Jone 20
20
Ota kama keaka
(Matiu 28:1-10; Maka 16:1-8; Luke 24:1-12)
1Ipu ka kobu sate Sade vikavikale inio Maqidalama Mere ta ko olake niami keaka kasi, ni ko keake ta koa lado keaka ko suta ta lula kota vatute veutu kasi azo. 2So sole kota ko rereake ni ko olake Saimone Pita kasi ni kala pado disaipeli, vo Jisu o matu roqueveni, ni ko bazuekake nioqa, “Seta kepa voala vo Lekasa keaka kale azo ni animeta pui meqai nianiia sai kepa vaevalakoi vo!” kikolake.
3Nio Pita ni voa pado disaipeli ta taukavole qo zolaike ni qo olake keaka kasi. 4Nioqata qo rereake nio vo vokale ala disaipeli ta ota va kuletake vo Pita ni okai baroake kuleto koa keaka. 5Ni vota o poqupoquike tu o kelo koa keaka ko poro ni vota o keake ko tapo suma, melai vota pui o amaqeake. 6Voko tova inio Saimone Pita ta o baroake sai, ni tutumazi avole o amaqeake koa keaka ko poro kale. Ni vota o keake ko tapo suma sudesude, 7ni koa suma vo Jisu ko lezu keta vai lupikema ta edolokoi kobeta tekuake ko kiada lokiloki ama, pui koa tapo suma sudesude topi. 8Sai nio voa pado disaipeli vo kuleto okai baroini koa keaka melai o amaqeake sai, ni vota o keake kiadama ko quli, nio vota tuvevo o ikake vo Jisu ko mata saevo. 9Ni seta kebeta evake puliama paqumuko sate koko kaseima Tabu ama Riki topi, ko vota ota maba saevou voukale azo kikolako. 10Sai nio nioqa omuqa disaipeli ta qota vaitake mata pade kasi.
Jisu ko purato Maqidalama Mere kasi
(Matiu 28:9-10; Maka 16:9-11)
11Ni Mere melai ko luluekake nioqa keaka kasi ni kota lojole kobeta ziake koa keaka ko kupekupe. Ni ko kobeta zia keru inio kota ko poqupoquike ni ko soipake koa keaka ko poro kale. 12Ni kota ko keake omuqa mateana sai tapo sabosaboa nioqa qopeta papuake sai Jisu ko tupu lula ko evekoi, kala pado ta lezu raura, ni kala pado ta kiti zara. 13Ni nioqata eri kiqolake, “Ṉoiza, noi sole inio ṉoda zia?” kiqolake.
Nio kota ko kati tiorikake nioqa, “Kake kepa voala ni ke vati olala aṉavo Lekasa inio ada zia, ako aṉata pui avai nianiia sai seke vaevalakoi vo sole!” kikolake.
14Ni koko so kio ko tova inio kota ko lilitake ni ko veake vo Jisu obeta lojoake sai, melai kota pui ko nianiievake ta vo inio vo Jisu kio. 15Ni Jisu ta o kuimaekake ko, “Ṉoiza, noi sole inio ṉoda zia? Lala inio ṉo vailiva?” kiolake.
Ni koko kerukeru ta vota ore bariki kale o iruruputani maba inio kikolake, so sole kota eri kikolake vokasi, “Tanala, ṉo lula ṉoba vovou vo tea, lai bazueka koa zae sai ṉo ṉoba vaevalakoi vo, tu aṉata a ziovou ni aba vovou,” kikolake.
16Nio vo Jisu ta eri kiolake, “Mere!” kiolake.
Ni kota taukavole ko lilitake vokasi, ni eri kikolake, “Raboni!” kikolake Hiburu pesio kale, se Jiu amu ko pesio. Koko kalo ta “Nianiiekato ko maba,” kio kio ko so.
17Nio Jisu ta o bazuekake ko, “Ṉota pui kamalo aṉa, ako aṉata pui nio a qoiva a Mama kasi sole. Melai ṉota sidopu avole ola aṉako disaipeli poso kasi tu pa lai bazute sekasi, ‘Aṉata ada koilou inio vo aṉavo Mama ni mevo Mama kasi, vo aṉavo Baṉara ni mevo Baṉara kasi,’ ” kiolake.
18So sole Maqidalama Mere ta ko olake ni komai bazuekake se disaipeli poso ko kota lula ko veala vo Lekasa kio, ni vo inio okai bazuekala ko kikolake.
Jisu ko purato voko disaipeli poso kasi
(Matiu 28:16-20; Maka 16:14-18; Luke 24:36-49)
19Ni koa Sade raisiraisi ama taku kale inio sea disaipeli poso ta ke padoivake tibutibuli ama lose kale, ako seta keta ma ṉake se Jiu ama tanatanamu sole. Sai nio Jisu ta o kuevake ni o lojoake seko tiania nio, “Bule mekasi,” kiolake. 20Vota so kiolake ni oma kasekake voko omuqa ṉase ni voko ropa kale ama tabi tu ke uria tuvevo putou. Nio se disaipeli poso ta keta matu zoleike ke vea keru vo Lekasa Jisu. 21Ni Jisu ta mata so kiola sekasi, omuqama taku kale, “Bule mekasi. Omadeuvo vo Mama o soroele aṉa jari, aṉata a joroemela me,” kiolake. 22Vota so kiolake saita inio omai kozatake se, ni eri ma kiolake, “Vomo vo Tabu ala Auvana. 23Ni meta meda ma akoekou maba poso ko sarueko poso inio kota kota akoilou, melai pui meda ma akoekou inio kota pui kopa akoilou,” kiolake.
O ṉavi Jisu ko kasa elo Tomasi kasi
24Ni kala pado sea toni omuqa kale ala, Tomasi “Modi” va kikelani, ta pui o zomanake Jisu o purate keru lose kale. 25Nio se disaipeli poso vokale amu ta ke bazuevake vo tova, “Eṉeta ṉe veala vo Lekasa!” kikelake.
Nio Tomasi ta eri kiolake sekasi, “Aṉata pui ada va kelou a vilu kale ko pato ko zae poso voko omuqa ṉase kale, ni pui a jukuekou aṉako seseu koa purapura kale, ni aṉako ṉase voko ropa kale ama tabi sopere ko amaqeovikoi, aṉata pui aba tuvevo putou,” kiolake.
26Ni omadeu vuiki ko tova inio se disaipeli poso ta mata ke padoivake koa tibutibuli ama lose kale ni vo Tomasi melai se sate. Ko tibulu poso ta vinavina tibutibuli, melai Jisu ta o kuevake ni o lojoake seko tiania, ni “Bule mekasi,” kiolake. 27Sai nio vota eri kiolake Tomasi kasi, “Tomasi, ṉota kua tu kea aṉako omuqa ṉase, ni sukueka ṉoko seseu koi, ni rauqaze ni ika ṉoko ṉase aṉako ropa kale. Epeze niuniala elo, melai ṉota tuvevo pute!” kiolake.
28Ni vo Tomasi ta o vati tiorikake vo, “A Lekasa ni a Baṉara ṉa tiṉoineni!” kiolake.
29Nio Jisu ta eri kiolake vokasi, “Ṉota ṉolai oqua, ako ṉota ṉo lea aṉa sole, kio? Maurumauru amu tisoiko se pui ke leani aṉa melai ke tuvevo putani!” kiolake.
Komia buka ko kio ni kalo
30Ni Jisu ta o ereke mata matu kubo aqasiele ama iruruputo poso voko disaipeli poso ko vilu kasa, ko pui aba rikiekema komia buka topi. 31Melai aṉata a rikieka komia buka kale ama quli tu meta me duvevo puekou vo Jisu inio vo Baṉara o soroeveni Pakio kio, vo Baṉara vo Meqora, ni koa tuvevo puto kale meta me qovou ko tuvevo ama saevo voko ṉikale.
Pašlaik izvēlēts:
Jone 20: BLBNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
The New Testament in the Bilua language, Solomon Islands © The Bible Society of the South Pacific, 1995.