Lukas 23
23
Yesus dibaba' ko Gubernur Pilatus oca' diadili
(Mat. 27:1-2, 11-14; Mrk. 15:1-5; Yoh. 18:28-38)
1Somuo urakng dalapm potomuan nantai bodiritn, lalu mombaba' Yesus ko Pilatus, gubernur doerah Yudea. 2Di santai sia' monuduh Sio. Kato sia', “Urakng ni'in udah monyosat'an banso koi. Sio morarakng boko urakng pakai' mombayar pajak ko kaisar di Roma. Sio jam bopandir obai Sio nantai rajo, ia'an Rajo Inyo Dijanjian Allah, ia'an siku' rajo inyo koi sobut ‘Kristus’.”#23:2: Boko pomimpitn bulah tumbukan. Yesus kinyo kalo monyosat'an siku' urakng pan. Yesus hoyu' ja' mongajar urakng oca' mombayar pajak ko Rajo Romawi inyo palikng bokuaso (Lukas 20:24-25). Memang bondar Yesus nantai Rajo, apo Sio molawatn kokuasa'an jahat, kinyo molawatn kokuasa'an Romawi.
3Lalu Pilatus botakutn ko Yesus, “Bondaram Kolai rajo urakng Yahudi?”
Timbas Yesus, “Ubo pandir kolai nam.”
4Lalu Pilatus bopandir agatn boko imam kopala' huatan boko urakng bukai inyo udah bokumpul, “Aku co monomuan kosalahan Urakng ni'in. Conyiant alasan sampai Io gola' dihukupm.”
5Apo boko pomimpitn urakng Yahudi hala nyosahan. Kato sia', “Sio mohasut boko urakng pakai' momborontak. Niannam pongajaran-Nyo di soluruh tanah urakng Yahudi. Sio mula'i doi' doerah Galilea, sampai ko kota Yerusalem ni'in!”
6Mondingaꞌ nantai, Pilatus botakutn, “Apobai Yesus ni'in boasal doi' doerah Galilea?”
7Lopas jadi dipadahan obai Yesus memang boasal doi' su'utn, Pilatus monyiuh boko projurit mombaba' Yesus ko Herodes, rajo doerah Galilea. Mumpukan io ado di kota Yerusalem jam.
Yesus dibaba' ko Herodes oca' diadili
8Herodes udah opat mondinga' borito mongona'i Yesus. Udah manaham honda' botomu Sio.#23:8: Herodes Antipas udah mohukupm mati Yohanes Pombaptis (Lukas 3:19, 9:9). Doi' doholu Herodes sangant honda' botomu Yesus (Lukas 9:9). Jadi watu moniant Yesus, mulonyo Herodes rindakng bondar obai boharap ulih moniant Yesus bulah mujisat. 9Ongko, Herodes banyaꞌ botakutn ko Yesus, apo Yesus co monimbasi samo sokali.#23:9: Pado joman komai, Nabi Yesaya udah mongatoan obai Rajo Inyo Dijanjian Allah paca'an mohadapi komatian-Nyo kinyo bopandir pakai' mombela diri-Nyo siku' (Yesaya 53:7). Hal nantai monjadi nyata agatn porbuatan Yesus ni'in.
10Boko imam kopala' huatan boko guru agama Yahudi bodiritn di santai. Ongko tomaho godi, sia' monuduhan tuduhan inyo borat mongonaꞌi Yesus. 11Lalu Herodes ongko boko projuritnyo mohayam Yesus. Sia' boulu'an Yesus agatn mongona'an jubah rajo ko Sio. Lalu, Herodes monyiuh boko projurit mombaba' Yesus bobali' ko Pilatus. 12Komai Herodes agatn Pilatus hala bomusuhan, apo pas ari nantai sia' duo udah bokawalam.
Gubernur Pilatus momutusan oca' Yesus dihukupm mati
(Mat. 27:15-26; Mrk. 15:6-15; Yoh. 18:38–19:16)
13Pilatus mongumpulan boko imam kopala', boko pomimpitn, ongko boko rayat, 14lalu bopandir ko sia', “Kaitn mombaba' Urakng ni'in ko aku ongko monuduh obai Io monyosat'an boko urakng. Dinga'anbo, aku udah boriso'i Io di hadapan kaitn, apo aku samo sokali co bodapat sobuti' pan kojahatan inyo kaitn tuduhan ko Io. 15Herodes pan udah momutusan samaꞌan nian jam. Lalu, io monyiuh boko projurit mombaba' Yesus bobali' ko si'itn. Sobondarnyo Urakng ni'in kinyo molabuhan kojahatan la'apo pan sampai ulih mondapat hukupan mati. 16Jadi, aku paca'an monyiuh Io dipodularan ja'am, lalu molopasan-Nyo.”#23:16: Urakng Romawi isu'anu boduda'an siku' urakng oca' io lobih hati-hati pakai' co molabuhan boko hal inyo mongganggu' kodamaian huatan bulah boko urakng godi. Pilatus mongohonda'i hal ni'in jam pakai' ponggodi urakng Yahudi monjadi tokosih.
[ 17Pilatus bopandir ubo nantai obai pas sotiap Ari Rayo Paskah io wajib molopasan siku' urakng tahatan pakai' urakng Yahudi.] 18Apo somuo urakng inyo bokumpul di santai mondorah, “Bunuh ja'am Io! Lopasan Barabas pakai' koi!” 19(Nah, Barabas ditamoan ko dalapm ponjara obai di kota Yerusalem io bulah korusuhan molawatn pomorintah Romawi. Io pan mombunuh urakng jam.)
20Pilatus honda' molopasan Yesus. Jadi, io bopandir agi' agatn saro borakng ko urakng banyaꞌ nantai obai Yesus kinyo bosalah. 21Apo sia' hala mondorah, “Bunuh Io di kayu salib! Bunuh Io di kayu salib!”
22Lalu pongontigo kalinyo Pilatus bopandir ko sia', “Urakng ni'in kinyo bosalah! Io kinyo molabuhan kojahatan la'apo pan sampai ulih mondapat hukupan mati. Aku paca'an monyiuh Io dipodularan ja'am, lalu molopasan-Nyo.”
23Apo sia' hala mondorah monuntut agatn togas oca' Yesus gola' dibunuh di kayu salib. Koponsuahannyo sia' bohasil. 24Pilatus molabuhan somuonyo sosuai agatn kohonda' sia'. 25Biar pan Barabas ditamoan ko dalapm ponjara obai bulah korusuhan huatan pombunuhan, Pilatus totap molopasan Barabas, lalu monyiuh boko projuritnyo pakai' mohukupm mati Yesus di kayu salib obai nantai kohonda' boko urakng banyaꞌ.
Yesus dibaba' pakai' dihukupm mati di kayu salib
(23:26-32)
(Mat. 27:32-46; Mrk. 15:21-41; Yoh. 19:17-30)
26Lalu, boko projurit mombaba' Yesus ko luar kota pakai' mohukupm-Nyo sampai mati. Watu sia' tongahan bojalatn, ado siku' urakng lolaki honda' mansu' kota Yerusalem nantai. Damonyo Simon, doi' kota Kirene. Boko projurit nantai monangkap io, momoso io momikul kayu salib, ongko bojalatn di bolikat Yesus.#23:26: Biasonyo ponjahat gola' momikul kayu salib sonsiku'annyo. Yesus udah mula'i mombaba'nyo sonsiku'annyo (Yohanes 19:17), apo komungkitan bosar pado watu nantai Sio udah uyuh obai dipodularan (Yohanes 19:1).
27Kotakan banyaꞌ bondar urakng tuyut Yesus, tomansu' boko botina' monangis, salu' moniant koadaan Sio. 28Apo Yesus mongilikng ko arah sia' ongko bopandir, “Boko botina' doi' Yerusalem, jangan monangis obai la'apo inyo tojadi ko Aku. Apo sobali'nyo monangiscam obai la'apo inyo paca'an tojadi ko kaitn huatan poana'an kaitn. 29Obai tajahan hagar datakng watunyo urakng tajahan ajab sonsaro kotakng banyaꞌ sampai bopandir, ‘Lobih boi' pakai' boko botina' inyo co boana', kinyo kalo molahiran, kinyo kalo monyusu'i ana'!’#23:29: Yesus udah mongatoan obai kota Yerusalem paca'an dihancuran. Jadi, lobih boi' co nyiant ana' daripado sia' ajab sonsaro damo dibunuh ulih musuh (Lukas 19:41-44, 21:6, 20-24; Tiat jam Yeremia 16:1-4). 30Timpu ajab sonsaro nantai urakng paca'an bopandir ko boko gunung, ‘Tinggakngcam koi.’ Lalu ko boko bukit, ‘Lungkucam koi!’#23:30: Doi' Hosea 10:8. Urakng paca'an honda' mati socaro copat daripado hala ajab sonsaro. 31Obai aman urakng molabuhan ni'in ko kayu inyo bansah, la'apo inyo tajahan tojadi ko kayu inyo rangkai?”#23:31: Ado banyaꞌ komungkitan pakai' roti kiasan ni'in. Mungkitn kiasan ni'in monunju'an hukupan doi' urakng Romawi. Aman sia' mombunuh Yesus di kayu salib biar pan Sio kinyo bosalah, pasti lobih borat agi' inyo dilabuhan sia' agatn boko urakng inyo bosalah (inyo honda' molawatn pomorintah Romawi). DAMO mungkitn jam kiasan ni'in monunju'an hukupan doi' Allah. Aman Allah mombiaran Yesus dihukupm mati di kayu salib biar pan Sio kinyo bodosa, pasti lobih borat agi' hukupan Allah ko boko urakng inyo bodosa.
32Ado duo urakng bukai inyo dibaba' pakai' dihukupm mati bonsamo agatn Yesus. Koduo urakng nantai ponjahat.
Yesus dipaku di kayu salib
(23:33-43)
(Mat. 27:33-44; Mrk. 15:22-32; Yoh. 19:17-24)
33Timpu datakng ko tompat inyo disobut “Tongkorak”,#23:33: Kito co tohu ma'apo tompat ni'in disobut ‘Tongkorak’. Mungkitn obai dampikng bukit inyo bontu'nyo samaꞌan tongkorak, damo mungkitn obai tontara Romawi mohukupm mati banya' urakng di tompat nantai. Dalapm Baso Aramaia, tompat nantai disobut ‘Golgota’ (Matius 27:33, Markus 15:22). Sotilah ‘Calvary’ ado doi' Baso Latin, ‘Calvary’ rotinyo ‘Tongkorak’. boko projurit Romawi momakuan Yesus di kayu salib bonsamo agatn koduo ponjahat nantai jam – siku' urakng di sopia' kanan huatan siku' urakng agi' di sopia' kiba' Yesus. 34Lalu Yesus bodoa, “Bopai, amputi sia' inyo monyobab'an Aku sampai dihukupm mati di kayu salib! Sia' co tohu la'apo inyo sia' pulah.”
Lalu, boko projurit monguti' pakai'an Yesus. Sia' boundi pakai' monontuan sopo inyo tajahan mondapat'an pakai'an-Nyo. 35Urakng banyaꞌ bodiritn di santai moniant la'apo inyo tojadi. Boko pomimpitn urakng Yahudi boulu'an Yesus. Kato sia', “Aman Urakng ni'in bondar-bondar Rajo Inyo Dijanjian Allah, Urakng Inyo Dipilih Allah sampai Sio ulih monyolamant'an urakng bukai, biaram Sio ni'in monyolamant'an diri-Nyo siku' jam.”
36Boko projurit boulu'an Sio. Sia' mohampiki Sio monawaran anggur mansapm.#23:36: Ni'in minuman inyo palikng mudah rogonyo, jadi pasti kinyo cucu' pakai' dionji'i ko siku' urakng rajo. Ubonyo, sia' bayo monawarannyo, apo kinyo lansukng moonji'inyo ko Yesus. Kali boboropo watu lopas nian, hoyu' sia' bondar-bondar moonji'inyo. (Matius 27:48, Markus 15:36, Yohanes 19:29). Hal nantai sangant kojapm obai hukupan mati di kayu salib bulah urakng sangant korahakan sampai rada'. 37Kato sia', “Aman Duatn bondar-bondar Rajo urakng Yahudi, solamant'ancam diri Duatn!” 38Ado jam tulisan dipasakng dibuai pucu' kayu salib. Tulisan nantai bobunyi, “Ninam Rajo Urakng Yahudi.”#23:38: Pomorintah Romawi molabuhan hukupan mati di kayu salib di tompat umum oca' urakng banyaꞌ ulih moniant. Sia' pan momasakng pongumuman di kayu nantai oca' urakng tohu la'apo kosalahannyo. Nantai moingant'an urakng pakai' monaati pomorintah. Tulisan inyo dipasakng di pucu' Yesus nantai pakai' boulu'an Yesus (obai sia' kinyo pocayo Sio nantai Rajo) DAMO boulu'an urakng Yahudi (obai moremehan kuaso sia' dibandikan agatn kuaso pomorintah Romawi).
39Apotolagi', salah siku' ponjahat inyo disaliban di santai mohayam Yesus jam. Io bopandir, “Aman Duatn bondar-bondar Rajo Inyo Dijanjian Allah, inyo disobut ‘Kristus’, solamant'ancam diri Duatn huatan koi jam!”
40Apo ponjahat inyo siku' agi' monogur kawalnyo nantai, kato io, “Kolai soharusnyo gola' huatan tundu' agatn Allah, obai co manah agi' kolai tajahan mati. Kolai sosamo dihukupm mati samaꞌan Sio. 41Sobondarnyo hukupan kito duo memang sosuai agatn porbuatan kito. Apo Sio samo sokali kinyo bosalah!” 42Lalu io bopandir agatn Yesus, “Ingantcam aku, watu Duatn monguaso'i somuo la'apo pan sobagai Rajo!”
43“Pocayocam,” kato Yesus ko io, “Ari ni'in kolai tajahan sosamo agatn Aku di sorugo.”
Yesus mati
(23:44-49)
(Mat. 27:45-46; Mrk. 15:33-34; Yoh. 19:28-30)
44Kiro-kiro japm duo bolas tongah ari, matoari kinyo moncara'. Somuo doerah santai monjadi potakng-hiru' bondar sampai japm tigo babahari. 45Tidikng#23:45: Tidikng nantai momisahan ruakan husus kohadirat Allah. Sokali sotohutn ongkah Imam Agukng ulih mansu'. Jadi, watu tidikng nantai birat rotinyo co nyiant batasan agi'. Kito bebas monyombah Allah di mono pan. Tiat Ibrani 6:19-20, 9:1-15, 10:19-22 huatan Efesus 2:18, 3:12. inyo monyongkayoan Tompat Kotakng Suci doi' tompat bukai di Rumah Allah, birat monjadi duo. 46Lalu Yesus mondorah agatn saro kotakng borakng, “Bopai! Ko dalapm kuaso Duatn Ku sorahan kosih-Ku!” Lopas jadi bopandir ubo nantai, Io pan matiam.
47Timpu kopala' pasukan moniant la'apo inyo udah tojadi, io momuji Allah. Lalu io bopandir, “Bondaram, Sio kinyo bosalah!”
48Urakng banyaꞌ inyo bokumpul di santai pan udah moniant Yesus dihukupm mati ongko moniant somuo nantai sia' kotakng salu' bondar huatan pulakng agatn kotakan monyosal bondar. 49Di santai jam, ado banyaꞌ kawal Yesus inyo kotakng jamo, tomansu' boko botina' inyo tuyut Sio doi' doerah Galilea. Sia' moniant somuo kojadian nantai jam apo bodiritn jojouh.
Bangkai Yesus dipasar dalapm gua
(23:50-56)
(Mat. 27:57-61; Mrk. 15:42-47; Yoh. 19:38-42)
50-51Ado siku' urakng bodamo Yusuf,#23:50-51: Yusuf nantai urakng dampu (Matius 27:57). Io monjadi murid Yesus, apo kinyo socaro tobuka' sampai poristiwa ni'in (Yohanes 19:38). inyo boasal doi' kota Arimatea di doerah Yudea. Io urakng onsi' inyo dihormati urakng. Io tongahan monanti kodatakan Rajo Inyo Dijanjian Allah. Biar pan io anggota kolompok pomimpitn urakng Yahudi inyo kotakng pontikng, io co sotuju agatn koputusan huatan kolaku'an sia' nantai. 52Yusuf ni'in botula' ko Gubernur Pilatus ongko minto ijitn oca' io ulih momasar bangkai Yesus. 53Kali udah dapat ijitn, io monurutan bangkai Yesus doi' kayu salib, lalu momutut-Nyo agatn koitn inyo bowarna putih ongko boi'. Io moulit'an-Nyo di dalapm pasaran inyo dipulah di dalapm bukit batu. Pasaran nantai bolupm kalo dipakai. 54Sia' hagar momasar-Nyo sobolupm matoari tonggolapm obai ari nantai ari Jumat. Urakng Yahudi bososiap sobolupm Ari Sabat mula'i#23:54: Ari Sabat mula'i pado watu matoari tonggolapm pado Ari Jumat sampai pado watu matoari tonggolapm pado Ari Sabtu. obai culih bokorojo watu ari nantai.
55Boko botina' inyo datakng agatn Yesus doi' doerah Galilea tuyut Yusuf lalu moniant pasaran nantai. Sia' moniant jam ubo apo bangkai Yesus diulit'an di dalapm pasaran. 56Lopas nian sia' pulakng ko kota Yerusalem lalu monyiap'an boko rorompahan huatan minya' harupm pakai' mominya'i bangkai Yesus. Apo timpu Ari Sabat, sia' torahat bokorojo pakai' monaati Porintah Allah inyo ditulis Musa dalapm Hukupm Torat.
Pašlaik izvēlēts:
Lukas 23: TBDS
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties