John 12
12
1Wa o qoŋ laveatea ti o rowolagau, wa i Jesus we mule a Bethania, wa i Lasarus aia, i gene ilone i Jesus me ge raka kelua nan ra mate. 2Wa neira we ge o ganagana ravrav munia aia, wa i Martha me lapasag, pa i Lasarus o tuanira we pute tuwale amaia. 3Wa i Meri me taur o urai we tirotiroga, o gene tun, ti nonon naraŋon Jesus nia, ti maŋ naraŋona mun nauluna, wa o ima we uravag o pune nonon. 4Naŋ i tuara nanra tiŋqoro anana, i Judas Iskariot, iloke gina te maniriŋia, ti vet wa, 5Ape sava gate wol o urai iloke mun o pene melnol vagatol, wa me la munra tanun masara? 6Pa ni me vava tamaike, pa gate ape ni we nonom aneane ape tanun masara ŋaŋ, panava ape neia i palu, wa o taŋa som amaia, wa ni we vilevile o sava me map ti alolona. 7Naŋ i Jesus wa, Ka ukegia, ni me matagisgis goro o ike ape qoŋ te tavig nau alolona. 8Ape o masara ŋaŋ we toga vagae amen kamiu, nava inau na gate toga vagae amen kamiu.
9Wa o sul liwoa tamaira ta Judea we gilala si neia aia: wa neira we mule ma, pa gate manigiu i Jesus magesena, pa o manigiu mulaŋ si neira ilo lai i Lasarus ni me ge raka kelua ti nan ra mate. 10Nava ira oloolo liwoa me varsikesike si neira ge mate mulaŋ i Lasarus. 11Apenra ta Judea we qoqo me vanreag, wa we nomtup i Jesus o manigiu ineia.
12Tavala maran o sul tar me mule ma ti ape lakalaka, we roŋotag apen Jesus si ni we mule i Jerusalem; 13we la o no metigtig ŋaŋ we rowolue at si a varniŋa ineia, we awoawo wa, Hosana; tur wievavae i gene we mule ma alo sasan Lord, i maranaga nora Israel. 14Wa i Jesus we ilo suar o nat ass ti pute avunana, tama me rave wa, 15Nipea gogogolo, nat Sion, tavine; ilo ma, nom o maranaga we mule ma, we pute avune nat ass. 16Wa ira tiŋqoro anana gate gilala amoa ape gene ŋaŋ iloke; nava i Jesus me ronoga veta, wa neira qara nom kel ape gene ŋaŋ iloke si me rave ti we tuai apeneia, wa ape neira me gege ineia ti tamaine. 17Wa neira o sul me gaganag we tira ape neia, iragai nane me toga ti amaia alo ni me log lue i Lasarus nan o qaraŋa, we ge raka kelua nan ra mate. 18O manigiu o ine mulaŋ o sul me rowolue we varniŋa ineia, ape neira me roŋotag ti ape ni me ge o vaglala iloke. 19Naŋ ira Pharise me varvava wa, Kamiu we ilo vaglala si kamiu gate ge lai o sava tea: ilo, o marama nol me qet suria.
20Pa o tuaniu ta Grekia tamairagai me kalo ma si a tataro ape lakalaka; 21ineira iloke we mule sur i Philip ta Bethsaida a Galilea, we paere munia wa, Gai, kamam we maros we ilo i Jesus. 22I Philip me mule, ti vava mun Andrew, wa i Andrew we mule tana i Philip, we vava mun Jesus. 23Naŋ i Jesus ti valui rara wa, Me wesu o masao qoŋ si i Nat tanun te ronoga alolona. 24We nun, we nun, nau we vava mun kamiu wa, O wo korn ta tete masu ilo tano, ta tete mate, te toga magesena; panava ni ta mate, te ge o woai we tar. 25Isei qe tape naesuna te ge tagea, wa isei qe ŋustup naesuna alo marama iloke te matagisgis goro ilo esu galava. 26Isei qe rowrowovag munau, ni tataga inau; wa nau ta avea, i rowrowovag anak te aia mulaŋ; isei qe rowrowovag munau, o Mama te nom mava ineia. 27Ilokenake naesuk we matiko; wa na te vava o sava? Mama, vaesu nau nan o masao qoŋ iloke. Nava o manigiu iloke nau me niŋa o masao qoŋ iloke apena. 28Mama, ka ge ronoga nasasama. Wa o liŋai ti rowolue ma avunana wa, Nau me ge ronoga veta, wa na te ge ronoga mulaŋ. 29Wa o sul we tira arivtag we roŋotag, we vava si o manu me nuŋnuŋ; naŋ o tuaniu wa, O angel we vava munia. 30Naŋ i Jesus ti valuira wa, O liŋai iloke gate rowolue ma apenau, nava apen kamiu. 31Ilokenake we veveg o marama iloke; ilokenake te savrag reag i maranaga talo marama iloke. 32Wa inau, si qe la raka inau nan o tano, na te ramo qet ma o tanun ŋaŋ sur nau. 33Ni me vava tamaike, wa ni me vaglala o matea ni te mate gasavai nia. 34Naŋ o sul we valui goroa wa, Kamam me roŋotag alo lea si i Christ te toga galava; pa ko we vava tama avea wa si, Te la raka ran i Nat tanun? Isei i Nat tanun iloke? 35Naŋ i Jesus ti vet muneira wa, Galewora ti o marmararan te qale toga amen kamiu; tur mulemule alo o marmararan qale toga amen kamiu, o silsiliga wa gara goro ikamiu; wa isei we mulemule alo silsiliga gate gilala sin van ivea. 36Alo o marmararan qale toga amen kamiu, tur nomtup o marmararan, si kamiu a qeteg nat marmararan apena. I Jesus me vava paso tamaike, qara toa, ti suspata naneira.
37Wa ni me ge o vaglala ŋaŋ we qoqo tamaine alo nagora, pa neira gate nomtupua; 38o manigiu sin wesu o vavae mon Isaia i prophet, we vet wa,
Lord, isei we nomtup nomam o roro vavae?
Wa napanen Lord me sere lue ma mun sei?
39O manigiu ilone ineira gate nomtup lai; apen i Isaia me vava mulaŋ wa,
40Ni me ge pei namatara,
Wa ni me ge wasvat natoqara,
Nan neira wa ilo mun namatara, nan wa nom vaglala mun natoqara,
Nan neira wa vusiag kel,
Wa na qara ge esura.
41Isaia me vava tamaine ape ni me ilo naleŋasina, wa ni me vava ape neia. 42Panava we qoqo amaira moai goro me nomtupua, pa neira gate gaganag lue, o manigiu ira Pharise, wa vure neira nan o ima siwo tuwale. 43Ape neira me maros o sotaliva nora tanun nan o sotaliva non God.
44Naŋ i Jesus ti vava eleele ti vet wa, Isei qe nomtup nau, ni gate nomtup nau, pa ni we nomtup i gene me vatraŋ nau ma. 45Wa isei qe sagarag nau, ni we sagarag i gene me vatraŋ nau ma. 46Na me mule ma o marmararan ilo marama, si isei qe nomtup inau tete toga alo silsiliga. 47Wa si isei qe roŋotag mok o vavae pa ni gate kokor goro, nau gate vevegia; ape na gate van ma si a veveg o marama, panava si a ge esu o marama. 48Isei qe gevtag nau, qe tete taur mok o vavae, apena nake te vevegia; o vavae na me vava, ilone nane te vevegia alo paspasoane qoŋ. 49O manigiu na gate vava matapuk; nava o Mama me vatraŋ nau ma, ni me le ma munau o lea ape savasava ŋaŋ na te vava, wa na te log apena. 50Wa nau we gilala ape mon o lea si o esu galava nane; o manigiu o ine o savasava nau we vava, tama o Mama me vet ti mun nau, nau we vava mok tamaine.
Pašlaik izvēlēts:
John 12: MOTA
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Testament was published by the British and Foreign Bible Society in 1931.