HLIMI 28
28
1Isake wɔ̀ɔ Jakɔbe yeri ma bâ Nyɛʔɛlɛ wa mòo kân màʔa yo wí kan gbanʔa mà yo: «Mò gá cɛlɛ wà kpe wa Kana picɛɛ ni be. 2Jɛ̀ maa sye Pada Aramu ni wa Betuwɛli go nî, ma no wi to we, ma ya ma cɔ fara wa Laban wi picɛɛ pee ni, ŋa wí nyɛ ma no wi lɛ we. 3Nyɛʔɛlɛ la Sye wì bɛfu fɔlɔ we li ma haʔa, li ma kan pii ní, ma he ma nyɛʔɛ, jango ma kluru ti po fafaʔa. 4Li Abrahamu wi frɛmɛ pa má na ní ma kluʔu pii ní be, jango má bi yà glɛn klo la ni bí bo nabonŋo, la li dá gan Abrahamu ma we li krɛ̀ʔɛ̀ ma wolo.»
5Ki kruʔu ma Isake wɔ̀ɔ Jakɔbe yaʔa, wɔ̀ɔ kɛri Pada Aramu ni Betuwɛli pyɔ Laban krugu. Wi dá bo Aramu klo woo wà wi, Hrebɛka ŋa Jakɔbe nì Esawu nì pe no wi lɛ we.
6Esawu wɔ̀ɔ Isake nya wí ma frɛmɛ pa Jakɔbe na we mòo troʔo Pada Aramu ni wi ya wi cɔ kpe wa ban. Wɔ̀ɔ kí nya nɛ wi gâ frɛmɛ pa wí na kɔ, wɔ̀ɔ kí yo wí kan gbanʔa mà yo: «Mò gá cɛlɛ wà kpe wa Kana ni we.» 7Jakɔbe wɔ̀ɔ wi to nì, ní wi no nì pe kayoʔo kpɔʔɔ mà jɛ mà kɛri Pada Aramu ni we. Esawu wɔ̀ɔ ki woʔo nya ge. 8Wɔ̀ɔ ki cɛn kpo mà yo Kana klo picɛɛ poò na wi to Isake glanʔa we. 9Wi da gɛrí Isimayɛli krugu ŋa Abrahamu wi pyɔ we mà yâ wi picɛ Mahalati kpe ŋa Nebayɔti cɛpii we mà haʔa wa wi cɛɛ pe tɔɔ na be.
Jakɔbe wi ŋlonʔo
10Jakɔbe wɔ̀ɔ jɛ wa Bɛrisyeba ni ma kɛri Aran. 11Wɔ̀ɔ yâ no deʔe kà na yaa nì ki kɔ́. Wɔ̀ɔ syɛn be ki deʔe na. Wi dá ŋglɛnʔɛ kpe mà syɛn mà yugu paʔa na be ki deʔe na. 12Wi dá ŋlonʔo ŋolo mà aluʔugu nya ki jɛ́ naʔa tra na de fɔ mà yâ sun wa namuru ni de. Nyɛʔɛlɛ mlɛŋɛyee à pe na luruʔu na na sye namuru ni na trigiʔi na kpo. 13Welé, Bajegɔ Nyɛʔɛlɛ li dá bo wa ki yugu na ge. À li yo: «Mí nyɛ Bajegɔ Nyɛʔɛlɛ la ma to Abrahamu wi Nyɛʔɛlɛ le mà po Isake wi Nyɛʔɛlɛ. Tra da na ma syɛ́n, mí bi ti kân má ma ní ma kluʔu pii ní be. 14Ma kluʔu pii pé bi ba nyɛʔɛ bì bo nɛ pa tanyrɛʔɛ nyɛ naʔa tra na de. Ma woo pé bi ba no wa tra kanŋaa ticɛrɛ wì bɛfu na. Heme mì bɛfu ma naʔa tra na mí bi ba frɛmɛ ta mo má ní ma kluʔu woo ní be. 15Welé, mí nyɛ má ni su bì da ma kɔrɔsi deʔe kì bɛfu na ga má bi da sye ge. Mí bi ba ma nuŋu bì ban má ni naʔa ki klo la ni le nɛ, mɛjɛn mi ìn bi ma wa, di mí bi ki woʔo kì bɛfu funŋu ga mí yo má kan ge.»
16Jakɔbe wɔ̀ɔ jɛ wi ŋlonmo na mà yo: «Kanyɛmɛ na, Bajegɔ Nyɛʔɛlɛ lí nyɛ naʔamɛ ki deʔe ga na ge, mi ìn dìʔi cɛn!»
17Wɔ̀ɔ fya mà yo: «Ki deʔe ga kí nyɛ fyara deʔe gi dɛ! Nyɛʔɛlɛ li go kí nyɛ naʔamɛ. Namuru ti goyɛʔɛ kí nyɛ naʔamɛ.» 18Ki kpɛntoʔo jɛfantutuʔu na, Jakɔbe wɔ̀ɔ jɛ mà ŋglɛnʔɛ ga kpe wi da syɛ́n mâ yugu pa màʔa yrigi mà hùnmù wo wa ki yugu na ge. 19Wɔ̀ɔ yele kan ki deʔe na naʔa yeri Betɛli, ki kàʔà pe da glú naʔa yeri Lusi. 20Jakɔbe wɔ̀ɔ nofele kon mà yo: «Nyɛʔɛlɛ nà li po ná ni na tanʔala la na mí na sye ge, nà li bru kan ná ma bùu ka bì drere kan ná ma bì ti le, 21nà mi hru bi gɛri nyimi na wa na to wi go nî, ki nyiŋi na Bajegɔ Nyɛʔɛlɛ pa li bo na Nyɛʔɛlɛ. 22Ki ŋglɛnʔɛ ga mi yrigi, paʔa grɛʔɛ Nyɛʔɛlɛ li go. Na yrɛbɛ pì bɛfu ba ma bì gân ná ma, pa mi kɛ̂ wobo laʔa bì pi kân má ma.»
Pašlaik izvēlēts:
HLIMI 28: NLK10
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible Society of Côte d'Ivoire