YOHANES 3
3
Yesus mbrap bit Nikodemus
1Mpe dima lene andigpoi Nikodemus gwam nok Nikei Puig Yahudi binggre kin nimpung Farisi nya cem. 2Mpe di gom lene noni ug ngat Yesus mem mmun bihig ser Noni “Guru e, nikan tut bipia Nani ne guru di Allah cuk kwei ri. Gino Noni ningat rin bit Na bi ne bit bon abibon mindur nok gi abibon dima kan bi.”
3Yesus buhup “Ma ayok ngon kep bipia gino tungwagom yai nisrek nimbicanti bi#3:3: Nipas kep yai nisrek nimbicanti bi cem kei lene nipas kep srek leu anai hu kwei bi cem kei. Kata dini kwei leu nihyet Yunani ba, jo ei Yoh. 3:7 ti cem. ne bit bon noni coi bit Allah Ninyeng Tak Kepti kan bi.”
4Nikodemus hig ser Yesus “Gino tungwagom ug wer andigpoi su ne notou nipmem srek tut noni hanyen bu i? Bit bon noni coi hanyen ug ei nipmem ninghopti bisrek tut noni hanyen bu kan bi!”
5Yesus buhup “Dipai nijit bina bipia gino tungwagom srek tug hon minyei kin Ninnei Gi Kwes bi ne bit bon noni coi bit Allah Ninyeng Tak Kepti kan bi. 6Tungwatu nya igyai niyaijo tug hon icig bat-ipmem bat nya noro igyai niyaijo nijep tug hon Allah Ninnei. 7Anga leu sut gi dipai bina bipia suar jahagom jiyai nisrek nimbicanti#3:7: Nipas kep yai nisrek nimbicanti: Angig ayai kep Yoh. 3:3. au. 8Bit leu nok hou di kui nyeti leu nima kwei-nima kwei ba, amiap nibimbi noro akan tut nikwei leusi kin nuug eisi bi. Nok gima cem tut yo di Allah Ninnei srek tut yok nya.”
9Nikodemus hig ser Yesus “Notou mun di apai sut dima mipek kep mem tungwatu nya i?”
10Yesus hig ser noni “Nani ne guru di ninyeng jei ei mben Israel igyai him rin noro akan tut mun dini yok bi e? 11Ma ayok ngon kep bipia nitri tut mun di nikan tut ba, nipai sut mun di ningat bou niyai him tu noro jingon jo kep nihyet di nitri tut bije bi. 12Dipui sut mun di pek kep mem tungwatu nya ei dihyeisi dini bije noro jingon jo kep Da bi. Gino dipui sut mun di pek kep ei gwamti bu bije lene notou mijingon jo kep i? 13Munggwom Tungwatu Nipmot di kwei leu gwamti Nongkom kui ug ei gwamti noro tungwa hi kui ug ei gwamti bi sren.
14 #
Bil. 21:9
Bit leu nok Musa kon wou ngkimom-tembaga ei biei ninggrupti bitas tut ei iggum ndigsi. Nok gima cem tungwatu nya mitas biei tut Munggwom Tungwatu Nipmot, 15leu binhyepo bikwop no di ba ningon com Noni miyai niyaijo nijep di jo kikau.
16Lewo Allah ningon ngakei tungwatu dihyeisi dini hagom nindig bibor apino kes Nipmot di nimig gom ngat hak ei mem yok leu binhyepo bikwop no di ba ningon com Nipmot misar bi noro yai niyaijo nijep di jo kikau. 17Lewo Allah cuk Nipmot kwei ei dihyeisi dini nok nikei di pai kep tungwatu nya bi noro nok No di teu yok leu sisar biyai niyaijo nijep biyok. 18No di ba ningon com Nipmot tug ndei hukum bi. Noro no di ba ningon com Noni bi tug ndei hukum leu Allah tu lewo ba ningon com Nipmot di nimig gom ngat dima bi. 19Noni tug ndei hukum bitig dino nipigati piga digai dihyeisi dini tu noro tungwatu nya ijoi sut nidinditi nindig dor njiriek nipigati lewo igyai munti nya hagom kinei bibor. 20Niyai kep mun di kinei cig ningon mpo tut nipigati bikwei ndam nipigati bi. Noni kou sut gima nide mun di kinei nya jo brei ei tungwatu nya igyai him a. 21Noro no di yai igbit Allah ningon kanti kwei ndam nipigati leu binhyepo nipigati piga digai nide niyai igbit Allah ningon kanti.”
Yohanes di tur tungwatu nya ei minyeiti pui sut Yesus di ninyeng jei
22Gima ngwig leu api Yesus kin yo di igya kui Noni yuug ei hanjop Yudea. Noni bong bit yok ei sirima mem bed poi ba, tur tungwatu nya ei minyeiti. 23Yohanes cem tur tungwatu nya ei minyeiti ei mpia di ninyeng Ainon dideu minu ndig Salim. Mpia ttou nsi dima nok minyei nimangti ri. Gima rino tungwatu nya yuug ngat noni leu binhyepo noni tur yok ei minyeiti. 24#Mat. 14:3; Mrk. 6:17; Luk. 3:19-20 Mpe dima ne Yohanes sima ei ig bui nsi bigyo.
25Yo di igya kui Yohanes ibou poi kin mben Yahudi gom isrep yam tut midut nipiap yonti bipwoisi. 26Yoni yuug ba, ihig ser Yohanes “Guru e, ayok ngon kep No di bit na ei Minyei Yordan nite dima ug di ando binye pima e? Nogindini Noni cem tur tungwatu nya ei minyeiti apino yahagom induk yam bingwig kep Noni!”
27Yohanes buhup “Gino Allah sindui sut bi lene bit bon mun nyeng hi pek kep mem tungwatu nya kan bi. 28#Yoh. 1:20 Jingon dorti tut mun di dipai sut Noni pima bipia dani ne Nibou Ndig di teu tungwatu nya biyai niyaijo nijep biyok rin bi noro Allah cuk da kwei bibie mem Noni. 29Bit leu nok pinai pilei di wak nitnem. Nongkom ninyeng tak kep sop gwam nitta pilei di noni yok wa kep tu. Noro nisut di ya kui noni ntu kep nihyet apino ningon llei sut. Nok gima tut dani cem. Nogindini diyai nillei titut yam ei dingonti. 30Suar Noni bon ninyeng di jei bibor noro dibon dinyeng wer cun he.”
Ningginausi tut No di juk kwei leu gwamti
31“No di juk kwei leu gwamti ninyeng jei dor njiriek tungwatu nya yahagom. No di ntun tungwatu dihyeisi dini him nggre kin yo dima ba, noni pui sut mun di jo ei dihyeisi dini he. No di juk kwei leu gwamti ninyeng jei dor njiriek tungwatu nya yahagom. 32Noni tri tut mun di Noni ngat bou niyai him bimiap ei nitingou nsi cem noro tungwatu nya ingon jo kep nihyet bi. 33Tungwa tou rino ba ningon com nihyet di pai dima lene mipai ei nibreisi bipia Allah nihyet ne nihyet di nijit-jau ri. 34No di Allah cuk kwei tri tut nihyet di kwei leu Allah lewo Allah kes Nonti Ninnei titut yam ei ningonti. 35#Mat. 11:27; Luk. 10:22 Nicig ningon ngakei Nipmot bibindei ba, Noni krau nisindemti hagom ei nindati. 36No di ba ningon com Allah Nipmot yai niyaijo nijep di jo kikau ei ningonti tu. No di ba ningon com Allah Nipmot bi yai niyaijo nijep bi. Noro noni tug ndei hukum leu Allah bijo ninno bijo kikau.”
Pašlaik izvēlēts:
YOHANES 3: HAD
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties