli Ɨli litaawa lyɨnjɨ ɨlya Seetano. ʉnʼgoosi ʉwɨ mapepo gonti.” 23Ɨpo ʉYeesu ahabhakwizya, ahanda hubhabhʉʉzye hu vifwani huje, “Ɨshi, ʉSeetano agahwiyeefwa nanshi bhʉlɨ bhʉlɨ? 24Nkashele abhantu abhɨ wumwɨnɨ weeka bhalwa ʉlʉgʉ bhɨɨbho hu bhɨɨbho, ʉwumwɨnɨ ʉwo wunza‑agwe. 25Bhope abhantu abha mu nyumba yeeka nkashele bhanda alwe bhɨɨbho hu bhɨɨbho, ɨnyumba ɨyo saga ɨgalʉnjɨha nalumo. 26Nkashele ʉSeetano alwa na mapepo agamwabho, ʉwumwɨnɨ waabho wutapuhɨɨne, wugɨmɨɨlɨla nanshi bhʉlɨ bhʉlɨ? Saga wugɨmɨɨlɨla nalumo, lyoli wuula wugwiye nzɨɨla. 27Leelo, ɨlyoli ya yɨɨnɨ. Nʉʉmo ʉmuntu wa‑abhajiiye atʉʉshe mu nyumba ya muntu ʉwi‑ikhone, huje amʼfyʉle ɨvintu vyakwe, sinta humʼpinye nasʉʉti. Ɨpo abhajiiye humʼfyʉle ɨvyo vya vili mu nyumba yaakwe.
28Lyoli ɨhubhabhʉʉzya, abhantu bhahayikhobhoshelwa ɨmbiibhi zyabho zyonti. Nantele, bhahayikhobhoshelwa hwope nkashele bhahunʼshenta wowonti, 29leelo nkashele ʉmuntu ahunʼshenta ʉMʼpepo ʉMʼfinjile, saga ahayikhobhoshelwa nalumo. Ʉyo ahayibha na malando gɨ mbiibhi zyɨ wiila.” 30Ahabhabhʉzɨɨzye ɨsho, pɨpo abheene bhahagaga, “Ali ni‑ipepo.”
Abhaholo bha Yeesu abhɨ lyoli
(Mataayo 12:46-50; Luuka 8:19-21)
31Ɨpo ʉnyina na bhaholo bhaakwe ʉYeesu bhahafiha ɨpo, bhahɨmɨɨlɨla panzɨ pa nyumba ɨla mwa‑ahamanyizyaga. Bhahanʼsonteelezya ʉmuntu ʉmo huje, anʼkwizye ʉYeesu mu nyumba, bhayanje nawo. 32Ɨmpʉga ɨngoosi ɨya bhantu yahakhɨɨye, yahanʼzyʉngʉʉlɨle. Ɨpo bhahamʼmʉʉzya ʉYeesu bhahaga, “Enya, ʉbhɨɨnyu na bhaholo bhaaho bhali panzɨ, bhahukwizya.” 33ɄYeesu ahabhaamula huje, “Ʉnyina waanɨ na bhaholo bhaanɨ bha naanu?” 34Ɨpo ahabheenya abhantu bha bhahali bhakhɨɨye na hunʼzyʉngʉʉle, ahaga, “Enyi, ɨbha bha bhaanyina bhaanɨ, nantele bhaholo bhaanɨ.” 35Ahonjela ahaga, “Ʉmuntu wowonti ʉla wa‑abhomba ga‑ahwanza ʉNgʉlʉbhɨ huje abhombaje, ʉyo holo waanɨ, nyina waanɨ, nantele yɨlʉmbʉ waanɨ.”
Pašlaik izvēlēts:
Maalʉko 3: SBK
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2022, Wycliffe Bible Translators, Inc. All rights reserved.