Lukas 12
12
Jangan monjadi urakng inyo pompadah boi' hati apo sobondarnyo hatinyo jahat
(12:1-3)
1Timpu Yesus botula' doi' rumah urakng Farisi nantai, banyaꞌ bondar urakng bokumpul. Obai sia' kotakng banyaꞌ sampai ado inyo totonja'an kaki siku'-monyiku' obai honda' mondingaꞌ Yesus mongajar.
Yesus lobih doholu bopandir ko boko murid-Nyo, “Jagocam diri kaitn oca' co monjadi urakng pompadah boi' samaꞌan pomimpitn agama doi' kolompok Farisi. Kotiat'annyo sia' molayati Allah, apo sobondarnyo cado. Kojahatan sia' mongkitn banyaꞌ, mompongaruhi urakng bukai samaꞌan ragi bulah roti mongkitn mongombakng.#12:1: Urakng Yahudi momakai kato ‘ragi’ pakai' poumpamoan urakng inyo bisi pongaruh; nantai pongaruh jahat damo pongaruh boi' (samaꞌan di Lukas 13:21). Di si'itn Yesus momakainyo pakai' mongatoan pongaruh jahat doi' urakng inyo kinyo honda' pocayo agatn Allah huatan pan ajaran sosat urakng Farisi ko urakng banyaꞌ. Tiat Lukas 11:44. 2Apo somuo inyo urakng tutupi tajahan dibuka'. Somuo kojahatan inyo urakng ombakan tajahan dikotohu'i.#12:2: Urakng inyo pompadah boi' hati apo sobondarnyo jahat nantai urakng budu, obai Allah mongotohu'i somuo hal. Nononyo Allah paca'an mombungkarnyo watu Ari Kiamant, malahan mungkitn dalapm kohidupan ni'in jam. Tiat Roma 2:16 ongko 1 Korintus 4:5. 3Obai nantai somuo hal inyo dipandiran urakng socaro bototapu'dalapm golap tajahan didinga' socaro tobuka' pas watu torakng. Somuo rahasia inyo urakng kucapan di kolindakan urakng bukai di dalapm kamar totutup, nononyo tajahan diboritoan doi' pucu' hatap rumah.”#12:3: Hatap rumah di doerah Timur Tongah bobontu' rato. Boko rumah hala bohampikan, jadi urakng ulih monyampaian pongumuman doi' hatap rumah.
Jangan gola' momandiran diri kaitn pocayo ko Yesus
(12:4-12)
(Mat. 10:22-31, 12:32, 10:19-20, 32-33)
4“Dinga'anbo ni'in, boko pokawalan-Ku. Jangan gola' agatn monsio, biar pan sia' ulih mombunuh kaitn. Obai lopas nian, sia' culih bulah la'apo pan agi' ko kaitn. 5Aku momadahan ko kaitn sopo inyo sobondarnyo gola' kaitn kogola'i. Gola'cam agatn Allah! Obai Sio kinyo bayo bokuaso mombunuh urakng. Sio pan bokuaso pakai' mombuakan urakng ko dalapm noraka! Jadi, sobondarnyo Sionam inyo gola' kaitn kogola'i.
6Lima' iku' burukng pipit dijual kotakan mudah rogonyo. Apo siku' pan kinyo tongkolupatn Allah. 7Allah lobih morogo'i kaitn daripado banyaꞌ burukng pipit nantai. Sio udah tohu boropo banyaꞌ lambai' rambut di kopala' kaitn. Obai Allah kotakng mongasihi kaitn, jadi jangan gola' momadahan diri kaitn pocayo agatn Aku timpu kaitn didorako'i.
8Dinga'anbo ni'in: Sotiap urakng inyo mongaku'i Aku dipohadapan boko urakng bukai obai io pocayo agatn Aku, Ana' Monsio pan paca'an moakui'nyo dipohadapan boko molekat Allah. 9Apo sotiap urakng inyo kinyo mongaku'i-Ku dipohadapan boko urakng bukai, Ana' monsio pan paca'an kinyo moaku'i io dipohadapan boko molekat Allah. 10Sotiap urakng inyo mongatoan sosuatu inyo molawatn Ana' monsio urakng nantai ulih diamputi. Apo sotiap urakng inyo mohayam mongatoan sosuatu inyo molawatn Roh Allah, urakng nantai kinyo paca'an ulih diamputi.
11Aman kaitn dibaba' ko boko rumah sombayakng pakai' diadili#12:11: Boko pomimpitn agama Yahudi udah bulah koputusan pakai' monundukng somuo urakng inyo pocayo, obai Yesus nantai Rajo Inyo Dijanjian Allah (Yoh. 9:22). Nanam alasan boko murid Yesus paca'an diadili diboko rumah sombayakng. di pohadapan pomorintah damo ponguaso, jangan gola' mongonaꞌi caro kaitn gola' mombela diri. Jangan gola' mongonaꞌi la'apo inyo gola' kaitn pandiran. 12Obai timpu nian jam, Roh Allah paca'an momadahi la'apo inyo gola' kaitn pandiran.”
Yesus momakai poumpamoan pakai' mongajar urakng oca' jangan tama'
(12:13-21)
13Siku' urakng doi' antaro urakng banyaꞌ bopandir agatn Yesus, “Guru, siuh somadikanku pakai' mombagi warisan ko aku.”
14Apo Yesus bopandir ko io, “Somadikan, co nyiant urakng inyo moangkat Aku monjadi hakipm damo porontaro pakai' momutusan pokaro sama'an nian!”
15Ongko Yesus bopandir ko somuo urakng di santai, “Boboi'cam! Jagocam diri kaitn doi' somuo macapm kotama'an. Obai hidup inyo sobondarnyo samo sokali kinyo bogantukng agatn banyaꞌnyo kodampuan.”
16Lopas nantai Yesus mongajar sia' agatn poumpamoan ni'in, “Ado siku' urakng dampu bisi tanah. Hasil lakaunyo bokobanyaꞌan bondar. 17Io botakutn dalapm hatinyo, ‘La'apo inyo gola' aku pulah? Aku conyiant tompat inyo cukup bosar pakai' monyimpatn hasil lakauku inyo banyaꞌ ni'in.’ 18Lalu io bopikir agi'. Katonyo, ‘Ni'innan inyo tajahan aku pulah. Aku tajahan molora' boko jurukngku ni'in, moninjakan jurukng inyo lobih bosar agi', ongko monyimpatn somuo gandupm ongko boko bando barakng di santai. 19Lopas nian aku yakitn obai aku udah monyimpatn cukup banyaꞌ kongkamant pakai' botohutn-tohutn manahnyo. Jadi aku ulih torahat, makatn, minum huatan bosonang-sonang ja'am.’ 20Apo Allah bopandir ko urakng dampu nantai, ‘Budu bondar kolai ni'in! Malapm ni'in jam kolai paca'an mati. Sampai, somuo kongkamant inyo kolai kumpulan pakai' diri kolai siku', kinyo pakai' kolai, apo urakng bukai inyo paca'an mondapat'an somuonyo.’ ”
21 Lopas nian Yesus monyimpulan, “Nianam inyo tajahan tojadi agatn somuo urakng inyo mongumpulan kodampuan pakai' dirinyo siku', apo kinyo molabuhan la'apo inyo monyonangan Allah.”
Jangan mooso gola', apo bosandar ko Allah
(12:22-34)
(Mat. 6:25-34)
22Lopasnyo, Yesus bopandir ko boko murid-Nyo, “Obai kodampuan di dunia ni'in kinyo monjamin soluruh kohidupan kaitn, jadi jangan kuatir mongonaꞌi pomakatn pakai' hidup kaitn. Jangan kuatir mongonaꞌi banggi-pakaian pakai' bukakng-tubuh kaitn. 23Hidup lobih pontikng doi' pomakatn. Tubuh lobih pontikng doi' banggi-pakaian.
24Bolajarcam doi' boko burukng dondakng. Sia' kinyo monanam, kinyo bohanyi. Sia' conyiant godukng damo jurukng. Apo Allah monyodia'an pomakatn oca' sia' ulih hidup. Pasti kaitn jouh lobih borogo daripado boko burukng! 25Conyiant urakng inyo ulih bulah umurnyo lobih panjakng soari pan aman io kuatir. 26Kaitn culih molabuhan lou' kocit nantai. Obai nantai, jangan kuatir mongonaꞌi hal bukai.
27Bolajar jam doi' boko kombakng liar inyo tumbuh. Boko kombakng nantai kinyo bokorojo ongko kinyo monjohit jam pakai' bulah pakai'an. Apo sotiap kombakng nantai jouh lobih boi' daripado pakai'an mahal ubo inyo dipakai Rajo Salomo joman komai! 28Boko kombakng liar di lakau tumbuh sobontar mo, opat ditobas ongko dicucul.#12:28: Sobagi'an urakng Timur Tongah momakai rado momant pakai' suluh ponggonti kayu. Apo Allah totap bulahnyo boi'. Kaitn lobih borogo daripado boko kombakng liar di lakau nantai. Jadi, pasti Allah paca'an monyodia'an banggi-pakaian pakai' kaitn. Apo kaitn kurakng pocayo!
29Jangan bulah tujuan kohidupan kaitn bayo momikiran mongonaꞌi makatn-minum. Jangan kuatir hal nantai. 30Boko urakng inyo kinyo mongonal Allah ongkah momikiran mongonaꞌi hal nantai. Apo kaitn udah mongonal Allah Bopai kaitn inyo tohu somuo kopontikan kaitn nantai. 31Jadi, daripado ongkah momikiran mongonaꞌi hal nantai, pikirancam boko hal inyo pontikng dalapm Koraja'an Allah. Lopas nantai, somuo kopontikan kaitn paca'an dionju' ko kaitn.”
32“Kaitn samaꞌan kabatn domba inguan inyo kocit. Apo, jangan gola'. Bopai kaitn inyo di sorugo paca'an sonang moonji'i kaitn somuo la'apo inyo kaitn pontikan obai kaitn hidup dalapm Korajaan-Nyo. 33Jadi, jualcam umputn kaitn. Ongko onju'cam duitnyo ko boko urakng jaro. Aman kaitn molabuhan hal nantai, samo sama'an kaitn bulah somacapm dompet di sorugo pakai' diri kaitn. Dompet nantai co rusa' somanah-manahnyo. Kodampuan di sorugo nantai, kinyo paca'an habis. Conyiant pongolit inyo ulih mongolitnyo. Conyiant gogat inyo ulih morusa'annyo. 34Jadi, soharusnyo kaitn monyimpatn kodampuan kaitn di sorugo, obai di mono kodampuan kaitn ado, di siatn jam hati kaitn.”
Boko murid Yesus gola' hala siap pakai' kodatakan-Nyo agi'
(12:35-48)
(Mat. 24:43-51)
35-36“Kaitn gola' hala bojojago samo sama'an boko hulutn inyo hala monanti kodatakan habakngnyo pulakng doi' hundakan kawitn. Sia' hala bopakaian pakai' molayati habakngnyo, hala momastian pompolitoan rumah totap bonyalo, hala siap oca' aman habakngnyo pulakng ongko mongetok lawakng, sia' ulih lansukng mombuka'i lawakng pakai' io. 37-38Boko hulutn inyo siap paca'an sonang-nyaman, biar pan habakngnyo datakng tinggi malapm damo holapm sunsukng. Habakngnyo tajahan sonang agatn sia' obai sia' hala siap monanti kodatakannyo. Dinga'anbo ni'in: Habakng nantai paca'an monggonti pakai'annyo pakai' molayati sia'. Io tajahan monyiuh sia' pakai' dudu' makatn. Lalu io tajahan molayati sia'.#12:37-38: Siku' urakng habakng biasonyo kinyo molayati boko hulutnnyo. Di si'itn Yesus monggambaran sorugo samaꞌan acara makatn-minum. Biar pan Yesus nantai Habakng, Sio paca'an molayati boko murid-Nyo di sorugo. Tiat jam Lukas 13:29, 14:15-24, huatan 22:16.
39-40Kaitn gola' hala siap pakai' kodatakan Ana' Monsio bobali' ko dunia ni'in, obai Ana' Monsio tajahan bobali' pas watu inyo kinyo dikotohu'i. Samo ubo siku' urakng pongolit datakng timpu inyo kinyo dikotohu'i. Aman urakng umputn rumah udah tohu sombilo pongolit datakng, pasti io monjagonyo oca' pongolit kinyo ulih mansu'.”
41Kato Rasul Petrus, “Tuhatn, pongajaran Duatn doi' poumpamoan nantai pakai' somuo urakng kata'an bayo pakai' koi, murid Duatn?”
42Yesus monimbas, “Pongajaran-Ku nantai pakai' sotiap urakng inyo pintar corodi' ongko sotia agatn Aku. Io samo ubo hulutn inyo sotia ongko pintar-corodi'. Habakngnyo moangkatnyo monjadi kopala' boko hulutn bukainyo. Habakngnyo moonji'i tanggukng-jawab ko io pakai' moonji'i pomakatn ko boko hulutn bukainyo pas watunyo. 43Aman io molabuhan tugasnyo nantai agatn sotia, timpu habakngnyo pulakng, hulutn nantai tajahan sonang-nyaman. 44Pasti, habakngnyo paca'an moangkat hulutn nantai agi' sampai io monjadi pongurus somuo kodampuan inyo monjadi umputn habakngnyo.
45Apo, soumpamonyo kopala' boko hulutn nantai bopikir, ‘Habakngku udah manah kinyo datakng. Pasti ija' manah. Jadi la'apo inyo ku labuhan kinyo kotohuan.’ Lalu io mula'i momantu hulutn inyo bukainyo, boi' lolaki boi' pan inyo botina'. Io pan makatn, minum, sampai komabu'an. 46Nah, habakngnyo tajahan pulakng timpu io co monyangko, pado ari inyo kinyo dikotohu'inyo. Pasti habakngnyo nantai mohukupm hulutn nantai kotakng borat, lalu dimansu'annyo ko tompat hukupan pakai' somuo urakng inyo kinyo sotia.
47Hulutn inyo udah mongotohu'i kohonda' habakngnyo, apo kinyo molabuhannyo, co siap pakai' mohimpa'inyo, io tajahan dihukupm kotakng borat. 48Apo hulutn inyo kinyo mongotohu'i kohonda' habakngnyo, aman io molabuhan lou' inyo salah sampai gola' dihukupm, apo hukupan io kinyo borat.
Aman Allah moonji'i banya' ko siku' urakng, Sio pan paca'an monuntut banya' doi' urakng nantai. Aman Allah moonji'i banyaꞌ tanggukng-jawab ko siku' urakng, Sio pan paca'an monuntut lobih banyaꞌ agi' doi' urakng nantai.”#12:48: Baso Yunani momakai ungkap'an pakai' kosimpulan ni'in. Aman habakng moonji'i hak inyo bosar ko hulutnnyo, io monuntut hulutn nantai pakai' molayati agatn sangant boi'. Samo jam agatn Allah. Aman Sio moonji'i borokat ko kito, Sio pan monuntut kito pakai' molayati Sio agatn sangant boi'.
Boko murid Yesus tajahan moalapi mosalah doi' urakng bukai huatan doi' koluarga
(12:49-53)
(Mat. 10:34-36)
49“Aku datakng pakai' monikapan api ko dunia. Kotakng boi' aman api nantai udah bonyalo.#12:49: Ado tigo tapsiran pakai' masud doi' ‘api’ dalapm ayat ni'in. 1) ‘Api’ boroti ‘pomisahan’ antaro urakng inyo pocayo Yesus huatan urakng inyo cado, 2) ‘Api’ boroti ‘hukupan’ pakai' urakng inyo kinyo pocayo Yesus, damo 3) ‘Api’ boroti ‘proses pakai' momurnian’ umant Allah doi' kojahatan. 50Aku gola' ija' moalapi ajab sonsaro inyo kotakan borat.#12:50: Baso Yunani momakai poumpamoan ‘baptisan’ pakai' monggambaran ‘ajab sonsaro’ inyo paca'an dialapi Yesus, nantai komatian-Nyo. Watu ni'in Aku kotakng salu'. Aku paca'an totap salu' sampai ajab sonsaro nantai jadi.
51Jangan bopikir Aku datakng pakai' mondamaian boko urakng di dunia ni'in. Malahan sobali'nyo! Aku datakng pakai' monyongkayoan. 52Nyongkayoan nantai paca'an mula'i doi' watu ni'in obai ado urakng inyo pocayo ko Aku huatan ado inyo cado. Malahan boko koluarga paca'an hala bolawatan. Sobagai contoh, aman dalapm sobuah koluarga ado lima' urakng, jadi tigo paca'an molawatn duo. 53Bopai paca'an molawatn ana'nyo inyo lolaki huatan ana' lolaki paca'an molawatn bopainyo. Indai molawatn ana'nyo inyo botina' huatan ana'nyo botina' molawatn indainyo. Montuho botina' paca'an molawatn bonantu botina'nyo huatan bonantu botina'nyo paca'an molawatn montuho botina'nyo.”
Boko urakng gola' mongomboi'i hubukan agatn Allah sobolupm tolambat
(12:54-59)
54Yesus bopandir jam ko boko urakng banya', “Watu kaitn moniant awatn di buai barat, kaitn bopandir, ‘Pasti ari honda' hujatn.’ Lalu, hujatn pan bondar-bondar turutn. 55Sama'an nian jam, watu kaitn mooso angin muput doi' padakng pasir di solatatn, kaitn bopandir, ‘Pasti ari paca'an podi' kopas.’ Ongko, kaitn memang bondar, ari pan podi' kopas. 56Ui boko urakng inyo gala' pompadah boi'! Agatn moniant awatn ongko angin, kaitn ulih mongotohu'i cuacanyo. Apo biar pan kaitn udah moniant boko porbuatan inyo udah Ku pulah di joman ni'in, kaitn pan totap co ulih mongotohu'i kohonda' Allah.
57Sobondarnyo kaitn ulih momutusan siku' pakai' molabuhan inyo bondar. Labuhan nantai sobolupm tolambat. Labuhan nantai sobolupm datakng watunyo pakai' Allah mohakipi kaitn. 58Sama'an lapo aman ado urakng inyo monuduh kaitn. Soboi'nyo, sobolupm sampai ko pongadilan, kaitn gola' bousaha oca' pokaro nantai holu disolosaian. Aman nantai kinyo dilabuhan, io paca'an momoso kaitn oca' dibaba' ko pohadapan hakipm. Lalu, hakipm nantai paca'an monyorahan kaitn ko potugas pongadilan. Potugas nantai paca'an monamoan kaitn ko dalapm ponjara. 59Dinga'ancam kaitn kinyo paca'an koluar doi' ponjara sobolupm kaitn mombayar somuo hutakng kaitn.”#12:58-59: Yesus momakai poumpamoan ni'in pakai' monokatan urakng gola' mongomboi'i hubukan agatn Allah sobolupm tolambat. Kito bayo ulih mongomboi'i hubukan agatn Allah molalu'i moaku'i dosa kito huatan pocayo Yesus sobagai Ponyolamant huatan Rajo kito.
Pašlaik izvēlēts:
Lukas 12: TBDS
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties