Genesisi 2
2
1Zinghaho a tilo ni misava zi lo mahiwa, ni zilo zontlhe zi nga ka zona.
2Hi siku ga wuntlhanu ni mambiri Nungungulu i wa gumesile mitiro yontlhe leyi a nga wa yi mahile: i lo humula hi siku ga wuntlhanu ni mambiri mitirweni yakwe yontlhe leyi a nga yi mahile. Ekso. 20:11; Maheb. 4:4
3Nungungulu i lo katekisa a siku ga wuntlhanu ni mambiri, a gi basisa; hakuva hi ka gona Nungungulu i lo humula mitirweni yakwe yontlhe a nga yi vanga hi ku tira.
A kuvangiwa ka munhu ni kungaingisi kakwe.
4Leti hi timhaka ta kuvangiwa ka tilo ni misava, lezi zi vangilweko a sikwini lego Jehova Nungungulu a nga maha a misava ni tilo.
5Ku wa nga se kuva kona a zimilwa za khwati misaveni, hambu ni khubyanyi gontlhe ga khwati gi wa nga se nga mila, hakuva Jehova Nungungulu i wa nga se nga nisa vula laha misaveni, ku wa nga se kuva kona a munhu wa ku rima misava,
6kanilezi ku wa huma a mbhera yi tsakamisa a misava yontlhe.
7Jehova Nungungulu i lo wumba munhu hi tshuri wa misava, ni ku mu pupuxela lomu tinhovini a muhefemulo wa kuhanya, ni munhu i lo maha xiwumbiwa xi hanyako. 1 Kor. 15:45, 47
8Jehova Nungungulu i lo byala a simu hi le Mutsuwuka-gambo lomu Edeni, i lo veka kona a munhu loyi a mu mahileko.
9Jehova Nungungulu i lo milisa laha misaveni tontlhe tisinya ti sasekileko kucuwukekeni, na ti sasekile ku giwa; ni sinya ya wutomi xikari ka simu, ni sinya ya ku tiva kusaseka ni kubiha.
10Ku lo huma a congo hi le Edeni wu tsakamisa a simu; kwalomo wu lo panza mune wa micongo.
11A vito ga wo sangula hi Pixoni; hi wona wu renzelekako a tiko gontlhe ga Havila, laha ku nga ni nzalama.
12A nzalama ya tiko lego yi sasekile; ku kona ni bedeliu ni ribye ga xohama.
13A vito ga congo wa wumbiri hi Gihoni; hi walowu wu renzetekelako a tiko gontlhe ga Khuxe.
14A vito ga congo wa wunharu hi Hedekeli: hi wona lowu wu khulungelako a Mutsuwuka-gambo wa Assiria. A congo wa wumune hi Eufrate.
15Na Jehova Nungungulu i lo teka munhu a mu veka sinwini ga Edeni, kasi ku gi rima ni ku gi gongola.
16Jehova Nungungulu i lo laya munhu, aku: U ngaga tontlhelele tisinya ti nga lomu sinwini hi matsenya;
17kanilezi a sinya ya ku tiva kusaseka ni kubiha u nga yigi; hakuva a siku lego u ta nga yiga, u tafa.
18Na Jehova Nungungulu aku ngalo: A zi saseki lezaku a wanuna a tshama yece; nzi ta mu mahela a muvuni wo kota yena.
19Jehova Nungungulu i lo wumba hi misava zontlhe a zihari za khwati, ni tinyanyani ta tilo; i lo zi yisa ka munhu kasi a wona lezaku i ta zi chulisa kuyini mavito ya zona, zonake a mavito wontihe lawo a munhu a nga ma chula ka zivangwa zontlhelele, walawo ma lova mavito ya zona.
20Zonake a munhu i lo chula zifuyo zontlhelele a mavito ya zona, ni tinyanyani tontlhelele ta tilo, ni zihari zontlhelele za khwati. Kanilezi Adamu i wa nga se nga vangelwa muvuni wo fana na yena.
21Na Jehova Nungungulu i lo neha ka wanuna a wurongo ga tshongotshongo; ni laha a nga etlela, i lo susa a linwe la timbambu takwe, i lo tlhelisela a nyama wutshanweni ga yona.
22Hi limbambu lelo Jehova Nungungulu a li tekileko ka munhu, i lo maha wasati a mu neha ka wanuna. 1 Kor. 11:8; 1 Tim. 2:13
23Ni wanuna aku ngalo: Loyi hi rambu ga marambu ya mina, ni nyama ya nyama ya mina; i ta vitanwa ku ngalo wasati, hakuva i tekilwe ka wanuna.
24Hikwalaho a wanuna i ta siya a raru wakwe ni nyine wakwe a namarela ka sati wakwe; vona va tava nyama yinwe. Mat. 19:5; Efe. 5:31
25Na vona vambiri va wa nga ambalangi nchumu, a wanuna ni sati wakwe, kanilezi va wa nga hi na tingana.
Pašlaik izvēlēts:
Genesisi 2: TSC72
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Tshwa Bible © Bible Society in Mozambique, 1972, 2007.