मत्ती 20
20
अंगूर कै बागो कै मोजदूरो का उदारण
1“स्वर्ग का राज्य ऐसी ऐकी उदारण साए औसौ, ऐक जीमदार जू झीशीं दा बायरै हौटा, औरौ आपणै अंगूरो कै बागो दै मजदूर कै काम कौरदै लाए। 2औरौ तैणै मोजदूरो खै ऐकी दूसौ कै धियाड़ै कौरणौ कै बारै दै बात कौरे, औरौ तिनुखै आपणै अंगूरो कै बागो दै भैजै दिए। 3झीशो नोई बौजै औटेयौ बायरै हौटा औरौ तैणै तिथै कै किछै मोजदूरो कै ऐशैखैई बैकार खौड़ै दैखैयो, 4तिनुखै बौल़ौ, ‘की तुऐं बै अंगूरो कै बागो दै जांव, औरौ जू किछै ठीक हौल़ौ, सै तुऔं खै दैंदा।’ तोबै सैजै बै काम कौरदै हौटै। 5तोबै सै दोफारी कै बारौ बोजे औरौ होजो लमसम ती बौजै बायरै हौटा औरौ तैशैकैई कौरौ। 6औरौ लमसम बैल़खै कै पाँची बौजै हौजौ ओकी मजदूरो खै खौड़ै दैखै, औरौ तिनुखै बौल़ौ, ‘तुऐं दूस भोरै किथुखै बैकार दै खौड़ै रौंव?’ तिनुऐ तैसीखै बौल़ौ, ‘इथकारिए की कुणिए बै आमुखै धियाड़ी पांदी नी लांव।’ 7तैणै तिनुखै बौल़ौ, ‘तुऐं बै अंगूरो कै बागो दै जांव औरौ काम कौरौ।’ ”
8“बैल़खै अंगूरो कै बाग कै स्वामीए आपणै भण्डारी खै बौल़ौ, ‘मजदूरो खै बोइदो जू झीशो औरौ जू बैल़खै कै काम कौरणौ कारिए बौएदै राए थिए, तिनु सौबी कै धियाड़ी दैय दैंव।’ 9जोबै सै आए, जू बैल़खै पाँची बौजै काम कौरणौ लाए राए थिए, तौ तिनुकै पूरै दूसौ कै धियाड़ी भैटी। 10जू झीशो आए रौवै थिए, तिनुऐ जाणौ कै आमु जादा भेटदो; पौरौ तिनुकै ऐकी दूसौ कै धियाड़ी भैटी। 11जोबै तिनकै धियाड़ी भैटी, तौ सै अंगूर कै बाग कै जीमदार पांदी बड़बड़ायो बौलदै लागै, 12‘इनु जिनुवै पाछैदा ऐकैई घंटा काम कौरा, औरौ आमै जिनुवै तैज गर्मी दै बैजाए मैहनत कौरेयौ काम कौरा तुऐं तिनु बै अमारै बराबर धियाड़ै दै।’ 13जमीदारे तिनु मुंजीदा ऐकी खै जोवाब दिया, ‘की ओए रै दोस्त, मोऐं तोंवारै साथै किछै बै अन्याय ना कौरे रैई; का तुऔं पूरै दूस काम कौरणौ कारिए मोऐं पूरै ऐकी दूसौ कै धियाड़ी ना दी? 14जू तैरै धियाड़ी औसौ, तियौं ऊबै टीप औरौ आगु जा; मैरै इछा ऐजै औसौ कै जैतरो ताखै दैय राए, तैतरो ही ऐसी पाछलै काम कौरणौवाल़ै कै बै दियु। 15मुंआ ऐजा औधिकार औसौ कै हांव आपणै पौयसै शै जू कौरणौ चोऊं, सै कौरु? तुऔं खै मैरै साथै ज़लन ना राखणै चैंई कै हांव दया शै दियु?’ 16ऐशैखै जू इबी पाछलै औसौ सै औगौड़ियौ कौरे जांदै, औरौ जू आपी खै औगौड़ियौ सौमझौ सै पाछलै सौमझै जांदै।”
आपणी मौत औरौ जियुंदी हौणौ कै बारै मुंजी औटेयौ बौताणौ
(मर 10:32-34; लूका 18:31-34)
17यीशु यरूशलेम शहर खै जांदै बैई बारौ चैलै खै शुनशान जौगैह दै लोए गौआ, औरौ बाटो पुंडु तिनुखै बौलदा लागा। 18“शुणौ, आमै यरूशलेम शहर खै जांदै, औरौ हांव आदमी का बैटा मुख्य यहूदी पुरोहित औरौ यहूदी शास्त्री कै हाथौ दा थोम्बाए जांदा, औरौ सै मुखै मारणौ कै सौजा दैलै, 19औरौ मुखै बैगानै यहूदी कै हाथौ दै सोंपदै। औरौ मैरा मोजाक ऊड़ालै, औरौ कौड़ै मारले, औरौ क्रूस पांदी चौढ़ाल़ै, औरौ हांव ती दूसौ दा जियुंदी हौए जांदा।”
ऐकी माँ कै आपणै नानड़िया कारिए हाएड़ै कौरणै
(मर 10:35-45)
20तोबै जब्दी कै बैटै कै माँ आपणै बैटै कै साथै तैसकै धोरे आयौ तैसीखै प्रणाम कौरा, औरौ तैसी कैईंदु किछै मांगदै लागै। 21तैणै तियौंखै बौल़ौ, “तू का चांए?” तियैं यीशु खै ऐजौ बौल़ौ, “कै मैरै ऐजै दो बैटै ऐक तैरै राज्य दै ऐक तैरै सोऐं औरौ ऐक तैरै डैरै ढौबौ बौठौ।” 22यीशुए तियौंखै जोवाब दिया, “तुऐं ना जाणौ कै का मांगै लो? का तुऐं दुख झैल़णौ कै तैयार औसौ जू दुख हांव झैल़णौ पांदी औसौ, का तुऐं पी सौकौ?” तिनुऐ तैसीकै बौल़ौ, “हौर आमै झैल सौकु।” 23यीशुए तिनुखै बौल़ौ, “तुऐं दुख तौ झैलै सौकौ पौरौ आपणै सोऐं औरौ डैरै ढौबौ बोठाल़णा मैरा काम ना आथी पौरौ मैरै बापूए जू जौगैह तिनु कारिए तैयार कौरे राए सैजै तिनु कारिए औसौ।” 24ऐजौ शोणेयो दस चैलै तिनु दु भाईयों पांदी गुस्से होवे। 25यीशुए तिनुखै उंढे बौएदैयौ बौल़ौ, “तुऐं जाणौए की, सैजै जू बैगानै यहूदी लोगौ मुंजी आपी खै राजाओं कै भैषो दै मानै जांदै, औरौ तिनुकै दबायो राखौ औरौ तिनकै बौड़ै औधिकारी तिनु पांदी आपणा औधिकार चोलांव। 26पौरौ तुऔं मुंजी ऐशै ना हौणौ चैंई; जै कुणिए तुऔं मुंजी बौड़ा बौणणा चांव, सै सौबिका सेवक बौणौ। 27औरौ जू कुणिए तुऔं मुंजीदा प्रधान हौणा चांव, सै तोंवारा गुलाम बोणला। 28जैशैकै हांव आदमी का बैटा ओकी कै सेवा कौरणौ कारिए इयौं दुनिया दा आए रौआ। हांव इथकारिए ना आए रैई कै औकै लोग मैरी सेवा कौरौ, हांव कैई लोगौ कै तिनकै पापौ शै छुड़ाणो कारिए मौरणौ कै आए रौआ।”
दु आन्धै कै देखिणो का दाण
(मर 10:46-52; लूका 18:35-43)
29जोबै सै यरीहो शहर पोरदै निकल़दै लागै रौवै थिए, तोबै ऐक बैजाए बौड़ै भीड़ तैसकै पाछैदै हौए गौए। 30औरौ दो आन्धै, जू शोड़कै कै किनारे बौठै रौवै थिए, ऐजौ शौणैबा की यीशु जांदा लागै रौआ, जोर सै बौलदै लागै; कै “ओए रै दाऊद कै वंश, आमु पांदी दया कौर।” 31औरौ लोगै तिनुखै ताडै़, कै चुपी रौंव, पौरौ तिनुऐ हौजौ बै जोर सै बौल़ौ, “ओए रै दाऊद कै वंश आमु पांदी दया कौर।” 32तोबै यीशुए खौलेयौ, तिनुखै बौईदै, औरौ बौल़ौ, “तुऐं का चांव कै हांव तुऔं कारिए कौरु?” 33तिनुऐ तैसीखै बौल़ौ, “ओए रै प्रभु; ऐजौ कै अमारी आखी ठीक हौए जांव।” 34यीशुए तरस खाएयो तिनकी आखी छूंई, औरौ सै तौलोंई दैखदै लागै; औरौ तैसकै साथै हौटै गौवै।
Pašlaik izvēlēts:
मत्ती 20: SRXNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.