ഓഗന്നാ് 4
4
ഏസുമ് സമര്യക്കാറിസിമ്
1ഏസു ഓഗന്നാന ബ്‌ഡ മൊത്തന ആള്‌ഗണ തന്ന് സൊല്ലുപഡി ണഡാക്കവാര് ആക്കികൊണ്ട്‌മ് തണ്ണിക്ക് മുളുഗിസികൊണ്ട്‌മ് ഇര്‌ക്കാ് എന്ത് പരിസലാക്ക് സേദി കെ്ഡേത്ത്‌ദ് എന്ത് ഏസുക്ക് തെരിന്ത്‌ദ്. 2(തന്ന് സൊല്ലുപഡി ണഡാക്കവാര്‌ത്തെ തണ്ണിക്കെ മുളുഗിസിനാദ് ഏസു ആര്‌ണാമ് തണ്ണിക്കെ മുളുഗ്‌സാലെ.) 3അച്ചെ ആള്‌ഗ തനാണ പറ്റി സൊല്ലുറാദ്‌ണ കേ്ട്ട്, ഏസു എഗുദ ണാഡിലിര്‌ന്ത് പിന്നേമ് ഗെലീലെ ണാഡ്‌ക്ക് താനെ പോനാ്.
4ആന ഏസുക്ക് സമര്യ ണാഡ് മേലെ പോയെ പറ്റു എന്താറ്റ്. 5അച്ചെ അവാ് പോയി പോയി സമര്യ ണാഡില്യ സുഗാറ് എങ്ക പട്ടണാത്തിലി ആക്കോവു തന്ന് മഗാ് ഓസേപ്‌ക്ക് കൊഡുത്ത ഗദ്ദെ അര്‌ഗെ എജ്ജിനാ്. 6അദിലി ആക്കോവു ബെ്ട്ടിന ഒരു കെ്ണേ്റ് ഇര്‌ന്ത്‌ദ്. ഏസു ണഡാന്ത് സോറ്റു അയ്യി കെ്ണേ്റ് അര്‌ഗെ പോയി കുക്കാന്താ്. അക്കുളെ ണേര മദ്ദേന ആയിര്‌ന്തിര്‌ക്കു.
7അയ്യി ഗള്യേലിതാനെ ഒരു സമര്യക്കാറിസിമ് അദ്‌ക്കെ തണ്ണിക്ക് ബന്ത. അവാണ ഏസു: <<എനാക്ക് ലേസ കുഡിക്ക്യ തണ്ണി താ>> എന്ത് കേ്ട്ടാ്. 8(ഏസുദ് സൊല്ലുപഡി ണഡാക്കവാര് അയ്യി ഗള്യേലി സാപാഡ് ബാങ്കി ബര്യ പട്ടണാക്ക് പോയിര്‌ന്താര്.)
9അക്കുളെ സമര്യക്കാറിസി: <<ണീ ഒരു എഗുദാന്‌മ്, ണാന് ഒരു സമര്യക്കാറിസ്യാന പൊമ്പുളേമ്. പിന്നെച്ചെ ണീ എന്നോഡെ തണ്ണി കുഡിക്ക്യ കേ്ക്കുവെ?>> എന്ത് ഏസുണ കേ്ട്ട. (എഗുദാര്‌ഗാമ് സമര്യക്കാറാര്‌മ് ആങ്കീങ്ക് ഒരു ഉറാവുമില്ലെ.)
10അദ്‌ക്ക് ഏസു: <<സാമി തര ദാന എന്തായെന്റ്‌മ് ണിന്നോഡെ കുഡിക്ക്യ കേ്ക്കവാ് ആര് എന്ത്‌മ് ണിനാക്ക് തെര്യ. അച്ചെ തെരിന്തിര്‌ന്ത, ണീ അവാന കേ്ട്ടിര്‌ക്കുവെ. അവാ് ണിനാക്ക് ഉജുറു തര തണ്ണിന തന്തിര്‌ക്കുവാ്>> എന്ത് ബദ്‌ള് സൊന്നാ്.
11അക്കുളെ അവ: <<പണ്ണാഡ്യെ, ണിന്നോഡെ തണ്ണി എ്ഡ്‌ക്ക്യ പാത്ത്‌റാമില്ലെ. കെ്ണേ്റ്‌മ് ഉജാര. പിന്നെ ണിനാക്ക് ഏദിലിര്‌ന്ത് ഉജുറു തര തണ്ണി കെ്ഡേക്കു? 12ണീ ണമ്മ് പാട്ടാ് ആക്കോവുണ ബ്‌ഡ ബെല്ല്യവാന? അയാള്‌ത്തെ എമാക്ക് ഈ കെ്ണേ്റ്‌ണ തന്താദ്. അയാള്‌മ് അയാള്‌ദ് മക്കഗാമ് അയാള് സാക്കിര്‌ന്ത ബേ്ണ്ട്‌ഗാമ് ഈ കെ്ണേ്റിലിര്‌ന്ത്‌ത്തെ തണ്ണി കുഡിത്തിര്‌ന്താദ്>> എന്ത് സൊന്ന.
13ഏസു അവാള്‌ക്കെ: <<ഈ തണ്ണിന കുഡിക്കവാര്‌ക്കെല്ല പിന്നേമ് തണ്ണിബേ്ക്കു. 14ആന ണാന് കൊഡുക്ക തണ്ണിന കുഡിക്കവാന്‌ക്ക് പിന്നെ എപ്പേക്ക്‌മ് തണ്ണിബേ്ക്കാഗെമാട്ട. അയ്യി തണ്ണി അവാന്‌ദ് ഉള്ളുക്കിര്‌ന്ത് ഉറാവെ ആയി ബന്ത് എപ്പേക്ക്‌മ് ഇര്‌ക്ക പെ്ളേപ്പ് തര പട്ട്‌ക്കെ എ്ഡ്‌ത്ത് പോയി എജ്ജ്‌സു>> എന്ത് ബദ്‌ള് സൊന്നാ്.
15അക്കുളെ അവ ഏസുക്കെ: <<പണ്ണാഡ്യെ, എനാക്ക് തണ്ണിബേ്ക്കാദെ ഇര്‌ക്ക്യാമ് ണാന് തണ്ണി എ്ഡ്‌ക്ക്യ ഇമ്മാട്ട് ബരാദെ ഇര്‌ക്ക്യാമ് അയ്യി തണ്ണി എനാക്ക്‌മ് തരുഡൊ>> എന്ത് സൊന്ന.
16ഏസു അവാള്‌ക്കെ: <<ണീ പോയി ണിന്ന് ആളാ്നാമ് കൂട്ടി ബാ>> എന്ത് സൊന്നാ്.
17<<എനാക്ക് ആളാ് ഇല്ലെ>> എന്ത് അവ ഏസുക്കെ സൊന്ന.
അക്കുളെ ഏസു സൊന്നാ്: <<ണിനാക്ക് ആളാ് ഇല്ലെ എന്ത് ണീ സൊന്നാദ് ണേര്‌ത്തെ. 18എന്ത്‌ക്കെന്റ ണീ അഞ്ച് ആളാ്ലണ എ്ഡ്‌ത്തിര്‌ന്തെ, ആന ഇപ്പിര്‌ക്കവാ് ണിന്ന് ആളാ്ന്‌മ് അല്ല. ണീ സൊന്നാദെല്ല ണേര്‌ത്തെ.>>
19അവ ഏസുക്കെ: <<പണ്ണാഡ്യെ, ണീ സാമിദാസ്‌ത്തെ എന്ത് എനാക്ക് തെരിദ്. 20എമ്മ് പാട്ടല ഈ മലേലിത്തെ സാമിന കുമ്മുഡി ഇര്‌ന്താദ്. ആന സാമിന കുമ്മുഡ്‌റദാനാക്കി എര്‌സലേമിലി താനെത്തെ കുമ്മുഡുഡൊ എന്ത് എഗുദാരാന ണിമ്മ സൊല്ലുറേര്>> എന്ത് സൊന്ന.
21ഏസു അവാള്‌ക്കെ: <<അമ്മെ, ണീ എന്ന് ബാക്ക്‌ണ ണമ്പ്, ണിമ്മ അപ്പനാന സാമിന കുമ്മുഡ്‌റാദ് ഈ മലേലിമല്ല എര്‌സലേമിലിമ് അല്ല എങ്ക ണേര ബര്‌ദ്. 22സമര്യക്കാറാരാന ണിമ്മ ണിമാക്ക് തെര്യാത്താദ്‌ണ കുമ്മുഡ്‌റേര്. ആന എമ്മാഗൊ തെരിരാദ്‌ണ കുമ്മുഡ്‌റേര്. എന്ത്‌ക്കെന്റ മന്‌സാന ദെങ്ക്‌സ്‌റവാ് എഗുദാരിലിര്‌ന്ത്‌ത്തെ ബരാദ്. 23ണേരോഡെ സാമിന കുമ്മുഡ്‌റവാര് അപ്പനാന സാമിന സാമിണിഗാല് ഉദാവ്യാലേമ് സത്ത്യത്തോഡേമ് കുമ്മുഡ്‌റ ണേര ബരു. ഇപ്പ് അയ്യി ണേര ബന്ത്‌മിര്‌ക്ക്‌ദ്. എന്ത്‌ക്കെന്റ ഇച്ച്‌ള ദിന്‌സിലി സാമിന കുമ്മുഡ്‌റവാര്‌ണാത്തെ സാമി പരാക്കാദ്. 24സാമി ണിഗാലായിര്‌ക്കാദ്‌ണാലെ സാമിണിഗാല് ഉദാവ്യാലേമ്#4:24സാമിണിഗാല് ഉദാവ്യാലേമ് ഗ്‌റീക്ക് ണായാത്തിലി ണിഗാല് എന്ത് മാട്ട്‌ത്തെ എ്ള്‌ദിര്‌ക്ക്‌ദ്. സത്ത്യത്തോഡേമ് ആയിര്‌ക്കുഡൊ സാമിന കുമ്മുഡ്‌റാദ്>> എന്ത് സൊന്നാ്.
25അവ ഏസുക്കെ: <<ക്‌റ്‌സ്‌ത്ത് എന്ത് സൊല്ലുറ മസിഗെ ബരുവാ് എന്ത് എനാക്ക് തെര്യു. അവാ് ബര്‌ഗാട്ടി എല്ലാദ്‌ണ പറ്റി എമാക്ക് സൊല്ലി തരുവാ്>> എന്ത് സൊന്ന.
26ഏസു അവാള്‌ക്കെ: <<ണിന്നോഡെ പേസി കൊണ്ടിര്‌ക്ക ണാന്‌ത്തെ മസിഗെ>> എന്ത് സൊന്നാ്.
സൊല്ലുപഡി ണഡാക്കവാര് തിലിമ്പി ബരാര്
27ഏസുദ് സൊല്ലുപഡി ണഡാക്കവാര് തിലിമ്പി ബര്‌ഗാട്ടി ഏസു ഒരുത്ത്യോഡെ പേസികൊണ്ട് ഇര്‌ക്കാദ്‌ണ കണ്ട് അദിസ്യപട്ടാര്. ആന ണീ എന്തണ പരാക്കെ? എന്ത്‌മ് ണീ അവാളോഡെ എന്തണ പേസ്‌റെ എന്ത്‌മ് അവാര് ഏസുണ കേ്ക്കാലെ.
28അദ്‌ക്ക് പ്‌റ അവ തണ്ണി പാത്ത്‌റാണ അദ്‌ക്കെ താനെ ബെത്ത് തള്ളി പട്ടണാക്കെ ഓഡി പോയി ആള്‌ഗാക്കെ: 29<<ണാന് സെയ്‌ദാദ്‌ണ ഒട്ടുക്ക് എനാക്ക് സൊന്ന ഒരുത്താന ബന്ത് ണോഡിരി. അവാ് ഒരു ബേ്ള്യെ ക്‌റ്‌സ്‌ത്ത്‌ത്തെഗൊ?>> എന്ത് സൊന്ന. 30അദ്‌ണാലെ ആള്‌ഗ പട്ടണാത്തിലിര്‌ന്ത് ഏസു പട്ട്‌ക്ക് ബന്താര്.
31അയ്യി ഗള്യേലി തന്ന് സൊല്ലുപഡി ണഡാക്കവാര് ഏസുക്കെ: <<ഗുരുവെ, എന്താറ്റ് തിന്ന്>> എന്ത് സൊന്നാര്.
32ആന ഏസു അവാര്‌ക്കെ: <<ണിമാക്ക് തെര്യാത്ത തീനി എനാക്ക് തിന്ന്യ ഇര്‌ക്ക്‌ദ്>> എന്ത് സൊന്നാ്.
33അക്കുളെ തനാക്ക് ആരാറ്റ് സാപാഡ് എ്ഡ്‌ത്ത് ബന്ത് കൊഡുത്താരൊ? എന്ത് സൊല്ലുപഡി ണഡാക്കവാര് ആങ്കീങ്ക് പേസിനാര്.
34അക്കുളെ ഏസു സൊന്നാ്: <<എനാണ സൊല്ലിബ്‌ട്ടവാന്‌ക്ക് പ്‌ഡിത്ത കാര്യഗണ സെയ്‌രാദ്‌മ് അയാള് എനാക്ക് സെയ്യ തന്തിര്‌ക്ക ബേലെന സെയ്‌ദ് മുഡിക്കാദ്‌മ്‌ത്തെ എന്ന് സാപാഡ്. 35ഇനി ണാല് മാസ പോന പ്‌റ അറെ ഗള്യെ ആദെന്ത് ണിമ്മ സൊല്ലുറാദില്ലേഗ? ആന ണാന് ണിമാക്കെ സൊല്ലുറെ, ണിമ്മ കാഡ്‌ണ സൊക്കാന ണോഡിരി. കാഡ് മുച്ചുഡ ബെ്ള്ളാമെ ബെ്ളേന്ത് ഇപ്പ് താനെ അറ്‌ക്ക്യ ആയിര്‌ക്ക്‌ദ്. 36ബെദേക്കവാന്‌മ് അറ്‌ക്കവാന്‌മ് ഒരേ ഒപ്പ പിര്യപഡ്യ ബേ്ണ്ടി അറ്‌ത്തവാന്‌ക്ക് കൂലിന കൊഡുത്ത് അന്നണ എപ്പേക്ക്‌മ് ഇര്‌ക്ക പെ്ളേപ്പ്‌ക്ക് ബേ്ണ്ടി സേത്തി ബെക്കാ്. 37ബെദേക്കാദ് ഒരുത്താ് അറ്‌ക്കാദ് ബേ്റൊരുത്താ് എന്ത് ണിമ്മ സൊല്ലുറ സൊല്ലു ഇച്ചെ സത്ത്യാറ്റ്. 38ണിമ്മ പാഡ്‌പട്ട് ഉണ്ടാക്കാത്ത ബെ്ള്ളാമെന അറ്‌ക്ക്യ ണാന് ണിമാണ സൊല്ലിബ്‌ട്ടിര്‌ക്കെ, ബേ്റെ ആള്‌ഗ പാഡ്‌പട്ട് ഉണ്ടാക്കിനാര്. അദ്‌ദ് ഗുണ ണിമ്മ കെ്ഡേസിര്‌ക്കേര്.>>
എത്തിന്യൊ സമര്യക്കാറാര് ഏസുണ ണമ്പ്‌റാര്
39<<ണാന് സെയ്‌ദാദ്‌ണ ഒട്ടുക്ക് അയാള് എനാക്കെ സൊന്നാ്>> എന്ത് സമര്യക്കാറിസി സൊന്ന ണായണ കേ്ട്ട് അയ്യി പട്ടണാത്തിലിര്‌ക്ക എത്തിന്യൊ സമര്യക്കാറാര്‌മ് ഏസുണ ണമ്പിനാര്. 40അച്ചെ സമര്യക്കാറാര് ഏസു പട്ട്‌ക്ക് ബന്ത് എമ്മ്‌ദൊപ്പ തങ്കുഡോമെ എന്ത് സൊന്നാര്. അക്കുളെ ഏസു റണ്ട് ണാള് അവാരോഡെ തങ്കിനാ്. 41ഏസു സൊന്ന ണായണ കേ്ട്ട് പിന്നേമ് എത്തിന്യൊ ആള്‌ഗ അവാന ണമ്പിനാര്.
42അവാര് അവാള്‌ക്കെ: <<ഇനി എമ്മ ണീ സൊന്ന ബാക്ക്‌ണ കേ്ട്ട് അല്ല അവാന ണമ്പ്‌റാദ്, ഇപ്പ് എമ്മാഗെ എമ്മ് കാദാറ കേ്ട്ട്‌മിര്‌ക്കേര് അവാ് സെരിക്ക്‌മ് ഉലഗാത്തില്യ എല്ലാര്‌ണാമ് ദെങ്ക്‌സ്‌റവാനെന്ത് എമ്മ തെരിന്ത്‌മ് ഇര്‌ക്കേര്>> എന്ത് സൊന്നാര്.
റാജാവുദ് ജോലിക്കാറാന്‌ദ് മഗാന തെ്ള്‌സ്‌റാ്
43റണ്ട് ണാള് സമര്യ പട്ടണാത്തിലി തങ്കിന പ്‌റ ഏസു അദിലിര്‌ന്ത് ഗെലീലേക്ക് പോനാ്. 44ഏദ് സാമിദാസ്‌ക്ക്‌മ് സൊന്ത ഊര്‌ക്കാറാര് മദ്‌പ്പ് കാട്ടമാട്ടാര് എന്ത് ഏസു താനെ സൊല്ലിര്‌ക്കാ്. 45ഏസു ഗെലീലേക്കെ എജ്ജ്‌ഗാട്ടി അദില്യവാര് ഏസുണ സേത്തിനാര്. എന്ത്‌ക്കെന്റ അവാര്‌മ് പെസഗെ ണോമ്പിക്ക് ഗെലീലേലിര്‌ന്ത് എര്‌സലേമ്‌ക്ക് പോയിര്‌ന്താദ്‌ണാലെ ഏസു ണോമ്പി ഗള്യേലി സെയ്‌ദാദ്‌ണ ഒട്ടുക്ക് കണ്ടിര്‌ന്താര്.
