Jone 19
19
1Sai nio vo Paelati ta o soruemake se pazokinio ko maba madu tu seta ke vati zio tu sisiparu ke ivo vo Jisu. 2Ni seta keva viriviriekake ko tarapae kada sama siakona kale ni kevai kiakake voko lezu topi, ni seta kevai kiakake ko soqu jaria domu ama rosia sabosabo, aikovakova ko jari ama, 3ni seta ke kuevake ni eri kikelake, “Raurai se Jiu amu vo Aikovakova ṉa!” kikelake. Ni seta ke pazovake vo.
4Ni Paelati ta mata o saqorake kupele ni eri kiolake koa matu padopadoilo maba kasi, “Kemoni, aṉata a mela saqorivou vo koi, tu a melai vakakuke me ko aṉata pui ada va kea kama sarueko tu vota kuiripato saṉa o elo kio,” kiolake. 5Nio Jisu ta o saqorake kupele kada tarapae o lezu topi sala ni soqu domu rosia sabosabo ala. Sai nio Paelati ta eri kiolake sekasi, “Vemo, nei nio voa maba!” kiolake.
6Ni so keru se raura kama siama madu ni se Jelepade ke kati vailani maba madu ke vea keru vo seta ke velavelaoke, “Patoevomo korosi topi! Patoevomo korosi topi!” kikelake.
Ni vo Paelati ta eri kiolake sekasi, “Aṉata puliama sarueko ada va kea tu a vati tuamuko ko vou, sole meta vati olamo me ṉavi ni patoevomo.”
7Melai se Jiu amu ta ke tiorizatake mata, “Eṉeta kama bazu saṉela ko vota o male tu o vou kikolako, ako vota okai rairizia ta vota Baṉara vo Meqora inio kiolani sole,” kikelake.
8Nio so keru vo Paelati ota ma viqa keru koa rukuruku, ko vo Jisu vo Baṉara vo Meqora inio kiolani kio sama, vota ota matu ṉake. 9Nio vota mata ota amaqeake titizato ko pade kale ni o kuimakuimaevake vo Jisu, “Lai kazo ṉo quevani ṉa inio ko ṉo?” kiolake. Melai vo Jisu ta pui o tiorizatake.
10So sole Paelati ta eri kiolake, “Ṉota ṉoda lupaova lati pesio aṉa, kio? Kerukerueka, aṉa inio a roveani lala rupasiṉo ṉo ni a roveani lala patoeṉo ṉo korosi topi,” kiolake vo Paelati.
11Nio Jisu ta o vati tiorikake vo, “Kota pui ko katizia ṉokasi vo Baṉara kasi azo tea, ṉota puliama pizato saṉa inio ṉoda elo tu ṉota ṉolai ereko kama quli. So sole vo aṉa o vaelani ṉoko ṉase topi ko sarueko ta kokai paloasa ṉoko sarueko,” kiolake.
12Ni so keru Paelati o viqa keru ko inio vota o vailikake kama pado keve tu o rupasivo vo Jisu kiolake. Melai se Jiu amu ta mata ke velavelaoke, “Ṉota ṉo rupasivou vo, inio ṉota pui vo Romu ala Aikovakova vo baerebaere ṉa! Vo aikovakova okai rairiziani maba vo inio vo Romu ala Aikovakova vo kana sole!” kikelake.
13Ni so keru vo Paelati o viqa keru koa pesio poso inio vota o saqorivake vo Jisu kupele ni o ṉavi ta o papuake titizato ko papupapu topi, koa zae ko ṉi ta “Lado Sapera.” Hiburu pesio, se Jiu amu ko pesio kale, ta “Qabata” ka kikolako. 14Koa taku ta sipole ṉadale koa Porare ṉaniu kale puliako Alokato ko Ṉojola elo, ni Paelati ta eri kiolake se Jiu amu kasi, “Vemo mevo aikovakova!” kiolake.
15Ni seta mata ke velavelaoke, “Vouvaevomo! Vouvaevomo! Patoevomo korosi topi!” kikelake.
Ni Paelati ta o kuimaemake ni eri kiolake, “Meta meqai zaria tu aṉata a vouvaevou mevo aikovakova, kio?”
Ni se raura kama siama madu ta eri kikelake, “Eṉeta omadeu pado aikovakova saṉela, ni vo inio vo Romu ala Aikovakova!” kikelake.
16Sai nio Paelati ta o vaevake vo Jisu seko ṉase topi tu seta ke patoevo vo korosi topi.
Seko patoevo vo Jisu korosi topi
(Matiu 27:32-44; Maka 15:21-32; Luke 23:26-43)
So sole se pazokinio ko maba madu ta ke noqoevake vo Jisu. 17Ni seta ke vati saqorake vo ni o ṉavi ta o borikake voko korosi, ni ke vati olake kama pado zaekale koko ṉi ta “Reikareika kama Lezu ko Zae.” Hiburu pesio, Jiu amu ko pesio kale, ta “Qoloqota” ka kikolako. 18Sai nio seta ke patoevake vo korosi topi ni mata omuqa maba kidi nioqako omuqa korosi topi voko omuqa rana, vota nioqako tiania. 19Ni Paelati ta o rikiekake kama pado bazu nio se pazokinio ko maba poso ta ke nasoekake korosi topi, “Nei nio vo Nazareti ala Jisu, se Jiu amu vo Aikovakova” kikolako. 20Vota o rikiekake koa pesio poso, Hiburu pesio kale, ko ikio se Jiu amu ko pesio, ni Lateni pesio kale, ko ikio se Romu amu ko pesio, ni Quriki pesio kale, ko ikio se Qurisi amu ko pesio. Ni matu kubo Jiu amu ta ke tiromikake ko, ako koa zae sai se Jisu ke patoevekoi korosi topi ta pui vaṉa Jerusalema peuru kale azo sole. 21Ni Jiu amu ko raura kama siama madu ta ke keake ko ni eri kikelake Paelati kasi, “Pui uri ko ṉoṉo rikiekalama, ‘Se Jiu amu vo Aikovakova,’ so sole besieka, ‘Nea maba kiolani, “Aṉa inio se Jiu amu vo Aikovakova lala,” ’ ” kikelake.
22Melai Paelati ta o mati tiorikake se, “Ko quli aṉa lula a rikiekalama, ko ikio kobeta elou,” kiolake.
23Ni se pazokinio ko maba poso ko patoevo vo Jisu korosi topi ko tova vasi, seta keta vai daisimatake voko suma ni ariku pitasa ke ikake, ni kekai okotake ṉeamuko ko sea pazokinio ko maba poso. Ni so jari seta keta va koake ko rosia sabosabo, kota paqupaquli pide ama, omadeu pala. 24Nio se pazokinio ko maba poso ta eri kikelake ke ṉavio kude, “Animeta pui me riziko ko, melai meqai daisimatou tu me velou vo o kovo ala,” kikelake. So kokai kaevo ta, tu ko Tabu ama Riki ta tuvevo ko elo, ko eri kikolako,
“Seta keta lai bobosake aṉako suma,
ni kekai daisimate aṉako sabosabo.”
Ko quli ko tuvevo iko kale inio pazokinio ko maba ta so ke kae.
25Nio sai kebeta lojoake vo Jisu ko korosi ko sipole voko niania, ni voko niania ko visi, ni Mere Kolopasi ko reko, ni Maqidalama Mere. 26Ni vo Jisu ta o keake voko niania ni voa disaipeli vo o matu roqueveni vo ta sai qopeta lojoake. Nio vota eri kiolake voko niania kasi, “Niania, vea voa disaipeli ṉovo meqora,” kiolake.
27Ni koko tova vota eri kiolake voa disaipeli kasi, “Kea ṉoko niania,” kiolake. Ni so keru inio voa disaipeli ta o odiekake ko voko pade kasi ni kota ko evake sai vokasi.
Jisu ko vou
(Matiu 27:45-56; Maka 15:33-41; Luke 23:44-49)
28Ni koko tova Jisu ta o paqumukake ta erisaṉa ta kota okota kiadama quli, sole eri kiolake, tu ko tuvevo pueko ko Tabu ama Riki kikovevo, “Kabare ada eva,” kiolake.
29Kama pado lolulolu paza kama vaini ko ju sama ta miduku topi kobeta papuake sai voko sipole, nio seta ke duluekake ko kuna zaute koa vaini jukale ni ke nasoekake hisopi ore ko kata topi ni ke okekake ni keta vai tibaekake voko suto. 30Ni Jisu ta o kuzuekake koa vaini ko ju ni sai nio vota eri kiolake, “Kota okota kiadama iruruputo!” kiolake.
Ni vota o loqunikake voko lezu ni ko vaevake voko auvana.
Seko tava jataeko Jisu ko ropa kama rana
31Ni se Jiu ama tanatanamu ta ke pasekake ko zariekato Paelati kasi tu seta keta ma lopaeko sea zouke maba poso ke vouvaemani ko kiti poso, tu taukavo ke vou, tu ke ivimo korosi poso topi azo. Seko paseko ko ko raki ta kota Porare ṉaniu, so sole seta pui keka zariake tu koa tupu poso, korosi poso topi ama, ta kokai barou ko leama Sabati, tabu ṉaniu. 32So sole se pazokinio ko maba madu ta ke olake ni keta vai lopaekake vo kuleto ala maba ko omuqa kiti, ni mata vovo omuqala ko, nioqa ke vouvaekeni nioqa Jisu sate. 33Melai kevai baroake vo Jisu ta ke veake ta lula ota utupake, so sole seta pui keta va lopaekake voko omuqa kiti. 34Nio kala pado sea pazokinio ko maba poso azo ta ota va jataekake Jisu ko ropa kama rana voko sopere kale, nio maba so keru koa taku kale inio dara ni ju kota rereake.
35Aṉa a qeveni lala kiadama komi quli inio aqai bazubazutani lala, ni aṉako bazu ta tuvevo ama, ni aṉata aqai nianiia ta aṉa a qasekako quli ta tuvevo ama, so sole me melai me rovea tuvevo puto.
36So kokai kaevo ta, tu ko Tabu ama Riki kikovevo lulavo ta tuvevo ko elo, “Puliama kama pado voko piza ta kopa lopailou,” kikovema riki. 37Ni mata kama pado kobu Tabu ama Riki kikovevo, “Sea maba poso ta ke velou se vo ke jataeveni,” kikovema.
Jisu ko mutavo
(Matiu 27:57-61; Maka 15:42-47; Luke 23:50-56)
38Ni koko tova inio kala pado maba ta o kuevake sai, vota Arimatiala Josepa. Vota kala pado vo Jisu o tuvevo pueveni, vo pui kasa opa eveni ako vota ota ma ṉae se Jiu ama tanatanamu sole. Ni vota o pasekake Paelati kasi Jisu ko tupu tu o zarieko tu o kati zio. Nio Paelati ta ova zariekake koa tupu tu vota o kati zio, so sole Josepa ta o olake nio opa borikake. 39Ni Nikodimasi, vo ovai keveni vo Jisu ipu kale, ta o olake Josepa sase kama uria tui ama lumu poso sate, moa ni alosi kale ke valuvaluekako, zouke toni sike kilo koko duki sama. 40Nio nioqata qo borikake Jisu ko tupu ni qo sudekake suma kale uria tui ama lumu poso sase, ako soa tukitukieko inio ke evani se Jiu amu ko mutaivako tupu niami kale sole. 41Ni Jisu ke vouvaevekoi ko matu sipole ta inovoana kala ore bariki sai, ni sai ta inovoana kala pado vairu ala keaka niami puliala maba lula ovai mutaivani. 42Ni kota lula kokai baroa Jiu amu ko Sabati ko inainao ko taku, sole seta ke vaevake vo Jisu sai koa keaka niami kale, ako kota sipole ama sole.
Pašlaik izvēlēts:
Jone 19: BLBNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
The New Testament in the Bilua language, Solomon Islands © The Bible Society of the South Pacific, 1995.