मत्ती 21
21
यीशु का यरूशलेम शहर दा आणा
(मर 11:1-11; लूका 19:28-38; युहन्ना 12:12-19)
1जोबै यीशु औरौ तैसकै चैलै यरूशलेम शहर कै नेड़िक पोऊंचे औरौ जैतून धारो पांदी बैतफगे गांव कै धोरे आए, तोबै यीशुए दु चैलै खै ऐजौ बौलेयौ भैजै। 2“कै आपणै सामणै कै गांव दै जांव, औरौ तिथै पोहचेबा तुऔं खै ऐक गोधी बानेयोंदे भैटदै, औरौ तियांरै साथै गाधडू तुऔं खै भेटलो; तिनु खोलेबा मैरै धोरे लांव। 3जै तुऔं कैईंदु कुणिए किछै पुछलै, तौ बौलेया, प्रभु खै इनकी जौरुरत औसौ, तोबै सै तावल़ै तिनु भैजै दैला।” 4ऐजौ इथकारिए हौं, कै जू वचन पौरमेशवर कै बातौ बौताणौवाल़ै कै दवारा बौल़ै राए थिया, सै पूरा हौंव:
5“सिय्योन की बैटी खै बौल़ौ,
‘दैख, तैरा राजा तैरै धोरे आन्दा लागै रौआ;
सै नम्र औसौ औरौ सै गाधड़ू पांदी बौठै रौआ;
यानी गोधी कै गाधडू पांदी।’”
6चैलै जाऐबा, जैशैखै यीशुए तिनुखै बौल़ै राखौ थियु; तैशैखैई तिनुऐ कियु। 7औरौ तिनुऐ गोधी औरौ गाधडू खै यीशु कै धोरे लियोऊवे औरौ तिनु पांदी आपणै खोटणो पाए, औरौ यीशु तिथपांदी बौठै गौआ। 8औरौ बौहितै लोगै यीशु कै आदर दैणौ कारिए बाटो पुंडे आपणै खोटणो बिछाए औरौ कैई लोगै खेतौ की डाल़ी काटैयौ बाटो पुंडी बिछाई। 9औरौ जू भीड़ औगौड़ियौ-औगौड़ियौ जांव थी, औरौ पाछै-पाछैदै हांडो थी, सै जोर-जोर शै बौल़ौ थी, “दाऊद कै वंश कै बौड़ाए हौंव, धन्य औसौ सैजै जू प्रभु कै औधिकार शै आंव। पौरमेशवर कै बौड़ाए हौंव जू स्वर्ग दा रौंव।” 10जोबै यीशु यरूशलेम शहर दा पोंहिचा, तौ पूरै शहर दै हलचल मोचै गौए; औरौ लोग बौलदै लागै, “ऐजा कुण औसौ?” 11लोगै बौल़ौ, “ऐजा गलील जिले कै नासरत गांव का पौरमेशवर कै बातौ बौताणौवाल़ा यीशु औसौ।”
मन्दिरो पौरैशै व्यापारियों कै आगु गाड़णै
(मर 11:15-19; लूका 19:45-48; युहन्ना 2:13-22)
12यीशु पौरमेशवर कै मन्दिरो दा जायौ, तिनु सौबी खै, जू चीज़ौ औरौ गोरु कै बल़ि कारिए खोरिदणो औरौ बैचणो कै काम कौरौ थिए। तैणै तिनु लोगौ कै मेजो कै जू पौयसै बौदलौ थिए, औरौ कबूतर बिकणौवाल़ै कै मेजो कै पोलटै दियै। 13औरौ तिनु बौल़ौ, “पवित्र शास्त्र दो लैखै राए; ‘मैरौ घोर प्रार्थना को घोर बौल़ै जांव’ पौरौ तुऐं तिथुकै डाकुओं लैई भोरेयोंदे गुफा बौणांव।” 14औरौ आन्धै औरौ लोंगड़े खै, मन्दिर कै धोरे लाए, औरौ तैणै तिनुखै ठीक कौरे। 15पौरौ जोबै मुख्य यहूदी पुरोहिते औरौ यहूदी शास्त्रीए इनु अनौखै कामौ कै, जू तैणै कौरे, औरौ भैईयै खै मन्दिर दै दाऊद कै सन्तान खै बौड़ाए बौलदै बैई शौणै, तौ गुस्से हौयौ, 16तैसीखै बौलदै लागै, “का तू शुणै कै ऐजै का बौल़ौ?” यीशुए तिनुखै बौल़ौ, “हां, का तुऐं ऐजौ कौलोंई ना पौढ़ै रैई की, ‘तुऐं बालकों औरौ दूध पींदै नानड़िया कै जातै लैई बौड़ाए सिद्ध कौराए?’ ” 17तोबै सै तिनु छोडे़बा नगर कै बायरै बैतनिय्याह गांव खै हौटा, औरौ तिथै रात बिताऐ।
अंजीर कै डाल़ो पौरैशी शिक्षा
(मर 11:12-14,20-24)
18औरौ जोबै सै झीशो बैतनिय्याह गांव शै यरूशलेम शहर कै पाछु जांदा लागै रौआ थिया, तौ तैसीखै भूख लागै। 19औरौ अंजीर का ऐक डाल़ शोड़कै कै किनारे दैखैयो सै तिथकै धोरे हौटा, औरौ पात छोड़ेबा तिंदु किछै ना भैटणौ की बौजैह शै तैसी डाल़ो खै बौल़ौ, “ऐलो दै ऊबै तांव दै हौजौ कौलोंई फल़ ना लागदै।” औरौ अंजीरो का डाल़ तौलोंई शोकै गौआ। 20इथु दैखैयो चैलै हैरान हौए गौवै, औरौ बौल़ौ, “ऐजा अंजीरो का डाल़ ऐतरा शट कैशै शोकै गौआ?” 21यीशुए तिनुखै जोवाब दिया, “हांव तुऔं खै साचौ बुलू; कै जै तुऐं बिशवाश राखलै, औरौ शक ना कौरौ; ना तौ तुऐं सिरफ ऐजौ कौरदै, जू ऐसी अंजीर कै डाल़ो आरी कौरे राए; पौरौ जै इयौं धारो कै बै बौलल़ै, की ओकशै जा, औरौ समुन्द्रो दो हौटै जा तौ ऐजौ बै हौए जांदो। 22औरौ जू किछै तुऐं प्रार्थना मुंजी बिशवाश सै मांगलै सैजौ सौबै तुऔं खै भैटी जांदो।”
यहूदी नेताओं का यीशु कै औधिकारो पांदी शक
(मर 11:27-33; लूका 20:1-8)
23तैणै मन्दिरो दा जाऐबा उपदैश दैय लौआ थिया, तौ मुख्य यहूदी पुरोहित औरौ यहूदी शास्त्री औरौ बुड़ेईक तैसकै धोरे आयौ पूछदै लागै, “की तू ऐजै काम कोसी औधिकार शै कौरे? औरौ ताखै ऐजा औधिकार कुणै दैय राए?” 24यीशुए तिनुखै जोवाब दिया, “हांव बै तुऔं कैईंदै ऐक बात पूछु, जै तुऐं मुखै बोताल़ै, तौ हांव तुऔं खै बौतौऊंबा कै ऐजै काम कोसी औधिकार शै कौरु। 25जोबै यूहन्नाए लोगौ खै बपतिस्मा दिया, तौ तैसीखै ऐजा कौरणौ का औधिकार पौरमेशवरे दिया, या लोगै।” तोबै सै आपी मुंजी चौर्चा कौरदै लागै कै, “जै आमै जोवाब दियु, ‘स्वर्गो कै ढौबौशै,’ तौ सै आमु बौलला, ‘कै तुऐं तैसका बिशवाश किथुखै ना कौरी?’ 26औरौ जै आमु बुलूबे, ‘ऐजा औधिकार आदमियों कै ढौबौशै’ तौ आमुखै भीड़ का डौर औसौ, जिथुखै सौबै लोग यूहन्ना खै पौरमेशवर कै बातौ बौताणौवाल़ा मानौ थिए।” 27तिनुऐ यीशु खै जोवाब दिया, “आमै ना जाणु।” यीशुए बै तिनुखै बौल़ौ, “हांव बै तुऔं खै ना बौतांदा कै ऐजै काम कोसी औधिकार शै कौरु।”
दो बैटौ का उदारण
28“तुऐं ऐसी उदारण लैई का सौमझौ? कोसी आदमी कै दो बैटै थिए; तैणै आगलै कै धोरे जाऐबा बौल़ौ; ‘ओए रै बैटा ऐलो अंगूरो कै बागो दा काम कौर।’ 29तैणै जोवाब दिया, ‘हांव नै जांदा,’ पौरौ बाद मै पौछताएयो आगु हौटा। 30तोबै ओकी कैंई जाऐबा ऐशैखैई बौल़ौ, तैणै जोवाब दिया, ‘की ठीक औसौ हांव जांदाए,’ पौरौ हुटी ना। 31इनु दु मुंजीदै कुणै पिता कै इछा पूरै कौरी?” तिनुऐ बौल़ौ, “आगलै।” यीशुए तिनुखै बौल़ौ, “हांव तुऔं खै साचौ बुलू, की महसूल लोणो वाल़ै औरौ वेश्या तुऔं दै आगै पौरमेशवर कै राज्य दै प्रवेश कौरदै। 32जिथु यूहन्ना बपतिस्मा दाताए तुऔं खै बौतौऊं कै कैशैखै सोही ढंग शै जीणु चैंई, औरौ तुऐं तैसी पांदी बिशवाश ना कौरी, पौरौ मामला लोणो वाल़ै औरौ वेश्याए पाप कौरणै छोड़े दिए: औरौ तुऐं इथु दैखैयो बै पोछतैई ना, कै तैसका बिशवाश कौर पांदै।”
दुष्ट किसानो का उदारण
(मर 12:1-12; लूका 20:9-19)
33“ऐक ओका उदारण शुणौ ऐक जीमदार थिया, जैणै अंगूरो का बाग लाया, औरौ तिथकै चोऊ ढौबौ खै बाड़ा बानै दिया, औरौ रोसौ का कुण्ड खुणा, औरौ तोबै बाड़ बानी; औरौ किसानो खै तिथकै ओधयाल़ी देएबा प्रदेश हौटै गौआ। 34जोबै फल़ का सौमय नेड़िक आए गौआ, तौ तैणै आपणै दासो खै तैसका हिस्सा लाणौ कारिए किसानो कै धोरे छाड़ै। 35पौरौ किसाने तैसकै नोकरो खै पाकड़ैबा कोसी खै पिटै औरौ कोसी खै मारै दियै, औरौ कोसी पांदी पाथर मारेयों मारै दियै। 36तोबै खेतौ कै मालिकै ओकी नोकरो कै छाड़ै, जू आगै दै जादा थिए; पौरौ तिनुऐ तिनुआरी बै तैशैखैई कियु। 37औरौ आखिर दा तैणै आपणै बैटै कै ऐजौ बौलेबा तिनकै धोरे छाड़ा; कै सै मैरै बैटै कै इज्जत कौरलै। 38पौरौ किसाने बैटै दैखैयो आपी मुंजी बौल़ौ, ‘ऐजा ही तौ वारिस औसौ, चालौ, आमै ऐसीखै बै मारै दियुंबे: औरौ ऐसकै जमीन-जायदात अमारै हौए जालै।’ 39औरौ तिनुऐ तैसीखै पाकड़ा औरौ अंगूरो कै खेतौ कै बायरै लाएबा मारै दिया।
40इथकारिए जोबै अंगूरो कै खेतौ का मालिक आला, तौ तिनु किसानो कै साथै का हौंदौ?” 41तिनुऐ तैसीखै बौल़ौ, “सै तिनु बुरै लोगौ खै बुरी तरह शै मारै दैंदा, औरौ अंगूरो कै खेती कै ओधियाल़े ओकी किसानो खै दैंदा, जू सौमय पांदी तैसीखै ओधियाल़े दैलै।” 42यीशुए तिनुखै बौल़ौ, “का तुऐं पवित्र शास्त्र दौ ऐजौ ना पौढ़ै रैई कै:
‘जैसी पाथरो कै मिस्रिए फेरकाए दिया थिया,
सैजा पाथर चट्टान बौणै गौआ;
पौरमेशवरे ऐजौ कियु, जू तैणै कौरे राए
तियौं बातौ पांदी आमै बौहितै हैरान हुवे।’”
43“हांव तुऔं खै बुलू, की पौरमेशवर का राज्य तुऔं कैईंदा आगु कौरदै, औरौ तिनु सौबी देशो कै लोगौ खै दैय दैंदै जू तैसकी मानौए। 44जू ऐसी पाथरो पांदी रिड़लु सै चकनाचूर हौए जांदो, औरौ जिथपांदी सै रिड़ल़ा, तिथुखै पिशै दैंदा।” 45मुख्य यहूदी पुरोहित औरौ फरीसी लोग यीशु कै उदारण खै शुणैबा सौमझै गौवै, की ऐजौ अमारै बारै मुंजी बौल़ौ। 46औरौ तिनुऐ तैसीखै पाकड़णा चोऊवा, पौरौ लोगौ दै डौरो थिए, जिथुखै सै तैसीखै पौरमेशवर कै बातौ बौताणौवाल़ा जाणौ थिए।
Pašlaik izvēlēts:
मत्ती 21: SRXNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.