Luka 4
4
Kweseka kwaku Yesu
(Mateyu 4.1-11; Marko 1.12-13)
1Ndipo Yesu, wakuzala ndi Mzimu Wakupaturika, wanguweko ku Yordane, ndipo warongozgekiyanga ndi Mzimu mu bozwa, 2mazuŵa machumi ghanayi (40) wakweseka ndi Diabolo. Ndipo kuti wangurgha kanthu cha mu mazuŵa ghenigha; ndipo ghachimara gho, wangufwa ndi nja. 3Ndipo diabolo yo wanguti kwaku iyo, “Asani we Mwana waku Chiuta, unene mwa uwu kuti uŵe chiŵande.” 4Ndipo Yesu wangwamuka kwaku iyo, “Kwalembeka, kuti, ‘Munthu wajariyenge wamoyo ndi chiŵande chija pe cha.’ ” 5Ndipo wanguti wamkwezga, wangumrongo maufumu ghose gha uzengi mu kamphindi ka nyengo. 6Ndipo diabolo yo wanguti kwaku iyo, “Kwaku iwe ndipaskenge mtufu uwu wose, ndi unkhankhu waku vyo: pakuti kwaku ine waninkhika; ndi kwaku mweniyo ndikhumba ndiupaska. 7Viyo asani iwe ulambiyenge pa chisku changu, vyose viŵenge vyako.” 8Ndipo wakwamuka Yesu wanguti kwaku iyo, “Kwalembeka,
‘Ulambiyenge Mbuya Chiuta wako,
ndipo iyo pe yija umsopenge.’ ”
9Ndipo wangumrongozge ku Yerusalemu, ndipo wangumumika pa kasongo ka kasopi, ndi wanguti kwaku iyo, “Asani we Mwana waku Chiuta, ujipong'e pasi: 10pakuti kwalembeka,
‘Ŵangelo ŵake waŵalanguliyenge paku iwe,
kwachikusungirizga’:
11ndipo,
‘Mu manja ŵakunyamuliyenge,
vinu ungagunyuwa pa mwa phazi lako.’ ”
12Ndipo wakwamuka Yesu wanguti kwaku iyo, “Kwaneneka, ‘Ungesanga cha Mbuya Chiuta wako.’ ” 13Ndipo penipo diabolo wangumara mesedu ghose wangutuwako kwaku iyo mpaka pa nyengo yakutemeka.
Yesu watamba nchitu yake mu Galile
(Mateyu 4.12-17; Marko 1.14-15)
14Ndipo Yesu wanguwere mu Galile mu nthazi ya Mzimu Wakupaturika: ndipo mbiri yapaku iyo yinguwanda mu charu chose chakuzunguliya. 15Ndipo mweneko wasambizganga mu masinagoge ghawo, wakukankhuskika ndi wose.
Yesu wakanika mu Galile
(Mateyu 13.53-58; Marko 6.1-16)
16Ndipo wanguza ku Nazarete, kweniko wangulereka: ndipo wangusere mu sinagoge mwa karusu kake pa zuŵa la Sabata, ndipo wangusoka kwachiŵerenga. 17Ndipo kungupaskika kwake buku la mchimi Yesaya. Ndipo wanguti wabanuwa buku lo, wangubowozga malo penipo pangulembeka,
18“Mzimu wa Mbuya we paku ine,
pakuti wangunditukutizgiya kutauliya ŵakavu ghakunozga.
Wandituma kumemeze chifwatuwa ku ŵamikoli
ndi kuŵachiburumutiya chiwona so,
kuŵadomo ŵakuphwanyika,
19kumemeza chirimika chamarondeka cha Mbuya.”
20Ndipo wanguti wajara buku lo, wangulipaska ku mumirizi, ndipo wanguja pasi: ndipo maso ghaku wose mu sinagoge ghaŵanga pake dodoli. 21Ndipo wanguwanda kuŵakambiya kuti, “Le lafiskika lembo lenili mu makutu ghinu.” 22Ndipo wose ŵangumsimikizgiya, ndipo ŵatondwanga pa mazu gha wezi ghakutuwa mu mlomo wake; ndipo ŵanenanga, “Asi uyu ndi mwana waku Yosefe?” 23Ndipo wanguti kwaku wo, “Posepose mundineniyenge ntharika yeniyi, ‘Ng'anga, ujichizge; vyenivyo vyose tavwa vyachitika mu Kapernaumu, chitanga muno so mu charu cha kwako.’ ” 24Ndipo wanguti, “Nadidi ndinene imwe, Palive mchimi wamarondeka mu charu cha kwake. 25Kweni kwakuneneska ndikuneniyani, mwenga vyoko vinandi mu Yisraele mu mazuŵa ghaku Eliya penipo kuchanya kungujarika virimika vitatu ndi myezi yinkhonde ndi umoza, po chinguŵiyapo chilala chikuru pa charu chose. 26Ndipo chingana nkhu yumoza kuti wangutumika Eliya cha, kweni ku munthukazi choko ku Sarepta waku Sidoni. 27Ndipo ŵamakhati ŵanandi ŵengamu Yisraele pa nyengo yaku Elisha mchimi yo: ndipo pengavi yumoza waku wo wanguphotoreka, kweni Namani mu Siriya yo.” 28Ndipo wose ŵanguzazika ndi chikwiya mu sinagoge, ŵachivwa yagha; 29ndipo ŵangusoka, ŵangumpong'a kubwaro ku muzi, ndipo ŵanguka nayo ku sendemu la phiri penipo muzi wawo unguzengeka, kwachimpong'a pasi kasindira mutu. 30Kweni wangusorota mukati mwawo wanguruta.
Munthurumi yo wenga ndi mzimu wauyu
(Marko 1.21-28)
31Ndipo wangusikiya ku Kapernaumu, muzi waku Galile. Ndipo waŵasambizganga pa masabata: 32ndipo ŵazizwanga pa chisambizgu chake; pakuti mazu ghake ghenga ndi mtufu. 33Ndipo mu sinagoge mwenga munthu wakuŵa ndi mzimu wa demone wawiyu; ndipo wangukambura ndi liu likuru, 34“Owe! Te ndi chine ndi iwe, Yesu waku Nazarete? Kumbi waziya kwachinanga ifwe? Ndikuziŵa mo uliri, Wakupaturika we waku Chiuta.” 35Ndipo Yesu wangumchenya, wakuti, “Sunama, ndi tuwamo mwake.” Ndipo demone yo, wanguti wampong'a pasi, wangutuwamo mwake kwambura kumpweteka kose. 36Ndipo munthondwi unguŵaŵiya wose, ndipo ŵakambirananga, ŵakuti, “Ngane mazu yagha, pakuti ndi mtufu ndi nthazi walanguliya mizimu yawiyu, ndipo yituwa?” 37Ndipo mbiri yapaku iyo yawandiyanga mu malo ghose gha charu chakuzunguliya.
Yesu wachizga ŵanthu ŵanandi
(Mateyu 8.14-17; Marko 1.28-34)
38Ndipo wanguti wasokako ku sinagoge lo, wanguza mu nyumba yaku Simoni. Ndipo mpongozi waku Simoni wakorekanga ndi muliŵavu mukuru; ndipo wangumpempha iyo. 39Ndipo wanguti wamiyapo pake, wanguchenya muliŵavu, ndipo mungumtaya: ndipo wanguti wayuka sosonukweni waŵateŵetiyanga.
40Ndipo lichisere dazi wose ŵeniwo ŵaŵanga ndi ŵakutama ndi matenda cha mitundumitundu, ŵanguza nawo kwaku iyo. Ndipo iyo wanguti waŵikapo manja paku wo yumoza ndi yumoza, wanguŵachizga. 41Ndipo ŵademone nawo ŵatuwangamo mu ŵanandi, ŵakukambura ndi ŵakuti, “Iwe ndiwe Mwana waku Chiuta!” Ndipo wanguŵachenya, kuti waŵazomerezganga kurongoro cha, pakuti ŵamziŵanga kuti wenga Kristu.
Yesu wauza mu sinagogi
(Marko 1.35-39)
42Ndipo kunguti kwacha, wangutuwako, wanguruta ku malo ghabozwa; ndipo mizinda yo yampenjanga ndi yinguza kwake, ndipo yamumikanga kuti wangatuwako kwaku wo cha. 43Kweni iyo wanguti kwaku wo, “Kutindenere kutaula makani ghakunozga gha ufumu waku Chiuta mu mizi yamwenga so: pakuti ndatumikiya chenichi.” 44Ndipo wamemezanga mu masinagoge ghaku Galile.
Pašlaik izvēlēts:
Luka 4: TongaMw
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible Society of Malawi