John 13
13
1Wa o lakalaka o rowolagau gate noga tiqa, wa i Jesus we gilala ape masao qoŋina me wesu ilokenake, sin toa nan o marama iloke sur i Tamana, wa ni me tape ira tanun anana we toga alo marama iloke; wa ni we tape ineira gai niŋa o ulusui. 2Wa neira we ganagana, pa i Satan me map veta o nonomia ilo toqan i Judas Iskariot natun Simon si a maniriŋia. 3Wa i Jesus we gilala apen i Tamana me map veta o gene ŋaŋ ilo panena, wa ape ni me rowolue ma amen God, wa we mule kelu at sur God; 4wa ni me tavaraka nan o ganagana, ti map vitag non o siopa, ti taur o siopa maŋmaŋ, ti rotig kelua. 5Paso nan, ti liŋ siwo o pei ilo tapera, ti qeteg vasug naraŋora tiŋqoro, ti maŋ mun o siopa ilone me rotia ti nia. 6Wa ni we niŋa i Simon Peter tamaine. Naŋ neia ti vet munia wa, Lord, ka vasug naraŋok? 7Naŋ i Jesus ti valuia wa, Ko gate gilala tiqa ape gene nau we ge; pa ko te lolomaran aŋaisa apena. 8Naŋ i Peter ti vet munia wa, Ko tete vasug naraŋok ti tuai ti tuai. Naŋ i Jesus ti valui goroa wa, Si na qe tete vasug iniko, ko tete taur pul lai amenau. 9Naŋ i Simon Peter ti vet munia wa, Lord, pa nipea vires raŋok, pa napanek mulaŋ wa naqatuk. 10Naŋ i Jesus ti vet munia wa, Isei me sugsug nol veta, ni ta vasug naraŋona vires pa te wenewene nol; wa ikamiu we wenewene, nava ikamiu nol tagai. 11Ape ni me gilala veta i gene we maniriŋia; o manigiu ilone ni me vet wa, Kam gate wenewene nol.
12Wa ni me vasug paso naraŋora, ti taur mulaŋ non o siopa, ti risa mulaŋ, ti vava muneira wa, Kamiu we lolomaran si tagai ape ike na me ge mun kamiu? 13Kam we log nau was, Vatogo, wa, Lord: pa kam we vava mantag, ape nau tamaine. 14Pa si nau i Lord kamiu wa i Vatogo kamiu me vasug naraŋomiu, o pug avunamiu si kamiu a var vasvasug mulaŋ naraŋomiu. 15Ape nau me map mun kamiu o makaliu, si kamiu mulaŋ a ge tama na me ge ti mun kamiu. 16We nun, we nun, nau we vava mun kamiu wa, I rowrowovag gate liwoa nan i tagina, wa o sala nan i gene me suwarea at. 17Si kam qe gilala o gene ŋaŋ iloke, turwia kamiu si kam qe ge tataga. 18Nau gate vava apen kamiu nol; nau we gilala irasei nau me ilo rakatira; nava si o raverave a wesu wa, I gana o bread amenau me la kalo navulagena munau. 19Nan ilokenake nau we gaganag mun kamiu alo gate wesu tiqa, si kamiu a nomtup alo we wesu si inau iloke. 20We nun, we nun, nau we vava mun kamiu wa, Isei qe lav vasgot i gene nau we vatraŋia at we lav vasgot inau; wa isei qe lav vasgot inau we lav vasgot i gene me vatraŋ nau ma.
21I Jesus me vava paso tamaike, naatana me matikotiko, wa ni me gaganag lue, ti vet wa, We nun, we nun, nau we vava mun kamiu wa, I tuwale nan kamiu te maniriŋ inau. 22Wa ira tiŋqoro me varsagsagarag ineira, we nonom varuarua apena ni we vava apen sei. 23Wa i tuara tiŋqoro we risa ape ganagana vawo varan Jesus, i gene i Jesus me tapea. 24Wa i Simon Peter we qatmawui munia ti vet munia wa, Gaganag mun kamam, isei iloke ni we vava ape neia? 25I gene iloke we sale taragiate tamaine vawo varan Jesus, ti vava munia wa, Lord, isei? 26Naŋ i Jesus ti valui goro wa, Ineia ilone na te tuk munia o wotore sinaga, wa we la munia. Wa ni we tuk o wotore sinaga, ti la kalo, ti sueg vano mun Judas Iskariot, natun Simon. 27Naŋ ape kule wotore sinaga ilone, i Satan qara van pata ilo ineia. O manigiu ilone i Jesus we vava munia wa, Ka ge gaplot o gene ko we ge. 28Wa isei nan ragai we risa ape ganagana gate lolomaran ape manigiu o sava ni we vava munia. 29Ape o tuaniu we nonom, o manigiu i Judas we taur goro o taŋa som, i Jesus me vava munia wa, Ka wol o savasava nina we maros ran ape lakalaka; si, ni le o sava mun o tanun masara ŋaŋ. 30Wa ni me taur o wotore sinaga me tuk ti, pa ti kalolue gaplot at; wa me qoŋ silsil.
31Wa ni me kalo lue veta, i Jesus qara vava wa, Ilokenake i Nat tanun me ronoga, wa God me ronoga alo ineia. 32Wa God te ge ronoga ineia alo ineia kel, wa ni te ge ronoga gaplotua. 33Ra nanatuk, galewora ti na te qale toga amen kamiu. Kam te sike inau, wa tama na me vava veta munra ta Judea wa, Kamiu tete mule lai ilo vatine nau we van aia, nau we vava ilokenake mun kamiu tamaine. 34Nau we le mun kamiu o lea vatraŋ we garaqa, si kamiu a vartape kamiu; si kamiu a vartape kamiu tama inau me tape kamiu. 35Mun iloke o tanun ŋaŋ te ilo vaglala apen kamiu ira tiŋqoro anak, si kamiu qe vartape kamiu.
36Naŋ i Simon Peter ti vet munia wa, Lord, ko we van ivea? Naŋ i Jesus ti valuia wa, Ko tete tataga lai nau ilokenake ilo vatine nau we van aia, pa ko te tataga inau aŋaisa. 37Naŋ i Peter ti vet munia wa, Lord, apesava na tete tataga lai ko ilokenake? na te map naesuk siwo o manigiu iniko. 38Naŋ i Jesus ti valuia wa, Ko te map naesuma siwo o manigiu inau? We nun, we nun, nau we vava muniko wa, O toa gate kokorako tiqa ko gai tala inau vagatol.
Pašlaik izvēlēts:
John 13: MOTA
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Testament was published by the British and Foreign Bible Society in 1931.