Genese 35
35
Aualari Iakobo Betela leia lei morapaeape
1Aualari Iakobo maeape: “Urou, Betela leia pekai aeakive. A akoreapo Esau oaoka lei hukaupe la hoa ave oropa ve hihika leipe la Aualari ve arura haha urapakive.” 2Laelave Iakobo areve uvi haela i are i hareho apeape la haela oaria maeaeape: “Eve aru ve la ita lahua ve harihu aikikilapaki; E va elare maea lei veveroro leivahaeai pura āre kohahakive; 3elaviila urahukai Betela leia pekahavakilai, ara leia arave heraho hoa koarai mea oaria ara i aeaveape la Aualari ve arura haha urapakilai.” 4Laelave ereve ita ve la harihu merava i ereve avako ila la maupa eharu oaria ila ere Iakobo aiarape. Iakobo Sekema maea maea ve la havuhu ve ipi ve erero aiarapape.
5Ere hahi auvahaeape la hoa, maeamaea ve la karikara oaria Aualari lei oaoka eapapo leivahaeape, laelave ere Iakobo ve la akoremari au haruapaila. 6Iakobo Lusa leia ekepe, (la ita ve rare aea Betela, Kanana ita ve karikara), are i hareho la haela kara, 7are leia arura haha urapape; are la ita rare El‐betela rare itavape, ehovea are akoreapo oaoka lei vivilape la hoa Aualari leia arero oropa ve hihika leipe. 8Debora, Rebeka ve kiva leipe uamari, leia apape. Ere arero Betela maeamaea ve havuhu eapapo aea ve ipi ve koru le ihape. Ere la ita rare Alona‐bakuta rare itavape.
9Iakobo Padana‐arama ve leia ve ekepe la hoa Aualari areve oropa ve aeka hihika leipe, kai arero lei morapaeape. 10Aualari arero maeape: “Ave rare va Iakobo; ma hoa ave la rare Iakobo kahara, ave rare ma hoa va Iseraela itavakilai.” Laelave areve rare va Iseraela rare itavape. 11Kahara, Aualari arero maeape: “Ara va Aualari Akea Iele; ave haela oaria iele leivahaeaki; a v'ila vilaipi aea vilaipipi oaria horeavakilai, kai a v'ila amua haela oaria kihoreavakilai. 12Ara Aberahamo i Isako ila avarape la ita ara aro avarakilai, ara kai ave meavohula kara la ita avarakilai.” 13Kahara, Aualari arero oharo kileape la ita ve le hakurepape. 14Are arero oharo maeape la ita, Iakobo pupu eharu urapape, la pupu eharu have ila: are au larive ma kakaitape, kai arero tehoro ila haroroape. 15Iakobo Aualari are i oharo hukavape la ita ve rare Betela rare itavape.
Rahela apape hari
16Kahara, ere Betela hakorepai hahi aupe; ere va Eparata perehekai apehai ve la hoa Rahela ero eavi ai epakive heraho eapapo leipe. 17Are heraho eapapo leipe la hoa, arero koarape la uamari maeape: “A oaoka kalailue; a va ma hoa akore ae epakilai.” 18Areve ove hakurepape la hoa (ehovea are apape) are arero rare Benoni rare itavape, aka oa va arero rare Beniamina rare itavape. 19Kahara, Rahela apape; ere arero Eparata la okiharo ve koru ihape (la va Betelehema). 20Iakobo areve kapu ita iki alalaki have urapape: are Rahela ve kapu ita ve have, ikiki ma hoa are aeavila. 21Iseraela aeka hahi leipe, are areve kovo uvi urapape ita va Edera la arari uvi ve oropaki ukai ve.
Iakobo ve akoremari
22Iseraela la ita aeape la hoa, Reubena areve oa ve horova mari Biliha uavape. Iseraela la oharo iapape. Kahara, Iakobo ve akoremari va 12 ila: 23Lea ve akoremari va Reubena (Iakobo ve akore koare), Simeona, Levi, Iuda, Isakara, i Sebulona ila. 24Rahela ve akoremari, Iosepa i Beniamina ila. 25Rahela ve horova mari Biliha, ve akoremari, Dana i Napatali ila. 26Lea ve horova mari, Silipa, ve akoremari va Gada i Asera ila. Ma va Iakobo ve Padana‐arama erape akoremari.
Isako apape hari
27Iakobo areve oa Isako Mamere ve leia, rare ae Kiriata‐areba, (o iele la va Heberona) Aberahamo i Isako ila overa leia kovo apearoape, la ita aupe. 28Kahara, Isako ve hitolo hoa va hitolo 180 ila. 29Isako ve ovokake karia leipe; are api karu le ihape, areva oalou maea iele, hitolo oaria ila. Areve akoremari Esau i Iakobo ila arero karu le ihape.
Pašlaik izvēlēts:
Genese 35: ORO
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Published by the British and Foreign Bible Society 1963-1972