46ഏസു പിന്നേമ് ഗെലീലേലിര്‌ക്ക കാനാവു എങ്ക പട്ടണാക്കെ തിലിമ്പി ബന്താ്. അദിലിത്തെ താന് തണ്ണിന ഊറിന മുന്തിരി സാര ആക്കിനാദ്. ഗെലീലേല്യ കവറ്‌ണഗൂമ് എങ്ക പട്ടിലി റാജാവുദ് ഒരു ജോലിക്കാറാന്‌ദ് മഗനച്ചാന്‌ക്ക് ണോയി പ്‌ഡിത്തിര്‌ന്ത്‌ദ്. 47ഏസു എഗുദേലിര്‌ന്ത് ഗെലീലേക്ക് ബന്തിര്‌ക്കാ് എന്ത് അയ്യി ജോലിക്കാറാന്‌ക്ക് സേദി കെ്ഡേത്ത്‌ദ്. അക്കുളെ അവാ് ഏസു പട്ട്‌ക്ക് പോയി: <<എന്ന്‌ദ് മഗാ് ണോയി ആയി ഉജുറു പോയ ആയിര്‌ക്കാ്. അദ്‌ണാലെ ണീ സെറ്റെ ബന്ത് അവാന തെ്ള്‌സുഡോമെ>> എന്ത് ബേ്ണ്ടികൊണ്ടാ്.
48അക്കുളെ ഏസു അവാന്‌ക്കെ: <<ണിമ്മ അഡ്യാളഗാമ് അദിസ്യഗാമ് കാണാദെ പോന ണമ്പഗേമട്ടേരല്ല?>> എന്ത് സൊന്നാ്.
49അക്കുളെ അയ്യി ജോലിക്കാറാ്: <<പണ്ണാഡ്യെ, മ്‌ഗ ഉജുറു പോഗാത്ത മുദ സെറ്റെ ബരുഡോമെ>> എന്ത് സൊന്നാ്.
50ഏസു അയാള്‌ക്കെ: <<ണീ പോ, ണിന്ന്‌ദ് മഗാ് ഉജുറു തെ്ളിന്ത് ണലമായി ആയിര്‌ക്കാ്>> എന്ത് സൊന്നാ്.
ഏസു സൊന്ന ണായണ ണമ്പി അയാള് പോനാ്. 51അയാള് ആങ്ക് പോയി കൊണ്ടിര്‌ക്കാട്ടി അയാള്‌ദ് ബേലെക്കാറാര് എ്ഡെ ബയ്യിലി ബെത്ത് ജമ്പിത്ത് <<ണിന്ന് മഗാ് ഉജുറു തെ്ളിന്താ്>> എന്ത് സൊന്നാര്. 52അവാ് ഉജുറു തെ്ളിന്താദ് ഏദ് ഗള്യെ എന്ത് അവാര്‌ണ കേ്ട്ടാ്. അക്കുളെ അവാര്: <<ണിഗാറ്റ് ഉച്ചിക്ക് പനി ബ്‌ട്ട്‌ദ്>> എന്ത് സൊന്നാര്.
53<<ണിന്ന്‌ദ് മഗാ് ഉജുറു തെ്ളിന്ത് ണലമായി ആയിര്‌ക്കാ്>> എന്ത് ഏസു സൊന്നാദ് അദേ ഗള്യേലിത്തെ എന്ത് അയ്യി മ്‌ഗാദ് അപ്പാന്‌ക്ക് തെരിന്ത്, അവാന്‌മ് അവാന്‌ദ് കൂരെക്കാറാര് എല്ലാര്‌മ് ഏസുണ ണമ്പിനാര്.
54ഏസു എഗുദ ണാഡിലിര്‌ന്ത് ഗെലീലേക്കെ ബന്ത പ്‌റ സെയ്‌ദ റണ്ടാവദ് അദിസ്യമാന അഡ്യാളത്തെ ഇദ്.
Pašlaik izvēlēts:
ഓഗന്നാ് 4: സാമിദ് സേദി
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Life Literature