YOHANES 2
2
Pesta niwak yamti ei minu mien Kana
1Njap can bu lene tungwatu nya ibon pesta niwak yamti ei minu mien Kana ei hanjop Galilea. Yesus nipmem cem ningat rin ei pestati dima. 2Nibou pesta sok nihyet mem Yesus kin yo di igya kui Noni cem bikwei ei pestati dima. 3Jei bi lene ba anggur ngei pingge bingwig leu yok. Gima rino Yesus nipmem pai biNoni “Ide ba anggur ngei pingge bingwig leu yok tu.”
4Yesus buhup “Amei e, acuk Da au. Lewo tto bou mem dikinyon ei Ditde midyaiti dem bigyo.”
5Noro Yesus nipmem cuk awak nya “Ma jiyai igbit dipmot nicuk jeti hak ug.”
6Dibijig ngwak mem ibipiap inda eisi ningat muhwindagom jo ei mpia dima bit leu nok mben Yahudi igyai kepti. Dibijig gom dem mem ikiber kau nuut simnaimuhwidip eisi. 7Gima rino Yesus cuk awak dima yok “Ma jitau minyei ei dibijig nyati ba, hagom ut.” Lene itau minyei ei hagomti buut. 8Lene Noni cuk yok “Nogindini ma jiba mok bitau minyei dima bijittei bak nibou pesta niwak yamti.” Awak nya igyai hagom bit leu nok Yesus nicuk yoti bittei bak nibou pesta. 9Noni dut minyei bingon lo, nok ba anggur ngei noro kan tut nikwei leusi bi. (Awak nya di itau minyei ikan tut nikwei leusi.) Gima rino nibou pesta hig pinai pilei di wak nitnem kwei, 10bipai binoni “Bikwop tungwatu nindigsi yahagom itri ba anggur ngei di nyop kei bak tungwatu nya nipou ba, idut bindei yok ug e. Leu api itri gi nyop haigtu bi niabiati bu. Noro abet ba anggur ngei di nyop bibor kei kikau kwei bipek nogindini kep!”
11Mindur dima ne Yesus sindi bibon tirigi nimbie him ei minu mien Kana ei hanjop Galilea. Noni ba bindo dima bindo tut Nide ninyeng jei biborti. Gima rino yo di igya kui Noni ingon jo kep Noni.
12 #
Mat. 4:13
Gima ngwig leu api Yesus kin nipmem kin nikinjoi bat nya kin yo di igya kui Noni yahagom yuug ei minu ndig Kapernaum bigwam ei sirima mem njap poi.
Yesus coi ug ei Tuhan De Ig
(Mat. 21:12-13; Mrk. 11:15-17; Luk. 19:45-46)
13 #
Kel. 12:1-27
Mpe dima lene son dideu Njap Ndig Paskah tu. Gima rino Yesus ug ei minu ndig Yerusalem. 14Tirigi Noni coi ug ei Tuhan De Ig lene Noni ttau kep nitri-nipek sapi kin domba kin hakimoi cig nya bitut niluei mitiei cig nya di igwam ei bilen dip. 15Gima rino Noni ba kuk di Noni kinding ba, ngot-ngot yam bingkiem bijji mindhe-ndhe bitut domba kin sapi hagom leu Tuhan De Ig binjei niluei mitiei cig nya ide bilen tut mitiei ba, mitiei hagom cut bigimahap bisrig yamti. 16Lene Noni pai bak nitri hakimoi cig nya “Ma jikon jide hakimoi nya leu mpia dini! Ma jibibon Dicig De Ig dini nok kios bousi au!” 17#Mzm. 69:10 Gima rino yo di igya kui Noni ikan kep Allah nihyet di pai “Allah e, dingon ngakei Ade Ig ba, gima dem kep nok hum di cig-cai ei dingonti.”
18Nibou mben Yahudi nya isrep huk Noni bipai “Abon mindur di bindo binye tut gi bitig dino ayai abou tut nok i.”
19 #
Mat. 26:61, 27:40; Mrk. 14:58, 15:29 Yesus buhup “Gino jilet Tuhan De Ig dini lene midingot hanyen ei njap ningai.”
20Lene ibuhup “Notou mem gima angot ig dini hanyen ei ninsi njap ningai i? Yo di ingot ig dini inda jo kep bingot kikau ei ari bingwam ningot bitai ba, muhwindagom leu api put.”
21Noro Tuhan De Ig di Yesus pai sut pima ne Nonti ningut ri. 22Yesus kiju hanyen leu nimai eisi ug api yo di igya kui Noni ingon huk niti tut gi pai sut Nonti ningut. Leu api ingon jo kep Allah nihyet bokti kin Yesus nihyet di tibim ei nuhui him cem.
Yesus kan bidem tut mun di jo ei tungwatu nya ingonti hagom
23Tirigi Yesus sisip ningat rin ei minu ndig Yerusalem mem Njap Ndig Paskah lene tungwatu nya imang bibor ingon jo kep Noni lewo ingat mindur di Noni bibon nya bou igyai him. 24Noro Yesus kan bidem tut tungwatu nya yahagom ingonti. Gima rino Noni ba ningon com yok bi. 25Noni suar tungwa hi bipai sut tungwatu nya ingonti biNoni bi lewo Nonti kan bidem tut mun di jo ei yahagom ingonti.
Pašlaik izvēlēts:
YOHANES 2: HAD
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties