ഓഗന്നാ് 5
5
കുള പട്ടിലിര്‌ക്ക ണോയിക്കാറാന തെ്ള്‌സ്‌റാ്
1അദ്‌ക്ക് പ്‌റ എഗുദാര് സെയ്‌ര ഒരു ണോമ്പി സെയ്‌ഗാട്ടി ഏസു എര്‌സലേമ്‌ക്കെ പോനാ്. 2എര്‌സലേമ് പട്ടണാത്തിലി കൊറ്യാഡ് ബാസ എന്ത് സൊല്ലുറ ബാസാദ് അര്‌ഗെ ബെദെസ്‌ത്ത എന്ത് എവുറാര് ണായാത്തിലി പേര് ഇര്‌ക്ക ഒരു കുള ഇര്‌ക്ക്‌ദ്. അയ്യി കുളാക്ക് സുറ്റുമ് അഞ്ച് പാഡിമ് ഇര്‌ന്ത്‌ദ്. 3ഈ പാഡിക്കുള്ളെ കുറുഡാര്‌മ്, മൊണ്ടിഗാമ്, സപ്പെ ണോയിക്കാറാര്‌മ് അച്ചെ എത്തിന്യൊ ണോയിക്കാറാര് ക്‌ഡാന്തിര്‌ന്താര്. [അവാര് തണ്ണി കിലാങ്ക്‌റാദ്‌ണ കാത്ത് ഇര്‌ന്താര്. 4ഒരൊരു ഗള്യേക്ക് ദൂദാ് കുളാക്കെ ഇ്റാങ്കി തണ്ണിന കിലാക്കുവാ്. അക്കുളെ മുദ തണ്ണിക്കെ ഇ്റാങ്ക്‌റ ഏദ് ണോയിക്കാറാ് ആനാല്‌മ് സെരി അവാ് തെ്ളിവാ്.]#5:4 മുദ എ്ള്‌ദിനാദ്‌ണ ണോഡി എ്ള്‌ദിന പഗ്‌ദി കായിദാത്തിലി ഈ സുലാക്ക ഇല്ലെ.
5ആന മുപ്പത്തെ്ട്ട് ബര്‌സായി ണോയി ക്‌ഡാന്ത് കൊണ്ടിര്‌ന്ത ഒരുത്താ് അദിലി ഇര്‌ന്താ്. 6അവാ് അദിലി ക്‌ഡാന്തിര്‌ക്കാദ്‌ണ ഏസു കണ്ടാ്. ഇച്ചെ അവാ് ണോയി ക്‌ഡാക്ക്യ പ്‌ഡിത്ത് എത്തിന്യൊ ബര്‌സ ആയിര്‌ക്ക്‌ദ് എന്ത് ഏസുക്ക് തെരിന്ത്‌ദ്. അദ്‌ണാലെ ഏസു അവാന: <<ണിനാക്ക് ണോയി തെ്ളിഡൊ എന്ത് ആസെ ഇര്‌ക്ക്‌ദ?>> എന്ത് കേ്ട്ടാ്.
7അക്കുളെ അയ്യി ണോയിക്കാറാ് ഏസുക്കെ: <<പണ്ണാഡ്യെ, തണ്ണി കിലാങ്ക്‌ഗാട്ടി എനാണ തണ്ണിക്കെ ഇ്റാക്ക്യ ആര്‌മ് ഇല്ലെ. ണാന് ഊരിന്ത്‌പാരിന്ത് പോഗാട്ട്യെല്ല എനാക്ക് മുദ ബേ്റെ ആരാറ്റ് ബന്ത് തണ്ണിക്കെ ഇ്റാങ്ക്‌റാര്>> എന്ത് സൊന്നാ്.
8അക്കുളെ ഏസു അയാള്‌ണ: <<എ്ന്ത് ണിന്റ് ണിന്ന്‌ദ് ക്‌ഡാക്ക പായിന എ്ഡ്‌ത്ത് ണഡ>> എന്ത് സൊന്നാ്. 9അപ്പ്‌താനെ അവാ് ണോയി തെ്ളിന്ത് ക്‌ഡാക്ക പായിന എ്ഡ്‌ത്ത് ണഡാന്താ്.
ആന അയ്യി ണാള് ഒയിവു ണാള് ആയിര്‌ന്ത്‌ദ്. 10അദ്‌ണാലെ എഗുദാര് ണോയി തെ്ളിന്തവാന: <<ഇന്റ് ഒയിവു ണാള് എന്ത് തെര്യാഗ? ഈ ണാള് ബിര്‌സ്‌റ സീലെന എ്ഡ്‌ത്ത് ണഡാക്കാദ് ണമ്മ് സട്ടപഡി തപ്പ്>> എന്ത് സൊന്നാര്.
11ആന ണോയി തെ്ളിന്തവാ്: <<എനാണ ണോയി തെ്ളിസിനവാ് ബിര്‌സ്‌റ സീലെന എ്ഡ്‌ത്ത് ണഡ എന്ത് എനാക്ക് സൊന്നാ്>> എന്ത് അവാര്‌ക്കെ സൊന്നാ്.
12അവാര് പിന്നേമ്: <<ബിര്‌സ്‌റ സീലെന എ്ഡ്‌ത്ത് ണഡ എന്ത് ണിനാക്കെ സൊന്നവാ് ആര്?>> എന്ത് കേ്ട്ടാര്.
13അദിലി ബെല്ല്യൊരു ആള്‌കൂട്ട ഇര്‌ന്താദ്‌ണാലെ അദ്‌ക്കെ ഏസു മറേന്ത് തള്ളിനാ്. അദ്‌ണാലെ തനാണ തെ്ള്‌സിനാദ് ആരെന്ത് ണോയി തെ്ളിന്തവാന്‌ക്ക് തെര്യാലെ.
14അദ്‌ക്ക് പ്‌റ ഏസു അവാന സാമികൂരേലി ബെത്ത് കണ്ട്: <<ണോഡു, ണീ ണോയി തെ്ളിന്തേനല്ല. ണിനാക്ക് സേത്തി കജട്ടഗ ബരാദെ ഇര്‌ക്ക്യ ബേ്ണ്ടി ണീ ഇനി പാവ സെയ്യാദെ>> എന്ത് സൊന്നാ്. 15അക്കുളെ അവാ് പോയി തനാണ തെ്ള്‌സിനാദ് ഏസുത്തെ എന്ത് എഗുദാര്‌ക്കെ സൊന്നാ്.
16ഏസു അവാന ഒയിവു ണാള് തെ്ള്‌സിനാദ്‌ണാലെ എഗുദാര് ഏസുണ ഒരേമൂട്ട ഓരാഡിസ്യ പ്‌ഡിത്താര്. 17അദ്‌ക്ക് ഏസു എഗുദാര്‌ക്കെ: <<എന്ന് അപ്പാ് ഒപ്പ സെയ്‌ദ് കൊണ്ടിര്‌ക്ക തന്ന് ബേലെന ഇപ്പ്‌മ് സെയ്‌ദ് കൊണ്ടിര്‌ക്കാ്. ണാന്‌മ് സെയ്‌ദ് കൊണ്ടിര്‌ക്കെ>> എന്ത് സൊന്നാ്. 18അച്ചെ ഏസു ഒയിവു ണാള് സെയ്യ പാങ്കില്ലാത്ത കാര്യണ സെയ്‌ദാദ്‌ക്ക് താനേമല്ല, സാമിന തന്ന്‌ദ് അപ്പാ് എന്ത് ഒളേത്ത് തനാണതാനെ സാമിക്ക് സമ ആക്കിനാദ്‌ണാലേമ് എഗുദാര് ഏസുണ കൊല്ല്യ റമ്പ ഓരാഡി കൊണ്ടിര്‌ന്താര്.
മഗാന്‌ക്കിര്‌ക്ക അദിഗാര
19ഏസു അവാര്‌ക്കെ ഇച്ചെ സൊന്നാ്: <<ണേര്‌മായിമ് ണാന് ണിമാക്കെ സൊല്ലുറെ, മഗാന്‌ക്ക് തന്യെ ഒന്റുമ് സെയ്യ മുഡ്യമാട്ട. അപ്പാ് എന്ത സെയ്‌രാനൊ അദ്‌ണ ണോഡിത്തെ മഗാന്‌മ് സെയ്‌രാദ്. അപ്പാ് സെയ്‌രാദ്‌ണെല്ല മഗാമ് അദേപാസെ സെയ്‌രാ്. 20എന്ത്‌ക്കെന്റ അപ്പാ് മഗാന സീവാ് ബ്‌ഡ്‌റാദ്‌ണാലെ താന് സെയ്‌രാദ്‌ണ ഒട്ടുക്ക് മഗാന്‌ക്ക് കാട്ടി കൊഡുക്കാ്. ണിമ്മ അദിസ്യപഡ്യ ബേ്ണ്ടി ഇദ്‌ണ ബ്‌ഡ ബെല്ല്യ കാര്യഗ ഗൂഡി അപ്പനാന സാമി തന്ന് മഗാന്‌ക്ക് സെയ്‌ദ് കാട്ടി കൊഡുക്കുവാ്. 21അപ്പനാന സാമി സത്തവാര്‌ഗണ ഉജുറേ്ത്തി അവാര്‌ക്ക് ഉജുറു കൊഡുത്താദ്‌ണ പാസെ മഗാന്‌മ് തനാക്ക് പ്‌ഡിത്തവാര്‌ക്ക്‌മ് ഉജുറു കൊഡുക്കുവാ്. 22-23എല്ലാര്‌മ് അപ്പനാന സാമിന മദിക്ക പാസെ മഗാനാമ് മദിക്ക്യ ബേ്ണ്ടി അപ്പനാന സാമി ആര്‌ണാമ് ബിദിക്കാദെ ണായ ബിദിക്ക അദിഗാരണ ഒട്ടുക്ക് മഗാന്‌ക്ക് കൊഡുത്തിര്‌ക്കാ്. മഗാന മദിക്കാത്തവാ് അവാന സൊല്ലിബ്‌ട്ട അപ്പനാന സാമിനാമ് മദിക്കാദില്ലെ.
24ണേര്‌മായിമ് ണാന് ണിമാക്കെ സൊല്ലുറെ, എന്ന് ണായണ കേ്ട്ട് എനാണ സൊല്ലിബ്‌ട്ടവാന ണമ്പ്‌റവാര്‌ക്ക് എപ്പേക്ക്‌മ് ഇര്‌ക്ക പെ്ളേപ്പ് ഇര്‌ക്ക്‌ദ്. പാവ സെയ്‌ദാദ്‌ക്ക് കെ്ഡേക്ക ദണ്ടണേക്ക് അവാര് സിക്കാദെ സാവുലിര്‌ന്ത് തപ്പ്‌സി എപ്പേക്ക്‌മ് ഇര്‌ക്ക പെ്ളേപ്പ് കെ്ഡേസിര്‌ക്കാര്. 25ണേര്‌മായിമ് ണാന് ണിമാക്കെ സൊല്ലുറെ, സത്തവാര് സാമിമഗാ് ണായ ജദ്ദണ കേ്ക്കുവാര്. അയ്യി ജദ്ദണ കേ്ക്കവാര് പെ്ളേക്ക ഗള്യെ ബര്‌ദ്. ഇപ്പ് ബന്ത്‌മിര്‌ക്ക്‌ദ്. 26അപ്പനാന സാമിക്ക് തന്നിദിലി താനെ ഉജുറു ഇര്‌ക്ക പാസെ മഗാന്‌ക്ക്‌മ് തന്നിദിലി താനെ ഉജുറു ഇര്‌ക്ക്യ ബെത്തിര്‌ക്കാ്. 27അവാ് മന്‌സാനായി പ്‌റാന്തവാ് ആനാദ്‌ണാലെ ണായ ബിദിക്കാദ്‌ക്കുള്ള അദിഗാരാമ് അപ്പനാന സാമി തന്ന് മഗാന്‌ക്ക് കൊഡുത്തിര്‌ക്കാ്.
28-29അദ്‌ണാലെ ണിമ്മ അദിസ്യപഡ ബേ്ഡ. എന്ത്‌ക്കെന്റ സുഡാലേലി ഇര്‌ക്കവാരെല്ല മന്‌സാനായി പ്‌റാന്തവാന്‌ദ് ജദ്ദണ കേ്ട്ട്, തമ്മ് പൊദേവക്ക്‌റാഗ ഇര്‌ന്ത് ബെ്ള്യെ ബര ഗള്യെ ബര്‌ദ്. ണല്ലാദ് സെയ്‌ദവാര് ഉജുറെ്ന്ത് എപ്പേക്ക്‌മ് പെ്ളേക്കുവാര്. കെ്ട്ടാദ് സെയ്‌ദവാര് ഉജുറെ്ന്ത് ദണ്ടണേക്ക് സിക്കുവാര്.>>
ഏസു ആര് എന്ത് സൊല്ലുറവാര്
30<<എനാക്ക് സൊന്തമായി ഒന്റുമ് സെയ്യ മുഡ്യമാട്ട. സാമി സൊല്ലുറ പാസെ ണാന് ണായ ബിദിക്കെ. ണാന് എന്ന് പിര്യാക്കല്ല ബിദിക്കാദ്, എനാണ സൊല്ലിബ്‌ട്ടവാന്‌ദ് പിര്യപഡിത്തെ. അദ്‌ണാലെ ണാന് ബിദിക്ക ബിദി ണേര്‌മെ ഉള്ളാദ്‌ത്തെ.
31ണാന് താനെ എനാണ പറ്റി ആള്‌ഗാക്ക് സൊല്ലുറദാനാക്കി അയ്യി ണായാക്ക് ബെലെ ഇല്ലെ. 32ആന എനാണ പറ്റി ആള്‌ഗാക്ക് സൊല്ലുറാദ് ബേ്റെ ഒരുത്താ്ത്തെ. അയാള് എനാണ പറ്റി ആള്‌ഗാക്ക് സൊല്ലുറ ണായാക്ക് ബെലെ ഇര്‌ക്ക്‌ദ് എന്ത് എനാക്ക് തെര്യു.
33ണിമ്മ ഓഗന്നാ് പട്ട്‌ക്ക് ആള് ബ്‌ട്ടേര്. അയാള് എനാണ പറ്റ്യുള്ള സത്ത്യണ ണിമാക്കെ സൊന്നാ്. 34ണാന് ആര് എന്ത് മന്‌സാ് എനാണ പറ്റി സൊല്ലുഡൊ എന്ത് എനാക്ക് തേവില്ലെ. അവാ് സൊന്നാദ്‌ണ ണമ്പി ണിമ്മ ദെങ്കി കഡാക്ക്യ ബേ്ണ്ടിത്തെ ണാന് ഇദ്‌ണ ണിമാക്ക് സൊല്ലുറാദ്. 35ഓഗന്നാ് ദഗദഗാത്ത് കത്തി ബെ്ള്‌സ അഡിക്ക ബ്‌ളാക്ക് പാസെ ആയിര്‌ന്താ്. ണിമ്മ അയ്യി ബെ്ള്‌സാത്തിലി ലേസ ണേര പിര്യപിര്യാത്ത് ഇര്‌ക്ക്യ ആസെപട്ടേര്.
36ആന ണാന് ആരെന്ത് ഓഗന്നാ് എനാണ പറ്റി സൊല്ലുറാദ്‌ണ ബ്‌ഡ ബെല്ല്യ കാര്യ എനാക്ക് ഇര്‌ക്ക്‌ദ്. അദ് ണാന് സെയ്‌ദ് മുഡിക്ക്യ ബേ്ണ്ടി അപ്പനാന സാമി എനാക്ക് തന്തിര്‌ക്ക കാര്യഗാത്തെ. ണാന് സെയ്‌ര അയ്യി കാര്യഗ ണാന് ആരെന്ത് സൊല്ലിമ് കൊഡുക്ക്‌ദ്. എനാണ അപ്പനാന സാമിത്തെ സൊല്ലിബ്‌ട്ടാദ് എന്ത് ആള്‌ഗാക്ക് കാട്ടിമ് കൊഡുക്ക്‌ദ്. 37എനാണ സൊല്ലിബ്‌ട്ട അപ്പനാന സാമി താനെ ണാന് ആരെന്ത് എനാണ പറ്റി സൊല്ലികൊഡുക്കാ്. ണിമ്മ സാമിദ് ണായ ജദ്ദണ കേ്ക്കാമില്ലെ, ഉരുവണ കാണാമില്ലെ. 38സാമി സൊല്ലിബ്‌ട്ടവാന ണിമ്മ ണമ്പ്‌റാദ്‌മില്ല്യല്ല. അദ്‌ണാലെ സാമി സൊന്ന സേദി ണിമ്മ് മനേസ്സിലി ഇര്‌ക്കാദെ ഇല്ലെ. 39സാമി സൊല്ലുസുലാക്കണ ണിമ്മ സൊക്കാന പഡിത്ത് ണോഡുറേര്. എന്ത്‌ക്കെന്റ അദ് എപ്പേക്ക്‌മ് ഇര്‌ക്ക പെ്ളേപ്പ്‌ണ തര്‌ദ് എന്ത് ണിമ്മ ണെനേക്കേര്. ഈ സാമി സൊല്ലുസുലാക്ക ണാന് ആരെന്ത് എനാണ പറ്റി സൊല്ലി തര്‌ദ്. 40എന്ത്‌ട്ട്‌മ് ഉജുറു കെ്ഡേസ്യ ബേ്ണ്ടി എന്ന് പട്ട്‌ക്ക് ബര്യ ണിമാക്ക് മനേസ്സില്ലെ.
41മന്‌സാര് എനാണ മദ്‌സ്‌റാര ഇല്ലേഗ എന്ത് ണാന് ണോഡുറാദില്ലെ. 42ആന ണിമ്മ ആരെന്ത്‌മ് സാമ്യോഡെ ണിമാക്ക് സീവാനെ ഇല്ലെന്ത്‌മ് എനാക്ക് തെര്യു. 43എന്ന് അപ്പാ് തന്ത അദിഗാരത്തോഡെ ണാന് ബന്തെ. ണിമ്മ എനാണ സേത്തി ബെക്കാലെ. ആന ഒരുത്താ് ഒരു അദിഗാരാമ് ഇല്ലാദെ ബന്ത അവാന ണിമ്മ സേത്തി ബെക്കേര്. 44ണിമാക്ക് താനെ ആങ്കീങ്ക് മദ്‌പ്പ് കെ്ഡേക്കാദിലി ണിമ്മ പിര്യപഡ്‌റേര്. ആന ഒരേ ഒരു സാമിലിര്‌ന്ത് മദ്‌പ്പ് കെ്ഡേസ്യ ണിമ്മ ഓരാഡ്‌റാദില്ലെ. പിന്നെച്ചെ ണിമ്മ എനാണ ണമ്പുവേര്?
45ണാന് അപ്പനാന സാമിദ് മുന്തുക്ക് ണിമാണ പറ്റി കുറ്റ സൊല്ലുവെ എന്ത് ണെനേക്കാദി. <എമാണ പറ്റി കുറ്റ സൊല്ലമാട്ടാ്> എന്ത് ണിമ്മ ണെഞ്ചഡെ ബെത്തിര്‌ക്ക മോസെ ണിമാണ പറ്റി കുറ്റ സൊല്ലുവാ്. 46ണിമ്മ മോസേന ണമ്പിനവാര് ആയിര്‌ക്കദാനാക്കി എനാണാമ് ണമ്പിര്‌ന്തിര്‌ക്കുവേര്. എന്ത്‌ക്കെന്റ മോസെത്തെ എനാണ പറ്റി എ്ള്‌ദിര്‌ക്കാദ്. 47ആന മോസെ എ്ള്‌ദിനാദ്‌ണാഗെ ണിമ്മ ണമ്പാലെ. പിന്നെ എച്ചെ എന്ന് ണായണ ണമ്പുവേര്?>>
Pašlaik izvēlēts:
ഓഗന്നാ് 5: സാമിദ് സേദി
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Life Literature