Genesisi 1
1
A kuvangiwa ka misava.
1A kusanguleni Nungungulu i lo vanga tilo ni misava.
2A misava yi wa nga hi na xiwumbeko, yi nga hi na nchumu; a munyama wu wa hi hehla ka kueta ka bimbi, ni Moya wa Nungungulu wu wa tshama hehla ka mati.
3Nungungulu aku: A kuve kona kuwonekela: kuwonekela ku lova kona. 2 Kor. 4:6
4Nungungulu i lo wona kuwonekela lezaku ku sasekile; Nungungulu i lo hambanyisa kuwonekela ni munyama.
5Nungungulu i lo chula kuwonekela ku i Hlikanhi, a chula munyama ku Wusiku. Zonake kuva kona kubiwa ni kuca, kuva siku go sangula.
6Nungungulu aku: A kuve kona a pfhuka xikari ka mati, wa ku hambanyisa a mati ni mati. Jer. 10:12; 51:15
7Nungungulu i lo wu vanga pfhuka, a hambanyisa a mati ya laha hasi ka pfhuka ni mati ya le hehla ka pfhuka; ku lova lezo.
8Nungungulu i lo chula pfhuka ku i Tilo. A kuhlwa ni kuca ku lova siku ga wumbiri.
9Nungungulu aku: A ma tsombane wutshamu ginwe a mati laya ma nga lahasi ka tilo, ku woneka muhanza wu omileko; ku lova lezo.
10Nungungulu i lo chula muhanza wu omileko ku Misava. A kutsombana ka mamati i lo ku chula ku i Bimbi. Nungungulu i lo wona lezaku ku sasekile.
11Nungungulu aku ngalo: A misava a yi humese a byanyi ni matsawu lawa ma pswalako mbewu, ni tisinya ti pswalako mihanzu leyi yi nga ni mbewu ya yona, hi tixaka ta tona laha misaveni. Ku lo mahisa lezo.
12A misava yi lo humesa byanyi, ni matsawu lawa ma pswalako mbewu hi tixaka ta wona, ni tisinya leti ti pswalako mihanzu leyi yi nga ni mbewu nzeni ka yona, hi tixaka ta tona. Nungungulu i lo wona lezaku ku sasekile.
13Zonake gi lohlwa, gica, kuva siku ga wunharu.
14Nungungulu i te ngalo: A kuve kona a ziwoningo mbhinganweni wa tilo, zi hambanyisa hlikanhi ni wusiku, ziva zikombiso za tinguva, ni masiku, ni malembe;
15zive ziwoningo a mbhinganweni wa tilo, zi woningela misaveni: ku lova lezo.
16Nungungulu i lo vanga a ziwoningo zimbiri za hombe; a xiwoningo xa hombe ku fumela hlikanhi, ni xiwoningo xi tsongwani ku fumela wusiku: i lo vanga ni tinyeleti.
17Nungungulu i lo zi yimisa mbhinganweni wa tilo, kasi zi woningela misaveni.
18Zi fumela a mumu ni wusiku, zi hambanyisa kuwonekela ni munyama: Nungungulu i lo wona lezaku zi sasekile.
19Gi lohlwa, gica, kuva siku ga wumune.
20Nungungulu i te ngalo: A mati a ma phandlule a zivangwa lezi zi hanyako, ni tinyanyani a ti purume hehla ka misava, mbhinganweni wa tilo.
21Nungungulu i lo maha vanghuzulume va zihari za bimbi, ni zontlhe zilo lezi zi hanyako, zi teleko matini hi tixaka ta zona, ni tinyanyani tontlhe ti nga ni tipapa, hi tixaka ta tona; Nungungulu i lo wona lezaku zi wa sasekile.
22Nungungulu i lo zi katekisa, aku: Pswalani, mu anza: mu tatisa a mati ya bimbi, ni tinyanyani a ti anze misaveni.
23Gi lohlwa, gica, kuva siku ga wuntlhanu.
24Nungungulu aku ngalo: A misava a yi humese a zivangwa lezi zi hanyako hi tixaka ta zona, a zifuyo hi tixaka ta zona, ni lezi zi kokakokako, ni zivanza za misava hi tixaka ta zona; zi lo mahisa lezo.
25Nungungulu i lo maha a zivangwa za khwati hi tixaka ta zona, ni zifuyo hi tixaka ta zona, ni lezi zi kokakokako misaveni hi tixaka ta zona: Nungungulu i lo wona lezaku zi sasekile.
26Nungungulu i te ngalo: A hi vangeni munhu hi mufananiso wa hina, i ta fanana na hina; i ta fumela zidluwani za bimbi, ni tinyanyani ta tilo, ni zifuyo, ni misava yontlhe, ni zikokakoka zontlhe zi fambako misaveni. Tis. 8:6; Maheb. 2:7
27Nungungulu i lo vanga munhu hi mufananiso wakwe; a mu vanga a fanana na Nungungulu; a vanga wanuna ni wasati.
28Nungungulu i lo va katekisa, ni ku va laya, aku: Pswalani, mu anza, mu tata misava, mu yi fumela; mu fumela ni zidluwani za bimbi, ni tinyanyani ta tilo, ni zontlhe zi hanyako, zi fambako misaveni.
29Nungungulu aku ngalo: Langutani, nzi mu nyikile matsawu wontihe ina humesako mbewu, lawa ma nga misaveni yontlhe, ni tisinya tontlhelele ti nga ni mihanzu yi nga ni timbewu, ziva kuga ka nwina.
30Ka zihari zontlhelele za misava, ni tinyanyani ta tilo, ni ka zilo zontlhe zi kokakokako laha misaveni, lezi zi nga ni muhefemulo lowu wu hanyako, nzi zi nyikile a khubyanyi gontlhelele go nyuka, giva kuga ka zona; zi lo mahisa lezo.
31Nungungulu i lo wona zontlhe a nga maha; languta, zi wa sasekile nguvu. Gi lohlwa, gica, kuva siku ga wuntlhanu ni ginwe.
Pašlaik izvēlēts:
Genesisi 1: TSC72
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Tshwa Bible © Bible Society in Mozambique, 1972, 2007.